Garã nina adu nga 17 ti gu regbo i avungure rogo gu garã nangia 1960. Buba aima mbu nina mbata fu i vungu re. Ani araki na tita rogo gu rago nga Burg, nga tooni gbata naadu Germany yo pavuruhe ku uroyo. Dungu aboro naaidanga kuti Mbori ya, na gimi aborokporo adu na kina gu bangisa bipai re a. Sunge aadunga tirani na Mbori te.

Wa mi aasona, rago aima ngba ti tita na mi. Ko anaakekeda re tipa dungu asunge, wa gu nga mi naadakpa angua kaa mbakada abehe. Ni du mi ni gude, gi sunge re aima ngba tire. Kpakarapai aadunga rogo gimi raka te na mi adu na ngbarago.

Kere nyanyakipai amangi re rogo kura uru sa ho garã re adu ni nga saba. Mi adi garã sa gbua ku sukuru yo. Ho mi aaga ni ku kporo yo, mi abiti ngua karaba. Mi abiti nga ametere 8 ku ari, karaba ki zi re mi ki ti kusande. Fuo mi zingi rogo rame bambu ngua yo, mi abi gupai nga abe re amanganga sunge te. Gupai naamangi nga, abe re aima gbi ti baraha dunduko ue ni kerehe, si kini sa gupai nga i kati abe re tipa ka biriko rimingo ku rogo kure re ya. Ni rengo, anina na tita aima du na bakere rungo. Ono wa mi adu tie ni gude, mi aaruganga tire na pa wai nzunzu pa zanga mi abe re nika mbusa re kumbatayo te.

Fuo mi kuru bambu ngua yo, mi akaraga tire ku sukuru yo. Agude anaasawia re, kini tutura re na kini bafu ahe kuti re mbiko mi aarengbanga ka manga wiripai te. Gi gayo gbegberẽ mangaapai re anaaba gberãrago ti re ni kerehe. Ni yangaraha, i akedi re ku rogo gu sukuru nga ga gbarigbari aboro naadu rogo gu rago nga Birkenwerder, nga gu gbarigbari agude anaawirikapai rogoho. Wa duhe nga gu sukuru re aima turo na kpurani, gene aadunga be anina na tita tipa i naaye kaa bi re te. Mi anaabi yo kina ti aregbo ongoda. Tipa agarã bawe, mi asono zanga nina na tita.

Mi awiriki wai ka manga agu apai mi ainihe na kina ndu re. Mo berẽnga pa wai duhe ka mangasunge na wiri andue tipa ka ri riahe na agu ahe i naari riahe na ni. Wa si avura du wo, mi aima sonosa gu birĩ re. Mi awiriki wai ka ko rindi re naka zagba ri re na kina wiri andu re. Mi aima tona kaa yaka wiri andu re ho mi anaafura ni na boro. Ni rengo, wiri andu re ada ni wiri abe re fere.

Ho mi atona ka sona ni, mi akpinyemu geda agu abuku naafura tipa agu apai aboro birĩ-inohe aberãha. Ti  kura aregbo, mi aberẽpa gu kandi i naamaha kuti boro nga si rengbe ka undore mi naamanga apai dunduko. Ho garã re adu ni nga 14, mi atona ka vu gundö. Mi aabihe nga si nika sa re mi du na kido kuti tire na ki sa re mi naabi tire nga mi wakina kura aboro a. Si adu wa mi aaya fu ti re we: ‘Mi ima rengba ka manga gupai re a. Gu boro navu gundö nga gu boro naima sona si ngia beni ti ni watadu si ti ni te.’

Mi arimisi tire ku rogo dungu apai na ki tona ka manga gupai aboro aamangaha. Mi aye ka da ni boro sa rogo gu riigbu nga ga paranga aboro nangia ga German, nga gu naasongoda agu ariigbu nga ga paranga aboro, kini mangisunge yo ni bakeapai, nga gu boro pa ni aima nyaka dagba akurani rogo gu riigbu re. Mi atona ka koda tire na ababi bia, kini ndu ku ba peka wene siakasiaka afugo wia yo, na kini ngi gu kandi nga ga gbarigbari aboro ru a. Ho mi adu ni na bete inohe tooni, mi atona ka mangasunge rogo basunge sa rogo gaani rago. Wa mi aasona, mi anaavo gu kandi re ti aregbo dunduko tipa ka du na abarapa re ti re dunduko.

Rogo kura uru sa, mi aasungudo tarambiri tipa ka ndu ku basunge yo, kura kumba kini ye fuo re. Ko asana re singia mi aberẽnga gupai nga Mbori ima rengba ka karaga abe re berewe kubaha. Kina ngbare nazere. Ono gu rengo duho nga, mi naida aida ka du na abe re berewe, ono gipai re adu bangire wa gupai arengbanga ka manga ya! Ni du mi ni gu boro naaidanga kuti Mbori ya, mi aima ida kuti gupai nga Mbori ti ni te. Natona ti gu regbo re, mi aaidanga pai kodi re berewe na ko te.

Fuo bete regbo kusa, kura boro rogo gimi basunge ayambu re tipa mi ye ka bi gari aborokporo. Ho ani aambira buni ni, avunguri atona ka fura tipa gu Mbori nga Yekova. Si adu fere ni bambata regbo mi gi gupai nga Mbori na kina rimoko ti ni. (Atambuahe 83:18) Wa si avura duwo, mi aima ká gupai kpotore yo nga: ‘Ka si vura du nga rimoko nga da vuru, boro ho rengbe ka du nga Mbori te. Mi nika yugoho fu agi aboro re nga i nga airaziree.’ Wa mi aima du na ida kuti gimi bipai, mi aidihe tipa ani saki Ziazia Kekeapai na yo. Ono tie, mi arengbanga ka yugo agu agopai nayugoho nga Mbori ti ni te te.

Wa ani aawisigo agu asangbaanebi nga ga Ziazia Kekeapai, mi aye ka tona kaa aria berãre ti gupai nga boro ho nga Mbori te. Dungu agu apai anebi apehe aima ye ki digisitihe, wa si avura du nga i aima kehe mbu dungu kama agarã kumbatayo. Ti regbo gaani sakapai nga ga Ziazia Kekeapai sa, ani awisigi agu apai namanga rogo zegino awere na agu apai du rogo Matayo kapita 24, Ruka kapita 21, gbiati 2 Timoteo kapita 3. Kina wai pa dungura agu apai namanga boro naaundo munganga tipa ni ini gu kaza namanga boro, kina wo agu apai peke yo ho rogo agu asangbaanebi re aundo re tipa mi ini gupai nga ani naraka ti gu regbo Baibiri ayambaha nga “kusa rago.” * Kina ngbare naazere nga, agi asangbaanebi re nadigiso tihe kina ku bangire.

Mi aima ida kuti gupai mi aawirikaha rogo Ziazia Kekeapai yo nga rengo du. Mi atona ka kpara fu Yekova, na ki mbu vugundö​—wa vura duhe nga mi aima du ni kere bavugundö tipa dungu aregbo. Mi andu kumbatayo na gimi wirika Ziazia Kekeapai tipa garã sa. Rogo Zerekpe  27, 1986, mi azi bapatiza ni gbuko rogo guhe boro api api rogo ka mbida ime (bathtub), mbiko i aima rugusa ga aDezire Yekova sunge Germany yo rogo gu paparaha naadu ku uroyo.

Mbiko wa i aima rugusa sunge tungusapai, ani anaadungura tirani ni umba badona rani kina ku rogo akporo na mi anaabi kina bete akuare aidipase yo. Gupai naye ka manga nga, irangbii ambugene fere tipa mi ndu ku rogo gu papara Germany naadu ku dioyo, nga gu ba i aarugusanga ga aDezire Yekova sunge rogoho ya. Gere nangia bambata regbo fere rogo gimi raka tipa mi rengbe ka du pati gu bakere adunguratise mburuhe adu rii Ziazia Kekeapai, na ki rengbe ka bi dungu akutu awirina nga akumba na adee. Gere nga gupai ka bangire agonga ti ni ya.

Tifuo gu bandugu nangia ga Berlin gburuwa, i azaki gene fu aDezire Yekova tipa i tona gayo sunge tungusapai. Ni yangaraha, ani adu na rengba ka iriso Yekova Mbori na ranirii. Mi aaida ka kiiso gimi sunge tungusapai. Ono tie, mi anaagunde agunde be aboro. Mi abi tire nga gene bere te mbiko wa mi adu ni gbarigbari re na mbiko wa mi adi bakere gimi raka ni gude kina ku rogo gu ba nga ga gbarigbari aboro. Rogo gu garã nangia 1992, mi aasadi ka tungusapai tipa asaa 60 rogo diwi sa. Mi aima mangaha wenengai na ki gbia bakere ngbarago. Mi adiberã ka mangaha na adiwi dunduko na mi amangihe wo tipa agarã biata.

Mi naatingida gupai ti aregbo dunduko Ziazia Kekeapai agumbaha nga: “Da du dokoyo, ka mi adu nga dokoyo ya?” (2 Akorindo 11:29) Mi kindi na kina berã tire na ngbare. Mi naasada tire ka undo kura aboro wa vura du mi ni gbarigbari boro vuru. Wa duhe nga abe re ti ni te, si nasa re mi naabi rungo agu aboro adunga gene beyo ya. Mi ima ino wai duhe ho du boro ni na nyemu ka mangapai ono ka gene adunga be ni ya. Mi naasada ka ngarasa agu aboro du wa gure. Pa undo mi aboro ngba gi gene re naye na ngbarago fere.

Aregbo kinaho mi nidu na bakere gberãrago. Gupai mi akpinyemuhe nga ka du na abarapa re dunduko. Mi ima rengba ka manga dungu apai ni tire, ono si nadia bakere regbo, bakere asadatise na ome tipa ka manga agu apai re. Gupai mi namaa berãre tipaha na aʹuru dunduko nga: “Mi rengbe na manga apai dunduko rogo gu ko nanyakasa re.” (AFiripoio 4:​13) Yekova nafu gu ome fere mi aidaha na aʹuru dunduko tipa mi rengbe ka manga “agu apai” nga ga aʹuru ni basasa. Mi ima ino gupai nga Yekova ambunga re te. Na si nga ndu gupai mi aambunga ko ti ni ya.

Yekova ima fu maku fere, ki fu aborokporo fere​—nga gupai mi azangaha mbure ni gude na ni paranga re. Mi na bawene sino diare nga, Elke, du na nyemuse na nunga. Kurigure, badungu amirioni aDezire Yekova ima da ni awirinina​—nga agu aborokporo du rogo zegino dunduko.

Mi naagbia wasa a ti gu kidohe Mbori akidoho tipa Paradizo, nga gu nika mbakada “ahe dunduko ni vovo ho,” kodihe na abe re. (Yugoti 21:5) Mi naaruga tire na gi akidohe re gbe ho mi aberã ni kurii agu apai Yesu amangihe ho ko adu ni aʹuru kpotosende ane. Ko ahusi gbarigbari aboro na ki karaga tu gu kumba i katihe. (Matayo 12:13; Ruka 22:50, 51) Agu akidohe nga ga Yekova gbiati gu iiriwo apai Yesu amangihe ima sare mi du na gu kido nga barambeda, abarapa re dunduko nika du adu kubaha.

Gu bakere maku susi gbe nga, pa ye mi ka ino Yekova Mbori. Ko ima da ni buba na ni bakureami, ni bafu wasa fere, na ni gu boro nafu ome fere. Mi nabi tire wakina Bakindo Davide nga guko nakepai ki ya: “Yekova nga gi ome . .  si ki unda re, kpotore yo ki ningi.” (Atambuahe 28:7) Mi naida ka kakuti rengo rogo gimi raka nabaha. Mi adihe zanga abe re.