WIRIKAPAI 36
Mo du ni Irarengo Rogo Apai Yo Dũ
Ai boro naida na agu abakureani du ni airarengo. Yekova naida abakureako du ni airarengo a. Ono taata pai nga ha te, ka du ni irarengo rogo gu zegino adunga dungu aboro rogoho ni airarengo ya. Gini aundo naye ti du ni irarengo rogo apai yo dũ?
1. Gini nyanyaki ndupai du ho si aida boro du ti ni ni irarengo?
Ho ani aperengo ni fu kura aboro, ani nayugo gupai fu Yekova nga ani ima kpinyemu ko na ani na irisa ko. Mo ini gupai nga: Yekova ima ino agu apai dunduko ani aberãha na kini mangihe. (AEbere 4:13) Ko nabihe abi ho ani asia ni ka du ni airarengo na si nasako ko du na ngbarago. Fugoko nape gupai nga: ‘Irakeretu nga kere gbegberẽ boro bangiri Yekova; ono ruru boro du rogo gako pa du zukazuka.’—Asanza 3:32.
2. Gini bete agene si aida ani du rogoho ni airarengo rogo gaani raka yo na aˈuru dũ?
Yekova naida gupai nga ‘ani gúmba rengo fu akuarani.’ (Zekaraya 8:16, 17) Ginipai gipai re ayugoho? Singia ani nafura na gaani aborokporo, abadiasunge, awirinarani aKristano ni akumba na adee, watadu agbia-ngbii, ani apenga ziree te watadu agu apangbanga du ni irairaha te. Agu aboro du ni airarengo adĩngo he be akurayo watadu ka biriko yo te. (Mo gedi Asanza 24:28 na AEfeso 4:28.) Na i natumo agu amarã-ngbeti dunduko nga gu si aida i fuhe. (ARomo 13:5-7) Ngba gi gene re na agu akuraha, ani nakpinyemu “ka sunga na rurupai rogo apai dunduko.”—AEbere 13:18.
3. Gini aundo du ti du ni irarengo?
Ho aboro aino rani ni ni airarengo, i nadu na kido kuti rani. Ani naundo aboro dũ i du ni bandabanda yo rogo dungurati wa agu aborokporo du na nyemuse. Ani nagbia ngbarago ti du na wene sangbakpotoseyo. Pa du ani ni ruru rani ima rengba a ka ‘fonga gu yugopai nga ga Mbori Batasirani,’ na ki gbe agu aboro adunga rogo dungurati ya kuti ndikidi irisombori.—Tito 2:10.
MO WIRIKI KURA DUNGU APAI
Mo bingo wai padu ni irarengo narengbe ka du na maapai kurii Yekova gbiati ro, na ki wirikinga wai mo narengbe ka du ni irarengo rogo apai yo ni bakiakia rogo raka yo.
4. Du ni ruruse nasa ngbarago ti Yekova
Mo gedi Atambuahe 44:21 na Maraki 3:16, na tifuoho mo ki sakipai tipa agi asanahe re:
-
Tipagine mo abihe ti ni nga patatamana nga ha te ka ida kuti gupai nga ani ima rengba ka õka rengo?
-
Mo nabihe nga Yekova rengbe ka du wai ho ani asia ni ka perengo zavura ti gu regbo duhe ni kpakarakpakaraha ka mangaha wo?
Ho agude aperengo ni, i nasa avunguyo i du na ngbarago. Ho ani aperengo ni, ani nasa Yekova ko du na ngbarago a
5. Mo naamanga rurupai ti aregbo dũ
Dungu aboro idi kuti gupai nga ka boro du nga ni irarengo ti aregbo dũ te. Ono mo bingo ndu gupai si aida boro du ti ni ti aregbo dunduko ni irarengo. Mo bi gu VIDIO re.
Mo gedi AEbere 13:18, na tifuoho, mo ki sakipai tipa wai ani narengbe kaa gumba rengo . . .
-
fu gaani aborokporo.
-
basunge yo watadu sukuru yo.
-
rogo gu kuraapai.
6. Ani nagbia undo agbia ti du ani ni airarengo
Du ni irarengo ima rengba ka ye na bete akpakarapai. Ono kumbatayo gizo, perengo nga gu wenepai rengbe mo ka mangaha. Mo gedi Atambuahe 34:12-16, na tifuoho, mo ki sakipai tipa gi sanahe re:
-
Wai du ni irarengo narengbe ka sa gamo raka si du ni bawenehe?
-
A. Agu akumbakuadee gbiati dereakumba du ni airarengo nanyakasa gayo rogatise
-
B. Agu amangisunge du ni airarengo nasa gayo abairasunge i du na kido kutiyo
-
D. Agu aboro ringara du ni airarengo nasa gupai nga agbia-ngbi kido kutiyo
GU KURA ABORO NAPE GUPAI NGA: “Gu kura tooni aziree kinaho gbua adunga na pai ti ni ya.”
-
Tipagine mo naidi kuti gupai ti ni nga Yekova ima soga ngbatunga aziree naabaha dũ?
GINIPAI MO NAWIRIKIHE?
Yekova naida gupai nga abakureako du ni airarengo rogo agu apai yo dunduko i apehe na kini mangihe.
Fugöpai
-
Gini bete kura agene rengbe mo ka du ngbaha ni ruru ro?
-
Tipagine adunga ha ti ni nipa tatamana ka berã gupai nga ani ima rengba ka oka rengo ya?
-
Tipagine mo aida ti ni ka du ni irarengo ti aregbo dũ?
MO WETEKE GU KURA APAI
Wai rengbe avunguagude ka yugopai fu awiriyo i du ni airarengo?
Gini aundo ani agbiaha ho ani amangapai ni kuti gaani akidohe?
Mo wisigingo singia ani du wa ka ani tumo marã-ngbeti ka si vura du vurũ nga i amanganga sunge na ni ngba wene gene te.
“Marã-ngbeti—Ya Mo si Naida Mo Tumoho?” (Ngbaõbambu Sinziri, Mbirinvuo 1, 2011)
Ginipai nafõ gu kura kumba naadunga ni ruruko ya ko mangi ariapai rogo gako raka yo na ki tona mangasunge ni ruru ko?
“Mi Awiriki Gupai Nga Yekova na Inapai na Mbupai” (Ngbaõbambu Sinziri, Merekoko 1, 2015)
