1-2. Gini amaku boro agbiaha tingbafuo zio ni bapatiza?

 ANI nadu na ngbarago ho ani azio bapatiza ni na ki da ni papara ga Yekova aborokporo. Si nipa irisa kadu na mbembedi pagume na Yekova. Ani ima ida kuti agu afugo gu bake papara Atambuahe nangia Davide apehe nga: “Boro maku nga gu boro sia mo ni ki mbedisi ni na mo, ni nye rogo gamo avurukporo!”​—Tam. 65:4.

² Anga ai boro Yekova ambu ni ni du na pagume na ko te. A wa ani asakipai tipaha rogo gu kekeapai nadu mbata fu gere, ko nasia kadu mbembedi na agu aboro naida kadu na mbembedi pagume na ko. (Yak. 4:8) Ho mo akpara tiro ni fu Yekova na ki zi bapatiza, mo nada na mbembedi pagume na Yekova ngba kparakpara gene. Mo ima rengba kadu na gu kido nga tifuo zio mo bapatiza, ko nika ‘uka maku ku ri ro ka ba adu nga tipa ha ya.’​—Mara. 3:10; Yere. 17:7, 8.

3. Gini sunge du be agu aKristano niima kpara gayo raka Mbori na ki zi bapatiza? (Batungusipai 5:4, 5)

³ Si nirengo nga, bapatiza nga tonatona gamo raka ti ngba sunge fu Yekova. Tifuo mo zi bapatiza, mo nika manga ome nyanyaki tipa ka kakuti gamo kidohe kaa iriso Yekova na ki nye niruru ro fuko zavura ho mo nika gbiatiro ni na aasada ka manga gupai du ni gbegberẽhe watadu ho mo nikaa susa ni rogo aasada. (Oni gedi Batungusipai 5:4, 5.) Nidu mo ni ga Yesu bawiriki, mo nika pekafuo ga Yesu kpiapai na arugute wa rengbe omero na ni. (Mt. 28:19, 20; 1 Pet. 2:21) Gi kekeapai re nika undo ro mo mangi gupai re.

 MO NIPEKEFUO YESU AKPAKARAPAI NA AASADA KI VURA DU VURŨ

4. Ngba gini gene ga Yesu abawiriki atinda gayo “wagiwagingua”? (Ruka 9:23)

⁴ Ka mo berẽnga ha nga, tingbafuo gamo bapatiza, raka nika du foro taata ya. Yesu aima pe gupai ziazia nga gako abawiriki nika tinda ngbunduru ngua rungosi. Ni rengo, si naida i naamanga gipai re ‘na aˈuru’ dũ. (Rk. 9:23) Ya mo Yesu aape gupai nga apefuo ko nikaa gbiatiyo na arungosiro ti aregbo dunduko? Wagusa te. Kuba gure, ko aanyakasa gupai nga, kurii agu amaku i nika gbiaha, i nika gbiatiyo agbia na akpakarapai. Kura agi akpakarapai re ima rengba kadu ni kere iigirã ha.​—2 Tim. 3:12.

5. Gini amaku Yesu akidopaha fu agu aboro nambupa gayo apai?

⁵ Isoke, si rengbe kadu nga gamo aborokporo ima soga ro, watadu mo ima mbupa du na bakere marã gbiati kura ahe tipa ka peresa pa ga Mbori Kindo mbatayo rogo gamo raka. (Mt. 6:33) Ka si dunga wo duhe, mo ima rengba kadu na gu kido nga Yekova ima ino agu apai dunduko mo namangihe fuko. (Eb. 6:10) Si nawira wa, mo ima bi agu afugo Yesu si ni digisitihe nga: “Mi nagumba ha fu roni ni rengo, ka boro he gani bambu, na awirinani, na adawirini, na nani, na bani, na awirini, na gani aati, tipa re, na tipa wene pangbanga ni ka abambu du be ni na awirina, na adawiri, na ana, na awiri, na aati, na arungo, wa du rago re, ki susi gu naadu mbata bara 100; na nyenye unga rogo gu ngbi nikadu yo.” (Mk. 10:29, 30) Ni rengo, agu amaku mo nagbiaha ima kio kisusi pa agu apai mo nambupaha.​—Tam. 37:4.

6. Tipagine si nika ida mo naandu kumbatayo ti ni kindi kaa sovura kuti “gu nyemuhe nga ga borose” tingbafuo gamo bapatiza?

⁶ Si nika ida mo naasovura aso kindi kuti “gu nyemuhe nga ga borose” tifuo zio mo bapatiza. (1 Yo. 2:16) Gipai re wo mbiko mo kindi nga kpakpa boro. Ti kura aregbo, gamo abipai ima rengba kadu wakina ga gu mokedi nangia Pauro. Ko akepai nga: “Bambiko rago nangba ti re na ga Mbori rugute ku kpotore yo. Ono mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai du rogo apare yo.” (Rom. 7:22, 23) Mo ima rengba kadu na gberãrago bambiko si nika ida mo nasovura kuti gbegberẽ nyemuapai. Ono tie, pa berã mo kurii gu kidohe mo amangihe fu Yekova ho mo akpara tiro ni fuko nika nyakasa ro tipa mo naasovura kindi kuti asada. Gu rengo duho nga, ho mo agbia tiro ni na aasada, gamo kidohe nga ga kparatise fu Yekova nika undo ro mo sa gamo raka si du taata. Ngba gini gene?

7. Waigu pa gamo kparatise fu Yekova nika undo ro mo nye niruru ro fuko?

⁷ Ho mo amanga gamo kparatise ni fu Yekova, mo nambupa gamo apai. Gipai re nayugo gupai nga mo nasia ka ká gu gamo nyemuapai na asasa nga gu rengbe ka ba gberãrago ti Yekova. (Mt. 16:24) Sidu, ho mo agbia tiro ni na asada watadu ho mo asusa ni rogo kpakarakpakara regbo, mo abakanga bangiro tipa ginipai si aida mo mangihe te. Mo nika ima ino gupai si nika ida mo mangihe nga​—ka nye niruru ro fu Yekova. Mo nika diaberã ka sa ngbarago ti Yekova. Mo nika du wakina Eyobo. Wa vura duhe nga ko aima gbiatiko na kere kpakarakpakara aasada, ko aya: “Mi ambu nga pa gi du ni irarengo te.”​—Eyo. 27:5.

8. Waigu rengbe pa berã mo kurii gamo kparakpee nga ga kparatise fu Yekova ka undo ro mo ká aˈasada?

⁸ Ni berã mo kurii gu kparakpee mo amangihe nga ga kparatise fu Yekova, mo nika gbia ome tipa ka ká ai asada. Ni kpiapai, ya mo mo rengbe ka tona ba nyemuro ti ga kura boro badia rogatise? Wagusa te! Mo aima kido Yekova nga mo amanganga ngbatunga pai wa gure te.  Ka si dunga mo ambunga gbegberẽ aberã si sono rogo ro yo te, mo asota nga na ni kusa tipa ka nyasa riipaha te. Mo nika “ne gu gene” nga ga “gbegberẽ aboro.”​—Snz. 4:14, 15.

9. Waigu rengbe pa berã mo kurii gamo kparakpee nga ga kparatise fu Yekova ka undo ro mo moi iriso Yekova ni bambatapai rogo gamo raka?

⁹ Na ka si dunga boro nika fu sunge foro nga gu nika ká na mo ti nduge sa adunguratise dedede? Mo nika ino gupai aino mo nika mangaha. Mbata fu i fu gu sunge re foro, mo nika ima diaberã ka zanga dia gu sunge rengbe ka ká na mo ti nduge tipa adunguratise. Sidu, mo adu nga ni asadiasadi ro ka idapa gu sunge re na kini asadi kindi ka maa Yekova ni bambata boro rogo gamo raka yo te. Pa berã ani kurii gu kpiapai nga ga Yesu ima rengba ka undo rani. Ko aima diaberã tipa ka sa ngbarago ti Bako. Wakina Yesu, mo diberã ka ne ai gupai niipo mo na inihe nga si rengbe ka ba gberãrago ti gu Mbori mo akpara tiro fuko.​—Mt. 4:10; Yo. 8:29.

10. Waigu Yekova nika undo ro tingbafuo bapatiza tipa mo ‘naapeka fuo’ Yesu kindi?

¹⁰ Gupai mo amangaha ho mo agbia tiro ni na akpakarapai watadu ho du mo ni ni asadiasadi ro ka manga gupai du ni irairaha ima rengba ka yugo gupai nga mo naida ka ‘peka fuo’ Yesu. Na mo ima rengba kadu na gu kido nga Yekova nika undo ro aundo mo naapekafuo Yesu kindi. Baibiri naya: “Ono Mbori du ni irarengo, ko aida nga i asadi roni susi gu ka oni rengbe na ni te; ono rago asada ko ambakada gene kura be he a, ya oni rengbe ka hi he.”​—1 Kor. 10:13.

WAI KA NYE KAA PEKAFUO YESU KINDI

11. Gini wene gene sa dagba agu akuraha yo rengbe ani kaa pekafuo Yesu ngbaha? (Oni bi sura a.)

¹¹ Yesu airisi Yekova na kpotokoyo dunduko, na ko anye mbembedi na Yekova rogo kparakpee  yo. (Rk. 6:12) Ni rengo, wene gene sa dagba agu akuraha yo rengbe mo kaa pekafuo Yesu kindi ngbaha tifuo gamo bapatiza nga, ni ndu mo kumbatayo kindi kaa manga agu apai nika mbedi saro gbe na Yekova. Baibiri naya: “Ani tá ni kina gu rugute da ani ti ni.” (Frp. 3:16) Dedede, wo mo nikaa gia agu apangbanga nga ga agu awirina diberã ka kiiso gayo sunge fu Yekova. Isoke, i aima ndu tipa Gu Sukuru Du Tipa Abatungusipa Kindo watadu i aima ga kurogo gu ba du na bakere zingo abatungusipai rogoho. Ka si dunga apai tipa ro wenengai, gure nga wene sasa mo narengbe ka mangaha. Ga Yekova aboro na bakere nyemu ka kiiso gayo sunge tungusapai. (Amo. 16:9) Ono tie, na ka si dunga mo na rengba awere ka mangaha te? Ka mo bingo tiro nga paro kusende ti agu aboro rengbe ka mangaha wo ya. Gupai nyakipaha nga mo naandu kindi kumbatayo kaa hipai. (Mt. 10:22) Ka bangiro gonga ti gupai nga mo nasa Yekova ko du na bakere ngbarago ho mo amanga gupai ni nga gu du mo na rengba ka mangaha nibipa agu apai du tipa ro ya. Gure nga gu nyanyakipa gene rengbe mo kaa pekafuo Yesu ngbaha tifuo gamo bapatiza.​—Tam. 26:1.

12-13. Ginipai rengbe mo ka mangaha ka si dunga mo na ngbarago berewe wagu mo adu na ni ti ngba iriso Yekova te? (1 AKorindo 9:16, 17) (Oni bi gu sanduki a nga, “ Mo Nye Kindi ti Ngba Oto Abaangirã.”)

¹² Ginipai rengbe mo ka mangaha ka si dunga mo amanganga kparakpee kina boro ngbaduro yo fu Yekova te watadu mo agbianga ngbarago berewe ni bakerehe ti sunge tungusapai wagu nadu mbata te? Na ka si dunga mo agbianga ngbarago berewe ni bakerehe ti geda Baibiri wagu nadu mbata kusayo te? Ka pai wa gure mangi ro tifuo gamo bapatiza, ka mo danga kuti gu digisopai nga ga Yekova toro tiro berewe ya te. Mo nga kpakpa boro, na gamo nyemuapai ima rengba ka ariatihe ti  kura aregbo. Ka si dunga mo na bakere nyemupai berewe te, mo berẽkurii gu kpiapai nga ga gu mokedi nangia Pauro. Wa vura duhe nga Pauro aˈasadi ka wirika Yesu, ko aima ino gupai nga ti kura aregbo, ko adunga na bakere nyemu ka manga gupai ko akpinyemu ka mangaha te. (Oni gedi 1 AKorindo 9:16, 17.) Ko aya: “Ka si adu nga mbiko mi asia ha tigimi ya, mi du na gu pai i aasia pa ha fere.” Ka pepai ngba kura gene, Pauro aima diaberã ka nyasa gako sunge tungusapai si ki vura du vurũ nga nyemuhe anaadunga tiko ti kura aregbo, te.

¹³ Wakina gure a, ka mo namanganga gamo adiaberã gbua ringbisihe kuti gamo bipai ya. Mo diberã ka manga gupai du ni ruruhe si ki vura du vurũ nga mo aidanga nzunzu ka mangaha te. Ka mo nye kaa manga gupai du ni ruruhe, wa regbo nikaa susa, gamo bipai ima rengba ka ariatihe. Ka kina ginipai vura du vurũ, wene gene wisigopai nisase, kparakpee, nduge tipa adunguratise, na tungusapai nika undo ro mo naandu kindi kumbatayo kaa pekafuo Yesu tifuo gamo bapatiza. Ho awirinamo nika bi gamo hipai ni ti ngba iriso Yekova, i nika gbia ngarasaro.​—1 Tesa. 5:11.

“ONI WISIGI TIRONI . . . ONI ASADI TIRONI”

14. Ginipai si aida mo naawisigoho dedede, na tipagine? (2 AKorindo 13:5)

¹⁴ Tingbafuo zio bapatiza, si ni nyanyakipa pai mo naawisigo tiro dedede. (Oni gedi 2 AKorindo 13:5.) Ti kura aregbo, si ni wenepai kaa wisigo tirani ka bihe singia ani namanga kparakpee na aˈuru dunduko, kini gedi Baibiri na kini wisigihe, kini ndu tipa adunguratise na kini tungusipai. Mo asadi ka gbata agene ka gbia ngbarago gbiati undo ti agi apai re. Ni kpiapai, mo sananga tiro na ngbatunga asanahe wa: ‘Ya mo mi rengbe ka sakapai tipa gu bangua ayugopai nga ga Baibiri fu kura aboro? Ya mo agene ho rengbe mi ka sa gimi sunge tungusapai ngbaha si du ni gupai mi agbia bakere ngbarago ti ni? Waigu du gimi akparakpee, na ya mo si nayugo gupai nga mi nakido dunduko kina kuti Yekova? Ya mo mi naandu sa agu adunguratise nga ga aKristano ti aregbo dunduko? Waigu rengbe mi ka manga ariapai ti wai mi amaaberã re na kini fubee ti regbo adunguratise?’

15-16. Ginipai mo nawirikihe ti gu kpiapai nga ga kura wirina sa nibipa ká asada?

¹⁵ Si ni nyanyakipa pai mo ini gamo arungbura a. Wirina du rimoko nga Robert apepa kpiapai nga gu nayugo memepai, ko aya: “Ho garã re aambeda ni kuti 20, mi aamangasunge nga gu mi anaandunga tipaha na aˈuru dunduko ya. Rogo kura uru sa tifuo sunge, gimi badiasunge ayambu re ku kpuri yo. Ri aya, ani nika du nisarani  na ‘ani nika gbia ngbarago ti wene regbo na mo ue.’ Ni bambataha, mi afu kina wiri bete rurungbura nduapai, ono mi ape gupai furi ni yangaraha nga oó na ki saki ndu gupai mi aká ha ti ni.” Robert aká gi asada re na gupai ko amangihe re angia wenepai. Ono kusa, ko aberẽkurii gupai namangi re na ki bi gupai nga si aaida ko mangipai kutini kia. Ko aya: “Mi aakánga gupai re nyanyaki watadu ni ipo wagu Yosefa aká fu dia Potifaro te. (Bam. P. 39:7-9) Nirengo, ngbare aima zera ka bi wai si adu fere ni kpakarakpakaraha tipa mi ká gupai re. Gupai namangi re aundo re mi bi gupai nga si naida mi nyakasi gimi pabakure na Yekova.”

¹⁶ Mo ima rengba ka gbia undo ti wisigo tiro wakina gu Robert amangihe. Zavura ho mo nadu ni na diabese ka ká asada, mo sananga tiro nga, ‘Bagiza regbo wai si adi he tipa mi ya oó?’ Ka mo bihe nga si naida mo mangi ariapai, ka rago gberẽnga tiro ya. Mo du na ngbarago nga mo ima inopa gi rungbura re awere. Mo kpari fu Yekova tipa gamo arungbura na ki mangi agu apai nika nyakasa ro mo du na nyemu ka giasangbako.​—Tam. 139:23, 24.

17. Waigu gu kpiapai nga ga Robert aakodapa rimo Yekova?

¹⁷ Gu kurapai kinaho ani narengbe ka wirikaha ti gu kpiapai nga ga Robert. Ko andu kumbatayo ki pe gupai nga: “Tingbafuo mi ká gu yambahe nangia ga gimi badiasunge re, ri aya, ‘Mo ima diabe gi asada re!’ Mi asana ri tipa gupai ri aaida ka pehe na gipai re. Ri ape gupai nga, nakura ri kinaho nadu mbata ni Dezire Yekova ape gupai furi nga, agu aDezire Yekova dunduko nga paranga aboro namanga gupai du ni irairaha rogo gbuko yo ka i gbia momu. Sidu, ri ape gupai fu nakura ri nga, ri nika asada re ka bihe singia mi kinawo. Mi adu na ngbarago ka bi gupai nga mi ima ye na irisa kuti rimo Yekova.”

18. Ginipai mo nadiberã ka mangaha tingbafuo bapatiza? (Oni bi gu sanduki a nga, “ Gu Kekeapai Ue mo Nika Gbia Ngbarago ti Ni.”)

¹⁸ Ho mo akpara tiro ni fu Yekova na ki zi bapatiza, mo nayugoho nga mo naida ka ziasi rimoko ka kina ginipai vura manga vurũ. Na mo ima rengba kadu na gu kido nga Yekova ima ino agu akpakarapai mo agbia tiro na ni na agu aˈasada mo aká ha. Ko nika fu maku afu kurii gu ome mo amangaha ka nye niruru ro. Mo du na gu kido nga, vurube gako ziazia toro, ko ima rengba ka fu ome foro mo mangihe wo. (Rk. 11:11-13) Na ga Yekova undo, mo nika du na rengba ka nye kaa pekafuo Yesu kindi tingbafuo gamo bapatiza.