1-3. (a) Tipagine du Yosua ti ni nigu boro namoi wene kpiapai furani nga ga siapai rogo raka yo? (b) Ginipai si aida ani moihe kurirani yo ho ani amanga adiaberã ni?

AGU asiapai ani amangaha na nyanyakipaha gbe. Si na ome kurii gu gene ani aida ka raka gaani raka ngbaha. Si teketeke wa ka boro andu ngba gu gene nandu ka kparaka kurogo yo ue. Ho ní adani rogo gu ba si akparaka rogoho, si naida ní mangi siapai tipa gu ní nika ndu ngbaha. Gu rengbe ní ka siaha nga gu mbedi kurogo gu ba ní andu kurogoho angianga gu nika turũso ní ti gu ba ní andu kurogoho ya.

² Ziazia Kekeapai na dungu akpiapai rogoho tipa agu aboro nagbiatiyo na ngbatunga agu asiapai re. Nikpiapai, Kaina aima du na siapai singia ka mangapai kuti gako zinga watadu ka ne mangapai kuti gako zinga. (Bam. P. 4:6, 7) Yosua adu na kina siapai beko, singia ka iriso ndikidi Mbori watadu kungbo ambori. (Yos. 24:15) Ga Yosua sásá angia ka nye mbembedi na Yekova, sidu, ko asia gu gene raka naandu naako sa gako sásá. Kaina aadunga na ngbatunga gu sásá re te, na ko asia gu gene naturũsi ko ti Yekova.

³ Tigu kura aregbo, si niidi ani mangi nyanyaki diaberã tipa ka nye ngba ruru gene. Ka si du nga si naida oni mangi diaberã, si naida oni banda gu gaoni sásá nga ka ye na taarimo fu Yekova rironi yo rogo agu apai yo dunduko oni amangaha na ki ne gupai rengbe ka turũso roni tiko. (Oni gedi AEbere 3:12.) Rogo gi kekeapai re na gu ngbe fuani, ani nika wisigo apai saba rogo raka yo si aidanga ani mbuhe si turũsi rani ti Yekova ya.

4. Tipagine duhe ti ni ninyanyakipa pai ka mangasunge?

⁴ Si ninyanyakipa pai fu aKristano i ngerefuo tiyo na gayo aborokporo. Ziazia Kekeapai naya ka boro angeranga  fuo gani aborokporo ya, ní gberẽ kisusi gu boro angianga idipase ya. (2 Tesa. 3:10; 1 Tim. 5:8) Nirengo, sunge marã nga papara ga boro raka, ono ka ani adunga na rubangirise ya, sunge marã gbiati gupai ani aberãpa mangaha rengbe arengba ka turũso rani ti Yekova. Rogo gini gene?

5. Gini nyanyakipa apai si aida ani wisigihe mbata fu ani idi na sunge?

⁵ Ani yanga oni nagbata sunge marã. Ka si du nga oni naraka rogo gu ba kpakara pa gbia sunge rogoho, oni ima rengba ka dia ai gu sunge ka i fuhe furoni. Ono ginipai ka mangi ka si du nga gu sunge re natagbagatihe na agu arugute nga ga Ziazia Kekeapai? Na ka si du nga gu sunge re nika dia bakere regbo beroni zanga mbu regbo furoni tipa gaoni aborokporo watadu agu apai nga ga toro? Ya mo oni dihe adia awo koyo na gu berã nga si ngba ti sungo zanga sunge? Oni tingidi gupai nga, ka oni sia iraira gene, si rengbe ka turũso roni ti Yekova. (Eb. 2:1) Singia oni nagbata sunge watadu oni nawisigopai tipa gu sunge du beroni awere, wai gu rengbe oni ka manga gu diaberã duna tatamana?

6, 7. (a) Gini asásá rengbe boro ka maaha nibipa sunge marã? (b) Gini sásá rengbe ka mbedisa roni na Yekova, na tipagine?

⁶ A wa ani nipehe kusayo, gaoni sásá du kina rironi yo. Oni sana tironi nga, ‘Ginipai mi aida sunge mangihe fere?’ Ka oni abi sunge niguhe rengbe ka undo roni na gaoni aborokporo kuti ngba ga Yekova sunge, Yekova nika fu maku afu kurii gaoni asadatise. (Mt. 6:33) Yekova ima ino wai ka undo roni ka si du nga sunge beroni te watadu oni rogo bakere zingo marã. (Yes. 59:1) Ko ima ino wai ka “batasa aidipambori be asada.”—2 Pet. 2:9.

⁷ Ono ginipai rengbe ka manga ka si du nga gaoni maabangirise nga kadu na kumuko? Isoke, oni ima rengba ka gbia aũkumuko. Ono tie, ka oni vura gbia agu ahe re agbia vurũ, si naida oni tingidi gupai nga oni duwa ka oni tumo tipa ka gbia agu “aũkumuko” re. (Oni gedi 1 Timoteo 6:9, 10.) Merafuo aũkumuko watadu agu apai oni aberãpa mangaha kumbatayo rengbe ka turũso roni ti Yekova.

8, 9. Ginipai si aida avunguagude wisigihe ho daha ni ti sunge marã? Oni sakingo rogoho yo.

⁸ Ka si du nga avunguagude nga oni, oni berẽkurii gu ome du gaoni kpiapai nani kurii awironi. Ginipai i abihe nga si nyakipaha tironi, sunge marã watadu gaoni pagume na Yekova? Ka i aabi gupai nga agu apai nyakipaha bangironi gbe nga padu oni na kikiipa roni, iriiripa sunge, na aũkumuko, ya mo i merẽnga kina fuo gu gbegberẽ kpiapai re te? Ya mo i zanganga fu iriso furoni wangia oni avunguyo te? Paranga degude sa ni Kristano ayaa: “Gupai mi atingidaha nga, buba nidu ti aregbo dunduko kina gene sunge yo. Ti tonatonaha, mi abihe nga ko namangasunge nyanyaki tipa ani raki wene raka. Ko aida ka ngerafuo rani wenengai. Ono agi agarã ninaandu re, apai aima ariatihe. Ko namangasunge nga pitipiti, ki mere kaa ngbeka kina agu ahe duna ginoho kuari nga gu adunga sunge tirani nani ya. Nisangbana gipai re, aboro nabi rani ni airakumuko angianga ni agu aboro nangarasa akurayo rogo toro yo ya. Mi aduadu na ngbarago ka si du nga buba tona ka manga ome tipa rani wenengai rogo toro yo kuba aũkumuko.”

⁹ Avunguagude, ka oni turũsingo tironi ti Yekova nifu oni tironi bakere gbe kina ku gene sunge marã yo ya. Oni yuguhe rogo gaoni kpiapai yo nga gu bakere ũkumuko rengbe oni ka gbiaha nga agu apai nga ga toro angianga aũzegino ya.—Mt. 5:3.

10. Ginipai si aida paranga boro berẽkuriihe ho ní aberãpa sunge ni?

¹⁰ Kangia paranga aboro nga oni naberãkurii pa gu sunge oni nika mangaha kumbatayo, wai gu rengbe oni ka manga wene  siapai? A wa ani nawisigipai tipaha, si naida oni ini gu ba oni andu kurogoho. Ya mo gupai oni awirikaha re na gu sunge oni ka mangaha ambu roni oni mangi agu apai nga ga Kindo wenengai watadu si nika turũso roni aturũso ti Yekova? (2 Tim. 4:10) Ya mo oni naida kadu wa agu aboro du rogo zegino du gayo mburu ngbarago rii gu bakere marã du beyo? Watadu oni aduna ngbatunga gu kido naadu ti Davide nga guko nayaa: “Mi adu mbata ni parangare, mi gbinza awere; ono mi ata bi nga ruru boro i nambu ni te, na ngbatungani i nio riahe a te”? (Tam. 37:25) Oni tingidi gupai nga, gene sa rengbe ka turũso roni ti Yekova, gu kuraha rengbe ka ndu na oni sa wene raka. (Oni gedi Asanza 10:22; Maraki 3:10.) Gini gene oni nika siaha? *

11. Ginipai Ziazia Kekeapai apehe tipa zambuasitise na aũngbarago, ono ginipai si aida ani moihe ku berãrani yo?

¹¹ Ziazia Kekeapai akanga na aboro ti agu ahe nafu ngbarago fuyo te, na si agumbanga gupai a nga zambuasitise watadu aũngbarago nga gbarasa regbo te. Pauro aya fu Timoteo wee: “Nyakasa borose nakiisa pai ni umba ha.” (1 Tim. 4:8) Ziazia Kekeapai naya “rago mongo” na “rago dogbere” kina ti ni, na si nangarasa aboro tipa i ongodi ti sunge. (Batu. 3:4; 4:6) Ono tie, ka oni adunga na rubangirise ya, agu ahe re ima rengba ka turũso roni ti Yekova. Rogo gini gene? Gu kerepai du tipa agi apai re naru kurii apai ue nga, gu ngbatungaha oni asiaha na gu bakio regbo oni adiaha kutini.

12. Gini apai si aida oni wisigihe nibipa gu ngbatunga zambuasitise na aũngbarago oni asiaha?

¹² Nibambatapai, ani wisigingo pai tipa ngbatungaha. Si naida oni ini gupai nga oni rengbe arengba ka gbia wene ngbatunga zambuasitise na aũngbarago. Nirengo, badungu aũngbarago areme nataasa kina pa agu ahe Mbori asogaha duwa zuũ, sangbaatoro, na wasiwasi kodaba. Sidu, si naida oni wisigi gu ngbatunga zambuasitise na aũngbarago oni asiaha. Gini sangbanaha duhe nani kurironi? Ya mo si nangarasa roni tipa zuũ, sino abaangira, watadu kiisopa ringara? (Snz. 3:31) Ya mo si nanyasa gu wiri marã du beroni dunduko?  Ya mo si rengbe kadu nimbia kota fu kura aboro? (Rom. 14:21) Gini ngbatunga aboro gu zambuasitise gbiati aũngbarago re akoda roni naayo? (Snz. 13:20) Ya mo si narimiso nyemu manga gbegberẽpai kurogo roni yo?—Yak. 1:14, 15.

13, 14. Ginipai si aida oni wisigihe nibipa gu regbo oni adiaha kuti aũngbarago?

¹³ Oni wisigi gu bakio regbo a oni adiaha kuti zambuasitise gbiati aũngbarago. Oni sana tironi nga, ‘Ya mo mi nadia bakere regbo ku genehe yo ka regbo adunga bere tipa agu apai nga ga toro ya?’ Ka oni sia ka dia bakere regbo kupati ni, oni nika bi gupai nga si angbanga tironi wagu ka oni nidi regbo kutini tooni te. Nirengo, agu aboro namaa aũngbarago rogo gaha bangiriba, i nagbia ngbarago bakere gbe. Tipagine? Mbiko i ima inoho nga i ima manga gupai nyanyakipaha gbe, sidu, sangbakpotoyo afudanga yó te.—Oni gedi AFiripoio 1:10, 11.

¹⁴ Wa vura duhe nga dia bakere regbo kuti agu ahe nasa ngbarago ti boro rengbe kadu bangiri boro niwenehe, si rengbe arengba ka turũso boro ti Yekova. Wirinarani nga Kim du garãri nga 20 aima wirika gipai re ngba kere gene. Ri aya, “rukutu apumbo dunduko mi anaandu tipaha. Ti digido aposo dunduko pumbo anaamanga, Rago Bisue, Rago Nzengu, na Rago Poso. Ono awere dungu nyanyakipa apai gudu ho si aida mi mangihe. Nikpiapai, wa du mi awere ninazakigene, mi nazinga wiso saa sita tipa ka ndu ka tungusapai, regbo bere berewe tipa kaa sungo pati apumbo da ku pamanangba wiso te. Mi ima inoho nga anga apumbo dunduko gberẽ te, ono si ima rengba ka gbe berã boro ti gupai si aida ní niimangihe. Ono wakina gu kura ahe a, si naida i moihe kina rogo gaha bangiriba.”

15. Wai rengbe avunguagude ka undo awiriyo i gbia ngbarago ti wene aũngbarago?

¹⁵ Ga avunguagude sunge du nga ka ngerafuo tiyo na awiriyo rogo borose yo, rogo toro yo, gbiati ngerafuo yó rogo agu apai yo nafuda yó berãyo yo. Gipai re nakoda agu ahe a nazambuasi aboro. Ka oni du ni avungugude, ka oni bingoho nga aũmbaro dunduko du nigbegberẽhe ya. Ono ti kina gu bangisa regbo re, oni moiberã roni tipa agu rengbe ka gbarasa awironi. (1 Kor. 5:6) Ka oni di regbo ka berã wenengai, oni rengbe arengba ka ino pa gu zambuasitise na aũngbarago rengbe ka sa gaoni aborokporo i du na wasa. Rogo gi gene re, oni gbiati awironi nika sia gu gene nika mbedisa roni na Yekova.

16, 17. Gini gbegberẽpai dungu avunguagude agbiatiyo nani, na wai ani ainoho nga Yekova ima rugatiko naapa gayo imisiri?

¹⁶ Gu pagume du dagba avunguagude na awiriyo si ima nyaka, na Yekova amangisunge nani tipa ka ringbisapa gu nyemuse du ko nani tipa gako aboro. (Yes. 49:15) Sidu, anga si nigbegberẽpai ka boro du na bakere rungo ho gani borokporo ambu Yekova ni te. Wirinarani sa i akusi wiriri nidee rogo dungurati ayaa: “Rago aima gberã tire nikerehe. Mi aawakana gupai bangire nga, ‘Tipagine mbu ri Yekova ti ni?’ Mi abihe nga gimi ingahe du, na mi ki tona ka bira tire.”

¹⁷ Yekova ima rugatiko naapa gu imisiri du oni nani. Zavura ko a, ‘ngbaduko aimi aima’ ho bambata aboro asamungu ni kutiko gbiati agu aboro naraki ti regbo Ime Akangbii. (Bam. P. 6:5, 6) Si ima rengba ka kpakara fu agu aboro pai amanganga yó mbata wa gure ya i ini wai imi gipai re. Wa vura duhe wo, si aidanga oni mbu gu gbegberẽ mangapai nga ga gu gumeroni i nakusi ní kusayo rogo dungurati si turũsi roni ti Yekova te. Wai tie rengbe oni ka sovura kuti gberarago ho gumeroni nambu Yekova ni?

18. Tipagine si aidanga avunguagude bira tiyo ti ni ka si du nga wiriyo mbu Yekova ya?

¹⁸ Ka oni biranga tironi tipa gupai mangi  ya. Yekova ambu aboro i siapai nitiyo, na agu aborokporo nibasasa kpara gayo raka na ki zi bapatiza, i duwa ka i ‘tindi gayo tindiro.’ (Gara. 6:5) Niyangaraha tie, Yekova nabira gu boro mangi ingapai angianga oni ya. (Yeze. 18:20) Berewe a, ka oni biranga kura aboro ya. Oni irisi gu gene Yekova afu arugute ngbaha. Oni sovura kuti Bakitingbanga angianga kuti agu abaakumba nabanda dungurati ya.—1 Pet. 5:8, 9.

19, 20. (a) Ginipai rengbe agu avunguagude i nakusi wiriyo rogo dungurati ka mangaha tipa ka hi gu imisiri du yó nani? (b) Gini ngbatunga maabangirise agberãnga fu avunguagude ya?

¹⁹ Ono ka oni sia ka kpipai kuti Yekova, oni turũsi tironi aturũso tiko. Nirengo, si naida gu gumeroni re ini gupai nga gaoni diaberã nga ka peresapa Yekova mbatayo fu gu pagume du dagbaroni nani. Sidu, tipa ka sovura kuti gu gberarago re, si naida oni du nyanyaki rogo toro yo. Ka oni kparanga tironi ti agu awirinaroni nga aKristano ya. (Snz. 18:1) Oni peke agu apai naimisa roni fu Yekova rogo kpee yo. (Tam. 62:7, 8) Ka oni gbatanga gene tipa kaa kodatironi na gu gumeroni re ya. Nikpiapai, kaa fura nani rogo terefuni watadu kaa keka awaraga funi rogo Internet ya. (1 Kor. 5:11) Oni nimangi agu apai nga ga toro ti aregbo dunduko. (1 Kor. 15:58) Gu wirina fugori nidu kuari re aya, “Mi ima inoho nga si naida mi mangi ga Yekova sunge kakaka tipa kadu wenengai rogo toro yo mbiko ho wire ka karaga tiri ni fuo Yekova, mi ki du adu na rengba bere ka undo ri.”

²⁰ Ziazia Kekeapai naya nyemuse ‘namaabangirise’ tipa apai dunduko. (1 Kor. 13:4, 7) Gbegberẽpai ngaha oni duna maabangirise nga gu gumeroni re nika karaga tiní akaraga te. Rogo agarã dunduko, dungu agu aboro namangi ingapai nasa gayo berã na kini karagatiyo kurogo ga Yekova riigbu. Yekova akpingo pai kutiyo tifuo saberã te. Kuba gure, ko “zaza tipa vu” yó.—Tam. 86:5.

21, 22. Gaoni diaberã nga gine nibipa mangasunge na gu ranirii du beroni?

²¹ Yekova afu ranirii fu gu gako kusikusiahe nga aboro. (Oni gedi Pa Fu Rugute ni Ue he 30:19, 20.) Ono gu ranirii re gu duadu a na tindiro. Si naida aKristano nibasasa dunduko sana tiyo nga: ‘Gini gene du mi ngbaha? Ya mo mi mbu sunge, zambuasitise na aũngbarago, watadu gu pagume du dagbare na gimi aborokporo tipa si turũsi re ti Yekova?’

²² Gu nyemuse du Yekova nani koyo du gako aboro ni adigonga te. Ani rengbe sa ka turo ti Yekova ka ani sia gu gene du ni irairaha. (Rom. 8:38, 39) Ono si aidanga pai mangi rani wa gure te! Oni moihe nigaoni diaberã nga ka pai turũsingo roni ti Yekova ya. Gu kekeapai naye fuo gere nika sakapai tipa kura agene biama rengbe ani ka manga gipai re ngbaha.