1. Tipagine rengbe ani ka ya ti ni ahe dunduko nga ga Yekova? (Oni bi gu sura duti tonatonaha.)

AHE DUNDUKO nga ga Yekova! “Na gu ngbangbaturũ nga ga angbangbaturũ, na kpotosende, na agu ahe dunduko du rogo ho” nga gako. (Pa Rug. 10:14; Yugo. 4:11) Sidu, ani dunduko nga ga Yekova aboro mbiko ko nakusi aboro dunduko. (Tam. 100:3) Wa aboro atona niraki, Mbori aima sia bete aboro i du ni kparakpara yo fuko.

2. Ringbisihe kuti Ziazia Kekeapai, ada nga ga Yekova kparakpara aboro?

² Ni kpiapai, Atambuahe 135 nafura tipa gu ruru airisi Yekova naadu rogo gu ringara aYisaraere naadu mbata ni “gako ũkumuko.” (Tam. 135:4) Berewe a, gu buku nga Osea agumba gupai kumbatayo nga bete agu aboro naangianga aYisaraere ya nika ye ka da ni ga Yekova aboro. (Osea 2:23) Gu sangbanebi nga ga Osea adigisitihe, ho Yekova akodi agu aboro ni naangianga aYudo ya ku dagba agu aboro du na maabangirise ka zogarago na Kristo. (Amo. 10:45; Rom. 9:23-26) Gi “ziazia rika aboro” re nga “ga Mbori yo” rogo kparakpara gene yo, i ima mbeda yo na ziazia toro tipa i raki ngbangbaturũ yo. (1 Pet. 2:9, 10) Na ginipai du tipa gu badungu ruru aKristano du areme na maabangirise tipa ka raka auru kpotosende ane? Yekova nayamba yo a nga gako “aboro” nga gako “siasia aboro.”​—Yes. 65:22.

3. (a) Ada du areme na kparakpara pagume na Yekova? (b) Ginipai ani ka wirikapai tipaha rogo gi kekeapai re?

 ³ Areme, gu “umba rika aboro,” du na gu maabangirise nga ga raka ngbangbaturũ yo, gbiati gu “kura akandoro,” du na maabangirise ka raka auru kpotosende ane, i dunduko nga ‘rimbasa akandoro sa’ nga agu yo Yekova abiyo ni gako aboro. (Rk. 12:32; Yo. 10:16) Ani nirengo na bakere nyemu ka yugo bakere tambuahe fu Yekova tipa yamba ko rani ani du na kparakpara pagume na ko wa gure. Gi kekeapai re nika sakapai tipa agu agene rengbe ani ka yugo gaani tambuahe ngbaha fu Yekova tipa fuko gi bakere mamu re furani.

4. Gini gene sa rengbe ani ka fu tambuahe ngbaha fu Yekova tipa yamba ko rani ani du na pagume na ko, na waigu Yesu amangipai wakina gure?

⁴ Ani nayugo gaani tambuahe fu Yekova ni kpara ani tirani na ngbadurani yo dunduko fuko. Ni zio ani bapatiza, ani nayugoho gbaiga fu aboro dunduko nga ani nga ga Yekova aboro na ani na nyemu ka ra fu ko. (Eb. 12:9) Yesu amangipai wakina gure ho ko azi bapatiza ni. Wa ko avura du dagba agu aboro naima du ni kparakpara yo fu Yekova, ko afu tiko fu Yekova. Si adu wa ka i ya ko aagumba gupai fu Yekova nga: “Ako gi Mbori, rago ngba ti re ka amanga gu pai ngba angba ti ro.”​—Tam. 40:7, 8.

5, 6. (a) Ginipai Yekova agumbaha ho Yesu azi bapatiza ni? (b) Oni funga gu kpiapai nayugo gupai nga, Yekova na ngbarago ho ani afu tirani ni fuko si ki vura du vurũ nga ahe dunduko nga gako.

⁵ Ginipai Yekova agumbaha ho Yesu azi bapatiza ni? Ziazia Kekeapai naya: “Ho i abapatizi ko ni, ko ki guari ime yo ni ba sa. Ngbangbaturũ ki za fu ko, ko ki bi ga Mbori Ziazia Toro nazorã wa mbipo ki ye ku ri ko; Oni ngére, fugo ki ta paa ngbangbaturũ yo, niya, ‘Wire du re, nyemuko namanga re, ngba ko ti re gbe.’” (Mt. 3:16, 17) Wa si avura du nga Yesu aima du ni ga Mbori boro, Yekova aima du na ngbarago ka bi wai Wiriko afutiko tipa ka manga gupai Ko akpinyemuhe na kpotokoyo dunduko. Wakina gure a, Yekova na ngbarago ho ani akpara gaani raka ni fuko, na ko nika fu maku afu furani.​—Tam. 149:4.

⁶ Ka yugo gipai re na kpiapai, oni berẽnga gupai nga bagude fu bisikuiti fu wiriko. Fuoho, gu wiriko re kini di gu sa dagbaha kini fuhe berewe fu ko ni gamahe. Ya mo anga kina ko nifu gi bisikuiti re te? Waigu ka gi gude re fu guhe fu bani nga gu naye kina be ni? Gu bagude du na nyemuse arengbanga ka berã gupai nga, tipagine gu gude re nifu kina gu bangisa bisikuiti re ti ni funi te. Kuba gure, ni nadu na ngbarago ka dia gu ga wirini gamaha re, mbiko si nayugo pa ga wirini nyemuse koyo du ni ni. Ni nabi gu gamahe re na nyanyakipaha kisusi gu ni nifu he fu wirini. Wakina gure a, Yekova na ngbarago ho ani afu tirani ni fu kina ko sa.​—Gate 34:14.

7. Waigu Maraki ayugu ga Yekova bipai tipa agu aboro nairisoko na kpotoyo yo dunduko?

⁷ Oni gedi Maraki 3:16. Ka si du nga mo ata kparanga gamo raka fu Yekova na ki zi bapatiza te, si naida mo makia ndu gupai nyaki pa manga mo gu diandue re ti ni. Si ni rengo nga, tona ti gu regbo i adu na mobara ro, mo aima du ni ga Yekova boro wa sa na kura aboro dunduko. Ono tie, mo berẽnga pa wai ka si fu ngbarago fu Yekova ka mo idi ko ni gamo bazogo na ki kpara gamo raka fuko. (Snz. 23:15) Yekova ima ino agu aboro nafu tiyo ka irisoko, na ko nake rimoyo rogo gako “kitabu tingidapai.”

8, 9. Ginipai Yekova akpinyemuhe be agu aboro du rimoyo ni kekehe rogo gako “kitabu tingidapai”?

⁸ Ka ani aida rimorani nye rogo ga Yekova “kitabu tingidapai” yo, apai kinaho si aida  ani mangihe. Maraki agumba gupai nga si naida ani ‘gunde ti Yekova ki niberẽ pa rimoko.’ Ka ani airiso kura boro kia watadu kurahe kia, i nagbandaka rimorani kindi kusayo rogo ga Yekova buku unga yo.​—Gate 32:33; Tam. 69:28.

⁹ Sidu, gaani kparatise fu Yekova nakoda kura apai akoda, angianga kina gu sa nga ka kidohe ka manga gupai ko akpinyemuhe na ki zi bapatiza ya. Manga kidohe na zio bapatiza nga agu apai ani amangaha vuru umba regbo yo gbua si ki ima nyasa, ono iriso Yekova nga gene raka. Wa ani nikaa raka na aʹuru dunduko, si naida ani naayugo gupai rogo gaani mangaapai yo nga ani nagiasangba Yekova.​—1 Pet. 4:1, 2.

10. Gini kparakparapai si aida si du dagba agu aboro nairiso Mbori na aguyo aairisongo ko ya?

¹⁰ Gu kekeapai naaye mbata fu gere afura tipa agu apangbanga nga ga Ziazia Kekeapai nga gu du tipa Kaina, Soromo, gbiati aYisaraere. Agi aboro re dunduko aya i nairiso Yekova, ono i aafunga tiyo fuko na kpotoyo yo dunduko te. Agi akpiapai re nayugo gupai ziazia nga, agu aboro nga ga Yekova yo duwa ka i diberã tipa gupai du ni ruruhe na ki sogo gbegberẽpai. (Rom. 12:9) Si ruaru nga, tifuo Maraki fura tipa “kitabu tingidapai,” Yekova afura tipa “kparaka dagba rurupai na gbegberẽpai, na dagba gu boro namanga pa Mbori na gu boro amanga nga pa ko ya.”​—Mara. 3:18.

11. Tipagine si aida si du ti ni fu aboro gbaiga nga ani ni kparakpara rani fu kina Yekova sa?

¹¹ Gu kura gene kinaho berewe rengbe ani ka yugo gaani tambuahe fu Yekova ngbaha tipa siako rani ni gako aboro. Si naida gaani sonakumbatayo rogo toroyo du ni “yuguyugu he fu aboro dũ.” (1 Tim. 4:15; Mt. 5:16) Mo sananga tiro nga: ‘Ya mo aboro nabi re ni gu boro du ni ruru ni fu Yekova? Ya mo mi naagbata amomu tipa ka yugo tire ni boro sa dagba aDezire Yekova yo?’ Si ima rengba ka fu gberãrago fu Yekova ka ko sia rani ni gako aboro, ani kini kaa dindiko adindiko ka yugo gupai fu kura aboro nga ani nga gako aboro.​—Tam. 119:46; oni gedi Marako 8:38.

12, 13. Waigu kura aboro nasa gupai nga ka aboro iningo yo ni aDezire Yekova ya?

¹² Si nipa gberãrago nga, kura aDezire Yekova ima sa gupai nga ka aboro iningo gu  ‘kparakparapai du dagbayo na agu aboro airisongo Mbori ya’ ni wirikayo gu “toro nga ga zegino.” (1 Kor. 2:12) Gere nga gu toro nakusa ‘gu nyemuhe nga ga borose.’ (Ef. 2:3) Ni kpiapai, wa vura duhe nga dungu arugute i nafuhe nibipa voda aroko, kura aboro kindi na nyemu kaa vo roko na kini mbakadi tiyo ngba gu gene arẽnga ya. I navoda agu aroko du ni gbidigbidihe na gu nayugo agu abarapa boro si aidanga i bihe ya, zavura kaa ndu na ni kupati agu adunguratise nga ga aKristano. Watadu i nambakada riyo na kini tuku riyo wa kina ga aboro zegino. (1 Tim. 2:9, 10) Ni sangbanaha, ka mo biyo dagba rimbasa aboro, si ima rengba ka mbu tipa ka ino da dagbayo nga ga Yekova boro na da nga “badia zegino.”​—Yak. 4:4.

¹³ Kura agene kinaho berewe kura aDezire Yekova asoganga gu mangapai nga ga zegino rogoho ya. I nado gbere na kini mangiapai pati asungo ngba gu gene arẽnga fu aKristano ya. I namaa agu asurayo ku rogo Internet arẽnga ya na kini keke agu apai rogoho nayugo kina gu gayo aberã nga ga borose. Si rengbe kadu nga i aamanganga kere ingapai rogo dungurati i ki fu rugute fu yo te, ono gi gayo mangaapai re ima rengba kadu na gbegberẽ maapai kurii agu akurayo naasada ka banda gayo wene mangaapai dagba ga Yekova aboro.​—Oni gedi 1 Petero 2:11, 12. *

14. Gini apai si aida ani mangihe tipa ka banda gaani pagume na Yekova?

¹⁴ Zegino nasonosa “gu nyemuhe nga ga borose, na gu nyemuhe nga ga bangirise, na gu ũmosangi enda nga ga unga” ni bakerehe gbe. (1 Yo. 2:16) Ono tie, wa duhe nga ani nga ga Yekova aboro, i nangarasa rani tipa ani “mbu agu apai zanga sinombori na gu nyemuahe nga ga zegino nidu na rugatise, na rurupai, na sinombori, rogo gi zegino du awere re.” (Tito 2:12) Gaani afugo, gu gene ani arihe na kini mbirihe ngbaha, gaani voda aroko na mbakadatise, gaani gene mangaapai gbiati agu apai dunduko ani mangaha, si naida si yugu gupai fu agu aboro nabi rani nga ani ni kparakpara rani fu kina Yekova sa.​—Oni gedi 1 AKorindo 10:31, 32.

15. Tipagine si aida ti ni ani mangipai na akuarani airisimbori ni wenesino na nyemuse?

¹⁵ Ani nayugo gaani tambuahe fu Yekova tipa gu kparakpara pabakure du dagbarani na ko rogo gu gene ani amangapai ngbaha na akuarani airisi Mbori. Agu awirina re a nga kina ga Yekova aboro. Ka gi pai re du berãrani yo ti aregbo dunduko, si nika undo rani ani yugu wenesino fu awirinarani na kini mangipai na yo ni nyemuse ti aregbo dũ. (1 Tesa. 5:15) Yesu aya fu apefuoko wẽ: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.”​—Yo. 13:35.

16. Gini kpiapai du rogo ga Moize aNdiko yo nayugo kpia wai Yekova abi gako aboro?

¹⁶ Tipa ka yugo kpia wai si aida ani naamangapai na akuarani rogo dungurati, oni berẽnga kurii agi apai re. Agu ahe naadu rogo ga Yekova yekaru adu ni kparakparaha dunduko tipa ziazia irisombori. Ga Moize aNdiko atangara pa wai si aaida i ngerefuo agu ahe re, na i anaasarangbanga gu boro naanikuo agi andiko re kuti kpio. (Geda 1:50, 51) Ka si du nga Yekova aangerafuo agu ahe adunga onga rogoho ya nga gu i aamangasunge na ni kaa irisoko, si nirengo nga ko nabanda agu aboro kisusi nairisoko ni ruruyo nga aguyo ko nasia yo ni gako kparakpara aboro! Yekova afura tipa gako aboro ki ya: “Gu ni zadi roni, ni zadi zende bangire,” NW.​—Zek. 2:8.

17. Yekova ‘nadega tuko’ na kini bi gini apai?

¹⁷ Maraki afura tipa Yekova nga ko ‘nadega tuko ki nigi’ Gako aboro ho i afura ni dagbatiyo. (Mara. 3:16) Nirengo, Yekova “ini agu yo nga gako yo.” (2 Tim. 2:19) Ko ima rugatiko wenengai na agu apai dunduko ani apekaha na kini mangihe. (Eb. 4:13) Ho ani ayugongo wenesino ni fu akuarani airisimbori ya, Yekova nabihe abi. Ho ani adia akuarani ni kugume, kini gamuhe fuyo, kini mbupai fuyo na kini yugu wenesino fuyo, ani rengbe kadu na gu kido nga Yekova nabihe abihe a.​—Eb. 13:16; 1 Pet. 4:8, 9.

18. Waigu rengbe ani ka yugo tambuahe tipa gu momu du ani na ni kadu ni ga Yekova aboro?

¹⁸ Nirengo, ani na nyemu ka fu tambuahe fu Yekova tipa gu momu nga ga du ni gako aboro. Ani ima rugatirani na gupai nga, ani amangipai ni tatamana ho ani akpara gaani raka ni fu Yekova. Wa vura duhe nga ani naraka “dagba iraira rika aboro nga airanyakari,” si naida aboro bi rani “zanga sirõ ki du na zera, . . . wa aimahe dagba yo auru kpotosende.” (Frp. 2:15) Ani nadiaberã nyanyaki ka soga gupai Yekova asogaha. (Yak. 4:7) Na ani nayugo nyemuse na irisa koyo du akuarani airisimbori ni, ki rugutirani na gupai nga i nga kina ga Yekova aboro a.​—Rom. 12:10.

19. Waigu Yekova afu maku fu gako aboro?

¹⁹ Ziazia Kekeapai nakidohe nga: “Yekova abá nga gako aboro ku sa yo te.” (Tam. 94:14) Gipai re nga ndikiki rengo, ka ani vura gbiatirani na kina gini kpakarapai vurũ. Zavura kpio, ka si rugusinga ga Yekova nyemuse tipa rani ni te. (Rom. 8:38, 39) “Wa du ani ni ungarani, ani ni ungarani fu Gbia; wa ani nikpi, ani nikpi fu kina Gbia; watadu ani ni ungarani tie na ni kurugborani ani ni ga Gbia rani.” (Rom. 14:8) Ani nangera kumbatayo tipa gu regbo Yekova nika zingisa gu ruru abakureako naima kpiko. (Mt. 22:32) Zavura awere, ani nagbia dungu amaku agbia. A wa Ziazia Kekeapai agumbaha, “aboro maku nga gu rikaaboro du gayo Mbori nga Yekova, nga agu aboro ko asia yo i du ni gako ũkumuko.”​—Tam. 33:12.