Ziazia Kekeapai nayugo gupai nga, tipa ka digiso gupai Mbori akpinyemuhe, amaraika ti kura aregbo aima fu bandahe fu airisi ko. (Atambuahe 34:7) Ni kpiapai:

• Ti gu regbo Yekova aye na gberesa he kurii gu gbegberẽ gbata nangia Sodomo na Amora, amaraika aundo gu ruru kumba nangia Roto na gako aborokporo tipa i kuru kusayo.—Bambata Pai 19:1, 15-26.

• Rogo gu Babera naadu mbata, ho i aba paranga aEbere biata ni ku rogo ngariangaria mirãwe, Mbori ‘akedi gako maraika ki batasi agu avuruko’ re.—Daniere 3:19-28.

• Tifuo gu ruru kumba nangia Daniere ra dagba agu abahu naari ngba ra, ko agumba gupai nga, ko ni bati mbiko ‘gako Mbori nikedi gako maraika ko kisi ngba abahu’.—Daniere 6:16, 22.

Ti kura aregbo, gu ga Mbori amaraika namangasunge ni amokedi anaarimiso tiyo arimiso ku rogo gu mangaapai nga ga gu dungurati nangia ga bambata aKristano ho si ani rẽarẽ ni tipa ka digiso gupai Mbori akpinyemuhe. Ni kpiapai:

• Maraika azaki angbadimo bambukiso na ki rugu agu amokedi naadu yo tipa i ndu kumbatayo kindi na tungusapai yekaru yo.—Amokedi 5:17-21.

• Maraika agumbapai fu gu batungusi wene pangbanga nangia Firipo tipa ko ndu ngba gu gene natona Yerusarema yo ka ndu ku Gaza yo tipa ko tungusipai fu boro Etiopia nga gu ko nandu ku Yerusarema yo tipa irisombori.—Amokedi 8:26-33.

• Ho regbo ada ni be Mbori tipa agendiria da ni aKristano, maraika ayugu tiko fu gu barukurii aborovura nangia Korunerio rogo yuguyugupai na ki rugu ko tipa ko kedi sunge tipa gu mokedi nangia Petero ko ye ku kpuko yo.—Amokedi 10:3-5.

• Ho i aba gu mokedi nangia Petero ni ku bambukiso yo, maraika akuru fuko ki kusi ko kusayo bambukiso yo.—Amokedi 12:1-11.

Gopai ho awere nayugo gupai nga Mbori namangasunge na amaraika ti gi gaani regbo re ngba iiriwo gene tipa ka undo aboro wa gu i nafura tipaha rogo Ziazia Kekeapai te. Ono tie, nibi pa gaani regbo, Yesu aya: “Gi wene pangbanga nga ga ngbi re i atungusa ha rogo zegino dunduko mbiko ndiko fu arikaaboro dũ; ragoho ki digi adiga.” (Matayo 24:14) Ya mo mo iningo gupai nga ga Kristo abawiriki namanga gi sunge re tiibe gu bandahe nga ga amaraika?

Gu kitabu nga Yugoti nafura tipa amaraika nga aguyo nikaa undo aboro nyanyaki rogo kpotosende dunduko tipa i wirikipai tipa Yekova Mbori gbiati gako ringbisapai tipa ngbatunga aboro dunduko. Gu mokedi nangia Yoane akepai ki ya: “Mi ki bi kura maraika, ko nigu bebere ngbangbaturũ yo, nyenye pangbanga ki du ngbako yo ka tungusa ha fu agu yo dunduko naraka auru kpotosende, na fu arikaaboro, na ngbatunga aboro, na ngbatunga afugoyo, na aboro; ko ki poi ni bakere fugo, niya, ‘Oni gúnde ti Mbori, ki taasi rimoko; bambiko rago gako sapangbanga da; oni írisi gu ko naamangi ngbangbaturũ na kpotosende, na baime, na agugaabi aime.’” (Yugoti 14:6, 7) Dungu apangbanga duho areme nayugo gupai nga amaraika naundo gu sunge tungusapai aundo namanga rogo zegino dunduko. Ni rengo, ho boro ingapai sa asa gani berã ni ki karaga tini fuo Yekova, ‘ngbarago nadu dagba ga Mbori amaraika’—Ruka 15:10.

Ginipai nika manga ho sunge tungusapai nika digo ni? “Agu arikavura du ngbangbaturũ yo” ni amaraika nika songoda Yesu, nga Bakindo kurii abakindo, tipa ka so gu vura nga ga “gu bakere rago nga ga Mbori” ti regbo aramegido. (Yugoti 16:14-16; 19:14-16) Agu amaraika du na bakere ome nika mangasunge ni baimi agu aboro i nika sarangbanga yo wa Yesu nika “aíra bape fu agu yo agia nga sangba wene pangbanga nga ga gaani Gbia Yesu ya.”—2 ATesaroniko 1:7, 8.

Mo ini gupai nga, amaraika na bakere nyemu ka ino gupai du tipa ro. I naberã pa gu du wenengai nga ga agu aboro nakpinyemu ka irisombori, na Yekova aima digo ni mangisunge nayo tipa ka fu ngarasaro na bandahe fu gako ruru amoyambu auru kpotosende.—AEbere 1:14.

Oni tie, ani dunduko na siapai ka mangaha. Ya mo ani nika degaturani na ki gi sangba wene pangbanga nga gu i atungusaha rogo zegino dunduko? ADezire Yekova rogo gamo dagbarago nika du na ngbarago tipa ka undo ro mo gbia gu undo ga Mbori amaraika du na bakere ome tiyo afuhe.