1. Rogo gupai yo nga ka gunde ti Mbori nga ga gine, na tipagine si aida gupai aida ti ni nga agu aboro nakpinyemu Yekova naagunde ti ni ti ko?

AKRISTANO ima kpinyemu Mbori, na i nagunde agunde a ti ko. Rogo gi kekeapai re, ani nika sakapai tipa wai du gupai nga ga gunde ti Mbori na nyanyakipaha. Ono rogo gupai yo nga ka gunde ti Mbori nga gine? Agu aboro nagunde ti Mbori na ndikidi irisa koyo du ko ni. I aidanga ka ba gberãrago ti gu Bayo du ngbangbaturũ yo te bambiko i aidanga gupai nga ka gbarasapa gayo pabakure na ko te.—Tam. 111:10; Snz. 8:13.

2. Nibi agu afugo Bakindo Davide du ni kekehe rogo Atambuahe 86:11, gini apai ue ani nika sakapai tipaha?

² Oni gedi Atambuahe 86:11. Ho mo aberã ni kurii agu afugo re, mo ima rengba ka bi gupai ziazia nga gu ruru bakindo nangia Davide aima inopa wai du gupai nga ga gunde ti Mbori na nyanyakipaha. Ani nika sakapai awere tipa wai ani narengbe ka mangapai kuti gupai Davide apehe rogo gako kparakpee yo. Ni bambataha, ani nika sakapai tipa gu nduapai si aida ani naabi rimo Mbori ti ni na kiki. Fuo gure, ani ki sakipai tipa wai ka yugo gupai nga ani nabi rimo Mbori na kiki rogo gaani raka yo.

3. Ginipai si awira gupai nga si aima undo Moize tipa ko naabi rimo Mbori kindi na kiki?

³ Oni berẽnga pa wai Moize adu ti gu regbo ko akuku rogo due mbia ho ko abi ga Yekova taarimo ni rogo yuguyugupai yo si nisusi pati ko. Gu buku nga Insight on the Scriptures naya si nawiraha nga gupai re “angia gu yangara iiriwopai kisusi namangi fu boro mbata fu Yesu Kristo ye ku auru kpotosende.” Moize agi afugo nga gu si awira gupai ziazia nga maraika du naagumbaha, agu afugo re aaya: “Yekova, Yekova, nga Mbori du adu na nunga aboro na undahe ti ko, du ni bayee ko tipa zinga, ki du na inapai kpaima na rengo, naka kuti inapai tipa aboro ni dungu akutu yo,  navu aboro ti irairapai na ti samungu na ti ingapai.” (Gate 33:17-23; 34:5-7) Si nawira gupai awira nga Moize anaatingida pa gupai atingida naamangi re ho ko anaamangasunge na gu rimo nga Yekova ni. Si airiwongo te nga Moize afu zahe kusa fu gu ga Mbori aboro nangia aYisaraere nga i ‘niigunde ti gi taasitaasi rimo du ni iiriwoho’ re. —Pa Rug. 28:58.

4. Berãkurii gini asino rengbe ka undo rani ani naabi Yekova na kiki?

⁴ Ho ani aberãpa gu rimo ni nga Yekova, si naida aida a ani naaberãpa gu ngbatunga boro du Yekova nga ni. Si naida ani naaberãpa gako asino wa agu nga, gako ome, gako tatamana, gako rurupai, gbiati gako nyemuse. Berãkurii agu asino re gbiati agu akuraha ima rengba ka sarani ani naabiko na kiki.—Tam. 77:11-15.

5-6. (a) Rogo rimo Mbori yo nga gine? (b) Ringbisihe kuti Gate 3:13, 14 na Yesaya 64:8, gini agene Yekova asa apai si nimangi ngbaha?

⁵ Ginipai ani nainihe tipa rogo rimo Mbori yo? Dungu wene abawirikipai ima ida kuti gupai nga si wa ka i ya gu rimo nga Yekova, rogoyo nga “Ko Nasa Tiko Kadu ni gu Boro Ko Aida Kadu Nga Ni.” Gi rogo rimo Yekova yo re natingida rani na gupai nga he ho ka ká na Yekova ti manga gupai ko akpinyemuhe te, na ko ima rengba ka sa apai si mangi. Wai du duhe wo?

⁶ Yekova nasa apai si mangi ni sako tiko ni ai gu boro si aida ko du nga ni tipa gupai nga ka digiso gako ringbisapai. (Oni gedi Gate 3:13, 14.) Gu pa-Ebere i asaha nga, “Mi Nga gu Nga Mi,” i ima rengba ka saha a nga, “Mi Nika Du ni gu Boro Mi Aida Kadu Nga Ni.” I naangarasa rani dedede rogo gaani awaraga nga ani naaberãkurii gi papara sino Yekova re. Yekova ima rengba a ka sa kpakpa aboro nga aguyo nga gako amoyambu tipa i du ni gu ngbatunga aboro si aida i du nga yo tipa ka mangasunge fu ko na ka digiso gako ringbisapai. (Oni gedi Yesaya 64:8.) Rogo agi agene re, Yekova nasa gupai ko akpinyemuhe si mangi. He ho rengbe ka rugusa ko ti digiso ko gako aringbisapai te.—Yes. 46:10, 11.

7. Waigu rengbe ani ka sonosa gaani tambuahe tipa gu Barani du ngbangbaturũ yo?

⁷ Ani rengbe ka sonosa gaani tambuahe tipa gu Barani du ngbangbaturũ yo ni berã ani kurii agu apai ko namangihe gbiati agu apai ko  nasarani ani mangihe. Ni kpiapai, ho ani aberãpa agu ahe ni dunduko Yekova akusihe, iriwo agu apai dunduko ko amangihe nati tirani ni kerehe. (Tam. 8:3, 4) Na ho ani aberã ni kurii gu ngbatunga aboro Yekova nasarani ani du nga yo tipa gupai nga ka manga gupai ko akpinyemuhe, ani nasonosa dudunguro irisa koyo du ko ni. Gu rimo nga Yekova ima du ni iiriwoho nzunzu! Si nayugopa agu apai dunduko furani du tipa Barani, agu apai dunduko ko namangihe, gbiati agu apai dunduko ko nika mangaha.—Tam. 89:7, 8.

8. Ginipai Pa Fu Rugute ni Ue he 32:2, 3 ayugoho tipa gu bipai du Yekova na ni tipa rimoko?

⁸ Ho aYisaraere aambeda ni ka rimo ku rogo Ringara Mokido, Yekova ayugu afugo bia fu Moize. (Pa Rug. 31:19) Si adu nga Moize tigako nika yugo gu bia re fu aboro. (Oni gedi Pa Fu Rugute ni Ue he 32:2, 3.) Ho ani aberã ni kurii veresi 2 na 3 nga ga Pa Fu Rugute ni Ue he kapita 32, ani nabi gupai ziazia nga Yekova aidanga gupai nga rimoko du ni gbugbuhe kidu ni guhe si aidanga aboro yambuhe ya te. Ko naida aboro dunduko ini rimoko! Nairiwo gu pa momu nangiaha fu aboro ka gia Moize ko niyugupai fuyo tipa Yekova gbiati Rimoko! Gupai Moize ayuguhe fuyo aima nyakasa gayo idapase na ki ngarasiyo kina wai zezeredi nanamai ninaaundo akpe si sono. Waigu rengbe ani ka sa gupai nga gaani yugopai du wakina gure?

9. Waigu rengbe ani ka undo na pa ziasi rimo Yekova?

⁹ Ho ani atungusapai ni kporo na kporo watadu gbaiga, ani rengbe ka mangasunge na gaani Ziazia Kekeapai tipa ka yugo rimo Mbori nga Yekova fu aboro. Ani ima rengba ka fu wenewene awaraga, avidio, gbiati agu ahe du rogo gaani bangiriba nga ga Internet fuyo, nga gu nataasa rimo Yekova. Ho du ani ni basunge yo, sukuru yo watadu ho ani andu nunguro ni, ani ima rengba ka gbia amomu tipa ka fura tipa gaani Mbori nga guko ani nakpinyemuko na tipa wai du ko. Ani rengbe na pepa gu weneapai fuyo Yekova nika mangaha furani na tipa kpotosende. Si ima rengba kadu ni bambata regbo fuyo i bi wai Yekova nakpinyemu rani ho i agia agi apai re ni. Ho ani ayugo gu rengo ni fu kura aboro du tipa gu Barani nga boro nyemuse, ani naundo na pa ziasi rimo Mbori. Ani naundo aboro i rugutiyo na gupai nga, i aima yugo dungu aziree fuyo tipa Yekova. Gupai ani ayugoho fu aboro rogo Baibiri yo nga gu yangara bawenepai i narengbe ka wirikaha.—Yes. 65:13, 14.

10. Tipagine si aidanga ti ni ani naayugo kina yuguyugu ga Mbori arugute sa fu gaani abawiriki Ziazia Kekeapai ya?

¹⁰ Ho ani anungusa wisigo Ziazia Kekeapai ni, si naida ani undo gaani abawiriki Ziazia Kekeapai tipa i ini rimo Yekova na kini mangisunge na ni. Kurigure, si naida ani undo yo tipa i ini Yekova wenengai. Ya mo ani rengbe ka manga gipai re ka ani ayugo kina arugapai, ga Yekova arugute, gbiati agu andiko nga ga mangaapai sa fuyo? Wene bawiriki Ziazia Kekeapai ima rengba ka wirikapai tipa ga Mbori andiko na zavura si ki ima ngba ti ni. Ono ya mo gu bawiriki Ziazia Kekeapai re agiasangba Yekova mbiko ni ima kpinyemuko? Oni tingidi gupai nga, Eva aima ino ga Mbori andiko, ono ri aakpingo nyemu Mbori nzunzu te; na kina gu bangisapai re naadu tipa Adamu a. (Bam. P. 3:1-6) Sidu, si aidanga ani naayugo kina yuguyugu ga Mbori arugute sa fu aboro te.

11. Ho ani ayugopai ni tipa ga Mbori arugute, waigu rengbe ani ka undo agu aboro ani awirika Ziazia Kekeapai na yo tipa i kpinyemu Mbori?

¹¹ Ga Yekova arugute ti aregbo dunduko ni wenehe tipa rani. (Tam. 119:97, 111, 112) Ono gaani abawiriki Ziazia Kekeapai arengbanga kadu na gi berãpai re te ka si du nga i aruganga tiyo na gupai nga Yekova amoi agu arugute re bambiko gupai nga ko ima kpinyemu rani te. Sidu, ani ima rengba ka sana gaani abawiriki Ziazia Kekeapai nga: “Mo nabihe nga tipagine du Mbori aya  ti ni gako amoyambu mangi gipai re watadu ka i mangingo gipai re ya? Ginipai gupai re ayugoho furani tipa Ko?” Ka ani undo agu aboro ani awisigo Ziazia Kekeapai na yo tipa i naaberãpa Yekova na ki sonosi ndikidi nyemuse tipa rimoko, si nawira gupai gbe nga ani nika zio ngbaduyo yo azio. I nika kpinyemu ga Mbori arugute na ki kpinyemuko a. (Tam. 119:68) I nika sona rogo idapase yo na kidu na rengba ka hipai ho i nika gbiatiyo ni na aˈasada.—1 Kor. 3:12-15.

12. Waigu Davide azanga ka banda kpotokoyo ni kpamiakpamiaha ti kura regbo sa, na sangbanaha angia gine?

¹² Agu afugo Bakindo Davide akehe rogo Atambuahe 86:11 nga gu naya, “mo kpámia kpotore yo” ima du na nyanyakipaha gbe. Rogo gako raka yo, ko aima bi wai duhe taata ka mbu kpotoseyo si du ni kparakakparakaha. Ti kura regbo sa, ko adu ariyo rii gako bambu yo ki bi kura diakumba sa ri nimbidi ime. Ya mo kpoto Davide yo adu ti gu regbo re ni kpamiakpamiaha watadu ni kparakakparakaha? Ko aima ino gu ga Yekova rugute naya: “Ka mo kpí nga dia kuaro ya.” (Gate 20:17) Ono wa si avura duwo, ko aambunga ngana gu dee re te. Kpotokoyo akparaka ku rogoyo ue, ko aduadu na nyemu Bataseba kpotokoyo, kidu duadu a na nyemu ka sa ngbarago ti Yekova. Wa si avura du nga Davide aima digo nikpinyemu Yekova na kini gunde tiko, ko amangipai ni gbangbati. Mbiko gupai re, Davide amangi gupai naadunga ni ruruhe ya. Ko aye na gbarasarimo kuti rimo Yekova. Davide aima ye a na kere arungo fu kura aboro wenesa, kodihe na gako aborokporo.—2 Sam. 11:1-5, 14-17; 12:7-12.

13. Waigu ani aino gupai nga kpoto Davide yo aima da berewe ni kpamiakpamiaha?

¹³ Yekova afu rugute fu Davide na Davide kidu berewe na wene pagume na Yekova. (2 Sam. 12:13; Tam. 51:2-4, 17) Davide aima tingida pa gu kpakaraapai na arungo naye ti gu regbo ko ambu kpotokoyo si du ni kparakakparakaha. Agu afugoko du ni kekehe rogo Atambuahe 86:11, i ima rengba ka saha a nga: “Mo fu gu kpotoseyo fere adunga ni kparakakparakaha ya.” Ya mo Yekova aundo Davide tipa ko kpamia kpotokoyo? Ii, mbiko Yekova afura kusa tipa Davide nga ko angia gu kumba “kpotoko yo adu . . . ni ziazia ha fu Yekova gako Mbori.”—1 Aba. 11:4; 15:3.

14. Gini sanahe si aida ani sana tirani na ni, na tipagine?

¹⁴ Ga Davide kpiapai nga pa ngarasaro na kidu ni zahe furani a. Pa tiko ku rogo ingapai nga zahe fu ga Mbori amoyambu areme. Singia ani tona iriso Yekova barambeda watadu ani ima irisoko tipa dungu agarã, si naida ani sana tirani na gu sanahe nga, ‘Ya mo mi naká gu asadatise Satana amangaha tipa ka kparaka kpotore yo?’

15. Waigu rengbe gunde ti Mbori ka banda rani ka ani bi agu asura nazingisa nyemu kodaba?

 ¹⁵ Ni kpiapai, ka mo bi sura rogo terevizioni watadu rogo Internet nga gu rengbe ka zingisa nyemu kodaba, waigu ka mo mangipai? Si ima rengba kadu taata ka berã gupai nga gu sura re watadu gu vidio re ayugongo kina boro kpia kundiri boro nzunzu te. Ono ya mo si rengbe kadu ni guhe Satana amangasunge na ni ka kparaka kpotoroyo? (2 Kor. 2:11) Gu sura re ima rengba kadu wa dewedi nga guru boro amangasunge na u ka sara bakiki ngua. Gu bambatapai boro amangaha nga ni natona sara ha ti kpotoho na ngba dewedi yo nga gu du ni umbaha. Wa dewedi nikaa dunguro ti gu ngua re, gu ngua re kini tona sara kini kparaka ku rogoyo ue. Ya mo gu sura mo nabihe re rengbe kadu wa gu ngba dewedi yo re? Gupai rengbe ka tona wa wiri tooni pai ka si adunga wa gupai rengbe ka manga boro na kerepai ya ima rengba ka kparaka kpoto boro yo ni ipo na si ki sa gupai nga ni mangi ingapai na ki gberesi gani padu ni ruruse fu Yekova. Sidu, mo ká ka mbu ai gupai duni irairaha si rimi ku kpotoroyo! Mo bandaha si du ni kpamiakpamiaha tipa kaa bi rimo Yekova na kiki!

16. Ho ani agbiatirani ni na asada, gini asanahe si aida ani sana tirani na ni?

¹⁶ Kupati gu nga ga agu asura nazingisa nyemu kodaba, Satana namangasunge na kura dungu ahe tipa ka asada rani. Waigu rengbe ani ka mangapai? Si ni taatapai ka berã gupai nga agi ahe re ni gbegberẽhe gbe te. Ni kpiapai, ani ima rengba kaa berã nga: ‘I akusanga re rogo dungurati te, sidu, gipai re arengbanga kadu ni kerepai te.’ Ngbatunga gi berãpai re ni kere irairaha. Si naida ani sana tirani na ngbatunga agu asanahe nga: ‘Ya mo Satana naˈasada ka namangasunge na gi asada re tipa ka kparaka kpotoreyo? Ka mi mbu iraira nyemuapai si di bere, ya mo mi rengbe ka ye na gbarasarimo kuti rimo Yekova? Ya mo gipai re ambedesa re gbe na Mbori, watadu si ima rengba ka turũso re tiko?’ Sidu, mo berẽkurii  agu asanahe re. Mo mangi kparakpee tipa tatamana tipa ka karagapai kutini ni ruruhe, zanga nanga tiro. (Yak. 1:5) Mangaha wo ima rengba kadu ni ndikidi bandahe foro. Si ima rengba ka undo ro mo ká asada nyanyaki, wakina gu Yesu amangihe ho ko aya ni wẽ: “Satana, mo gúari erẽ!”—Mt. 4:10.

17. Tipagine adunga ha ti ni ni wenepai ka kpotoraniyo du ni kparakakparakaha ya? Oni funga kpiapai.

¹⁷ Wenepai ngaha ka kpotoraniyo du ni kparakakparakaha te. Oni berẽnga gupai nga riigbu nga ga ngi kandi na aboro rogoho nga aguyo adunga kodatise dagbayo ya. Kura aguyo naida taarimo fu kina tiyo, bete aguyo aidanga ka ngi ringbisihe kuti agu andiko duho te, na agu akurayo kinaho airisanga bangerekurii gu riigbu nga ga ngi kandi re ya. Si nawira gupai gbe nga ngbatunga gi riigbu nga ga ngi kandi re arengbanga kadu na diabese te. Ono gu riigbu nga ga ngi kandi du na kodatise ima rengba kadu na diabese. Kpotoroyo ima rengba kadu wakina gu riigbu nga ga ngi kandi du na diabese re ka si du nga gamo aberãpai gbiati nyemuapai ni kodikodihe rogo iriso Yekova yo. Mo tingidi gupai nga, Satana na nyemu ka kparaka kpotoroyo. Ko naida gupai nga gamo aberãpai gbiati nyemuapai naasovura na agu arugute nga ga Yekova. Ono tie, si naida kpotoroyo du ni kpamiakpamiaha tipa gupai nga mo du na rengba ka iriso Yekova. (Mt. 22:36-38) Ka mo mbunga Satana ko kparaka kpotoroyo ya!

18. Ringbisihe kuti agu afugo du rogo Mika 4:5, ginipai mo nadiberã ka mangaha?

¹⁸ Mo kpari fu Yekova wakina gu Davide amangihe, nga guko naya: “Mo kpámia kpotore yo si gunde ti rimoro.” Mo mangi agu apai dunduko rengbe mo ka mangaha tipa kaa mangapai kuti gi kparakpee re rogo gamo raka yo. Mo diberã nga agu adiaberã mo nikaa mangaha na aˈuru dũ, singia umbaha watadu bakerehe, si naayugo gupai nga mo nabi rimo Yekova na kiki. Ni manga mo ho wo wangia mo Dezire Yekova, mo nika sa gu rimo re aboro naabihe ni wenehe. (Snz. 27:11) Na ani dunduko nika du na rengba ka pe gupai gu nebi nangia Mika apehe ki ya: “Ani atá na rimo Yekova gaani Mbori nye anye kindi.”—Mika 4:5.