1. Gini bete agunde duho?

 ONI berẽnga kuriipa agi apai re nga gu kura aDezire Yekova adu rogoho. Nestor na diako nga, María, aaida ka mangasunge rogo gu ba naadu na bakere zingo abatungusipa Kindo rogoho. * Tipa ka manga gupai re, si aaida i aria gayo gene raka. Ono i aagunde nga i ima rengba ka zanga du na ndikidi ngbarago ka i aaraka na marã beyo ni betehe. Ho Biniam ada ni ni boro sa dagba aDezire Yekova yo rogo gu ringara i asoga gaani sunge asoga rogoho, ko arugu tiko na gupai nga, ni du ko ni boro sa dagba ga Mbori aboro yo, ko ima rengba ka gbiatiko na arungosiro. Gupai re aima gundesi ko. Ono ko aagunde berewe gbe tipa wai gako aborokporo nika mangapai ho i nika inopa gako vovo pambori ni. I abi gu ngbatunga kansa naadu ni kere gbegberẽhe ti Valérie, na ri aamanga bakere ome ka gbia gu munganga nga guni nika irisa gu gari aida du mburuhe rii Baibiri nibipa kure. Na a wa rengbehe kadu tipa ai boro, ri aagunde agunde nga ri ima rengba ka kpi.

2. Tipagine si aida ani dibe gaani agunde ti ni?

² Ya mo mo agbianga tiro na ngbatunga agu agunde re? Badungu rani naaima gbia tirani na ni. Ka ani aawirikanga wai ka za tirani ti gaani agunde ya, si nawira gupai gbe nga, ani nika manga gbegberẽ adiaberã amanga nga gu naima rengba ka rungburasi gaani pagume na Yekova. Gure nga gupai Satana aidaha. Ko naˈasada aˈasada a ka mangasunge na gaani agunde tipa ka sarani ani basasangba ga Yekova arugute, kodihe na gu rugute du tipa tungusa wene pangbanga. (Yugo. 12:17) Satana nga gbegberẽ boro, kingia kere boro, na kidu na ome tiko. Ono mo ima rengba ka banda tiro be ko. Ngba gini gene?

3. Ginipai nika undo rani ani dibe gaani agunde?

 ³ Ka ani du na gu kido nga Yekova ima kpinyemu rani, na ko nikaa songoda rani asongoda ti aregbo dunduko, Satana asanga rani ani gunde te. (Tam. 118:6) Ni kpiapai, bake Atambuahe 118 aima gbiatiko na kere gbegberẽ apai. Badungu avurako naadu ti ni, kodihe na bete agu aboro naadu na nyanyakipa yo (Veresi 9, 10). Ti kura aregbo, ko anidu rogo bakere fudifudiapai (veresi 13). Na ko aima gbia nyanyaki rugute be Yekova (veresi 18). Ono wa si avura duwo, gu bake papara Atambuahe re abi bia nga: “Mi agunde nga wa sa te.” Ginipai naasako ko naabi tiko ni bandabanda ko gbe wa gure? Ko aima ino gupai nga wa vura duhe nga Yekova afu rugute fuko, gu Bako du ngbangbaturũ yo aima kpinyemu ko ni bakerehe gbe. Gu bake papara Atambuahe re aima du na gu kido nga ka si vura du nga ko agbiatiko na ginipai, gako Mbori nga boro nyemuse nika duho ti aregbo dunduko nga regerege ka undo ko.​—Tam. 118:29.

4. Gini agunde rengbe ani ka diabehe ka ani du na gu kido nga Mbori ima kpinyemu rani?

⁴ Si naida ani idi kuti gupai nga Yekova ima kpinyemu rani. Gipai re nika undo rani ani dibe agunde biata, du nga, (1) gunde be zanga du na rengba ka ngerafuo gaani aborokporo, (2) gunde be aboro, na (3) gunde be kpio. Agu awirina i nigumba payo rogo bambata genewaraga adu na rengba ka diabe gayo agunde bambiko i aima du na kido kuti ga Mbori nyemuse.

5. Gini apai rengbe ka ye na bakere bakabangirise fu bariikporo? (Oni bi gu sura duti kpotoho a.)

⁵ Gu Kristano nga bariikporo nabi gu tindiro nga ga ngerafuo gani aborokporo rogo borose yo na nyanyakipaha. (1 Tim. 5:8) Ka si du nga mo nga bariikporo, isoke ti regbo gi riri kaza re, mo aabaka bangiro abaka nga mo ima rengba ka zanga gamo sunge marã. Si ima rengba kadu nga mo aabaka bangiro abaka nga mo adunga na rengba ka ye na riahe fu gamo aborokporo watadu ba tipa raka rogoho te. Si ima rengba kadu a nga mo aima du na gunde nga ka mo zanga gamo sunge, mo adunga na rengba ka bi gu kuraha berewe te. Watadu wakina Nestor na María, i nifura tipa yo kusayo, si rengbe kadu nga mo aaberãha nga mo adunga na rengba ka raka na marã ni betehe te. Satana aima du na rengba ka rugusa badungu aboro ti iriso Yekova mbiko i aaberã wa gure.

6. Ginipai Satana aˈasada ka sarani ani idi kutini?

⁶ Satana naˈasada ka sarani ani idi kuti gupai nga Yekova akpingo nyemu rani te, na ko aundongo rani ani ngerefuo gaani aborokporo te. Ni sangbana gipai re, ani rengbe ka berã gupai nga si naida ani mangi ai gupai rengbe ani ka mangaha tipa ka banda gaani sunge. Zavura ani ima rengba ka manga gupai rengbe ka gbarasa gaani pabakure na Mbori.

7. Ginipai Yesu akido rani na paha?

⁷ Yesu, nga guko ini Bako wenengai kisusi ai kura boro, nakido rani nga gaani Mbori “ini agu apai zingo ho amanga [rani], mbata [ani] nikasana ko ti ni.” (Mt. 6:8) Na Yesu ima ino gupai nga Yekova regerege ka ngerafuo gaani azingo. Wangia ani aKristano, ani nga avuru ga Mbori riikporo. Yekova nga gaani Bariikporo, na ani rengbe kadu na gu kido nga ko nika manga kina boro gupai nzunzu ko apehe fu abariikporo dunduko i mangihe nga gu du rogo 1 Timoteo 5:8.

8. (a) Ginipai nika undo rani ani dibe gunde be gupai nga ani adunga na rengba ka ngerafuo gaani aborokporo te? (Matayo 6:31-33) (b) Waigu rengbe ani ka wirika agu arogotise du rogo sura nga agu yo nafu riahe fu wirina ni dee?

⁸ Ho du ani ni na gu kido nga Yekova ima kpinyemu rani na ko ima kpinyemu gaani aborokporo, ani nadu na gu kido nga ani nika duadu  na agu ahe berani du ani na zingoho. (Oni gedi Matayo 6:31-33.) Yekova naida ka ngerafuo rani, na ko nga wene Boro gamahe! Ho ko akusi kpotosende ni, ko amangipai kisusi gu nga ka fu agu ahe furani ani nikaa idaha tipa kaa raka. Ko akusi badungu ahe ku auru kpotosende furani tipa ani naagbia ngbarago ti ni. (Bam. P. 2:9) Ka si vura du nga ti kura aregbo ani na kina guhe berani du ani na zingoho zanga gu kura ahe berewe, ani rengbe ka tingida gupai nga gupai du ani ti ni na guhe berani du ani na zingoho nga, Yekova du fuhe. (Mt. 6:11) Si naida ani naatingida gupai ti aregbo dunduko nga guhe Yekova afuhe furani, ima du na nyanyakipaha gbe kisusi ai guhe ani ambupaha awere. Na kumbatayo, ko nika fu nyenye unga furani. Gure nga gupai aNestor na María aye ka rugatiyo na ni.​—Yes. 65:21, 22.

9. Ginipai rengbe mo ka wirikaha ti gu kpiapai nga ga aNestor na María?

⁹ Nestor na María adu na bawene kporo beyo na wene asunge marã Colombia yo. I ape gupai nga: “Ani aberẽpa sa gaani raka ni taataha na ki kiisi gaani sunge tungusapai, ono ani adu na gunde nga ani adunga na ngbarago ka ani aaraka na bete marã berani te.” Ginipai naundo yo i dibe gayo gunde? I aaberãpa gu dungu agene Yekova ayugu gako nyemuse tipa yo ngbaha. Fuo du yo na gu kido nga Yekova nikaa ngera angerafuo yo ti aregbo dunduko, i ambu gu wene asunge marã i aamangaha. I abagi gayo kporo na ki ga ku rogo gu papara ringara naadu na bakere zingo rogoho nga ga abatungusipa Kindo. Waigu i abi gu diaberã i amangihe? Nestor aya: “Ani ima bi wai du gupai du rogo Matayo 6:33 nga rengo. Ani aazingongo tipa he nga ga borose te. Na ani naraka awere na bakere ngbarago.”

10. Ginipai nasa gupai nga aboro naagunde be akurayo?

¹⁰ Naatona kina ti gu regbo aAdamu na Eva asamungu kuti Yekova, gupai aboro ninaamangaha nga kaa ye na imisiri kuti akurayo. (Batu. 8:9) Ni kpiapai, aboro namangasunge na gayo pagbia kaa manga kura aboro gbegberẽ, amangi gbegberẽ apai namanga kere gbegberẽ apai, agude wingba sukuru yo nasenga agu akurayo du yo na yo rogo riko na kini gundesi yo, na zavura aboro namangapai na gayo aborokporo ngba kere gene. Sidu, si airiwongo te nga aboro nagunde be kura aboro! Waigu Satana aˈasada ka mangasunge na gi gunde be aboro re kuti rani?

11-12. Waigu Satana amangapai kuti rani na gu gako ũvura nga ga gunde be aboro?

¹¹ Satana naˈasada ka sarani ani du na bakere  gunde be aboro si ki sa gupai nga ani mbu tungusapai watadu ani mbu manga gu kuraapai Yekova aya furani ani mangihe. Tii be gu maapai kurii nga ga Satana, airangbii ninaarugusa gaani sunge na kini rungosi rani. (Rk. 21:12; Yugo. 2:10) Rogo ga Satana zegino, dungu aboro nagbandaka ziree apangbanga gbiati kerekere aziree tipa aDezire Yekova. Agu aboro naida kuti agi aziree re rengbe ka sawia rani, watadu zavura ka zubo rani. (Mt. 10:36) Ya mo iriwopai nati ati tirani be ga Satana abirĩ? Wagusa te. Ko aima tona nimangisunge na ni rogo bambata sa kama agarã.​—Amo. 5:27, 28, 40.

¹² A nga gunde be gu sogahe nga ga airangbii nga gu yangara ũvura Satana amangasunge na ni te. Kura aboro nagunde tipa gupai gayo aborokporo nika berãha ho i nika da ni ni aDezire Yekova. Ti kura aregbo, i nagunde be gipai re kisusi wai i agunde be gupai nga ga gbiatiyo na kpata. I ima kpinyemu agumeyo ni bakerehe gbe na i naida gupai nga i ye ka ino Yekova na ki kpinyemuko. I na gberãrago ho i abi agumeyo ni i nifura rogo zanga irisa yo tipa ndikidi Mbori na tipa airisiko. Ono tie, ti kura aregbo, agu agume naasoga rengo asoga ti bambataha naye aye ku rogo rengo kusa. Ono na ka gaani aborokporo pe gupai nga kodatise ho berewe bangbanda rani na yo te mbikopa gaani vovo aida? Ginipai rengbe ani ka mangaha?

13. Waigu pa du ani na kido kuti ga Mbori nyemuse narengbe ka undo rani ka gaani aborokporo mbu rani? (Atambuahe 27:10)

¹³ Ani rengbe ka gbia wasa ti gu bawene afugo du rogo Atambuahe 27:10. (Oni gedihe.) Ho ani atingidapa bakio wai ni Yekova nakpinyemu rani, ani nabi tirani ni bandabanda rani ho ani agbia tirani ni na sogote. Na ani na kido nga ko nika fu mosoro afu furani tipa gaani hipai. Yekova nika fu agu ahe dunduko furani ani aidaha ka raka, ko nika undo rani ani du zezeredi na ngbarago, na ki undo rani ani nye mbembedi na ko, na ko rengbe ka manga agi apai re furani kisusi wai ai kura boro narengbe ka mangaha! Gure nga gupai Biniam, nga guko i nifura tipa ko mbata kusayo aye ki bihe.

14. Ginipai rengbe oni ka wirikaha ti ga Biniam kpiapai?

¹⁴ Biniam ada ni boro sa dagba aDezire Yekova yo ko ki vura ino gupai vurũ nga ko ima rengba ka gbiatiko na kere arungosiro. Oni bingo wai pa ino Biniam gupai nga Yekova ima kpinyemuko aundo ko ko dibe gupai nga ga gunde be aboro. Ko ya: “Gu rungosiro re aima gberã kisusi wai mi aaberãha. Ono sogote be gimi aborokporo nga gupai mi aagunde  behe kisusi gu rungosiro nga ga airangbii. Mi aagunde nga gi diaberã kada ni boro sa dagba aDezire Yekova yo nika sa buba nga guko naadunga ni Dezire Yekova ya ko du na gberãrago na gimi aborokporo airisanga re berewe te.” Ono tie, Biniam aima ida kuti gupai nga Yekova ti aregbo dunduko nangerafuo agu aboro Ko nakpinyemu yo. Biniam aya: “Mi aberẽkuriipa wai Yekova aundo kura aboro i hi agu akpakarapai nga ga zingo mosoro, iraira bipai tipa kura aboro, gbiati zuu. Mi aima ino gupai nga ka mi kakuti Yekova, ko nika fu maku afu fere. Ho i azi re ni bara dunguhe na zavura ki rungosi re, mi abihe nitire nga Yekova ti aregbo dunduko naundo rani ka si du nga ani ni niruru rani fuko.” Yekova ada ni ndikidi Ba fu Biniam, na ga Yekova aboro ayugu gupai nga i nga ndikidi aborokporo fu ko.

15. Tipagine rẽhe arẽ ti ni ka gunde be kpio?

¹⁵ Baibiri nape gupai nga kpio nga vura rani. (1 Kor. 15:25, 26) Ani rengbe kadu na bakabangirise tipa kpio, gbe ho ani watadu gaani boro awoka ni nikerehe. Tipagine ani agunde ti ni be kpio? Bambiko Yekova akusi rani na nyemu gupai nga ka raka na ngbarago nyeanye kindi. (Batu. 3:11) Ono gunde be kpio ima rengba ka undo rani ani banda unga rani. Ni kpiapai, si rengbe ka fõngbaduraniyo ani naari wene riahe na kini mangi mangonvo, ani naagbata undo be amunganga na kini di dawa husa ho si aidaha aida ni wo, na kini ne gupai nga ga maa raka rani rogo kerepai.

16. Waigu Satana aˈasada ka mangasunge na gu gunde du ani na ni be kpio?

¹⁶ Satana ima ino gupai nga ani nabi raka rani na nyanyakipaha. Ono tie, ko nape gupai nga ani rengbe ka mbupa apai dunduko zavura gaani pabakure na Yekova, tipa gupai gbua nga ka banda ungarani awere. (Eyo. 2:4, 5) Nairiwo wai du gupai Satana apehe re ni ziree! Ono bambiko Satana ni gu boro du na “tandu kpio,” ko naˈasada ka mangasunge na gu gunde du ani na ni be kpio tipa ka sarani ani mbu Yekova. (Eb. 2:14, 15) Ti kura aregbo, agu aboro du kutii gu maapai nga ga Satana ninaaserekpo he ka imo rani ka ani ambunga pa gaani idapase ya. Watadu ti kura aregbo, Satana rengbe ka bi gupai nga ani naida husa ni ipiipihe na ko kini asadi ka mangasunge na gipai re tipa ka sarani ani mbupa gaani idapase. Amunganga watadu gu gaani aborokporo angianga ndikidi aidipase ya rengbe ka sosoda rani ani idi gupai nga ga dia kure kutii kpotoseyo nga gupai rengbe ka kuo ga Mbori ndiko. Watadu boro ima rengba ka asada ka sosoda rani ani idi gu gene husa andunga sa na agu arugute nga ga Ziazia Kekeapai ya.

17. Ringbisihe kuti ARomo 8:37-39, tipagine si aidanga ani naagunde ti ni be kpio ya?

¹⁷ Wa vura duhe nga ani aidanga ka kpi te, ani ima ino gupai nga Yekova ambunga kpinyemu rani te, ka ani vura kpi vurũ. (Oni gedi ARomo 8:37-39.) Ho abakurea Yekova akpi ni, Yekova nabanda payo berãko yo si ki du wa ka i ya i kindi ni unga yo. (Rk. 20:37, 38) Ko na bakere nyemu ka zingisa yo be kpio. (Eyo. 14:15) Yekova afu guhe naadu na bakere genoho tipa gupai nga ‘nyenye unga du berani.’ (Yo. 3:16) Ani ima ino wai Yekova nakpinyemu rani ni bakerehe na kini berẽpa rani. Sidu, kuba gupai nga ka mbu Yekova ho du ani ni na kaza watadu ho i aserekpo rani ni ka imo rani, si naida ani kido kuti Yekova tipa wasa, tatamana, gbiati ome. Gu re nga gupai nzunzu Valérie na kumbari amangihe.​—Tam. 41:3.

18. Ginipai rengbe oni ka wirikaha ti ga Valérie kpiapai?

¹⁸ Ho garã Valérie adu ni nga 35, i abi gu kaza tiri nga kansa nga gu naadu ni kerehe. Oni bingo wai nyemuse aundo ri ri dibe gunde be kpio. Ri aya: “Ho mi aini gupai ni nga kansa  tire, gupai re aima zigbä re nikerehe gbiati kumbami. Si aaida gupai nga i gba re tipa gupai nga mi bati. Mi afura na badungu amunganga, ono i dunduko naaima ká ka gba re zanga fu kure kutii kpotoreyo. Mi aima du rogo gunde, ono mbiko ga Mbori aNdiko, mi aká ka ida gupai nga i moi kure kutii kpotoreyo! Rogo gimi raka yo naabaha, Yekova aima yugo nyemuse fere ni bakerehe. Mi adu awere na momu bere ka yugo gimi nyemuse fuko. Ai gu regbo mi anaagia gbegberẽ pangbanga, si anaasa re mi diberã ni bakerehe ka sa Yekova ko du na ngbarago na ki zanga sa Satana ko du na diabese. Ni yangaraha, i agba re zanga i moi kure kutii kpotoreyo. Wa vura duhe nga mi azeredanga dunduko te, Yekova ti aregbo dunduko ninaafu guhe furani ani aidaha. Ni kpiapai, ti regbo gaani dunguratise nga ga dungurati ti digido poso mbata fu i bi re na gi kaza re, ani awiriki gu kekeapai nga ‘Ani Sovura Kuti Agu Arungosiro du Areme na Wingbaduse.’ * Gi kekeapai re aima fu bakere wasa furani. Ani anaagedaha berewe na berewe. Ngbatunga kekeapai wa gere gbiati ndu ani kindi kumbatayo kaa manga agu apai du wa tungusapai na du pati adunguratise ima undo kumbami gbiati re ani nye zezeredi na kini mangi wene adiaberã.”

19. Ginipai nika manga barambeda?

¹⁹ Na ga Yekova undo, aKristano rogo apapara zegino dunduko ninaadia adia be kpakarakpakaraapai na kini ká fu Bakitingbanga. (1 Pet. 5:8, 9) Mo ima rengba ka manga kina gu bangisapai re a. Barambeda, Yekova nika fu rugapai fu Yesu gbiati agu aboro ko nika zogarago na yo tipa i “gbarasi ga bakitingbanga mangaapai.” (1 Yo. 3:8) Fuo gure, gu ga Mbori aboro nikaa iriso ko auru kpotosende ‘agúnde nga te; gbudagbuda aturõ aturõ na yo.’ (Yes. 54:14; Mika 4:4) Ono tie, da kina kuti gu regbo re, si naida ani mangi nyanyaki asadatise tipa ka diabe gaani agunde.

20. Ginipai nika undo rani ani dibe gaani agunde?

²⁰ Si naida ani naandu kindi kumbatayo kaa nyakasa gaani kido kuti gupai nga Yekova ima kpinyemu gako amoyambu na ko nabanda yo abanda. Gupai nika undo rani ani mangi gipai re nga berãkurii wai Yekova abanda gako amoyambu bakuru kusayo na kini fura tipaha fu kura aboro. Na ani rengbe ka maa pa wai ku berãraniyo ko naundo rani ni tirani ani dibe akpakarapai. Na ga Yekova undo, ani ima rengba ka diabe gaani agunde!​—Tam. 34:4.