1, 2. (a) Da nga “nyenye Bakindo,” na tipagine rẽ gi rimo re arẽ ti ni tipa ko? (Oni bi gu sura du ti tonatonaha.) (b) Ginipai du tipa ga Yekova zogarago nagbe rani koyo du ko ni?

SOBHUZA GU UE KO nangia Bakindo gu ringara nga Swaziland azogorago tipa agarã wa 61. Bakindo ho nazogarago berewe wa gure te. Ka si vura du nga Bakindo Sobhuza azogorago ni gbangaha, kura Bakindo kinaho nazogarago kisusi awiri aboro. Ziazia Kekeapai nayamba ko nga “nyenye Bakindo.” (1 Tim. 1:17) Bake papara Atambuahe aini gi Bakerepa Bakindo re ti rimoko, na ki ya: “Yekova nga bakindo nye anye kindi.”—Tam. 10:16.

² Bagizo ga Yekova zogarago nasa gako zogarago si du kia ti ga aboro. Ono tie, gu gene Yekova azogarago ngbaha nagbe rani koyo du ko ni. Gu Bakindo naazogo aYisaraere tipa agarã 40 atambua Mbori na agu afugo nga: “Yekova du na nunga aboro na inapai a, aipo nga na zinga ya, ki du na weneringise kpaima. Yekova anyakasi gako mbatabakindo rogo angbangbaturũ yo, gako ngbi nazoga aboro dunduko.” (Tam. 103:8, 19) Yekova nga gaani Bakindo gbua te, ono ko nga gu Barani nakpinyemu rani. Gipai re nakusa asanahe ue nga: Gini gene Yekova amangapai ngbaha wa Baagude? Naatona ti gu regbo samungu amangi ati Edene yo, waigu Yekova ayugu padu ko ni Bakindo? Agu akaragapai du kuti agi asanahe re  nika sarani ani mbedi na Yekova na kini irisiko na ngbadurani yo dũ.

3. Da Yekova akusi ní mbata, na ada i akusiyo berewe ni “awiri” Mbori?

³ Nairiwo gu ngbarago Yekova adu na ni ho ko akusi bangisa Wiriko ni! Mbori aabingo bambata wiriko na pako kusende te. Kuba gure, ko akpinyemu ko na i ki kusi badungu akutu amaraika na ko sa. (Koro. 1:15-17) Ziazia Kekeapai naya agi amaraika re na mangasunge fu Yekova na ngbarago na ni gu “gako amoyambu namanga gu pai ngba ti ko.” Ko nairiso yo na kini yambu yo nga ‘awiriko.’ I nga ga Yekova kusikusiahe.—Tam. 103:20-22; Eyo. 38:7.

4. Gini regbo aboro ada ni kodikodi yo na amaraika ti ni?

⁴ Fuo Yekova kusi ngbangbaturũ na kpotosende, ko akusi aboro tipa i du ni kodikodi yo na maraika. Fuo kusa ko kpotosende ni bawene, ko akusi bambata kumba nangia Adamu ni kpiako. (Bam. P. 1:26-28) Yekova aaida Adamu ni gisangbako. Yekova afu arugute fuko rogo nyemuse na ngba wene gene wakina gu baagude du na nyemuse. Agi arugute re akánga na ranirii be aboro te.—Oni gedi Bambata Pai 2:15-17.

5. Gini mbakadapai Mbori amangihe tipa aboro hiisi kpotosende?

⁵ Yekova amanganga gako amoyambu wa agu abazogo nga awiri aboro te, ko na ngbarago tipa ka fu asunge fuyo na kini kido kuti yo wa gako aborokporo. Ni kpiapai, ko afu pagbia fu Adamu ko ni ngerekurii gu kusikusiahe du na unga rogoho, na ki ya fuko ko yambu rimo kurii anya. (Bam. P. 1:26; 2:19, 20) Yekova aakusanga amirioni aboro zanga ingapai tiyo tipa i hiisi kpotosende te. Kuba gure, ko adiberã ka kusa wene moundo fu Adamu nangia Eva. (Bam. P. 2:21, 22) Fuoho, ko afu momu fu agu arogotise re nga i hiisi kpotosende na awiriyo. Ka aboro atona ka zugo na ki hiisi kpotosende, zegino naabaha ki da ni Paradizo na kini irisi Yekova ni kodikodi yo na amaraika wa aborokporo sa. Nairiwo gu bawenepai kangiaha re! Na nairiwo gu nyemuse Yekova ayuguhe re!

6. (a) Waigu samungu atona dagba ga Mbori aborokporo? (b) Tipagine gu samungu re aayugongo gupai ti ni nga Yekova na pagbia berewe te te?

⁶ Si nafu kina gberarago nga, Adamu na Eva aaidanga Yekova du ni gayo Bakere Bakindo te. Kuba gure, i diberã ka pefuo gu wiri Mbori nasamungu nga Satana. (Bam. P. 3:1-6) Pa zanga yo raka kutii ga Mbori pagbia aye na ima, rungo, na kpio fuyo gbiati awiriyo. (Bam. P. 3:16-19; Rom. 5:12) Mbori aadunga na ruru aboro beko auru kpotosende berewe te. Ya mo gere aayugo gupai nga ko aadunga na pagbia berewe kurii kpotosende na agu aboro naaraka rogoho te? Oó! Ko amangisunge na gako pagbia ki do Adamu na Eva kusayo Ati Edene yo, na ki ká nayo ka i karaganga tiyo koyo ya, na ki moi akeruba i bandaha. (Bam. P. 3:23, 24) Ti kina gu bangisa regbo re, ko ayugu gako nyemuse na ki kidohe nga ko duwa ka ko digisi gu gako ringbisapai naadu tipa ka koda gu gako aborokporo nga amaraika na aboro. Ko akidohe nga boro kinaho nika ye ka nyasa riipa Satana na ki di surungba ga Adamu aingapai kusayo.—Oni gedi Bambata Pai 3:15.

7, 8. (a) Waigu zegino agberẽ ti rago Noa? (b) Ginipai Yekova amangihe tipa ka giriso zegino na ki banda aboro?

⁷ Rogo agu akama agarã nangbefuo  gure, bete aboro adiberã ka du ni ruru yo fu Yekova. Ebere na Enoka adu dagba agu aboro re. Ono tie, badungu aboro asogo Yekova ka ko dunga ni bayo na ni gayo Bakindo ya. Ti regbo Noa, kpotosende aima “hi be bakere zuu.” (Bam. P. 6:11) Ya mo gipai re aayugo gupai nga Yekova na ome berewe kurii agu apai naadu auru kpotosende te? Ginipai Ziazia Kekeapai apehe?

⁸ Mo bingo gu pangbanga du tipa Noa. Yekova afu arugute fuko tipa wai si aaida ko mbakadi bakiki kurungba tipa ka batasa tiko na gako aborokporo. Mbori ayugu bakere nyemuse fu aboro ho ko aya ni fu Noa ko du ni “batungusi rurupai.” (2 Pet. 2:5) Gako pangbanga akodipa saberã na zahe tipa gu gbarasahe naaye, ono aboro aagianga ha te. Noa na gako aborokporo araki rogo gu zegino naadu na bakere zuu na wasiwasi mangaapai tipa dungu agarã. Wa du Yekova nga wene baagude, ko abanda gu ruru aboro naadu muambe re na ki fu maku fuyo. Paye Yekova na Ime Akangbii ayugu gupai nga ko adu na ome kurii agu aboro gbiati gu gbegberẽ amaraika nasamungu kutiko. Nirengo, Yekova aima du na pagbia beko.—Bam. P. 7:17-24.

9. Gini momu Yekova afuhe fu aboro fuo Ime Akangbii?

⁹ Fuo Noa na gako aborokporo kuru kurungba yo, si nawira wa i aima du na bakere tambuahe tipa wai Yekova angerefuo yo na ki banda yo. Noa ame bamotumo na ki fu motumo ka iriso Yekova. Mbori afu maku fuko na gako aborokporo na ki ya fuyo “oni zuga ki ninge ange, ki hiisi kpotosende.” (Bam. P. 8:20–9:1) Aboro adu na momu beyo berewe ka kodatiyo rogo irisombori na ki hiisi kpotosende.

10. (a) Wari samungu akuru ni berewe kuti Yekova fuo Ime Akangbii, na wai si amangi? (b) Ginipai Yekova amangihe tipa gako ringbisapai mangi?

¹⁰ Ono tie, Ime Akangbii aadianga ingaapai kusayo ti aboro te, na i aahi gu gbegberẽ mangaapai nga ga Satana na gako amaraika kindi. Si aimanga te, gu kura aboro ki samungu berewe kuti ga Yekova zogarago. Ni kpiapai, gu kura tita Noa nangia Nimeroda asamungu kuti ga Yekova pagbia ngba gu kura gene kia. Nimeroda angia “nyanyaki bamangianya ni boro sogote kuti Yekova.” (NW) Ko adua bakere gbata wa Babera na ki moi tiko ni gaha Bakindo “rogo gu ringara nga Sinara.” (Bam. P. 10:8-12) Ginipai ka nyenye Bakindo amangi gi bakindo nasamungu kuti gu gako ringbisapai nangia aboro “hiisi kpotosende” re? Mbori avundu fugo aboro, ki sa gupai nga ga Nimeroda aboro zingi na ki gbandaka “ku auru kpotosende dunduko.” I aambunga gu ziree irisombori i anaamangaha na gu gbegberẽ sino zogarago nangia ga aboro te.—Bam. P. 11:1-9.

11. Waigu Yekova adu ni ruruko fu gu bakureako nangia Abarayama?

¹¹ Wa si avura du nga dungu aboro anaairiso ziree ambori fuo Ime Akangbii, bete ruru aboro adu kinaho naairiso Yekova kindi. Guni sa dagbayo angia Abarayama naambu gu bawene kpuko naadu rogo gu gbata nangia Ura kaa raka rogo bamburoko tipa dungu agarã. (Bam. P. 11:31; Eb. 11:8, 9) Ti agu aregbo Abarayama anaata kuari re, ko anaaraka dagba gu kere aBakindo naadu na angapa pati gayo agbata. Ono Yekova aima banda Abarayama na gako aborokporo. Nibipa ga Yekova bandahe, bake  papara Atambuahe aya: “[Mbori] aida nga fu boro ni mangi yo gbegberẽ wa sa te; ko aza abakindo tipa yo.” (Tam. 105:13, 14) Mbiko wa Yekova adu ni ruru ko fu bakureako nangia Abarayama, ko akido ko nga: ‘Abakindo akura rogo ro yo.’—Bam. P. 17:6; Yak. 2:23.

12. Waigu Yekova ayugu gako pagbia kurii Ezipeta, na waigu si aundo gako aboro?

¹² Mbori ape kina gu bangisapai re fu wiri Abarayama nangia Yisaka na titako nangia Yakobo nga ko nika fu maku fuyo, nga gu naakoda pa kura abakindo dagba atita yo. (Bam. P. 26:3-5; 35:11) Ono tie, mbata fu agu abakindo re kuru, atita Yakobo ada ni akanga Ezipeta yo. Ya mo gipai re aayugo gupai nga Yekova adigisongo gako ringbisapai watadu ko aadunga na pagbia berewe kurii kpotosende te? Oó! Ho regbo ada ni be Yekova, ko ayugu gako ome na gako bakere pagbia fu gu keretukeretu boro nangia Faro. AYisaraere akido kuti Yekova mbiko ko abatasi yo be ngba iriwo gene Zamba Baime. Si tie ziazia nga, Yekova adu kindi nga Bakindo Zegino dunduko, na wa du ko nga gu baagude nangerafuo awirini, ko amangisunge na gako ome ka banda gako aboro.—Oni gedi Gate 14:13, 14.

13, 14. (a) Ginipai aYisaraere apepaha rogo gayo bia tipa ga Yekova zogarago? (b) Gini kidohe Mbori amangihe fu Davide nibipa zogarago?

¹³ Fuo bata aYisaraere be sunge kanga Ezipeta yo ngba iriwo gene, i abi bia tambuahe fu Yekova. Gu bia re ni kekehe rogo Gate kapita 15, na veresi 18 naya: “Yekova azóga rago nye anye kindi.” Nirengo, Yekova ada ni Bakindo kurii gu vovo rikaaboro re. (Pa Rug. 33:5) Ono tie, agi aboro re aaida nakura Bazogo kia ti Yekova. Fuo agarã wa 400 fuo kura yo Ezipeta yo, i asana Mbori ko moi bakindo kurii yo i du wakina agu apagano naadu patiyo. (1 Sam. 8:5) Wa si avura du wo, Yekova adu kindi nga Bakindo, na gipai re ayugutihe ti regbo gu zogarago nangia ga Davide nangia ga aYisaraere ue Bakindo.

¹⁴ Davide aye na sanduki mokido ku Yerusarema yo. Ti regbo gi uru ngbarago re, aRevi abi bia tambuahe naadu na nyanyakipa afugo rogoho du rogo 1 Pekapai  16:31, naya: “I yá dagba arikaaboro yo, ‘Yekova nazoga rago!’” Yekova nazogarago rogo gu gene nga ko namangasunge na gako pagbia watadu ko namaa boro tipa ní ru kubako tipa ka manga gu kurapai. Pa gia ani tirani na pa wai Yekova ada ni Bakindo na nyanyakipa ha gbe. Mbata fu Davide kpi, Yekova akido ko nga gako zogarago nika nyeanye kindi ki ya: “Mi amáa wiro fuo ro nga gu ko enge ti kina ro, ki nyakasi gako ngbi.” (2 Sam. 7:12, 13) Gi kidohe re ada ti rengo ho tita Davide akuru ni fuo agarã naima susa 1,000 kusa. Da nangia gu boro re, na gini regbo ka ko ada ti ni ni Bakindo?

15, 16. Gini regbo Mbori ambedi Yesu ti ni na ziazia toro tipa ko da ni Bakindo ku mbatayo, na gini mbakadapai Yesu amangihe tipa gako zogarago?

¹⁵ Rogo gu garã nangia 29 Fuo Batikayo Kristo, Yoane Bafu Bapatiza atona tungusapai nga “gu ngbi nga ga ngbangbaturũ si nambeda.” (Mt. 3:2) Ho Yoane abapatiza Yesu ni, Yekova ambedi Yesu na ziazia toro ko da ni gu Masiya i akido pako na ni Bakindo gako Kindo ku mbatayo. Yekova ayugu gako nyemuse tipa Yesu na agu afugo nga: “Wire du re, nyemuko namanga re, ngba ko ti re gbe.”—Mt. 3:17.

¹⁶ Rogo ga Yesu tungusapai nabaha, ko anaataasarimo Bako. (Yo. 17:4) Ko amangi gipai re ni tungusa ko pa ga Mbori Kindo. (Rk. 4:43) Ko ayugupai a fu apefuoko i kpari tipa gu Kindo re ye. (Mt. 6:10) Wa Yesu angia gu Bakindo Mbori asiako, ko aya fu asogoko wẽ: “Ga Mbori ngbi du kpotoroni yo,” du rogoyo nga dagbayo yo. (Rk. 17:21) Kusa, rogo gu nyemu naadu mbata fu kpioko, ko amangi mozunga na apefuoko tipa Kindo. Ko afu maabangirise fu bete gako ruru abawiriki nga i nika du na ko ni abakindo rogo ga Mbori Kindo.—Oni gedi Ruka 22:28-30.

17. Ngba gini gene Yesu atona zogarago rogo bambata sa kama agarã ngaha, ono ginipai si aaida ko pidihe?

¹⁷ Gini regbo ka Yesu atona zogarago ni Bakindo ga Mbori Kindo ti ni? Ko aatonanga ha nibasa ti gu regbo re te. I aimiko rogo gu kura girorago fuo bebere uru na apefuoko ki gbandaka. (Yo. 16:32) Ono tie, a wa si adumbata, Yekova adu kindi na pagbia beko. Ko azingisi Yesu rogo biata uru, na ti rago Pendekote 33, Yesu atona zogarago kurii gu dungurati nangia ga aKristano. (Koro. 1:13) Ono, si aidi ko sungu ka pido gu regbo ko nika du na ome ni Bakindo kurii kpotosende dunduko. Yekova aya fu wiriko wẽ: “Mo súngu ku kumbabere, daho mi ka sa avuraro ni ni gbada nduro.”—Tam. 110:1.

18, 19. Ginipai si aida ani mangihe, na ginipai ani nika wirikaha rogo gu kekeapai ngbefuo gere?

¹⁸ Tipa akutu agarã, amaraika na aboro asamungu kuti ga Yekova zogarago. Ono Yekova anye kindi na pagbia beko. Wa du ko nga gu baagude nakpinyemu awirini, ko abanda gako ruru amoyambu nangia Noa, Abarayama na Davide na ki ngerefuo yo. Ya mo gipai re afõnga rani ani ra fu gaani Bakindo na ki mbedi na ko.

¹⁹ Ono ani ima rengba ka sanahe nga: Waigu Yekova nada ni Bakindo ti gaani regbo? Waigu rengbe ani ka nye ni ruru rani fu ga Yekova Kindo na ki koditirani na amaraika wa aborokporo sa? Ho ani akpara ni tipa ga Mbori Kindo ye, rogoyo nga gine? Gu kekeapai ngbefuo gere nika karagapai kuti agi asanahe re.