MO Berẽnga gupai nga mo sungu ka bi vidio pangbanga kura wene bata abia sa ni ngbaangba tiro gbe. Si tona na wai ni adu ni tooni gude kini wiriki taka aũmanzigo, na ki digi na wai ni amangi bakere ome tipa ka wirikaha dedede. Fuani, mo ki bi wai ni abibia fu dungu aboro, nita rogo kura arago tuturũ, na ki da ni gu baworimo zegino naini ni. Ka fuoho aturõngo ya niki gbinza na ni yangaraha ki kpi.

Gi vidio re nga ndikidi pangbanga nga ga raka gu boro adunga ti ni berewe ya. Ka si vura du nga gu boro re angia bata abia, boro birĩ-inohe, bangi-ambaro watadu gu boro aboro nainipai tipa ni gbe, kina gu bangisapai re rengbe ka manga tipa ni. Si rengbe kadu nga gu boro re aima manga dungu apai, ya mo mo arengbanga ka ida kuti gupai nga ka gbinza na kpio aanyasanga riipa gu boro re ya, ni aima rengba ka manga gu kura dungu apai te?

Ka si vura du nipa rungo, gere nga gupai napido rani dunduko. (Batungusipai 9:5) Ka ani vura manga ome kina wai vurũ, gene berani tipa ka ora be surungba gbinza na kpio te. Anga kina gure sa te, ani ima rengba ka kpi ti ai regbo be kaza watadu béno. Awa i nasakipai tipaha rogo Baibiri yo, ani wakina ndurõ “i nibi he ngbutuko, si ki gbandaka.”​—Yakoba 4:14.

Tipa kura aboro, i nabihe nga boro ima rengba ka kpi ti ai regbo, sidu, i na gu sino tiyo nga, “ani rí he ki nimbiri he, bambiko gba ani akpí akpi.” (1 AKorindo 15:32) Ono ya mo mo aidanga kuti gupai nga gu ngbatunga raka re nayugo gupai nga aboro ima ida kuti gu rengo nga ka boro oronga be kpio te te? Ti gu kura regbo, ho du boro ni rogo kpakaraapai, ni rengbe ka sanahe nga, ‘Ya mo gere nga gu yangara raka duho?’ Wari rengbe mo ka gbia karagapai ni kuti gi sanahe re?

Dungu aboro naberãha nga birĩ-inohe nika fu karagapai fuyo. Sonakumbatayo rogo birĩ-inohe gbiati adawa ima gizosi gaani raka tooni. Na aboro birĩ-inohe namanga ome tipa ka undo aboro i raki ni gbangaha kumbatayo. Kangia i adu na diabese watadu i adunga na ni te, gu sanahe duho kindi nga: Tipagine ani agbinza ti ni na kini kpiki? Ya mo maabangirise ho nga i nika diabe gu vurarani nga kpio? Gu kekeapai ngbefuo gere nika sakapai tipa gipai re na ki fu karagapai sa gu sanahe nga, Ya mo gere nga gu yangara raka duho?