1. Waigu kura aboro nidu ho i afura ni fu kura aboro gene tungusapai yo? (Oni bi sura a.)

 WANGIA ani ga Yekova aboro, ani natungusapai fu kura aboro bambiko ani ima kpinyemu gu Barani du ngbangbaturũ yo na ani naida ka undo gaani amurakporo tipa i ye ka inoko. Badungu abatungusipai ni naagbia ngbarago ti sunge tungusapai. Ono tipa kura aboro, si ima kpakara fuyo tipa i gbia ngbarago ti sunge tungusapai. Tipagine? Bete aguyo ima rengba kadu na bakere zee na kini bihe nga wene abayugupai nga yo te. Aguyo ni naadunga wenengai ka ndu ku rogo akporo zanga i yambu yo ayamba te. Aguyo nagunde nga aboro nika zinga kuti yo. I aima yugopai fu agu akurayo nga ka i banga gberãrago ti kura aboro ya. Wa vura duhe nga i ima kpinyemu Yekova ni bakerehe, agi awirina re nabihe ni mbumbuhe tipa ka ndu fuo agu aboro i ainongo yo ya na wene pangbanga. Wa vura duhe wo, i ima inopa wai nyaki gi sunge re na i kini tungusipai dedede. Yekova na bakere ngbarago na yo!

2. Ka si dunga mo nasota asota ka gbia ngbarago ti ngba sunge tungusapai, tipagine si aidanga rago gberẽ ti ni tiro ya?

² Ya mo mo naasota ti kura aregbo ka gbia ngbarago gene tungusapai yo mbiko agi abipai re? Ka ngia wo duhe, ka rago gberẽnga tiro ya. Gamo zanga du na kido ima rengba ka yugo gupai nga mo na umbasitise na mo aidanga ka gbeberã aboro kuti ro ni bakerehe te, na si nayugo gupai a nga mo aidanga ka ti kango na boro te. Na boro ho naida ka ba gberãrago ti kura aboro te, gu susi gbe nga ho ni aˈasada ka manga wenepai ni fu kura aboro. Gu Bamo du ngbangbaturũ yo ima ino wai du mo nzunzu na ko naida ka fu gu undo foro mo aida na ni. (Yes. 41:13) Rogo gi kekeapai re, ani nika sakapai tipa aberãpai bisue  nga gu rengbe ani ka mangapai kuti ni nibipa agu abipai re na wai rengbe ani kadu na ngbarago ti ngba sunge tungusapai yo.

MO MBU FUGO MBORI SI NYAKASI RO

3. Ginipai naundo gu nebi nangia Yeremaya ko tungusipai fu kura aboro?

³ Zavura mbata kusayo, gu pangbanga naye be Mbori aima nyakasa gako amoyambu ti gu regbo i adu na kpakarakpakara sunge beyo tipa ka mangaha. Ani bingo gu kpiapai nga ga gu nebi nangia Yeremaya. Ko aabaka kina bangiriko ho Yekova afu gu sunge ni fuko nga ga tungusapai. Yeremaya aya: “Mi aina nga waĩ ka fura te, bambiko mi nga kina paranga.” (Yere. 1:6) Ginipai naundo ko ko du na wingbaduse tipa ko tungusapai? Ko agbia ome ti gupai Mbori apehe. Ko aya: “Si kpotore yo wa ka si du nga we kisi yo ku rogo amemere yo, mi ki nimbu be zada ha koyo.” (Yere. 20:8, 9) Wa vura duhe nga, gu dagbarago Yeremaya aatungusapai rogoho adu ni kpakarakpakaraha, gu pangbanga i afuhe fuko tipa ko tungusihe aima fu gu ome fuko ko aaida na ni tipa ka manga gu sunge re.

4. Ginipai namanga ho ani ageda Fugo Mbori ni na kini berẽkuriihe? (AKorosaio 1:9, 10)

⁴ AKristano nagbia gu ome i aida na ni rogo afugo Yekova yo nga gu du rogo Baibiri yo. Ho gu mokedi nangia Pauro aakepai ni fu gu dungurati nadu Korosai yo, ko ape gupai nga, wirika yo badungu apai tipa gupai Yekova akpinyemuhe nika undoyo tipa i naandu kumbatayo “ki nizu rogo wene apai dũ” na ngba gi gene re, i “ki ta ata ki re are na gu pai Gbia akpi nyemu he.” (Oni gedi AKorosaio 1:9, 10.) Gu wene sunge re aakoda sunge tungusa wene pangbanga. Sidu, ho ani ageda Fugo Mbori ni na kini berẽkuriihe, gaani idapase kuti Yekova nanyaka na ani ki inipa nyaka pa tungusa gu wene pangbanga nga ga Kindo.

5. Waigu rengbe ani ka gbia bakere undo ti gaani geda Baibiri na wisigoho?

⁵ Tipa ani gbia bakere undo ti Fugo Mbori, si naida ani ne gupai nga kaa gedaha ni kina wiri ipo, kini wisigihe niipo na kini berẽkuriihe ni kina ipo. Mo di regbo adia ka manga agi apai re zezeredi. Ka si dunga mo kuru bara veresi nga gu mo agianga tiro na ni ya, ka mo mbunga ha ya. Kuba gure, mo mangisunge na Watch Tower Publications Index watadu Research Guide for Jehovah’s Witnesses tipa ka gbia sakapai tipa gu veresi re. Ka mo di bakere regbo ho mo awisigopai ni, mo nika nyakasa gamo kido kuti agu arengo du rogo Fugo Mbori yo. (1 Tesa. 5:21)  Kina wai mo nika du na bakere kido kuti gupai mo nawirikihe, kina wo a mo nika du na bakere ngbarago ka pepa gupai mo nawirikihe fu kura aboro.

MO MBAKADI TIRO WENENGAI TIPA TUNGUSAPAI

6. Tipagine si aida ani mbakadi tirani ti ni wenengai tipa tungusapai?

⁶ Ka mo mbakadi tiro wenengai tipa tungusapai, mo abakanga bangiro tipa ka fura fu kura aboro te. Yesu aundo gako abawiriki tipa i mbakadi tiyo mbata fu ko kedi yo ku gene tungusapai yo. (Rk. 10:1-11) Abawiriki adu na rengba ka manga badungu apai na kidu na bakere ngbarago mbiko i amangipai kuti gupai Yesu ayuguhe fuyo.​—Rk. 10:17.

7. Waigu rengbe ani ka mbakada tirani tipa sunge tungusapai? (Oni bi sura a.)

⁷ Waigu rengbe ani ka mbakada tirani tipa sunge tungusapai? Si naida ani berẽ tipa gupai ani nika pehe, na ani ki pehe ngba gu gene nika du taata furani na ani kini fura kina wai ani naafura. Si a ni nyanyakipa pai tipa ani ini agu agene rengbe aboro ka mangapai ngbaha na ani ki ini wai rengbe ani ka karagapai fuyo kutini. Sidu, ho ani nika gbia aboro ni, ani ima rengba kaa fura zezeredi, kini momu ti ngbarani, na kidu wa abakure.

8. Rogo gini gene du aKristano wa agu ahe i amekehe rogo sende yo gu mokedi nangia Pauro afura tipaha rogo gako kpiapai?

⁸ Gu mokedi nangia Pauro ape gupai fu awirinako aKristano nga: “Ani na gi kumuko re rogo agu ahe i ameke he rogo sende yo.” (2 Kor. 4:7) Ginihe nga gi ũkumuko re? Si nga tungusa gu pangbanga nga ga Kindo nabatasa unga. (2 Kor. 4:1) Ginihe du nga agu ahe i amekehe rogo sende yo? Si narukuba ga Mbori amoyambu nga aguyo natungusa wene pangbanga fu kura aboro. Ti regbo Pauro, ababagiahe anaamangasunge na meme pere tipa kaa tinda nyanyakipa ahe wa riahe, imekakue, na marã. Wa kina gure a, Yekova ima fu nyanyakipa sunge furani nga ga tungusa wene pangbanga. Na ga Yekova undo, ani ima rengba ka gbia gu ome si aidaha tipa ani mangi gi sunge re ni rururani.

ONI KPARI TIPA WINGBADUSE

9. Waigu rengbe ani ka diabe gunde be aboro? (Oni bi sura a.)

⁹ Ti kura aregbo, ani ima rengba kaa gunde be aboro. Waigu rengbe ani ka diabe gu kpakarapai  re? Ani bingo gu kparakpee amokedi amangihe ho i afu rugapai ni fuyo tipa i mbu tungusapai. Kuba gupai nga i gunde, i asana Yekova ko undo yo tipa gupai nga i naandu kindi kumbatayo kaa “peka [gako pai] apeka zukazuka gbe.” Yekova akaragapai kuti gayo kparakpee nibasa. (Amo. 4:18, 29, 31) Ka si du nga gunde be aboro namanga rani amanga ti kura aregbo, si naida ani kpari a tipa ga Yekova undo. Mo sana Yekova ko nyakasi gamo nyemuse tipa aboro tipa wa ka mo gumba wene pangbanga fuyo zanga gunde.

10. Waigu Yekova aundo rani ani tungusipai tipa ko? (Yesaya 43:10-12)

¹⁰ Yekova ima sia rani tipa ani du ni gako aDezire, na ko nakidohe tipa ka undo rani ani du na wingbaduse. (Oni gedi Yesaya 43:10-12.) Ani bingo agene biama ko amanga gupai re ngbaha. Bambataha nga, Yesu na ani ti agu aregbo dũ ani atungusa wene pangbanga. (Mt. 28:18-20) Uepai nga, Yekova ima sia amaraika tipa i undo rani. (Yugo. 14:6) Biatapai nga, Yekova ima fu ziazia toro tipa si du ni gaani moundo tipa ka tingida rani na agu apai ani nawirikihe. (Yo. 14:25, 26) Biama pai nga, Yekova ima fu awirinarani ani naandu na yo gene tungusapai yo. Na ga Yekova undo gbiati gu undo nga ga awirinarani, ani na agu ahe dunduko berani si aidaha tipa kadu na wingbaduse na kaa tungusapai kindi.

ONI NIIMANGI AˈARIAPAI NA KIDU NA WENE BIPAI

11. Ho du ani ni gene tungusapai yo, waigu rengbe ani ka gbia badungu aboro? (Oni bi sura a.)

¹¹ Ya mo rago ni naagberã tiro ho mo abi kina bete aboro ni tiikporo? Tipagine ka mo asananga tiro ti ni nga: ‘Wari du aboro ni awere rogo gimi dagbarago?’ (Amo. 16:13) ‘Ya mo i basunge yo watadu bangbeahe yo?’ Kangia wo duhe, ya mo mo rengbe ka gbia dungu aboro ka mo amanga dezirepai bangiri gene? Wirina du rimoko nga Joshua aya, “Mi ima gbia amomu ka tungusapai bangbeahe yo na rogo agu aba dungu aboro adunguratiyo ku rogoho.” Ko na diako nga Bridget, ima gbia badungu aboro kporo bara ku nyemu na rago Poso fuo bebere uru.​—Ef. 5:15, 16.

12. Waigu rengbe ani ka ino gupai aboro naidi kutini watadu i abakabangiriyo tipaha?

¹² Ka si dunga gu boro mo nafura na ni ti  bambata regbo na nyemu gupai mo apehe fu ni te, mo asadi ka ino ginipai ni naidi kutini watadu ginipai ni abakabangirini tipaha. Joshua na Bridget ni naamangasunge na gu sanahe du ti kpoto trakte ho i naatona fugo ni na boro. Ni kpiapai, i aya, ho i amangasunge ni na gu trakte nga Mo Nabi Ziazia Kekeapai Wai? i anaape gupai nga: “Kura aboro nabi Baibiri nga si nga gu kitabu naye be Mbori na aguyo kini bihe nga si aayengo dunduko beko te. Gamo bipai nga gine?” Gipai re ninaasa gupai nga ani tona fugo na ni.

13. Tipagine du ani na diabese ti ni rogo gaani tungusapai yo ka si vura du vurũ nga aboro adeganga tuyo furani te? (Asanza 27:11)

¹³ Ka si vura du nga aboro adeganga tuyo furani ho ani atungusapai ni te, gure kindi nga ani ima da ti gaani sasa. Tipagine? Bambiko gupai nga ani ima manga gupai Yekova na Wiriko aida ani mangihe nga​—ka manga dezirepai. (Amo. 10:42) Ka si vura du nga ani agbianga boro ka tungusapai funi te watadu i naká gaani pangbanga, ani ima rengba kadu na ngbarago bambiko ani ima ino gupai nga, ani nasa ngbarago ti gu Barani du ngbangbaturũ yo.​—Oni gedi Asanza 27:11.

14. Tipagine rengbe ani kadu na ngbarago ti ni ho kura batungusipai agbia gu boro du ni du na nyemupai rogo gaani dagbarago?

¹⁴ Ani ima rengba a kadu na ngbarago ho kura batungusipai agbia gu boro ni du na nyemupai rogo gaani dagbarago. Ngbaõbambu Sinziri ima ringbisa gaani sunge kuti gbata ingiingi gude. Badungu aboro nagbata gu gude re kini ta rogo arago dunduko. Ho i agbia gu gude re ni​—aboro dunduko nadu na ngbarago​—kodihe na gu boro bi gu gude re. Wakina gure a, aboro dunduko rogo dungurati naundo ka sa aboro ni ga Yesu vovo abawiriki. Ani naida aboro dunduko rogo dungurati tungusipai rogo gaani dagbarago, na ani dunduko nadu na bakere ngbarago ho vovo boro atona ye ni tipa adunguratise.

MO GBEBERÃ RO KUTI GAMO NYEMUSE TIPA YEKOVA NA GAMO AMURAKPORO

15. Waigu rengbe pa manga ani pai kuti Matayo 22:37-39 ka undo rani ani kiisi gaani nyemupai tipa tungusapai? (Oni bi gu sura a )

¹⁵ Ani ima rengba ka kiiso gaani nyemu tungusapai ni gbe ani berãrani kuti gaani nyemuse tipa Yekova na tipa gaani amurakporo. (Oni gedi Matayo 22:37-39.) Oni bingo gu  ngbarago du Yekova na ni ho ko abi rani ni ani nimangi gi sunge re na wai du aboro na ngbarago ho i atona wirika Baibiri ni! Mo tingidi gupai a nga, agu aboro na degatuyo kuti gaani pangbanga na ki diberã ka iriso Yekova, ima rengba ka raka nyeanye kindi.​—Yo. 6:40; 1 Tim. 4:16.

16. Waigu rengbe ani ka gbia ngbarago ti gaani sunge tungusapai ho adunga ani ni na rengba ka guari kporo ya? Oni funga akpiapai.

¹⁶ Ya mo ndupai ho nadingiso ro ti guari mo kporo ka mera? Kangia wo duhe, mo gbeberã ro kuti wai rengbe mo ka yugo gamo nyemuse tipa Yekova na gamo amurakporo. Ti regbo gu ririkaza nga Korona, Samuel na Dania aadunga na rengba ka guari kporo te. Ti gu kpakarakpakara aregbo re dunduko, i anaatungusapai dedede rogo terefuni, kini keke awaraga, na kini wirikipai na abawiriki Baibiri kina rogo Zoom. Samuel atungusipai fu agu aboro ko agbiayo bambungua yo ho ko aadia dawa ni tipa gu kaza nga kansa. Ko ape gupai nga: “Ho ani asusa ni rogo kpakarakpakara aregbo, ani ima rengba kaa bakabangirani, kidu na mbugo, na gaani idapase ima rengba kadu ni asadiasadihe. Si naida ani gbia ngbarago ti gaani sunge fu Yekova.” Ho gipai re aamanga ni, Dania ati na ki nye kubari tipa adiwi biata. Sidu, ri aaida na ngbagida gbarĩgbarĩ aboro tipa adiwi sita. Ri aya: “Mi aˈasadi ka manga gupai na omere dunduko mi arengbe ka mangaha nibipa gupai naadu tipa re. Mi adu na rengba ka tungusapai fu gu munganga naaye kaa bi re, na agu aboro nanaaye na ahe fere ku kporo. Mi adu a na wene fugodagbase rogo terefuni na gu dee naamangasunge rogo gu basunge nafu angua watadu adawa.” Wa si avura dunga aSamuel na Dania aarengbanga ka manga gupai i anaamangaha mbata te, i amangi gupai narengbe na ome yo na i ki gbia ngbarago ni sangbanaha.

17. Waigu rengbe mo ka gbia bakere undo ti agu berãapai du rogo gi kekeapai re?

¹⁷ Mo asadi ka mangapai kuti agu aberãpai dunduko bisue i nafura tipaha rogo gi kekeapai re. Agi aberãpai re dunduko ni basasa wakina agu ahe i amangasunge na ni tipa ka pa sa riahe. Ho i akoda agu ahe ni dunduko si aidaha tipa pasa riahe ku rogo ba sa, gu riahe re nadu ni bawenehe. Ni manga ani pai kuti agi aberãpai re dunduko, ani nika mbakadatirani tipa ka diabe gaani gbegberẽ bipai, na ki gbia bakere ngbarago ti ngba gaani sunge tungusapai.