Ga Moize aNdiko adu na dungu arugute rogoho naabipa girisotise wa ngbatunga agu apai du tipa ga kpanda ti boro, ngbataka, na pa mangapai na kangba aboro gbiati kangba anya. Na si afu arugute a tipa wai aboro anirengbe ka dia biriko tiyo kusayo. I anaamanga gipai re nifu yo motumo, zunda tiyo, watadu migido kure anya ti bamotumo.—Pa Mot., akapita. 11-15; Geda, kapita. 19.

Agu abangbembatayo nangia aYudo anaafura tipa agi andiko re na afutufutuhe dũ. Buku sa naya agu apai nanaabirikosi boro, i “anisasanahe tipa ka i ino wai du gu biriko re arengbe ka zio kura aboro, wai rengbe he ka kparaka, agu ahe narengbe ka biriko na agu naarengbanga ka biriko ya, na ni yangaraha, gu gene sinombori i anirengbe ka mangaha tipa ka giriso boro ngbaha.”

Asogo Yesu asanako nga: “Tipagine gamo abawiriki amanga nga sino ga aYudo abaakumba ti ni ya, i niri gayo kpokuta na beyo kina ku ho?” (Mk. 7:5) Agi avura Yesu nangia abangbembatayo rogo pambori re aayanga si ni gbegberẽhe tipa boro rihe na bibiriko beni te. A wa gayo sino irisombori adu, agi abangbembatayo re aaida gupai nga i uka ime ti be aboro mbata fu riyo riahe. Gu buku i nidi pai mbata rogoho ape kurapai nga: “I anaasakapai asaka a tipa gu ngbatunga ahe si aida i mangisunge na ni tipa ka uka ime ti be, gini ngbatunga ime rẽ tipaha, da si aida ni ukaha, na bange bee aboro wai si aida i uka ime ti ni.”

Ga Yesu mangapai kuti agi andiko nangia ga aboro re adu gbua taata. Ko aya fu gu ga aYudo abangbembatayo rogo pambori naadu rogo bambata sa kama agarã wẽ: “Yesaya agumba pai tipa roni nga airabiriki ni rengo, wa du he ni keke he, ya ‘Agi aboro re i nairisa re kina ngbayo yo, ono kpotoyo yo ti re tuturũ; ono i nauda re auda vurũ, niyugu gayo apai nga kina ga aboro rugute.’ Oni mbu gu rugute nga ga Mbori ki ka kuti sino aboro.”—Mk. 7:6-8.