Agedi Gaani Awaraga Nasanahe . . .

Wari Kaina Abi Dee ni Ka Dia Ri?

▪ Agu aboro nakapa akapa kuti sangba Ziazia Kekeapai naasanahe kini yaa: “Ka si du nga aAdamu na Eva adu na agude beyo gbua ue nga Kaina na Ebere, wari Kaina abi dee ni ka dia ri?” Ziazia Kekeapai agumbanga pa wari nzunzu Kaina abi dee ni te.

Bambata Pai kapita 3 na 4 nagumba gupai furani nga: (1) Eva “nangia na agu aboro dunduko du ni ungayo.” (2) Fuo vungayo Kaina, dungu agarã aima susa ko kini ru ka fu gu motumo Mbori akaha beko. (3) Ho Mbori ado Kaina ni ko du “ni miakpamiakpa boro ni yarayara” ko, ko aabakabangiriko nga ‘gu boro ka biko ní imiko aimo.’ (4) Mbori amoi yuguyuguhe ti Kaina tipa si nibanda ko. Gipai re nayugo gupai nga awirinako watadu agumeko adu kinaho narengbe ka imoko. (5) Tingbafuo gure, Kaina aini diako nidee “ringara Nodo” yo.—Bam. P. 3:20; 4:3, 12, 14-17.

Agi apai du kuari re nayugo gupai furani nga, dia Kaina aenge ti kina Eva. Bambata Pai 5:4 nayawee vuru agu agarã Adamu arakihe nga 930, ko ‘abatika akumbagude na adegude.’ Wa Ziazia Kekeapai avuranga yawee dia Kaina angia wiri Eva ya, gupai nga rengo nga ri aenge ti kina Eva. Na wa duhe nga i gumbapa dia Kaina kina tingbafuo do yó ko, si nayugo gupai nga ko aima raka tipa dungu agarã ko kini ru ka diadee, sidu, diako rengbe arengba kadu nga tita Eva. Buku sa nafura tipa agu apai du rogo Kuru Ndika nayawee dia Kaina “angia kina ngbatunga Adamu.”—The Amplified Old Testament.

Wene bawisigi Ziazia Kekeapai nangia Adam Clarke naraki rogo 19 kama agarã ayawee Mbori amoi yuguyuguhe ti Kaina boro andu ka imoko bambiko ti gu regbo re, atita Adamu “aima nge ki rengbe na dungu agbaria.”

Kura aboro nabihe nga si arengbanga kadu nga Kaina adi kina boro dawiriko watadu gu kura ngbatunga Eva te. I nabihe wo mbiko gupai nga i nabihe nga boro arengbanga ka dia gumeni te watadu ka boro di gumeni, i nika vunga agude nitayataya ra watadu niboforoboforo ra. Ono tie, Frank LaGard Smith afura tipa gipai re ki yaa: “Si ruaru ani yawee awiri Adamu na Eva arogotiyo aroga, zanga i gunde watadu bakabangiriyo wa gu rengbehe ka manga areme.” (The Narrated Bible in Chronological Order) Si naida ani tingidi gupai a nga, Mbori aarũngo ndiko nibipa dia mbembedi gume te, da kinaho ko afu andiko ni fu aYisaraere kube Moize rogo gu garã nangia 1513 Mbata fu Batikayo Kristo.—Pa Mot. 18:9, 17, 24.

Areme, badungu akutu agarã ima susa ti gu regbo atitarani agbia zangarengba. Agu apai rengbe dia mbembedi gume ka ye nani areme, si aadunga tipa awiri Adamu te. Kurigure, agu awisigopai i amangihe bambeda kusayo ayugu gupai nga, ho boro adia gu gumeni ni duwa wiri unvura bani watadu wiri tame nani, i arengbanga ka vunga agude gbe ami kidu na pai tira wa gu dungu aboro aberãha te. Aboro anaabakanga bangiriyo na gupai re rago Adamu watadu mbata fu rago Noa te. Sidu tie, ani rengbe ka dakuti gupai nga, dia Kaina angia kina gumeko.