1-2. Ga gu kura aboro bipai nga gine tipa mbakadapa rogatise?

 MBAKADAPA rogatise ima rengba kadu nipa ngbarago, si nga bawene regbo ngbarago. Ka si du nga mo nambakada pa rogatise awere, zanga kapa, mo naida aida ka gbia ngbarago ti gi regbo re. Na fu gu dungu aboro nambakada pa rogatise, si nga regbo ngbarago. Tsion, a nga wirina ni dee Etiopia yo aya: “Dagba agu aregbo yo mi adu na bakere ngbarago rogoho nga ho ani aambakada pa rogatise ni na kumbami. Ani anaasaka nyanyakipa apai asaka na ani kini momu a. Mi adu na ngbarago ho mi abi gupai ni nga mi ima gbia gu boro mi akpinyemu ni na kpinyemu re a.”

² Ono tie, Alessio, nga wirina ni kumba rogo gu ringara nga Netherlands, aya, “Si aima du ni pangbarago ka ino diare ho ani aambakada pa rogatise ni, ono gaani mbakadapa rogatise aima du a na akpakarapai.” Rogo gi kekeapai re, ani nika sakapai tipa agu akpakarapai rengbe kura aboro ka gbiatiyo na ni ho i ambakada pa rogatise ni, na bete agu abangua rengo nga ga Baibiri nga gu rengbe ka undo agu aboro nambakada pa rogatise tipa gayo mbakadapai du na diabese. Ani nika sakapai asaka a tipa wai rengbe agu aboro du rogo dungurati ka undo agu aboro nambakada pa rogatise.

NDU GUPAI ABORO AMANGA MBAKADAPA ROGATISE TI NI

3. Ndu ginipai aboro ninaambakada pa rogatise ti ni? (Asanza 20:25)

³ Wa vura duhe nga mbakadapa rogatise ima rengba kadu ni gupai naye na ngbarago, si a nga nyanyakipa diandue nga gu rengbe ka sa gupai nga aboro mangi rogatise. Rogo gayo uru rogatise, arogotise namanga kidohe ku bangiri Yekova tipa ka kpinyemu tiyo na kini yugu irisa dagba yo wa i nikaa raka kindi ni unga yo. Mbata fu ani mangi ai mokido, si naida ani berẽkurii gupai re wenengai. (Oni gedi Asanza 20:25.) Gipai re nga rengo nibipa gu mokido nga ga rogatise. Mbakadapa  rogatise nambu gene fu aboro i ini tiyo wenengai na ki mangi wene adiaberã. Ti kura aregbo, gu diaberã re ningia ka manga rogatise; na ti kura aregbo, gu diaberã re ningia ka digiso mbakadapa rogatise. Ka agu aboro nambakada pa rogatise mbuhe, gure ayugongo gupai nga i mangi gbegberẽpai te. Kuba gure, si nayugo gupai nga i ima bihe singia i mangi rogatise watadu ka i mangingo ho ya.

4. Tipagine si aida ani du ti ni na ruru bipai tipa mbakadapa rogatise?

⁴ Tipagine duhe ni nyanyakipa pai ti ni kadu na ruru bipai tipa mbakadapa rogatise? Ho agu aboro ata manganga rogatise ni ya adu ni na ruru bipai, i atonanga mbakadapa rogatise na gu boro i naima inoho nga i manganga rogatise na ni ya te. Ono tie, anga kina agu aboro sa ata manganga rogatise ya si aida i du na ruru bipai te. Ani dunduko si aida ani du na ruru bipai. Ni kpiapai, gu kura aboro naberã gupai nga, ka aboro aambakada pa rogatise, i du wa ka i mangi rogatise. Waigu du gi bipai re na maapai kurii agu aKristano ata manganga rogatise ya? Melissa, du Amerika yo nga wirina ata manganga rogatise ya aya: “Ho gu wirina ata manganga rogatise ya nga kumba na dee aˈasada ni ka ino tiyo wenengai, gu kura aDezire Yekova nabihe nga si naida aida i mangi rogatise. Ni sangbanaha, si nasa gupai nga gu kura aboro naandu kumbatayo kindi kaa manga mbakadapa rogatise si ki vura du vurũ nga i arengbanga kadu ni wene arogotise te. Gipai re nasa gupai nga kura abakuparanga na anakuparanga ne gupai nga ka asada ka ino tiyo wenengai. Gipai re ima rengba ka ye na bakere bakabangirise.”

ONI INIDI TIRONI WENENGAI

5-6. Gini apai si aida agu aboro nambakada pa rogatise asadi ka inoho tipa tiyo ti regbo mbakadapa rogatise? (1 Petero 3:4)

⁵ Ka si du nga mo nambakada pa rogatise, ginipai nika undo ro mo mangi diaberã singia ka manga rogatise watadu ka zanga mangaha? Oni asadi ka ino tironi wenengai. Si nawiraha wa mo aima ino wiri bete apai tipa gu boro re mbata fu mo tona fugo na ni. Ono awere wa oni natona mbakadapa rogatise, mo na momu ka ino “gu okooko boro du kpoto yo.” (Oni gedi 1 Petero 3:4.) Ho oni ambakada pa rogatise ni na boro, mo ima rengba ka ino dungu apai tipa ga gu boro re pagume na Yekova, asino ni, na gu gene ni aberã ngbaha. Wa regbo nikaa susa, mo ima rengba kadu na rengba ka karagapai kuti ngbatunga asanaha wa: ‘Ya mo gi boro re adu ni wene badiarogatise fere?’ (Snz. 31:26, 27, 30; Ef. 5:33; 1 Tim. 5:8) ‘Ya mo mi rengbe ka yugo gu nyemuse fu ni ni aidaha na kini moiberã re tipa ni, na ya mo ni rengbe ka yugo gu nyemuse fere mi aidaha na kini moiberã ni kuti agu apai du mi na zingoho? Ya mo ani rengbe ka mbupai dagbarani ti gaani azangarengba?’ b (Rom. 3:23) Wa oni nikaa inido tironi, oni tingidi gupai nga: Anga gupai nyakipaha kisusi nga wai du apai tipa roni kina sa te, ono gupai nyakipaha nga singia oni ue rengbe ka inido tironi na agu apai du ni bakiakia tipa roni.

 ⁶ Gini kuraapai si aida mo inipai tipaha tipa gu boro mo ambakada pa rogatise na ni ti regbo mbakadapa rogatise? Mbata fu mo sonosi gu nyanyaki nyemuse du dagba kumba na dee koyo du gu boro re ni, si ima rengba ka ida oni saki kura nyanyakipa apai, ga gu boro re asasa tipa kumbatayo. Ono na ginipai tigaha du tipa apai wa kaza kpotose, agu akpakarapai nabipa marã, gbiati agu apai namangi gu boro re mbata kusayo nga gu du na maapai kurii gani berẽpai, bipai, watadu mangaapai? Anga apai dunduko si aida oni fura tipa ha kina ti tonatona mbakadapa rogatise te. (Oni ringbisinga ha na Yoane 16:12.) Ka mo bihe nga mo arengbanga ka karagapai ni kina wiri ipo kuti kura asanahe nabipa ro te, mo pehe fu gu boro re ni inihe. Ono wa regbo nikaa susa, si nika ida gu kura boro re ini agu apai aino re tipa wa ka ni mangi wene diaberã. Sidu, regbo nika du kinaho si nika ida aida mo fura gbaiga tipa agi apai re.

7. Waigu rengbe agu aboro nambakada pa rogatise ka ino tiyo? (Oni bi gu sanduki a nga “ Ho mo Ambakadapa Rogatise ni na gu Boro Naraka Tuturũ.”) (Oni bi asura a.)

⁷ Waigu rengbe mo ka ino boro wenengai nzunzu? Gene sa dagba agu akuraha yo ngba kisusi nga ka pe kina boro rengo na kini fura gbaiga, ka fu asanahe na kini degetue wenengai. (Snz. 20:5; Yak. 1:19) Isoke mo ima rengba ka sia gupai nga oni mangi kuraapai kina sa nga gu rengbe ka saha furoni taata oni fura dagbaroni, ngbatunga apai wa rihe kina sa, kaa ta kina sa rogo agu aba du aboro adu rogoho, na ka tungusapai kina sa. Oni ima rengba a ka inopai tipa tironi ho oni adia regbo ni kina sa na abakurearoni gbiati agumeroni. Kurigure, oni mangi mbakadapai tipa ka manga agu apai nga gu nika yugo wai foro gu kura boro re amangapai rogo abangiriaba ni bakiakia na aboro ni bakiakia. Oni bingo gupai Aschwin, du rogo gu ringara nga Netherlands, aasadi ka mangaha. Ko ape gupai tipa gayo mbakadapa rogatise na Alicia nga: “Ani angere tipa agu apai rengbe ani ka mangaha kina sa nga gu nika undo rani ani ini agu apai du tipa tirani. Dedede, agi pai re angia taata apai, wa pasa riahe kina sa, watadu ka manga gu kura asunge kina sa. Ti agu aregbo ani anaamanga agu apai re, ani anaabi gu wene asino du tirani gbiati gaani azangarengba.”

8. Waigu rengbe agu aboro nambakada pa rogatise ka gbia undo ni wisigo yo pai kina sa?

⁸ Oni ima rengba a ka ino tironi niwisigo oni agu ari-apai du rogo Baibiri yo kina sa. Ka si du nga oni nika manga rogatise, si nika ida aida oni di regbo tipa kaa manga gu irisombori nga ga aborokporo, tipa gupai nga Mbori du ni nyanyakipa papara gaoni rogatise. (Batu. 4:12) Sidu, isoke oni ima rengba ka maa regbo awere tipa kaa wisigopai kina sa wa oni ambakada pa rogatise. Si ni rengo nga, anga agu aboro nambakada pa rogatise ima da ni aborokporo te, na anga gu wirina nga kumba re nga rii gu wirina nga dee re te. Ono tie, nimanga oni wisigopai  kina sa dedede, oni ima rengba ka inopai tipa wai du oni rogo toro yo. Max na Laysa, nga arogotise Amerika yo agbia gu kura undo. Ko aya: “Ho ani atona mbakadapa rogatise atona ni, ani atona wisigo agu awaraga du tipa mbakadapa rogatise, rogatise, gbiati gu raka nga ga aborokporo. Mbiko wisigo ani agi awaraga re, ani aima du na rengba ka fura tipa dungu nyanyakipa apai nga gu naima rengba kadu ni kpakarakpakaraha ka fura tipa ha.”

GU KURAAPAI SI AIDA ONI BERẼKURIIHE

9. Gini apai si aida agu aboro nambakada pa rogatise berẽkuriihe ho i amanga diaberã ni tipa da i aida ka pepa gayo mbakadapai fu ni?

⁹ Da si aida mo pepa gamo mbakadapa rogatise fu ni? Mo gbiati gu boro mo ambakada pa rogatise na ni du si aida oni diberã tipa gipai re. Ho oni natona asada ka ino tironi ni, oni ima rengba ka diaberã ka pehe fu kina bete aboro gbua. (Snz. 17:27) Ni manga oni he wo, oni ima rengba ka ne dungu asanahe nibipa gaoni pabakure na gu soapai nga oni mangi diaberã ka manga rogatise watadu ka zanga mangaha. Ono tie, ka oni aapenga ha fu ai boro ya, oni ima rengba ka õka tironi na ni mbiko gunde nga kura aboro nika inopai tipaha. Ono gipai re ima rengba kadu ni kerepai, mbiko ka kina roni du sa ue zanga kura boro, si ima rengba ka sa gupai nga oni mangi gbegberẽpai. Sidu, si ni patatamana ka pehe fu agu aboro rengbe ka fu wene arugute na ki undo roni ngba kura agene. (Snz. 15:22) Ni kpiapai, oni ima rengba ka pehe fu gu kura gaoni aborokporo, agu abakurearoni niima nyaka, watadu agu abaakumba nga aKristano.

10. Ginipai rengbe agu aboro nambakada pa rogatise ka mangaha tipa ka sa gayo mangapai si fu ngbarago fu Yekova? (Asanza 22:3)

¹⁰ Waigu rengbe mo ka sa gamo mbakadapa rogatise si du ni iriirihe? Wa gaoni nyemuse nikaa sona, si nika sa gupai nga oni naambeda dagba tironi gbe. Ginipai nika undo roni oni ne manga ai gupai rengbe ka ba gberãrago ti Yekova? (1 Kor. 6:18) Oni ne wasiwasi afugo, kadu ni sa roni zanga kura boro, gbiati bakere mbirabuda. (Ef. 5:3) Agi apai re ima rengba ka zingisa gaoni nyemupai nga ga kodaba na ki saha ni kparakparaha tipa ka manga gupai du ni ruruhe. Si adu ni patatamana tipa oni naasakapai dedede tipa agu apai rengbe oni ka mangaha tipa ka yugo irisa dagba tironi na ka yugo irisa tipa ga Yekova arugute. (Oni gedi Asanza 22:3.) Oni bingo gupai naundo Dawit na Almaz du Etiopia yo. I ape gupai nga: “Ani anaadia regbo rogo agu aba dungu aboro anidu adu rogoho watadu ho abakurearani anidu adu ni. Regbo aadunga ho sa ani adu ni sarani rogo tarambiri watadu kporo te. Sidu, ani ane agu apai narengbe ka sarani ani ti ku rogo asada.”

11. Gini apai si aida agu aboro nambakada pa rogatise berẽkuriihe ho i amanga diaberã ni tipa gu ngbatunga nyemuse i ayugoho dagbayo?

¹¹ Ya mo si naida agu aboro nambakada pa rogatise yugo gu nyemuse du dagba kumba na dee dagbayo? Gu kura agene yugo nyemuse kinaho rẽarẽ wa gayo pabakure nga ga mbakadapai nikaa ndu kumbatayo. Ono tie, ka si du nga gaoni nyemu kodaba da ni nyanyakihe, si ima rengba kadu ni kpakarakpakaraha ka manga wene adiaberã. (Ga So. 1:2; 2:6) Na berewe a, ho mo ayugo nyemuse ni, si ima rengba ka du taata ka mo dunga na zatise ya na si ki sa gupai nga mo mangi gupai nika ba gberãrago ti Yekova. (Snz. 6:27) Sidu, kinaho oni atona mbakadapa rogatise atona ni, oni sakipai tipa ga Yekova arugute na gupai oni nika mangaha na gupai oni nikaa manganga ha ya wa oni nikaa yugo nyemuse dagbaroni. c (1 Tesa. 4:3-7) Wa oni ambakada pa rogatise, oni sana tironi nga: ‘Waigu rengbe agu aboro mi araka dagbayo ka bi gu ngbatunga nyemuse ani ayugoho dagba tirani? Ya mo gu ngbatunga nyemuse ani ayugoho re rengbe ka zingisa nyemu kodaba ti boro sa dagba rani?’

12. Ka si du nga agu aboro nambakada pa rogatise na zangagiatise dedede, ginipai si aida i berẽkuriihe?

¹² Waigu rengbe oni ka mangapai kuti akpakarapai na zangagiatise? Na ka si du nga zangagiatise  nakura dagbaroni dedede? Ya mo gere nayugo gupai nga oni arẽnga dagbaroni te? Anga wo duhe nzunzu te; arogotise dunduko ni naaidanga kuti bangisapai sa te. Gu rogatise du ni nyanyakihe nakoda aboro ue nga aguyo rengbe ka mangapai wa sa tipa ka diabe gayo azanga giatise. Sidu, wai oni amangapai kuti akpakarapai awere ima rengba ka yugoho singia gaoni rogatise adu na diabese. Wangia oni agu aboro nambakada pa rogatise, oni sananga tironi nga: ‘Ya mo ani rengbe ka fura tipa kpakarapai zezeredi na rogo irisa yo? Ya mo ani ninaaida gaani aingahe na kini asadi ka manga ariapai? Ya mo si taata furani ani idi na ga gu kura boro bipai, ki hõmbupai, na ki mbupai?’ (Ef. 4:31, 32) Kurigure, ka si dunga oni nadu na zangagiatise dedede watadu kaa papaya dedede ti regbo mbakadapa rogatise, si nawiraha wa agu apai du tipa roni angbanga tifuo rogatise te. Ka mo bihe nga gu kura boro re arengbanga kadu ni wene badiarogatise foro te, digiso gu mbakadapa rogatise re ima rengba kadu ni bawene diaberã furoni dunduko ue. d

13. Ginipai rengbe ka undo agu aboro nambakada pa rogatise tipa i mangi diaberã tipa bagizo regbo wai i aida ka mbakadapa rogatise?

¹³ Bagizo regbo wai si aida mbakadapa rogatise dihe? Dedede, gu diaberã boro amangaha ni wiri ipo ninaaye aye na gbegberẽ sangbanaha. (Snz. 21:5) Si naida gaoni mbakadapa rogatise di wiri regbo adia tipa oni iniditiro ni wenengai. Ono tie, si aidanga oni di bakere regbo a kisusi kaa mbakadapa rogatise kisusi wai rẽhe te. Baibiri nape gupai a nga: “Ima na pa maabangirise nafu kaza ngbaduse.” (Snz. 13:12) Kurigure, wa mbakadapa rogatise nikaa ndu kumbatayo, si ima rengba kadu ni kere kpakarakpakaraha ka ká gu asada nga ga nyemu kodaba. (1 Kor. 7:9) Kuba gupai nga kaa maaberã ro tipa bagizo regbo wai oni namangi mbakadapa rogatise, mo sananga tiro nga, ‘Gini kurapai si aida mi inihe tipa gu boro mi aida ka manga rogatise na ni re tipa wa ka mi mangi diaberã?’

WAIGU RENGBE KURAABORO KA UNDO AGU ABORO NAMBAKADA PA ROGATISE?

14. Ngba gini agene rogo mangimangipai yo rengbe kura aboro ka undo agu aboro nambakada pa rogatise? (Oni bi sura a.)

¹⁴ Ka ani ini agu aboro na mbakadapa rogatise, waigu rengbe ani ka undo yo? Ani ima rengba ka yamba yo tipa riahe, tipa irisombori nga ga aborokporo, watadu tipa zambuasitise. (Rom. 12:13) Rogo ngbatunga apai wa gure, i ima rengba ka ino tiyo gbe. Isoke, mo ima rengba ka undo nimera mo na yo, ka zubo rogo bangisa tarambiri sa na yo, watadu ka yamba yo ku kpuro yo i sungu ka fura dagbayo tipa gupai nga ka i dunga ni kina sa yo rogo ba ya. (Gara. 6:10) Alicia, i nipepa ri kusayo natingidapa gupai atingida ri na Aschwin adu na tambuahe tipaha.  Ri aya, “Ani anidu na bakere ngbarago ho kura awirina anaape gupai ni furani nga ani ima rengba ka ndu ku kpuyo yo ka ani aida gu ba ka ani sungu rogoho ka fura dagbarani angianga kadu ni kina sarani ya.” Ka si du nga agu aboro nambakada pa rogatise sanaro mo di regbo na yo, mo ima rengba ka berãpa gipai re nga si nga nyanyakipa gene ka undo yo ngbaha. Mo du na rubangirise ka zanga mbu agi aboro nambakada pa rogatise re ni kina sayo, ono mo du a na tatamana ka ino gu regbo si aida mo mbu regbo fuyo tipa i fura dagbayo ni sayo.​—Frp. 2:4.

15. Gini kurapai rengbe abakure ka mangaha ka undo agu aboro nambakada pa rogatise? (Asanza 12:18)

¹⁵ Ani rengbe ka undo agu aboro a nambakada pa rogatise na gupai ani apehe watadu kini mangihe. Ti kura aregbo, si ima rengba ka ida ani du na zatise. (Oni gedi Asanza 12:18.) Ni kpiapai, ani ima rengba kadu na ngbarago ka pe gupai fu kura aboro nga gu kura aboro ima tona mbakadapa rogatise, ono si ima rengba kadu nga kina agu aboro re naida ka pe gupai re nitiyo. Si aidanga ani naagumba rimo agu aboro namanga mbakadapa rogatise te watadu kaa bisira yo nibipa gupai nabi kina boro te. (Snz. 20:19; Rom. 14:10; 1 Tesa. 4:11) Na berewe a, si aidanga ani naape agu apai watadu ka sana agu asanahe rengbe ka sa agu aboro du nambakadapa rogatise si du ni soapai kurii yo tipa i mangi rogatise te. Wirina ni dee du rimo ri nga Elise na kumbari natingida gupai nga, “Kina zee naazio rani ho aboro anaasanahe ni tipa gaani mbakadapa uru pumbo rogatise baraho ani aasakanga pai ni kindi tipa uru pumbo rogatise ya.”

16. Waigu si aida ani mangipai ka agu aboro nambakada pa rogatise mbuhe?

¹⁶ Na ka si du nga agu aboro nambakada pa rogatise diberã ka mbuhe? Si naida ani ne gupai nga ka asada ka inopai tipa agu apai nabi kina yo watadu ka ngbe na gu kura boro kini bisirapa gu kura ni mbiko gupai nga ni diberã ka mbuhe. (1 Pet. 4:15) Wirina du rimori nga Lea aya: “Mi agi gupai nga gu kura aboro aima tona kaa wakana ndu gupai riyo yo mi gbiati gu wirina ani aambakada pa rogatise na ko ambu mbakadapa rogatise ti ni. Gipai re aima sa re mi du na bakere gberãrago.” Ka si du nga agu aboro nambakada pa rogatise diberã ka mbuhe, ka ani berẽnga gupai nga i mangi gbegberẽ diaberã ya. Gupai si ayugoho gbua nga, gu mbakadapa rogatise re ima da ti gaha ringbisapai​—si ima undo agu aboro nambakada pa rogatise re i mangi wene diaberã. Ono tie, gu diaberã re ima rengba ka sa yo i du na gberãrago na si ima rengba ka sa yo i naabi tiyo nga i nisayo. Sidu, ani ima rengba ka ngera tipa agu agene rengbe ani ka undo yo ngbaha.​—Snz. 17:17.

17. Ginipai si aida agu aboro namanga mbakadapa rogatise naandu kindi kumbatayo kaa mangaha?

¹⁷ A wa ani nabihe, mbakadapa rogatise ima rengba kadu na gaha akpakarapai, ono si ima rengba kadu a nipa ngbarago. Jessica natingida gupai nga: “Ka pe guhe nga rengo, mbakadapa rogatise angia bakere sunge. Ono mi na ngbarago nga ani amangisunge na gu regbo re gbiati gu ome re ka ino tirani wenengai.” Ka si du nga mo nambakada pa rogatise, mo naandu kumbatayo kindi kaa manga asadatise tipa oni iniditiro ni wenengai. Ka oni mangihe wo, gaoni mbakadapa rogatise nika undo roni wa du oni ue oni mangi gu diaberã nga ga tatamana.