BAKABANGIRISE ima rengba kadu wakina rõrõihe ngbadurani yo. (Snz. 12:25) Ya mo mo arungongo bambiko mo nabaka bangiro? Ya mo mo abingo tiro nga tona ane ka ndu kumbatayo ka mo hinga pai berewe te? Ka singia wo duhe, mo nisaro te. Badungu rani aima du na bakere mbugo, bakabangirise, na bakere gberãrago tipa dungu nduapai. Ni kpiapai, gu kura aboro aima digo ni ngerefuo gu gayo aborokporo nawoka, agu akurayo ki zanga agu aboro i akpinyemuyo rogo kpio yo, na agu akurayo kini rungo mbiko gu gberãngo naye be ome zegino. Ono ginipai nika undo rani ani dibe bakabangirise? *

Ani ima rengba ka wirikapai ni bakerehe tipa wai ka diabe bakabangirise niwisigo ani ga Bakindo Davide kpiapai. Ko agbiatiko na dungu kpakaraapai rogo gako raka yo, zavura gu naandu ti kura aregbo sa kina kpio. (1 Sam. 17:34, 35; 18:10, 11) Ginipai naundo Davide ko hipai ho ko aabakabangiriko ni? Waigu rengbe ani ka wirika gako kpiapai?

Davide agbiatiko na dungu kpakaraapai ti bangisa regbo sa. Oni berẽnga pa gupai namangi ko ho ko aora ni be Bakindo Saura, nga guko naaida ka imo ko. Ho Davide na gako akumba akaraga tiyo ni ku kpuyo yo Zikeraga yo, i abi gupai nga avurayo aima dĩ gayo ahe, ki zokodi akpuyo na ki di gayo aborokporo nizizi yo. Waigu Davide amangipai? “Dawidi na agu akumba naadu na ko ki poi ku ari ki nikpari ni aume, daho ome adu nga ni ti yo sa kpe berewe ya.” Gu ga Davide akumba ko anaakido akido kuti yo akiisi gako gberãrago berewe kina kumbatayo ‘nigumba pa sopa ko ni ambia.’ (1 Sam. 30:1-6) Davide adu na kere akpakarapai biata ti bangisa regbo sa: Gako aborokporo adu rogo kerepai, gako akumba kini idi ka imoko, na Bakindo Saura aado fuo ko kindi. Oni berẽnga pa gu bakabangirise Davide arengbe kadu rogoyo tigaha!

Ginipai Davide amangihe fuo gure? Ko ‘anyakasi tiko rogo Yekova gako Mbori yo’ nibasa. Waigu Davide arengbe ka manga gipai re? Sino Davide nangia kaa kpara fu Yekova tipa undo na kini berẽ tipa wai Yekova aundo ko kusayo. (1 Sam. 17:37; Tam. 18:2, 6) Davide aini gupai nga si aaida aida ko sana Yekova tipa gupai si aida ko mangihe, sidu, ko asanahe tipa ka inopai be Yekova tipa gupai si aida ko mangihe. Tingbafuo Davide gbia rugapai be Yekova, ko amangipai nibasa. Ni sangbana gipai re, Yekova afu maku fu Davide gbiati gako akumba, na i ki batasi gayo aborokporo na ki karaga gayo ahe berewe kubaha. (1 Sam. 30:7-9, 18, 19) Ya mo mo bingo agu apai biata Davide amangihe? Ko akpari fu Yekova tipa undo, ki berẽkuriipa wai Yekova anaamangapai na ko kusayo, na ko ki mangipai kuti ga Yekova rugapai. Waigu rengbe ani ka wirika Davide? Oni wisigingo pai tipa agene biata.

1. Mo mangi kparakpee. Ai gu regbo ani atona kaa bakabangirani, ani ima rengba ka kpara fu Yekova tipa undo gbiati tatamana. Ho ani apeka pa agu apai ni dunduko fuko nafu bakabangirise furani, si ima rengba ka undo rani ani du wenengai. Watadu ani ima rengba ka manga wiri guru kparakpee kukiri ka agu apai du tipa rani mbugene furani ani mangihe wo ti gu regbo re. Ti agu aregbo dunduko ani asana Yekova tipa undo, ani nayugo gupai nga ani na bakere kido kuti ko wakina  gu Davide adu na ni nga guko naya: “Yekova nga gi mbia, nga gi nyanyaki gbata nga gi batasi, gi Mbori nga gi mbia, mi akida kuti ko.” (Tam. 18:2) Ya mo kparakpee nzunzu na undo ti ni? Wirina nga nazakigene du rimori nga Kahlia aya: “Tingbafuo manga mi kparakpee, mi naagbia zereda. Kparakpee naundo re dedede mi naaberã wakina gu Yekova aberã, na mi kini kido kuti ko ni bakerehe gbe.” Ni rengo, kparakpee nga nyanyakipa gamahe be Yekova nga gu naundo rani ani dibe bakabangirise.

2. Mo berẽpa wai Yekova aundo ro kusayo. Ho mo aberãpa agu apai ni namangi ro, ya mo mo rengbe ka berãpa agu aasada mo adu na rengba ka hihe mbiko kina ga Yekova undo sa? Ho ani aberã ni kuriipa wai Yekova aundo rani gbiati kura gako amoyambu bakuru kusayo, ani nagbia bakere zereda na kini kido kuti Yekova ni bakerehe. (Tam. 18:17-19) Bakumba du rimoko nga Joshua aya, “Dungu akparakpee duho bere ni tangaratangaraha Yekova nakaragapai fere kutini. Gipai re ima undo re mi tingidipa agu aregbo mi asana Yekova tipa pai na ko ki mangi kina boro gupai mi aidaha.” Ni rengo, ho ani aberãpa agu apai ni Yekova naima mangaha furani, ani nagbia ome tipa kaa sovura kindi kuti bakabangirise.

3. Mo mangipai. Mbata fu ani diberã tipa gupai ka ani mangihe ho du pai ni, ani ima rengba ka manga wetekapai rogo Fugo Mbori yo tipa bawene rugapai. (Tam. 19:7, 11) Dungu aboro bi gupai nga ho i amanga wetekapai ni riipa kura veresi, i nadu na rengba ka rugatiyo na pa wai rengbe yo ka mangasunge na gu veresi re rogo gayo raka yo. Bakumba du rimoko nga Jarrod aya: “Pa wetekapai ima undo re mi wirikipai tipa veresi na ki rugutire na gupai Yekova agumbaha fere. Gipai re ima undo re nzunzu mi idi kuti gupai mi agedaha tipa wa ka mi mangipai kuti gako arugapai.” Ho ani agbata ga Yekova arugapai ni rogo Ziazia Kekeapai yo na kini mangipai kuti agu arugapai re, si nika du taata furani ani gbia zereda gbiati ngbarago ho du ani ni rogo bakabangirise.

Davide aima rugatiko na gupai nga tipa ka diabe bakabangirise, ko aaida aida na ga Yekova undo. Ko aima du na bakere tambuahe tipa ga Yekova undo si ki sako ko ya: “Mi nagu ri ngapa mbiko gi Mbori. Nga gu Mbori naukadi re na ngarã.” (Tam. 18:29, 32) Ani ima rengba kaa bihe nga gaani akpakarapai ima du ni kere kpakarakpakaraha, na gene tipa mbakadaha watadu ka hihe te. Ono na ga Yekova undo, ani ima rengba ka hi ai akpakarapai! Ni rengo, ho ani akpara ni tipa ga Yekova undo, na kini berẽkurii agu apai dunduko ko namangihe furani, na kini mangipai kuti gako arugapai, ani ima rengba kadu na gu kido nga ko nika fu gu ome afu furani na tatamana ani aidaha tipa ka diabe bakabangirise!