1. Gini apai rengbe ka ye ku berãrani yo ho ani aberã ni tipa boro inapai?

HO ANI aberã pa gu boro ni du na inapai, ani rengbe ka berã pa gu boro du na weneringise, du na nyemuse, du na nunga, na kidu ni boro gamahe. Ani ima rengba ka berã a tipa gu kpiapai Yesu afura tipaha nga ga gu boro Somorona naadu na wene sino tini. Gu kumba nangia boro kura rago kia re ‘aini pai fu’ Yudo nga guko airadĩ ata ko na ki rogodi gako ahe. ‘Nunga’ gu Yudo naadu na aoro tiko re amangi gu boro Somorona re na ko ki ngerefuo ko ni nyemuse. (Rk. 10:29-37) Gi kpiapai re nayugo pai furani tipa inapai, du nga gu bawene sino nga ga gaani Mbori. Mbori na inapai bambiko ko ima kpinyemu rani, na ko nayugo inapai furani rogo dungu agene yo na aˈuru dunduko.

2. Gini kura gene rengbe boro ka yugo inapai ngbaha?

² Gu kura gene kinaho rengbe boro ka yugo inapai ngbaha. Gu boro du na inapai ima rengba ka diaberã ka zanga fu mbusa fu gu boro si aida i fu mbusa funi. Yekova ninaayugo inapai ayugo furani rogo gu gene re. Bake papara Atambuahe aya: “Ko amanga nga rani kuti gaani ingaapai te.” (Tam. 103:10) Ono tie, ti kura aregbo, Yekova ima rengba ka fu nyanyaki rugute fu gu boro mangi ingapai.

3. Gini asanahe ani nika wisigoho?

³ Rogo gi kekeapai re, ani nika sakapai tipa asanahe biata: Tipagine Yekova ayugo inapai ti ni? Ya mo kodatise ho dagba nyanyaki rugute na inapai? Na ginipai rengbe ka undo rani ani yugu inapai? Ani bingo wai Fugo Mbori akaragapai kuti agi asanahe re.

4. Tipagine Yekova ayugo inapai ti ni?

⁴ Yekova ima kpinyemu kadu na inapai. Ga Mbori toro adu kugii gu mokedi nangia Pauro ko ke gupai nga Mbori “nakumuko ni inapai.” Rogo gi bangiriba re Pauro aasakarogo gupai yo nga, Mbori na inapai bambiko gupai nga ko nafu gu maabangirise nga  ga raka ngbangbaturũ yo fu gako mbedimbedi amoyambu, nga aguyo du ni kpakpa aboro. (Ef. 2:4-7) Ono Yekova ayugongo inapai sa fu kina gako mbedimbedi amoyambu te. Gu bake papara Atambuahe nangia Davide akepai nga: “Yekova du ni wene ko fu aboro dũ, gako wene nunga aboro du ku ri agu ahe dunduko ko amangi he.” (Tam. 145:9) Bambiko gupai nga Yekova ima kpinyemu aboro, ko nayugo inapai ti ai gu regbo ko abi ndupai tipa ka mangaha wo.

5. Waigu Yesu aye ka inopai tipa ga Yekova inapai?

⁵ Boro ho ini bakio wai Yekova nakpinyemu ka yugo inapai wa gu Yesu nainihe te. AYekova na Yesu adu sa ngbangbaturũ yo tipa bagbanga regbo mbata fu Yesu ye ku auru kpotosende. (Snz. 8:30, 31) Yesu aima bi Bako ko niyugu inapai fu aboro ingapai bara dunguhe. (Tam. 78:37-42) Ho Yesu anaayugo pai ni, ko aima fura bara dunguhe tipa gi wene sino duti Bako re.

6. Wai du Yesu aundo rani ani rugutirani na pa ga Bako inapai?

⁶ A wa i agumbaha rogo gu kekeapai naadu mbata fu gere, Yesu amangisunge na gu sanza nga ga ingiingi paranga tipa ka undo rani ani rugutirani na bakio wai Yekova nakpinyemu ka yugo inapai. Gu paranga re aguari kporo na ki ‘gbandaka gako ũkumuko ni nzanga.’ (Rk. 15:13) Kusa, ko asa berãko ti gako gbegberẽ gene raka, ki umbasi tiko, na ki karaga tiko ku kporo. Waigu bako amangipai? Gu paranga re aasungongo asungo tipa gbanga regbo bako kini ru ka mangapai te. Yesu aya: “Wa [gu paranga re] adu tuturũ, bako ki bi ko, nungako ki nimangi ko, ko ki oro, ki ti ku goko yo, ki dungo ko gbe.” Ba gu paranga re aabanga zee tiko te. Kuba gure, ko ayugu inapai na ki mbupai fu wiriko na ki diko ku kporo berewe. Gu ingiingi paranga re aingipai ni bakerehe, ono mbiko gako saberã, bako ambupai fuko. Gu bagude naadu na inapai du pako rogo gi kpiapai re narukuba Yekova. Yesu ayugu gupai furani nga Yekova naida ka mbupai fu agu aboro ingapai namanga ndikidi saberã.—Rk. 15:17-24.

7. Gu gene Yekova ayugo inapai ngbaha, waigu si ayugo gupai nga ko na bakere tatamana tiko?

⁷ Yekova nayugo inapai bambiko gupai nga ko na bakere tatamana tiko. Yekova namanga agu adiaberã ti aregbo dunduko nika du ni wenehe tipa gako kusikusiahe. Ziazia Kekeapai nape gupai nga, ‘gu tatamana naye ari yo’ ima ‘hi be inapai na wene zuzuhe.’ (Yak. 3:17) Wakina gu bagude du na nyemuse tini, Yekova ima ino gupai nga gako inapai naundo awiriko aundo. (Tam. 103:13; Yes. 49:15) Gako inapai nafu maabangirise fuyo wa vura duhe vurũ nga i nga kpakpa aboro. Sidu, bambiko gupai nga Yekova na bakere tatamana tiko, ko nayugo inapai ti aregbo dunduko ho bi ko ndupai ni  tipa ka mangaha wo. Ono Yekova ima inopa gu regbo a si aidanga ko yugu inapai ti ni ya. Ho duhe ni nga ka ko yugu inapai si nika yugo gupai nga gu gbegberẽpai boro namangihe pai ti ni te, ko ayugongo inapai ti gu regbo re te.

8. Gini mangapai si aidaha aida ti kura aregbo, na tipagine?

⁸ Na ka si du nga ga Mbori moyambu diberã ka raka gbegberẽ raka. Ginipai si aida ani mangihe? Yekova aya fu Pauro ko rugu dungurati nga ‘ka i kódi nga tiyo’ na gu boro re ya. (1 Kor. 5:11) Agu amangi gbegberẽpai asanga berãyo ya, i nakusa yo kusayo rogo dungurati. Gu mangapai re rẽarẽ tipa gupai nga ka banda ruru awirinarani na ka yugo ga Yekova ziazia gene mangaapai. Ono tie, si ima rengba kadu ni mbumbuhe fu kura aboro i bi gupai nga ga kusa boro kusayo rogo dungurati ni gupai nayugopa ga Mbori inapai. Ya mo wo du duhe? Ani bingoho.

9-10. Ringbisihe kuti AEbere 12:5, 6, tipagine rengbe ani ka ya ti ni wẽ kusa boro kusayo rogo dungurati nayugo inapai? Oni funga kpiapai.

⁹ Ho ani ninaagia tingidapai ni ti regbo gu dunguratise nga ga aKristano nga gu boro ani naini ni na ki kpinyemu ni “berewe nga Dezire Yekova te,” ani nidu na bakere gberãrago. Ani ima rengba kaa bakabangirani singia si arẽarẽ i kusi gaani boro kusayo rogo dungurati. Ya mo kusa boro kusayo rogo dungurati ni gupai nzunzu nayugo inapai? Ii, si nayugo inapai ayugo. Zanga fu rugute fu gu boro si aida aida i fu rugute funi ni gupai adunga ni patatamana, inapai, watadu nyemuse ya. (Snz. 13:24) Ya mo kusa boro kusayo rogo dungurati rengbe ka undo boro ni mangi ariapai na ki saberã ni? Si ima rengba ka undo ni. Badungu agu aboro namangi kere ingapai abi gupai nga gu nyanyaki diandue abaakumba amangihe ka fu rugute fuyo aundo yo tipa i rugu tiyo na gupai i amangihe, ki mangi ariapai rogo gayo raka yo na ki karaga tiyo fuo Yekova.—Oni gedi AEbere 12:5, 6.

¹⁰ Oni bingo kpiapai. Babanda akandoro bi gupai nga gako kandoro sa nawoka. Ko ima ino gupai nga tipa ka husa guru nawoka re, si naida ko kpara ru kusayo ti agu akura ra. Ono tie, akandoro ninaakpinyemu kaa koda tira na akurara. Akandoro ima kpinyemu kadu rogo ga ami badona sa, na rago ima rengba ka gberã tira ho i akparaka ra ni. Ya mo pa sia babanda akandoro gi ngbatunga gene husa re nayugo gupai nga ni nga kere gbegberẽ sino boro? Wagusa te. Ko ima ino gupai nga ka ko mbu gu kazakaza kandoro re u kodi tiru na agu akurara, gu kaza re ima rengba ka gbaraga dagba ra. Ni kpara ko gu kazakaza kandoro re kusayo, ko nabanda rimbasa akandoro.—Oni ringbisinga ha na Pa Amotumo 13:3, 4.

11. (a) Rogo gini agene rengbe yo ka ringbisa gu boro i nakusi ni kusayo rogo dungurati kuti kazakaza kandoro? (b) Gini apai rengbe agu aboro i nakusi yo kusayo rogo dungurati ka mangaha na gini undo rengbe yo ka gbiaha?

¹¹ Ho i akusa Kristano ni kusayo rogo dungurati, ani rengbe ka berã pani wakina gu kazakaza kandoro re. Ni nawoka awoka rogo toro yo. (Yak. 5:14) A wakina gu kura akaza nga ga kpotose, kaza rogo toro yo ima rengba kadu ni gupai rengbe boro ka gbaragaha ti kura aboro. Sidu, aregbo kinaho rẽarẽ i kpara gu boro kusayo nawoka rogo toro yo ti dungurati. Gi rugute i afuhe fu boro re nayugo pa ga Yekova nyemuse tipa gako ruru aboro rogo dungurati, na si rengbe ka undo boro ingapai ni ini pa wai gberẽ gu ingapai ni amangihe na ni ki mangi saberã. Ho i nakusi boro ni kusayo rogo dungurati, ni ima du na rengba kaa ndu tipa adunguratise, nga gu ba rengbe ni ka gbia arugapai rogoho rogo Ziazia Kekeapai, na ki nyakasi gani idapase berewe. Ni ima rengba a ka gbia awaraga kaa gedaha na kaa wisigoho na ni ima rengba a ka bi gu Mbakadapai Nga ga ADezire Yekova Rogo  Terevizioni^®. Na a wa abaakumba nikaa bi gani sonakumbatayo, i ima rengba ti kura aregbo kaa fu arugute gbiati arugapai tipa ka undo ni ni mbakadi gani pagume na Yekova tipa i karaga ni berewe ni Dezire Yekova. *

12. Ginipai du ni wenehe na nipa inapai rengbe abaakumba ka mangaha tipa gu boro ingapai asanga gani berã ya?

¹² Si ni nyanyakipa pai ka tingida gupai nga, kina agu aboro ingapai sa asanga berãyo ya i akusa yo kusayo rogo dungurati. Abaakumba ima ino gupai nga si naida i berẽ wenengai gbe mbata fu i diberã ka kusa boro kusayo rogo dungurati. I ima ino gupai nga Yekova naruga boro “rogo ruru ringbisahe.” (Yere. 30:11) I ima kpinyemu awirinayo na i aidanga ka manga ai gupai nika gbarasapa gayo pagume na Yekova te. Ono tie, ti kura aregbo, gu wenepai si aida i mangihe nga ka kusa gu boro mangi ingapai kusayo rogo dungurati.

13. Tipagine si aaida i kusi kura Kristano ti ni kusayo rogo dungurati Korinda yo?

¹³ Oni berẽnga pa wai gu mokedi nangia Pauro amangipai na gu boro ingapai naasanga berãni ya rogo bambata sa kama agarã. Kura Kristano sa Korinda yo aamanga gupai naadu ni wasiwasihe na dia bako. Gipai re aima gberã ni kerehe! Pauro aima ino gupai nga bakuru kusayo, Yekova ape gupai fu agu aYisaraere naadu mbata nga: “Gu kumba ra na dia bani ni bi ga bani kundirise; i ue i ka niimi yo aimo.” (Pa Mot. 20:11) Rengo ngaha nga, Pauro aarengbanga ka pe gupai fu dungurati nga i imi gu kumba re te. Ono ko ape gupai fu aKorindo nga i kusiko kusayo rogo dungurati. Ga gu kumba wasiwasi mangaapai re aima du na gbegberẽ sangbanaha kurii kura aboro rogo dungurati, zavura agu akurayo adu kinaho naabingo ho nga kere ingaapai du ko amangihe ya!—1 Kor. 5:1, 2, 13.

14. Wai du Pauro ayugu inapai fu gu kumba i akusi ko kusayo rogo dungurati Korinda yo na tipagine? (2 AKorindo 2:5-8, 11)

¹⁴ Fuo regbo kusa, Pauro aye ka ino gupai nga gu kumba re aima manga ndikidi aˈariapai. Gu boro ingapai re aima manga ndikidi saberã! Wa vura duhe nga gu kumba re aye na zee ku rogo dungurati, Pauro ape gupai fu abaakumba nga, ko aaidanga ka mangapai na gu boro ingapai re gbegberẽ ‘kisusi’ te. Ko ape gupai fuyo nga: I “vu ni ki fu wasa fu ni.” Oni bingo ndu gupai Pauro aya ti ni i mangi gipai re: Mbiko “ni ka gberã agberã be gani bakere rungo susi.” Nunga gu kumba naasa gako berã re aima zio Pauro.  Gu mokedi re aaidanga ka bi gupai nga ome gberãrago fu rii gu kumba re mbiko gupai ko amangihe si ki sa gupai nga ka ko gbatanga gene i mbupai fuko ya te.—Oni gedi 2 AKorindo 2:5-8, 11.

15. Waigu rengbe abaakumba ka fu nyanyaki rugute ono ki yugu inapai ti kina gu bangisa regbo re?

¹⁵ Wakina Yekova, abaakumba ima kpinyemu ka yugo inapai. I nafu nyanyaki rugute afu fu gu boro mangi ingapai ka si aidaha wo, ono i nayugo inapai ayugo a ni bakerehe ka si rengbe wo. Ka abaakumba afunga rugute fu gu boro mangi ingapai kandara tooni ya, gure nga i ayugongo inapai te, kuba gure, i nambu gene fu gbegberẽpai. Ono tie, ya mo kina abaakumba sa si aida i naayugo inapai?

16. Ringbisihe kuti Asanza 21:13, wai du Yekova amangapai na agu aboro ayugongo inapai ya?

¹⁶ AKristano dunduko naˈasada kadu na inapai wakina gu du Yekova na ni. Tipagine? Ndupai sa nga Yekova adeganga tuko fu agu aboro ayugongo inapai fu akurayo ya te. (Oni gedi Asanza 21:13.) Anga boro sa dagbarani yo naida Yekova zanga degatuko kuti gani akparakpee te, sidu, ani na rubangirise ka ne sonosa gu sino nga ga zanga du na inapai. Ani akanga ka degaturani fu gu kuarani Kristano narungo te, ono ani ti aregbo dunduko regerege ka degaturani kuti “kpe rungorungo boro.” Wakina gure a, ani namanga pai na omerani dũ ka mangapai kuti gu veresi nga ga Ziazia Kekeapai naya: “Gu ni ayugo nga inapai ya sapangbanga adu nga na inapai fu ni te.” (Yak. 2:13) Ka ani atingidapa bakio wai ani aida i yugu inapai furani, si nawira gupai gbe nga ani nika yugo inapai ayugo. Si naida ani yugu inapai gbe ho gu boro ingapai saberã ni nakaraga tini ni ku rogo dungurati.

17. Wai du Bakindo Davide ayugu inapai kina boro kpotokoyo?

¹⁷ Agu akpiapai nga ga Ziazia Kekeapai rengbe ka undo rani ani yugu inapai na ki zanga mangapai ngba kere gbegberẽ gene. Ni kpiapai oni berẽnga pa Bakindo Davide. Ko anaayugo inapai dedede kina boro kpotokoyo. Wa si avura du nga Saura aaida ka imo Davide, Davide ayugu inapai fu gu bakindo Mbori amoiko, ki zanga irabape watadu ka manga ko na gbegberẽpai.—1 Sam. 24:9-12, 18, 19.

18-19. Gini aregbo ue Davide aayugongo inapai ti ni ya?

¹⁸ Ono tie, Davide aadunga na inapai ti aregbo dunduko te. Ni kpiapai, Nabara angia kere gbegberẽ sino kumba nga guko nasenge Davide na ki ká ka fu riahe fuko na gako akumba. Gipai re asa Davide ko zingi ni kerehe na ko ki diberã nga ko naida ka imo Nabara na agu akumba dunduko naadu kpuko yo. Ono dia Nabara nangia Abigaira angia wenesino boro na kingia boro zerangbaduse, na ri afu riahe ni ipo fu Davide, sidu, Davide aaimongo Nabara na gako akumba te.—1 Sam. 25:9-22, 32-35.

¹⁹ Ti gu kura regbo berewe, gu nebi nangia Natana agumbapa kumukokumuko kumba fu Davide nga guko natuka bawene kandoro be gako rungorungo murakporo. Davide azingi ni kerehe na ki pe gupai nga: “Wa du Yekova ni ungako, gu boro namangi gi pai re kina kpi ni ngba!” (2 Sam. 12:1-6) Davide aima ino ga Moize aNdiko.  Gu iradĩ naanidĩ kandoro, si anidu nga ni tumo na akandoro biama fu gu boro ni adĩ kandoro beni re. (Gate 22:1) Ono ya mo si aaida i saringbanga ni kina kuti kpio? Ka i anisaringbanga gu iradĩ re nga ni kpi akpi, ka si anidu ni kere sarangbanga. Natana aape gu pangbanga re nzunzu tipa ka undo Davide ko rugutiko na gupai nga ko aima manga aingahe nga gu naaima gberã kisusi! Na Yekova ayugu bakere inapai fu Davide kisusi wai ka Davide ayugu inapai fu gu iradĩ naadĩ kandoro du pani rogo ga Natana kpiapai yo!—2 Sam. 12:7-13.

20. Ginipai rengbe ani ka wirikaha ti ga Davide kpiapai?

²⁰ Ho Davide azingi ni nikerehe, ko adiberã nga aNabara na gako akumba rẽ na kina kpio. Na kusa, Davide ape gupai nga gu kumukokumuko kumba du pako rogo ga Natana kpiapai yo re rẽ na kina kpio mbiko gupai ko amangihe. Ono Davide angia wene sino boro, sidu, tipagine ko asaringbanga gu iradĩ re ti ni ni kerehe wa gure? Oni berẽnga pa gupai namangi rogo ga Davide raka yo ti gu regbo re. Ti gu regbo re, sangbakpoto Davide yo aambusa ko ambusa. Ho boro amanga kere sarangbanga ni, si ayugongo gupai nga ni wenengai rogo toro yo te. Si nayugo gupai nga ni nawoka awoka rogo toro yo. Yesu afu gu nyanyaki zahe fu apefuoko nga: “Ka oni sápu nga ngbanga boro ya, i ka sapa ngbanga roni a. Bambiko gu sapangbanga oni ka sapa ngbanga na ni, kina ha i ka sapa ngbanga roni na ni a.” (Mt. 7:1, 2) Sidu, si naida ani ne gupai nga ga du ni kere aboro sarangbanga na ki mangi ome ka ‘kumuko ni inapai,’ wakina gaani Mbori.

21-22. Gini agene rengbe ani ka yugo inapai ngbaha?

²¹ Ka ani du ni aboro inapai, ani adunga na kina nunga gbua tirani tipa kura aboro te. Agu aboro du na inapai tiyo, i namanga apai amanga tipa ka undo kura aboro. Sidu tie, ani dunduko rengbe ka ngera tipa agu aboro naida na undo rogo gaani ngbadimo kporo, rogo gaani dungurati, na rogo gaani dagbarago. Ani nika bi badungu amomu abi ka yugo inapai! Ya mo boro ho naida na wasa? Ya mo ani rengbe ka undo ni rogo mangimangi pai yo, isoke, ni fu ani riahe funi watadu ni manga ani gupai rengbe ka yugo gupai nga ani naberãpa ni aberã? Ya mo Kristano ho i nakaraga ni ku rogo dungurati naida na wene bakure nga guni rengbe ka ngarasa ni? Ya mo ani rengbe ka pepa gu wene pangbanga nga ga wasa fu kura aboro? Gere nga gene sa dagba gu bawene agene yo rengbe ani ka yugo inapai ngbaha fu agu aboro dunduko ani agbia yo.—Eyo. 29:12, 13; Rom. 10:14, 15; Yak. 1:27.

²² Ka ani inipa aboro nga aguyo du na ngbatunga agu azingo re, ani nika bi gupai nga amomu kina pati rani kirikiri ka yugo inapai. Ho ani ayugo inapai ni, ani nasa gu Barani du ngbangbaturũ yo ko du na ngbarago, bambiko ko “nakumuko ni inapai”!