1. Ginipai Yekova ambugene furani ani mangihe?

YEKOVA ima mbugene furani tipa ani sia agu apai ani aidaha rogo gaani raka yo. Ko nayugo wai furani rengbe ani ka manga agu asiapai du ni wenehe, na ko naundo rani ani du na diabese ho ani namangi agu adiaberã ni nafu ngbarago fuko. (Tam. 119:173) Sidu, ho ani amangapai ni kuti gu weneapai ani awirikaha rogo Ziazia Kekeapai yo, si nasa gupai nga ani mangi wene adiaberã.​—Eb. 5:14.

2. Gini kpakarapai rengbe ani ka gbiatirani na ni fuo manga ani diaberã?

² Ono zavura ho ani namangi wene diaberã ni, si ima rengba kadu ni mbumbuhe tipa ka digiso gupai ani adiberã ka mangaha. Oni bingo bete akpiapai: Paranga wirina diberã ka geda Ziazia Kekeapai naabaha. Ko gedihe ageda tipa bete aposo, ono ko kini mbuhe bebere gene. Wirina diberã tipa ka mangasunge ni nazakigene ono ri nagbisigo pa gu regbo agbisigo kumbatayo ri nika tonaha ti ni. Gu gbuu nga ga abaakumba mangi diaberã sa nga i nika ndu ka ngarasa agu akandoro du rogo dungurati, ono dungu adiwi susi zanga i tona manga gupai i adiberã tipaha. Agu apai re dunduko ni bakiakia ono pai kinaho du kina sa tipa ha dunduko. Agu aboro re aima manga diaberã ono ka i amanganga gupai i adiberã tipaha ya. Agu aKristano naadu rogo bambata sa kama agarã Korinda yo aima gbiatiyo na kina gu bangisa kpakarapai re. Ani sakingo pai tipa gupai rengbe ani ka wirikaha beyo.

3. Gini diaberã aKorindo amangihe, ono ginipai namangi?

³ Bara rogo gu garã nangia 55 Fuo Batikayo Kristo, aKorindo amangi nyanyakipa diaberã. I agi gupai nga awirinayo Yerusarema yo na Yuda yo adu rogo bakere rungo na gu kura adungurati aadungura marã tipa ka undo yo. AKorindo angia wene sino aboro na ni aboro gamahe na i kini diberã a nga i naida ka undo agu awirinayo  naadu rogo bakere zingo re, sidu, i asana Pauro tipa wai rengbe yo ka undo awirinayo. Pauro akedi arugapai ku rogo dungurati na ki moi Tito tipa ko dungura gu marã si adu nga i nafuhe ni gamahe re. (1 Kor. 16:1; 2 Kor. 8:6) Ono fuo bete adiwi kusa, Pauro aye ka ino gupai nga aKorindo aafunga gu gamahe i aya i nika fuhe te. Ni sangbana gipai re, gayo gamahe adunga ho ti regbo tipa i ndu na ni ku Yerusarema yo wa sa na agu agamahe nangia ga gu kura adungurati te.​—2 Kor. 9:4, 5.

4. A wa duhe rogo 2 AKorindo 8:7, 10, 11, ginipai Pauro angarasi aKorindo i mangihe?

⁴ AKorindo aima manga wene diaberã, na Pauro aima tambua yo tipa gayo nyanyaki idapase na mbiko i aaida ka gamahe. Ono ko aima ngarasa yo a tipa i digisi gupai i atonaha. (Oni gedi 2 AKorindo 8:7, 10, 11.) Gayo kpiapai nayugo gupai furani nga si ima rengba kadu ni mbumbuhe zavura fu ruru aKristano i mangi gupai i nadiberã tipa ka mangaha.

5. Gini asanahe ani nika karagapai kutini?

⁵ Wakina aKorindo, si ima rengba kadu ni mbumbuhe furani tipa ani mangi gupai ani adiberã nga ani naida ka mangaha. Tipagine? Mbiko gaani zangarengba, ani ima rengba kaa gbisigo ho agbisigo. Watadu agu apai boro ainongo aino nga si nika manga ya ima rengba ka saha furani ni mbumbuhe tipa ani mangi gupai ani adiberã nga ani ka mangaha. (Batu. 9:11; Rom. 7:18) Waigu rengbe ani ka fugö agu adiaberã ani namangihe na ki kpariaha si ngia si naida ani mangi ariapai? Na waigu rengbe ani ka digiso gupai ani atonaha?

6. Ti gini regbo rengbe ani ka aria gaani adiaberã?

⁶ Gu kura nyanyakipa adiaberã kinaho ka ani aˈariangaha ya. Ni kpiapai, ani naka kuti gaani diaberã ka iriso Yekova, na ani nadiaberã ka nye ni rururani fu gaani badiarogatise. (Mt. 16:24; 19:6) Ono tie, gu kura adiaberã kinaho si aida i ariaha aˈaria. Tipagine? Mbiko agu apai du tipa boro naˈariatihe aˈaria. Gini apai nika undo rani ani mangi wene adiaberã kisusi?

7. Ginihe si aida ani kpari tipaha, na tipagine?

⁷ Mo kpari tipa tatamana. Yekova asa Yakoba ko ke gupai nga: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko.” (Yak. 1:5) Gu kura apai kinaho “zingo tatamana” amanga rani amanga rogoho wa du ani dunduko. Sidu, mo kido kuti Yekova ho mo amanga diaberã ni na ho mo aida ka aria gu diaberã ni mo namangihe. Yekova nika undo ro mo mangi wene adiaberã.

8. Gini wetekapai si aida ani mangihe mbata fu ani mangi diaberã?

⁸ Mo mangi wetekapai sirisiri. Mo gedi Fugo Mbori, mo gedi agu awaraga ga Yekova riigbu akusaha, na mo fura na agu aboro rengbe ka fu wene arugute foro. (Snz. 20:18) Ngbatunga gu wetekapai re na nyanyakipaha mbata fu mo mangi diaberã tipa ka aria gamo sunge marã, ka ga ku rogo kura ba, watadu ka sia gu ngbatunga wirikapai rengbe ka undoro kutingba gamo sunge tungusapai.

9. Tipagine duhe ti ni ni pa undo ani wisigi gaani ndu mangaapai ho ani aida ka diaberã ni?

⁹ Mo wisigi ndu gupai mo amanga diaberã ti ni. Yekova nawisigo kpoto boro yo, sidu, ndu gupai ani amangapai ti ni na nyanyakipaha fuko. (1 Sam. 16:7) Ho ani awisigo tirani ni, ani nabi ndu gupai abi ani amangapai ti ni. Ono tie, si naida ani wisigi tirani ka bihe singia gu ndupai re nga kina boro gupai du ngbaduraniyo watadu kura nduapai kinaho berewe. Nirengo, ani namanga gupai du ni ruruhe ka ani wisigi gupai nzunzu du ngbaduraniyo. Ka si du nga ndu gupai ani nadiberã ti ni ni irairaha, si nika kpakara akpakara furani ani mangipai kuti gaani adiaberã ka akpakarapai kuru. Ni kpiapai, paranga wirina ima rengba ka diaberã tipa kada ni bazakigene. Ono fuo bete aregbo, ko kini kaa sota asota ka ringbisa agu asa si naaidaha be abazakigene na ko kini gbia kina bete ngbarago gbua gene tungusapai  yo. Tipagine? Si ima rengba kadu nga ko aberẽ gupai nga ndu mangako sunge abazakigene angia gu nyemupai ko adu na ni tipa ka sa ngbarago ti Yekova. Ono ya mo si rengbe kadu nga ndu mangako sunge abazakigene adu nga ko aaida ka sa ngbarago ti avunguko watadu gu kura boro?

10. Ginipai si aidaha tipa ka manga ariapai?

¹⁰ Oni berẽnga pa bawiriki Ziazia Kekeapai nga guni diberã tipa ka mbu vugundö. Ti bambataha, ni mangi asadatise amanga tipa poso sa watadu ue, ono ni kini vugundö berewe. Ni yangaraha tie, ni kini du na diabese zanga vugundö berewe! Gani nyemuse tipa Yekova na gani nyemupai tipa ka sa ngbarago Tiko ima undo ni ni dibe gu sino nga ga vugundö re.​—Koro. 1:10; 3:23.

11. Tipagine si aida mo du ti ni na agu asasa mo aida kada ti ni?

¹¹ Mo du na agu asasa mo aida kada ti ni. Ka mo du na gu ndikidi asasa mo aida kada ti ni, si nika du foro taata tipa mo nyasi gupai mo atonaha. Ni kpiapai, mo ima rengba ka diaberã kaa geda Ziazia Kekeapai dedede. Ono ka mo aadunga na sasa berãro yo ya, mo ima rengba ka zanga manga gupai mo adiberã tipaha. * Watadu abaakumba rogo dungurati ima rengba ka diaberã tipa kaa ngarasa akandoro dedede, ono fuo bete regbo, ka i amanganga pai kuti gu diaberã re ya. Tipa kadu na diabese i ima rengba ka sana ngbatunga asanahe wa gu nga: “Ya mo ani ini agu awirina rengbe ka gbia undo gbe ti gu ngarasaro ka ani fuhe fuyo? Ya mo ani moi regbo tipa ka ndu ka biyo ti ni?”

12. Ginipai ani naima rengba ka mangaha, na tipagine?

¹² Mo du na ruru bipai. Boro ho dagbarani yo du na gu regbo, ahe watadu ome si aidaha tipa ka manga ai gupai ani akpinyemu ka mangaha te. Sidu, si naida ani du na ruru bipai na rugatinapai. Ka si rengbe, mo ima rengba ka manga ariapai ti gu diaberã mo amangihe ka mo bi gupai nga mo arengbanga ka digisoho te. (Batu. 3:6) Ono tie, si ima rengba kadu nga mo wisigi gamo adiaberã berewe, ki mangi agu aˈariapai si aidaha, na ki bihe nga mo ima rengba ka mangapai kutini awere. Apai gere bisue rengbe ka undo ro mo nyasi gupai mo atonaha.

13. Waigu rengbe mo ka gbia gu ome mo aidaha tipa ka mangapai kuti gamo adiaberã?

¹³ Mo kpari tipa ome ka mangapai. Mbori ima rengba ka fu “nyemupai na ome” foro tipa mo mangipai kuti gamo adiaberã. (Frp. 2:13, NW) Sidu, mo sana Yekova tipa gako ziazia toro si fu gu ome foro mo aidaha. Mo nindu kindi kumbatayo kaa manga kparakpee ka si vura kaa ngera vurũ wa mo agbianga karagapai kuti gamo kparakpee te. Wa gu Yesu agumbaha: ‘Mo sána he tipa he, i ki fu he [ziazia toro] foro.’​—Rk. 11:9, 13.

14. Waigu rengbe gu rugute du rogo Ruka 14:28 ka undo ro mo mangipai kuti gamo diaberã?

¹⁴ Mo sogima pai. (Oni gedi Ruka 14:28.) Tipa ka nyasa ai gupai mo natonaha, si naida mo sogimaha. Fuoho, mo ki mangipai kina kuti gupai mo nasogimaha. Wakina gure a, ka mo mangi diaberã, si naida mo ke agu apai sande mo aida ka mangaha tipa ka manga gupai mo nadiberã tipaha. Ho du mo ni na bakere sunge bero tipa ka mangaha, ka mo kparakaha ku rogo yo rukutu kaa mangaha, si nika sa ro mo bi bakio gupai mo namangihe. Pauro angarasi aKorindo tipa i kpara he kubani ni gayo agamahe rogo “bambata uru nga ga poso” kuba gupai nga ka sungudo ko ko ye mbata i kini ru ka dungura gu gamahe re. (1 Kor. 16:2) Kparaka kikindigi asunge ku rogoyo rukutu ima rengba ka sa ro ka ome ro batingo ni kerehe ho mo amanga agu asunge re ni ya.

15. Fuo so mo gima pai, ginipai si aida mo mangihe?

¹⁵ Mo ke agu apai sande mo aida ka mangaha, si nika du taata foro tipa mo mangihe. (1 Kor. 14:40) Ni kpiapai, i fu gu rugapai fu gu rondo nga ga abaakumba nga i sia bakumba ni nikeke ai gupai gu rondo nga ga abaakumba nadiberã tipaha,  kodihe na gu boro nika manga gupai re na gu regbo i nika nyasaha ti ni. Si nadu fu agu abaakumba napekafuo gi rugapai re taata tipa i mangi gupai i nadiberã tipaha. (1 Kor. 9:26) Mo ima rengba ka asada ka mangapai wakina gure rogo agu apai yo nga ga raka mo amangaha na aˈuru dunduko. Ni kpiapai, mo ima rengba ka kepa agu apai mo aida ka mangaha rogo aˈuru ni basasa na ki kepa gu bambatapai mo aida ka mangaha ti tonatonaha. Gipai re nika undo ro angianga tipa mo nyasi kina gupai sa mo atonaha ya, ono mo mangi badungu apai vuru bete regbo yo a.

16. Ginipai si aida mo mangihe tipa ka mangapai kuti gamo diaberã, na waigu ARomo 12:11 asongoda gupai re?

¹⁶ Mo mangi asadatise. Si naida bakere asadatise tipa ka manga gupai mo nasogima ha na ki nyasi gupai mo natonaha. (Oni gedi ARomo 12:11.) Pauro aya fu Timoteo wẽ ko ‘niibérẽ pa tiko’ na kini “ka kuti” padu ko ni wene bayugupai. Gu rugute re nabipa gu kura asasa abi nga ga toro.​—1 Tim. 4:13, 16.

17. Waigu rengbe AEfeso 5:15, 16 ka undo rani ani mangi agu apai ani nasogima mangaha?

¹⁷ Mo mangisunge na gamo regbo na tatamana. (Oni gedi AEfeso 5:15, 16.) Mo moi regbo tipa ka manga gupai mo nadiberã tipa ka mangaha na ka mo arianga gu regbo ya. Ka mo sungudingo gupai nga apai dunduko du wenengai mbata mo kini ru ka tona manga gupai mo nadiberã tipaha ya. Mbiko si nangera wa mo adunga na gu regbo apai nika du dunduko ni rengberengbehe te. (Batu. 11:4) Mo du na tatamana tipa ka zanga mbu agu apai adunga na nyanyakipaha ya si di gamo regbo na ki sa gupai nga ka ome dunga berewe tiro ka manga agu apai du na nyanyakipaha ya. (Frp. 1:10) Ka rengba du, mo sia gu regbo aboro nikaa fudanga ro gbe ti ni ya. Mo gumba gupai fu aboro nga mo naida regbo tipa ka maaberã ro kuti gupai mo amangaha. Mo kisi gamo terefuni na mo ki bi gu kekeapai kusa nga ga e-mail watadu gu i nakedihe foro rogo aũfugo dagbase. *

18-19. Ginipai rengbe ka undo ro mo naasada kindi kaa manga gupai mo nadiberã ka mangaha ka si vura du vurũ nga si taata te?

¹⁸ Mo gbeberã ro kuti asangbana gamo diaberã. Sangbana gamo diaberã wakina digido gu ba boro andu ku rogoho. Ka mo aida nzunzu kada rogo gu ba mo andu ku rogoho, mo niikaa ndu kindi ka gene vura kiso vurũ na mo nika bihe nga si naida mo ndu ngba kura gene. Wakina gure a, ka ani moiberãrani kuti sangbana gaani adiaberã, omerani abatanga ni ipo te ka ani vura kaa gbiatirani na agu apai naga na ani kusayo vurũ.​—Gara. 6:9.

¹⁹ Manga wene adiaberã ima du ni kpakarakpakaraha, manga agu apai ani nadiberã tipaha ima rengbe kadu ni kpakarakpakaraha a. Ono na gu undo nga ga Yekova, mo ima rengba ka gbia gu tatamana na ome mo aidaha tipa ka nyasa gupai mo natonaha.