1, 2. Tipagine si aida ti ni ani sakipa wai ka fu wasa fu gu boro gani boro nakpi? (Oni bi gu sura duti tonatonaha.)

WIRINA nga Susi aya: “Ani adu na kere igirã kpotorani yo tipa he wa garã sa ho wirani akpi ni.” Kura Kristano sa ape gupai nga ho diako akpi gbarakagbaraka kpio ni, ko aye kadu rogo “kere igirã kpotose nga gu ko ainongo wai ka ko pe paha ya.” Si nafu kina gberãrago nga, badungu aboro nagbiatiyo na gi ngbatunga imisiri re. Badungu aboro rogo gu dungurati nga ga aKristano aberãnga gupai nga gayo aboro nika kpi mbata fu ye Aramegido te. Singia ga boro aima kpi watadu mo ini boro nga guni gani boro nakpi, mo rengbe ka bakabangiro nga, ‘Wai rengbe boro ka undo gu boro gani boro nakpi tipa ni mangipai kuti gu bakere gberãrago du ni rogoho?’

² Si nawira gupai nga mo aima gia gupai ku ngba aboro nga wa regbo nikaa susa, gu imisiri du boro rogoho nika go ago. Ono tie, ya mo regbo du nzunzu nitihe nika sa gupai nga gu boro du na rungo kpotoni yo ni hu? Dekurugbo sa ape gupai nga, “Mi ye ka bi gupai nzunzu nga gupai boro amangaha na gani regbo du naundo ni ni hu.” Nirengo, a wa kina ndikidi aro, gu igirã nga ga gu  boro du na rungo kpotoni yo naago kusayo tooni tooni ka i ngerefuoho wenengai. Gine du nzunzu rengbe ka undo agu aboro gayo boro nakpi i hu be gu igirã du kpotoyo yo re?

3, 4. Tipagine rengbe ani kadu ti ni na gu kido nga Yekova ima rugatiko na gupai nga gu boro gani boro nakpi naida wasa aida?

³ Zanga kapa, gu bangua boro rengbe ka fu wasa furani nga gu Barani du ngbangbaturũ yo nga Yekova, nga guko du na nunga tiko. (Oni gedi 2 AKorindo 1:3, 4.) Yekova nga guko nga bawene kpiapai nga ga gu boro rugutini na gupai aboro andu rogoho, akido gako aboro nga: “Mi, kina re nga gu ko nangarãsa roni.”—Yes. 51:12; Tam. 119:50, 52, 76.

⁴ Aboro aima kpiko ti gu Barani du na inapai tiko nga agu aboro ko aima kpinyemu yo, wa Abarayama, Yisaka, Yakobo Moize gbiati Bakindo Davide. (Geda 12:6-8; Mt. 22:31, 32; Amo. 13:22) Fugo Mbori nakido rani nga Yekova nangera kumbatayo tipa gu regbo ko nika zingisa yo be kpio, na ko na bakere nyemu ka mangaha wo. (Eyo. 14:14, 15) I nika du na ngbarago na kidu wenengai ti kpotoyo. Oni berẽnga gupai a nga Wiri Mbori ko aima kpinyemuko gbe nga guko “rago angba ti ko mbiko ko,” akpi kere iʹigirã kpio. (Snz. 8:22, 30) Gu imisiri Yekova adu rogoho, fugo ho ka ringbisihe te.—Yo. 5:20; 10:17.

5, 6. Wai du rengbe Yekova ka fu wasa furani?

⁵ Ani ima rengba kadu na bakere kido nga Yekova nika undo rani aundo. Si aidanga ani du na ndundu ka kusuko kpotorani yo fuko rogo kparakpee yo nibipa gaani imisiri te. Nairiwo gu pa wasa nga ni ka ino gupai nga Yekova ima rugatiko na gaani aimisiri na ko nafu gu wasa furani ani aidaha! Ono wai du ko amanga gipai re?

⁶ Gene sa Mbori aundo rani ngbaha nga vurube “gu wasa nga ga Ziazia Toro.” (Amo. 9:31) Ga Mbori zaaza ome nga gu nyanyaki ome nafu wasa furani. Yesu akidohe nga gu Barani du ngbangbaturũ yo “na gama Ziazia Toro fu agu yo nasana ko.” (Rk. 11:13) Gu Kristano nga Susi i nipe pani kusayo ape gupai nga: “Badungu aregbo adu kinaho ani anaati ku ngba rukusirani kini kpari fu Yekova ko fu wasa furani. Ai agu aregbo re, ga Mbori zereda anaabanda kpotorani yo na gaani aberã.”—Oni gedi AFiripoio 4:6, 7.

7, 8. Tipagine rengbe ani kadu ti ni na gu kido nga Yesu nika fu wasa afu fu aboro?

⁷ Ga Yekova rugatinapai tipa agu apai aboro andu rogoho aima du ni yuguyuguhe rogo agu afugo gbiati mangaapai nangia ga Wiriko nga Yesu ho ko adu ni auru kpotosende, nga guko du na nunga tiko. (Yo. 5:19) I akedi Yesu ko fu wasa fu “agu yo ngbaduyo akua” na “agu yo dunduko nakpara kpenunga.” (Yes. 61:1, 2; Rk. 4:17-21) Sidu, ko aima du na nunga aboro gbe tiko, na ki ima rugatiko na gu rungo nga ga aboro na kidu na bakere nyemu ka dia gayo arungo kusayo.—Eb. 2:17.

⁸ Ho Yesu adu ni ni wiri paranga, gako aboro kporo kinaho naima kpiko gbiati gu kura aboro ko aini yo a. Si nawira gupai nga Yosefa, basonosi Yesu, akpi mbu Yesu kindi ni wiri paranga. * Oni berẽnga pa gu imisiri Yesu adu rogoho na nako gbiati awirinako ho garãko adu ni gbua wa 20.

9. Wai du Yesu ayugu nunga ho Razaro akpi ni?

 ⁹ Ho Yesu atona gako sunge tungusapai ni, ko adu na dudunguro giarogopaiyo gbiati nunga. Ni kpiapai, oni berãnga pa gu regbo bawene bakureako nangia Razaro akpi. Wa si avura du nga Yesu aima ino gupai nga ko nika zingisa Razaro azingisa be kpio, ko aima du rogo gu imisiri a aMaria na Marata adu rogoho. Gu bakere nunga naadu tiko aima fõngbadu ko yo ko ki kpari ni aume.—Yo. 11:33-36.

10. Tipagine rengbe ani kadu na kido ti ni kuti ga Yesu nunga areme?

¹⁰ Wai rengbe ga Yesu afugo nunga gbiati wasa ka undo rani areme? Ziazia Kekeapai nakido rani nga “Yesu Kristo nadu gba a wa du ko areme, ii, kina wo ko ka du ku mbata yo nye anye kindi.” (Eb. 13:8) Wa duhe nga “Iraunga” nitiko ima rugatiko na wai du boro ho du ni ni rogo imisiri, “ko rengbe na unda agu yo du ni asadiasadi yo.” (Amo. 3:15; Eb. 2:10, 18) Sidu, ani ima rengba kadu na kido nga agu aimisiri nga ga aboro nafõngbadu Kristo yo kindi ko rugutiko na gayo aimisiri, na ki fu wasa fuyo “rogo rago zingo.”—Oni gedi Aebere 4:15, 16.

11. Gini averesi mo abihe nga si rengbe ka fu wasa?

¹¹ Gu pangbanga du tipa ga Yesu bakere imisiri ti gu regbo Razaro akpi nga veresi sa dagba agu averesi yo nga ga wasa du rogo Fugo Mbori yo. Na gipai re airiwongo te, “bambiko agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.” (Rom. 15:4) Ka si du nga mo rogo imisiri, mo ima rengba ka gbia wasa be averesi wa agu nga:

• “Yekova du mbembedi na agu yo du kpotoyo yo na rungo, ki nibatasi agu yo toroyo naima be ingapai.”—Tam. 34:18, 19.

• “Wa du sakapai ku kpotore yo ni badungu he, gamo [ga Yekova] wasawasa apai nangarãsa mbisimore.”—Tam. 94:19.

• “Gaani Gbia Yesu Kristo tigako, na Mbori nga Barani nakpi nyemu rani ki fu nyenye wasa fu rani na wene maabangirise mbiko undahe, ko ngárasi kpotoroni yo ki ninyakasi he rogo wene mangaapai na wene apai dunduko.”—2 Tesa. 2:16, 17. *

12. Gine nga gu nyanyakipa gene sa rengbe ani ka fu wasa ngbaha fu kura aboro?

¹² Gu kura ba rengbe agu aboro du na imisiri ka gbia wasa rogoho nga gu dungurati nga ga aKristano. (Oni gedi 1 ATesaroniko 5:11.) Wai rengbe oni ka ngarasa agu aboro du na “rungorungo toro”? (Snz. 17:22) Si naida oni moi gu pai ku berãroni yo nga “rago onga kii, na rago fura” kina ti ni. (Batu. 3:7) Dekurugbo du rimo ri nga Dalene aya: “Agu aboro gayo boro nakpi naida ka peka agu apai du kpotoyo yo na berãyo yo. Sidu, gu banyanyakipa pai mo narengbe ka mangaha fu gu boro gani boro nakpi nga ka degaturo kuti gupai ni apehe.” Junia, kawiiri aimi tiko aya: “Ka si vura du vurũ nga mo arengbanga ka rugatiro wenengai na gu imisiri nga ga boro te, gupai nyakipaha gbe nga mo naida ka rugatiro na gupai du ni rogoho.”

13. Ginipai si aida ani tingidihe nibipa gu imisiri nga ga boro?

¹³ Oni tingidi gupai a nga anga aboro dunduko nagbiatiyo na bangisa imisiri na kini fura tipaha kina ngba bangisa gene te. Ti kura aregbo, kina kpotoboro yo sa naino pa wai du gu igirã du kpoto ni yo. Fugo Mbori nape gupai nga: “Kina kpoto boro yo ini  gaha imisiriapai, kungba boro akoda nga tini na gaha ngbarago te.” (Snz. 14:10) Zavura ho boro apeka gupai ni nafuda ni, si ti aregbo dunduko ni taatapai ka rugatise na gupai nzunzu ni aida ka gumbaha te.

14. Wai du rengbe ani ka pe afugo wasa fu gu boro gani boro nakpi?

¹⁴ Si nirengo nga, si ima rengba kadu ni mbumbupai ka ino gupai rengbe ani ka pehe fu gu boro du rogo bakere imisiri. Ono wa vura duhe wo, Ziazia Kekeapai nape gupai nga “mirã iratatamana nafu husa.” (Snz. 12:18) Dungu aboro aima gbia afugo wasa rogo gu burosua nga Ho gu Boro Oni Akpinyemu Ni Nikpi Ni tipa ka pekaha fu aboro. * Ono dedede tie, gu banyanyakipa pai rengbe mo ka mangaha nga ka ‘kpara na agu yo nakpara.’ (Rom. 12:15) Gaby kumbari akpi ape gupai nga, “Aume ima da ni fugore. Si du mi naagbia bete wasa ti ni ho abakureami akpara ni na mi. Ti gu regbo re, si naadunga wa mi ni sare rogo gimi imisiri te.”

15. Wai du rengbe ani ka fu wasa fu aboro ka si du nga ani arengbanga ka fuhe rogo fugo yo te? (Oni bi gu sanduki a nga “ Agu Afugo Wasa Nazeresa Imisiri.”)

¹⁵ Ka mo aabihe ni mbumbuhe ka pe fugo wasa fu boro, si ima rengba kadu taata ka fu wasa fu boro rogo kekepai ti karte, rogo keda kekepai funi rogo internet watadu rogo keke waraga. Mo ima rengba ka dia fugo wasa rogo Ziazia Kekeapai yo, ka tingida sino gu boro kpi, watadu ka pepa wene regbo sa oni adihe na ni nga gu mo abihe na nyanyakipaha. Junia aya, “Ho boro ake guru kekeapai ni fere nga ga wasa watadu ho kuare Kristano ayamba re ni ku kpuni yo ani sungu, si naundo re bakere gbe. Agu apai re nasa re mi nibi tire nga aboro ima kpinyemu re na i nangera angera fuore.”

16. Gini gene du na wene sangbanaha ti ni rengbe ani ka fu wasa ngbaha?

 ¹⁶ Ka oni bingo gaoni akparakpee na gu kuaroni Kristano gani boro nakpi watadu pa manga oni kparakpee tipa ni na paha kusende ya. Ka si vura du vurũ nga si ima rengba kadu ni mbumbuhe ka manga kparakpee ti gu regbo du boro rogo imisiri, gu gaoni kparakpee naye kina boro kpotoroni yo tipa ni ima rengba kadu ni bakere ziga nga ga imisiri, ka si vura du vurũ nga oni nafura na kpe watadu fugoroni akuranga akura nzunzu te. Dalene agumba gupai nga, “Ti kura aregbo ho awirina ni adee aye ni ka fu wasa fere, mi naasana yo singia i na nyemu ka manga kparakpee. I naatona kparakpee si ki duadu ni mbumbuhe fuyo ti tonatonaha ka fura, ono fuo bete regbo, afugoyo naanyaka kina kumbatayo na i ki pe kina boro gu kparakpee naye kpotoyo yo. Gayo idapase, gayo nyemuse gbiati gayo nunga ima du ni agu apai nanyakasa gi idapase.”

17-19. Tipagine si aida ani naafu wasa afu ti ni kindi?

¹⁷ Ga aboro aimisiri ni bakiakia. Sidu, ka oni dinga regbo na gu boro gani boro nakpi kina tipa bete areme gbua ti gu regbo du agume ni gbiati abakureani ho ya, ono si naida oni di regbo adia a na ni rogo agu adiwi nikaa ye fuoho ti gu regbo kura aboro naima ga ku rogo akpuyo. “Badia ngbanya nakpi nyemu badiani na arago dunduko, ono i avungu wirina tipa unda ni rago gberãngbi.” (Snz. 17:17) AKristano ima rengba kaa fu bakere wasa fu gu boro du rogo imisiri a wa ni nika du kindi rogoho.—Oni gedi 1 ATesaroniko 3:7.

¹⁸ Oni tingidi gupai nga gu boro gani boro nakpi ima rengba ka du rogo gu imisiri naye mbiko gu ramediwi pai amangi ti ni, ngbatunga manzigo, asura, mangaapai, ngbatunga fuo he, woro he, watadu kura aregbo nga ga garã. Badungu apai duho gu boro gani badiarogatise nakpi amangaha ti bambata regbo ni sani, wa gu nga du pati bakere dunguratise watadu Tingida Pakpio Yesu, ti gu aregbo re, ni ima rengba kadu rogo imisiri. Wirina sa ape gupai nga, “Mi aaberã gupai nga ho gu uru ani amangi rogatise rogoho nika da ni, mi nika du rogo kere gberãrago, na si adunga nirengo taata te. Ono bete awirina nga akumba na adee amangi mbakadapai tipa ani sungu na mbembedi abakureami, angianga mi sungu nisare ya.”

¹⁹ Oni moi gupai ku berãroni yo nga gu boro gani boro nakpi naida wasa ti aregbo dunduko, angia ti kina regbo apai sa ya. Junia ape gupai nga, “Dedede, gu undo i afuhe fu boro angianga rogo gu ramediwi pai amangi rogoho ya ima rengba kadu na bakere undo ti ni. Agu aregbo re nga nyanyakipa aregbo gbe, na si naye na bakere wasa fu boro.” Rengo ngaha nga, ani arengbanga ka dia gu imisiri kusayo dunduko du boro na ni ho gani boro nakpi ni te, ono ani ima rengba ka fu wasa funi gbiati ngarasaro nimanga ani apai ka undo ni. (1 Yo. 3:18) Gaby aya: “Mi nafu bakere tambuahe fu Yekova tipa wenesino abaakumba nga aguyo naaru na mi ti aregbo dũ rogo gu imisiri mi adu rogoho. I ima sare mi bi be Yekova pati re.”

20. Tipagine du ga Yekova akidohe ti ni ni pa bakere wasa?

²⁰ Nairiwo gu pa wasa nga ni ka ino gupai nga Yekova nga Mbori wasa dunduko nika nyasariipa aimisiri dunduko na ki fu nyenye wasa ho “agu yo ka gia [fugo Kristo] ni dunduko du rogo amurã yo ki kuru”! (Yo. 5:28, 29) Mbori nakidohe nga “Ko adígisa pa kpio nye anye kindi, Gbia Mbori awéga aume ti bangirise ku sa yo dunduko.” (Yes. 25:8) Kuba gupai nga kaa ‘kpara na agu aboro na kpara,’ agu aboro dunduko nika du rogo zegino, ‘rago nika ngba angba tiyo na agu yo rago angba tiyo.’—Rom. 12:15.