‘Ruru Boro Angi Angi Rogo Yekova’ Yo

GARÃ Diana ima susa 80. Kumbari aambu be gu kaza nagbarasa berã boro na ko araki rogo gu ba i angerafuo aborokaza rogoho tipa bete agarã mbata fu ko kpi. Awiiri ue aima kpiko a na ri kini mbu be gu kansa nga ga momuse. Ono ho awirina abi Diana ni badunguratise watadu gene tungusapai yo, i nabi gupai nga ri na ngbarago ti aregbo dũ.

John angia gu babiapai ninaata ata tipa agarã naima susa 43. Ko aima kpinyemu gako sunge ni kerehe na si adu fuko wa raka ko! Ono tie, ko ambu mangasunge ni gu babiapai ninaata ata tipa ka ngerafuo gumeko naawoka na awere ko namangasunge rogo gu dungurati du ko rogoho. Ho agu aboro naini John mbata naabi ko ni ba bakere adunguratise yo watadu ba kikindigi adunguratise yo, i naabi gupai nga pai ho aria tihe tipa ko te. Ko kindi na bakere ngbarago.

Tipagine du aDiana na John ti ni na ngbarago? Wai rengbe gu boro narungo kadu na ngbarago? Wai rengbe boro kadu na ngbarago ka si vura du vurũ nga ni amanganga gu sunge berewe ni aima kpinyemuhe te? Ziazia Kekeapai nafu karagapai furani, si naya: ‘Ruru boro angí angi rogo Yekova’ yo. (Tam. 64:10) Ani rengbe ka giarogo gi rengo yo re gbe ka ani ini gupai rengbe ka fu nyenye ngbarago furani na gu arengbenga ka fuhe ya.

GU NGBARAGO DU TIPA BETE REGBO

Gu kura apai kinaho ninaaye na ngbarago ti aregbo dũ. Ni kpiapai, mo berẽnga pa agu aboro du rogo nyemuse yo naida ka manga rogatise, watadu mo berẽnga pa gu boro da ni vungugude watadu ho boro agbia vovo sunge ni rogo ga Yekova riigbu. Agi apai re dunduko naye na ngbarago mbiko si nga gamahe be Yekova. Ko du namoimburu rogatise, na ki saha furani taata tipa ani vunguagude, na ki moi asunge ani naamangaha rogo gako riigbu.​—Bam. P. 2:18, 22; Tam. 127:3; 1 Tim. 3:1.

Ono tie, gu kura apai kinaho naye na ngbarago tipa bete regbo. Si nafu kina gberãrago nga boro ima rengbe ka zanga du niruru ni fu gani badiarogatise watadu badiarogatise ima rengba ka kpi. (Yeze. 24:18; Osea 3:1) Gu kura agude ima rengba ka basasangba avunguyo na ki basasangba Mbori, isoke si ki da ti gupai nga i kusiyo kusayo rogo dungurati. Awiri Samuere aairisongo Yekova ngba wene gene te na dungu akpakarapai naadu rogo ga Davide kporo mbiko ko amangi ingaapai na Bataseba. (1 Sam. 8:1-3; 2 Sam. 12:11) Ho ngbatunga apai wa gure  amanga ni, si ayengo na ngbarago furani te ono kina imisiri gbiati bakere gberãrago.

Wakina gure a, gu momu nga ga sunge du boro na ni rogo ga Yekova riigbu ima rengba ka digo, si ima rengba kadu nga si digi mbiko gupai nga ani nakakaza akakaza, si naida ani ngerefuo gaani aborokporo, watadu apai ariatihe rogo ga Yekova riigbu. Badungu agu aboro agu aˈariapai re namangi tipa yo ima gumba gupai nga i nazingo tipa wai gayo sunge anaafu ngbarago fuyo.

Ani ima rengba ka bi gupai taata nga ngbatunga agu apai re naye na gu ngbarago du tipa bete regbo gbua. Sidu, ya mo gu kura ngbarago ho rengbe ka nyeanye kindi apai ki vura kpakara rogo raka yo vurũ? Si kinaho, bambiko Samuere, Davide, gbiakuti kura aboro adu kindi na ngbarago i ki vura kaa gbiatiyo na akpakarapai vurũ.

GU NGBARAGO NANYEANYE KINDI

Yesu aima ino guhe nzunzu nga ngbarago. Ho ko aaraka ni ngbangbaturũ yo mbata fu ko ye ni boro ku auru kpotosende, apai adu ni bawenehe, ko ‘aangi na auru dũ barabangiri, [Yekova].’ (Snz. 8:30) Ho ko adu ni auru kpotosende, ko anaagbiatiko agbia na akpakarapai ti kura aregbo. Ono wa si avura duwo, Yesu anaagbia ngbarago ti manga ko gupai Bako akpinyemuhe. (Yo. 4:34) Na gu igirã tigaha ko adu rogoho rogo agu asa naadu mbata fu ko kpi? Ani nageda gupai rogo Ziazia Kekeapai yo nga: “Ko nahi pa wagiwagi ngua mbiko gu ngbarago nadu fu ko ku mbata yo.” (Eb. 12:2) Ani ima rengba ka wirika dungu apai ti apai ue nga gu Yesu agumbaha nibipa ndikidi ngbarago.

Ho agu abawiriki Yesu akedi yo 70 i ndu ka tungusapai ayego ni, i adu na ngbarago mbiko agu apai dunduko i amangihe zavura ki do adaimona. Ono Yesu aya fuyo: “Ka oni ngí nga mbiko gere nga atoro du ni zogozogo ra fu roni ya; ono oni ngí angi bambiko rimoroni du ni keke he ngbangbaturũ yo.” (Rk. 10:1-9, 17, 20) Nirengo, ida Mbori na yo nga gupai paha anyaki kisusi na si naye na bakere ngbarago fuyo kisusi gu sunge naadu beyo rogo ga Mbori riigbu. Ino abawiriki gupai nga Mbori nika tingidapa yo atingida​—aaye na bakere ngbarago fuyo.

Ti gu kura regbo sa, ho Yesu aafura ni fu ndurumo aboro, rago aima ngba ti gu kura dee sa ni boro Yuda na gako yugopai si ki sa gupai nga ri ya fuko, nako ima du na ngbarago. Ono Yesu arugu ri ki ya: “Aboro [ngbarago] nga agu yo ti gure, nagia ga Mbori pai, ki nika kuti ni!” (Rk. 11:27, 28) Padu ani na wene agude  berani ima rengba ka ye na ngbarago furani, ono gu ngbarago ani agbiaha ti gaani pagume na Yekova mbiko ani nagiasangba ko ima kio kisusi.

Nirengo, ani nadu na bakere ngbarago ho ani aino gupai ni nga Yekova na ngbarago na ani. Wa vura duhe nga ngbarago ho boro agbiaha ho du ni ni rogo aˈasada te, si adianga gu inohe kusayo du ani na ni nga Yekova na ngbarago na ani te. Kuba gure, ho ani ahi agu aˈasada re ni, gaani ngbarago naadu ni bakerehe gbe. (Rom. 5:3-5) Kurigure, Yekova nafu gako ziazia toro fu agu aboro nakido kuti ko, na ngbarago nga papara gako zuzu toro. (Gara. 5:22) Gipai re naundo rani ani ini ndu gupai Atambuahe 64:10 aya ti ni wẽ: ‘Ruru boro angí angi rogo Yekova’ yo.

Gipai re nasaka ndu gupai aDiana na John, i nifura tipa yo kuari arengbe kadu ti ni na nyenye ngbarago i ki vura kaa gbiatiyo na akpakarapai vurũ. Diana aya: “Mi aima maa Yekova ni gimi bagbuko, kina wai gude nidu na avunguru.” Waigu ri aini gupai nga Mbori ima ida na ri? Ri ape kurapai berewe nga: “Mi naberã gupai nga Mbori ima fu rengba fere tipa mi naandu kindi kumbatayo kaa tungusapai dedede na ngbarago kpakpure yo.” John, nga gu ko naandu kindi kumbatayo kaa tungusapai zaaza fuo mbuko gu sunge nga ga gu babiapai ninaata ata asaki ndu gupai naundo ko ni bakerehe tipa ko du kindi zaaza gene tungusapai yo, ko aya: “Natona rogo gu garã nangia 1998, ho i afu gu sunge ni fere nga ga nungusa gu Sukuru Du Tipa Yugopai fu Amoyambu, mi ima manga wisigopai nisase susi wai mi anaamangaha mbata.” Ko afura tipa tiko na diako ki ya: “Agu aˈariapai ani amangihe na diare asaha furani taata ani du zaaza ka amanga ai gu sunge Yekova nika fuhe furani. Ani ima mangaha na ani abiranga tirani te.”

Badungu aboro naima bihe nitiyo nga gupai du rogo Atambuahe 64:10 nga rengo. Ni kpiapai, mo bingo gupai naadu tipa agu arogotise namangisunge rogo gu Betere du Amerika yo tipa agarã naima susa 30. Fuo gure, i kini kedi yo i ndu kaa tungusapai ni kparakpara abazakigene. I aya: “Gberãrago ni guhe du wa ka si mangi boro ho ni azanga guhe ni ni nakpinyemuhe ni bakerehe,” ono i ape gupai berewe nga: “Ka mo dunga na gberãrago nyeanye kindi te.” Nibasa fuo tona yo gayo vovo sunge, i atona tungusapai na dungurati. I agumba gupai berewe a nga: “Ani amangi kparakpee tipa agu apai ani aaidaha. Na bi ani gupai nga Yekova nakaragapai kuti gaani akparakpee aima ngarasa rani na ki fu ngbarago furani. Ho ani ada ni rogo gu dungurati i afu rani ku rogoho, gu kura aboro rogo dungurati atona ka mangasunge abazakigene, na ani agbia aboro ue ani awisigo Ziazia Kekeapai na yo.”

“KI NINGI NYE ANYE KINDI”

Nirengo, anga si taata kadu na ngbarago ti aregbo dunduko te, aregbo kinaho du ani na gberãrago. Ono wa vura duhe wo, Yekova nakido rani na agu afugo du rogo Atambuahe 64:10. Zavura ti agu aregbo du ani na gberãrago, ani ima rengba kadu na gu kido nga ka ani nye ni ruru rani ani ki vura kaa ndu kina rogo gini akpakarapai vurũ, ani nika “ngí angi rogo Yekova” yo. Kurigure, ani ima rengba ka ngera kumbatayo tipa gu regbo gu ga Yekova kidohe du tipa “vovo angbangbaturũ na vovo kpotosende” nika digiso tihe ti ni. Na i nika dia zangarengba kusayo nyeanye kindi. Ga Mbori aboro dunduko nika “dú na ngbarago ki ningi nye anye kindi” mbiko agu apai dunduko Yekova nika mangaha.​—Yes. 65:17, 18.

Oni berẽnga pa gupai nika manga: kpotorani nika du zanga akaza na ani nikaa zinga wiso na ome tirani wenengai. Ka si vura du vurũ nga kina gini apai naaba gberãrago tirani kusayo, si ayengo berewe ku berãrani yo te. Yekova nakido rani na gupai nga, ani ‘atíngida nga pa gu bambata apai te na si ayé nga ku berãrani yo a te.’ Ani nika dia gu gaani aboro kugume nakpiki ho i nika zingisa yo ni be kpio. Badungu amirioni aboro ka i agedanga yo ya nika du kina wai avungu gu degude garãri adu 12 Yesu azingisi ri be kpio adu: “Rago angbaangba tiyo bakere gbe,” NW. (Mk. 5:42) Ni yangarapai tie, aboro dunduko auru kpotosende nika da ni ‘ruru aboro’ na kini “ngí angi rogo Yekova” yo nyeanye kindi.