Ya mo oni rengbe ka tingidapa gu uru oni abatika wironi ti ni? Nirengo, rago aima ngba tironi tipa kadu na gude beroni. Ono tipa Carlo na Mia, gayo ngbarago asatihe nigberãrago ho i ape gupai ni fuyo nga wiriyo nawoka awoka watadu u ima gbarã.

Ya mo gude beroni du nigbarigbari ru? Sidu, oni ima rengba ka bakabangironi singia oni adu na diabese. Kangia wo duhe, ka oni gundenga ya. Kura avunguagude kinaho wa oni niima sovura kuti ngbatungapai wa gure na ki dibehe. Oni kparianga agu akpakarapai biata rengbe oni ka gbiatironi nani na ki bingo wai rengbe gu tatamana du rogo Ziazia Kekeapai ka undo roni.

Dungu avunguagude rago naangbanga tiyo ya ka bi gupai nga wiriyo nawoka. Nagude sa du Mexico  yo nga Juliana ayaa, “Ho munganga ape gupai ni fere nga, rurupai ri Santiago yo te, mi aidanga kutini te. Mi aduna bakere gberarago.” Si rengbe kadu tipa gu kura aboro wagu si adu tipa gu nagude du Itaria yo nga Villana naaya, “Mi aima kpinyemu vungu wa vura duhe vurũ nga dungu akpakarapai nagbia agu adee du garãyo wa gimi. Ho mi naabi wire ni na gu kaza naasako ko gbari, mi naabihe nga gimi ingahe du.”

Kangia oni nabihe nga gene beroni te watadu gaoni ingahe du, kinawo duhe tipa aboro dunduko. Mbori aakusanga aboro i niwoki te. (Bambata Pai 1:27, 28) Ko aakusanga avunguagude nga i niidi kuti gu gbegberẽ apai namanga awiriyo te. Nirengo, oni ima rengba kadu na gberarago ho wironi agbarã ni. Si rengbe ka dia regbo adia tipa bangironi go ti gupai re, na oni idihe nga wodu da gaoni raka re.

Ginipai rengbe ka manga ka si du nga oni nabihe nga mburu pa gbarã wironi ye kina beroni? Oni tingidi gupai nga, boro ho rengbe ka rugatini naapa agu akaza aboro adiaha ti avunguyo, dagbarago, na gu kurapai nagbarasapa kpoto gude te. Ono tipa gu kura aboro, i rengbe ka bira gayo badiarogatise. Ka oni mangingo pai wo ya. Si adu furoni niwenepai ka oni agia tironi wenengai na gaoni badiarogatise na ki nimoiberã roni tipa ngerafuo wironi.—Batungusipai 4:9, 10.

BERÃPAI: Oni asadi ka ino gupai namanga wironi. Ziazia Kekeapai nayaa, “Boro nidua bambu be tatamana, ni ki nyakasi he be rugatinapai.”—Asanza 24:3.

Oni ima rengba ka wirika dungu apai be amunganga watadu agu awaraga nafura tipa gu kaza re. Oni rengbe ka ringbisa gupai namanga wironi re kuti manga ome tipa ka ino vovo fugo wenengai. Si ima rengba ka mbu ti tonatonaha, ono oni rengbe arengba ka wirikaha.

Carlo na Mia fugoyo nidu ti tonatona gi kekeapai re, i agbata undo be munganga gbiati gu riigbu naangerafuo wiriyo. Sangbayo nga, “Gipai re aundongo rani ani rugutirani na kina agu akpakarapai rengbe ani ka gbiatirani nani sa te, ono ani du a na wene bipai tipa gako kaza. Ani abihe nga wirani rengbe arengba ka raka gu raka du niwenehe. Gipai re angarasi rani nibakerehe.”

Oni rengbe ka bihe nga ngerafuo wironi nanyasa omeroni anyasa. Nagude nga Jenney du New Zealand ayaa, “Tipa bete agarã fuo gbarã wire, mi anidu na mbugo na kini kpari ti agu aregbo dunduko mi aniˈasadi ka mangasunge kporo.”

Gu kura kpakarapai rengbe kadu nga oni nabi tironi nga oni nisaroni dedede. Ben wiriko awoka be gu kaza narungburasi gbaga boro na gu kura akaza ayaa, “Dungu aboro arengbanga ka rugatiyo na gupai nzunzu namanga rani te.” Oni ima rengba ka kpinyemu ka pe gupai nambusa wironi fu boro. Ono dungu abakurearoni na awiriyo na wene kpotora. Sidu, oni ima rengba ka gunde ti pe oni agu apai du tipa roni fuyo.

BERÃPAI: Oni sanahe asana tipa undo. Na ka boro undo roni oni ki dihe adia kugume. Juliana fugori nidu kuari ayaa, “Ti kura aregbo, zee namanga rani amanga na kumbaami tipa ka sanahe tipa undo.” Ri ape kurapai nga: “Gupai bi ani he nga ani naida na gu undo nga ga kura aboro. Ho aboro aundo rani ni ani nidu na ngbarago.” Kangia wene bakurearoni watadu gumeroni naida ka dia gude beroni ho du oni ni dagba aboro watadu ti regbo dunguratise, oni idihe aida funi. Ziazia Kekeapai nayaa: “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.”—Asanza 17:17.

Oni ngerefuo kpotoroni. A wa si niidi i nikusuko benzimi akusuko kindi kurogo gu tarambiri ninaatinda aboro kaza ku bambungua yo tipa si nitindi yó atinda kindi, kinawo a rengbe wene riahe, mangonvo, gbiati ongoda ka sa roni oni du na ome tipa ka ngerafuo wironi. Javier du wiriko nigbarigbari ru ayaa: “Wire atanga te, mi naabihe nga si naida mi mangi ome ka rihe wenengai mbiko mi du nga nduko.”

Wai rengbe oni ka gbia regbo tipa ka ngerafuo kpotoroni? Gu kura avunguagude namangaha nga guni naata ngerafuo gude gu kurani kini ongodi watadu kini mangi gu kurapai kia. Si aidanga oni gbarasi regbo kuti agu apai adunga sunge ti ni ya te, mbiko si rengbe kadu nikpakarapai tipa ngerafuo gude na fuo tironi a. A wa nagude sa apehe India yo nga Mayuri, “Niyangaraha, si nada nisino ro.”

Oni pe gupai namanga roni fu wene abakurearoni. Zavura agu abakurearoni adunga agude beyo ya, i rengbe  arengba ka fu wasa furoni. Oni kpari fu Yekova Mbori a tipaha. Ya mo kparakpee rengbe ka undo nzunzu? Yazmin du na agude beri ue nigbarigbari ra ayaa: “Aregbo kinaho mi anaabi tire nga mi ima mbeda ka kpi.” Ono wa si avura du wo, ri ayaa, “Mi akpari fu Yekova tipa undo gbiati ome. Fuani, mi ki bi tire nga ome kina tire.”—Atambuahe 145:18.

Ho gude awoka ni, si ima rengba ka manga ariapai na gu riahe aborokporo arihe, gu ba si aida i ndu kurogoho, na gu regbo si aida i nidihe na agude nibasasa. Nisangbana gipai re, kura agude rengbe ka bihe nga i aberãnga payo te. Kurigure, ga avunguagude ramukporo rengbe ka gberã mbiko i nadia bakere regbo kina kuti ngerafuo wiriyo. Lionel du Liberia yo ayaa, “Ti kura aregbo, diare naape gupai nga ri nangerafuo gude nibakerehe ono mi namangaha nikina betehe. Mi naabi tire wa ri airisanga re te, na ti kura aregbo, mi anaakaragapai furi nikina gbegberẽhe.”

BERÃPAI: Tipa ka yugo gupai fu awironi nga oni nakpinyemuyo akpi, oni berẽpa manga agu apai rengbe ka sa ngbarago tiyo. Jenney fugori nidu kuari ayaa, “Ti kura aregbo, ani naamanga gupai rengbe ka sa ngbarago ti sosono wirani, wa ndu ka ri riahe rogo gu bambu baga riahe ngbatiko gbe.”

Tipa ka banda gaoni rogatise, oni fura na gaoni badiarogatise na ki kparikpee nani wa sa. Bagude nga Aseem du India yo wiriko awoka be imawirianya ayaa: “Wa vura duhe nga mi gbiati diare nidu ti kura aregbo na mbugo, gbiati gberarago, ani naasungo sa kini fura na kini kparikpee sa. Awiso dunduko mbata fu zinga awirani rameyo, ani naasungo sa tipa ka wisigo agu averesi du tipa aˈuru nibasasa.” Gu kura arogotise nasungu nisayo ka fura mbata fu i ti nirame. Gu wene fugodagbase du dagbaroni gbiati kparakpee nika nyakasa gaoni rogatise ti agu aregbo du oni nifudifudi roni. (Asanza 15:22) Arogotise sa ayaa, “gu regbo ani naatingida paha dedede rogo gaani ramukporo yo nga agu aregbo ani anidu rogo akpakarapai.”

Ziazia Kekeapai nakidohe nga barambeda, Mbori nika nyasa riipa agu akaza gbiati gu ngbaramoni nambusa rukutu agude na sosono aboro kusayo. (Yugoti 21:3, 4) Tigu regbo re, “a nga boro kporo sa ayá, ‘Mi nawoka’ te.” *—Yesaya 33:24.

Wadu rago re, oni rengbe arengba kadu na diabese wa vura duhe nga wironi nigbarigbari ru vurũ. Carlo na Mia ani nifura tipa yó mbata kuari ayaa, “Ka rago gberẽnga tironi ya ka si du nga apai andunga furoni wenengai te. Oni moiberã roni sa gu wene apai du tipa wironi mbiko dungu weneapai du tipa ru.”