1, 2. (a) Gini gopai nayugoho nga gaani Bakindo aima digo ni zogorago tona rogo 1914? (b) Ginipai ani ka sakapai tipaha rogo gi kapita re?

GAANI idapase ima nyaka be wisigo ani agu apai ga Mbori Kindo namangihe dagba avuraha. (Tam. 110:2) Gaani Bakindo ima sigira agu abanzengere natungusapai na nyemuhe. Ko ima giriso apefuoko na ki kpuruwa yo rogo toro yo na rogo mangaapai yo. Wa vura duhe nga avura Kindo namanga ome tipa ka kparaka rani, ani ni kodikodi rani rogo zegino dunduko areme. Agi apai re gbiati gu dungu apai Kindo namangihe nga gu ani nawisigipai tipaha, nafu gu nyanyaki gopai furani nga, naatona rogo 1914, gaani Bakindo aima digo ni zogorago dagba avura Kindo.

² Kindo nika manga dungu iˈiriwoapai barambeda kumbatayo. Si nika “yé” na ki ‘kúadi’ avuraha dunduko na ki digisi yo. (Mt. 6:10; Dan. 2:44) Ono mbata fu gu regbo re da, gu kura nyanyakipa apai kinaho nika manga. Gini apai du ngaha? Dungu sangbaanebi nga ga Baibiri nasakapai tipa gu sanahe re. Ani wisigingo bete gu sangbaanebi re ka bingo agu apai du kumbatayo furani re.

3. Gini bambatapai ani apidoho kumbatayo?

³ Takapandepa zereda. Ho Pauro aakepai ni fu aTesaroniko, ko afura tipa gu bambatapai ani angera tipaha kumbatayo. (Oni gedi 1 ATesaroniko 5:2, 3.) Rogo gu ga Pauro waraga re, ko afura tipa “rago Gbia” watadu ga Yekova uru nga gu nika tona na pa zubo “Babera du ni bakere he.” (Yugo. 17:5) Ono tie, ngbutuko mbata fu tona ga Yekova uru, rikaaboro nika ya, “Zereda, ngba barani angba.” Si nawira wa gi takapandepai re nika du bara sa, watadu si nika manga ti mburu kuraha. Ya mo agbia pambori arimiso tiyo ku rogoho? Wa duhe nga i nga papara gi zegino re, si nawira wa i nika kodatiyo akoda na arikaaboro kaa ya, “Zereda, zereda.” (Yere. 6:14; 23:16, 17; Yugo. 17:1, 2) Gi takapandepa zereda na ngbabase re nika ngia gu kpiapai nika yugo na ni nga ga Yekova uru ima mbeda ka tona. Ono avura ga Mbori Kindo “abata nga wa sa te.”

4. Gini undo ani agbiaha ti ruga ani tirani na pa nyaka pa gu ga Pauro sangbanebi du tipa takapandepa zereda na ngbabase?

 ⁴ Gini undo ani agbiaha ti ruga ani tirani na pa nyaka gi sangbanebi re? Pauro aya: “Oni adu nga bitimo yo [ho], gu rago ka dusia roni wa iradĩ te re.” (1 Tesa. 5:3, 4) Ani wa gu kura aboro te mbiko ani ima ino wari agu apai du awere andu ku ho ni. Wai du nzunzu gu sangbanebi du tipa zereda na ngbabase re nika digiso tihe? Ani sungu ka pido ka bi wai agu apai du rogo zegino nika manga. Sidu, “ani nikparia rago ki nirugu tirani.”—1 Tesa. 5:6; Zef. 3:8.

5. Ginihe nika ngia tonatona “bakere gberãngbi”?

⁵ Zubo pambori. Oni tingidi gupai nga Pauro aya: ‘Ho i ka ya ni, “Zereda, ngba barani angba,” gberãngbi ki ye ku ri yo nibasa.’ Kina wai ikpirogumba niki na gumba ki su nibasa, sidu, gu regbo i nikaa ya “Zereda, ngba barani angba” “gberãngbi” nika ye nibasa ti gu regbo re. Gini ahe i nika gbarasaha? Bambataha nga, “Babera du ni bakere he,” nga bariwara ngbii zire apambori, i ayambaha a nga “debari.” (Yugo. 17:5, 6, 15) Pa gbarasayo agu akanisa naya si nga ga aKristano kodihe na gu kura apambori nga tonatona papara “bakere gberãngbi.” (Mt. 24:21; 2 Tesa. 2:8) Gipai re nika tunguo dungu aboro atunguo. Tipagine? Bambiko da kuti gu regbo re, gu debäri re nikaa bi tiri wa gu “nakindo” nikaa ‘bínga rungo’ ya. Ono tie, ri nika bihe nga gu gari tangbaduse re gbua. I nika diari ni ipo kusayo, si ki du wa “rogo uru sa.”—Yugo. 18:7, 8.

6. Ada watadu ginihe nika zubo gu “Babera du ni bakere he”?

⁶ Ada watadu ginihe nika zubo gu “Babera du ni bakere he”? Gu “nyarinde” du na ‘agbangaru bawe.’ Gu kitabu nga Yugoti nape gupai nga gi nyarinde re nga Yu-eni (United Nations). Agu agbanga du bawe re narukuba agu abazogo nasongoda gi “zamba nyarinde” re. (Yugo. 17:3, 5, 11, 12) Ya mo gu zubohe re nika iriwo ni kerehe? Gu rikaaboro du rogo Yu-eni nika gbarasa gu kumuko nga ga gu debäri re, ki sipiri, na “ki zokodi ri ni we dunduko.”—Oni gedi Yugoti 17:16. *

7. Wai du agu afugo Yesu du rogo Matayo 24:21, 22 adigisitihe rogo bambata sa kama agarã, na wai du si nika digiso tihe kumbatayo?

⁷ Guruso gu rago re. Gaani Bakindo ima kusa agu apai furani kuyangura nika manga ti regbo Bakere gberãngbi. Yesu aya: “I agúrusa gu rago re tipa siasia aboro.” (Oni gedi Matayo 24:21, 22.) Agi afugo Yesu re aima digiso tihe ni betehe rogo 66 F.B.K. ho Yekova “agurusi” gu zubohe ni nangia ga aRomo kuti Yerusarema. (Mk. 13:20) Gupai re asa gupai nga agu aKristano naadu Yerusarema yo na Yuda yo bati. Ono ginipai nika manga ti regbo gu bakere gberãngbi nika manga na zegino dunduko re? Vurube gaani Bakindo, Yekova nika ‘guruso’ gu zubohe nga ga Yu-eni kuti apambori tipa ka i gbarasinga ndikidi pambori na gbegberẽhe wa sa ya. Rogo gi gene  re, wa duhe nga zire apambori dũ i nika gbarasaha, kina ndikidi pambori sa ni ka bata. (Tam. 96:5) Ani wisigingo pai awere tipa gu kura apai berewe nika manga fuo digo gi papara bakere gberãngbi re.

8, 9. Gini iˈiriwoapai Yesu afura tipaha, na ginipai aboro nika mangaha tipa agu pai i nika bihe?

⁸ Ga Yesu sangbanebi tipa yangara arame nayugo gupai nga nyanyakipa apai kinaho nika manga mbata fu Aramegido. Gu bambata apai ue ani nika wisigopai tipaha gu du rogo gu Kitabu Wene Pangbanga nga ga Matayo, Marako, na Ruka.—Oni gedi Matayo 24:29-31; Mk. 13:23-27; Rk. 21:25-28.

⁹ Gu Yuguyuguapai du Ariyo. Yesu afura tipa pai kumbatayo nga: “I adáda uru adada, diwi ahása nga rago te, akerekuru ki nitiwi atiwa ngbangbaturũ yo.” Nirengo, aboro angeranga ku be agbia pambori tipa rugapai berewe te. Ya mo Yesu aafura a tipa gu iˈiriwo yuguyuguapai nga ga ngbangbaturũ? Isoke, si ima rengba ka du wo. (Yes. 13:9-11; Yoe. 2:1, 30, 31) Ginipai aboro nika mangaha tipa agu pai i nika bihe? “I akiga akiga” mbiko zanga ino yo gupai ka i mangihe. (Rk. 21:25; Zef. 1:17) Nirengo, avura ga Mbori Kindo, tona ti ‘abakindo ki da ti akanga’ i nika “ru aru be gunde, mbiko i angera [ka bi] agu apai nikaye” na ki oro ka gbata ba gbuko. Wa vura duhe wo, wene bagbuko ho i nika gbiaha tipa ka õka tiyo ti ga Bakindo zinga te.—Rk. 21:26; 23:30; Yugo. 6:15-17.

10. Gini takapandepai Yesu nika mangaha, na ginipai asongodi ga Mbori Kindo gbiati asogoho nika mangaha tipaha?

¹⁰ Takapandepa sapangbanga. I nika manga avura ga Mbori Kindo ngbaome i bi gupai nika kiiso gayo rungo kumbatayo. Yesu aya: “I [nika] bi Wiri boro ko niye rogo mai na bakere tandu na imarago.” (Mk. 13:26) Gu iˈiriwoapai nayugopa ome re nga agu apai nika yugoho nga Yesu ima ye tipa ka takapandepa sapangbanga. Rogo gu kura papara sangbanebi du tipa yangara arame, Yesu fura yo ni bakerehe tipa gu takapandepa sapangbanga nika manga ti gu regbo re. Gupai re gudu rogo gu sanza nga ga akandoro na ameme. (Oni gedi Matayo 25:31-33, 46.) Agu aboro nasongoda ga Mbori Kindo, i nika sapangbanga yo ni “akandoro” na i nika “tumba [riyo],” ka bi gupai nga ‘rago tumo yo nambeda.’ (Rk. 21:28) Ono tie, i nika sapangbanga asogo Kindo ni “ameme” na i nika ‘rúngo arungo’ mbikopa biyo gupai nga “nyenye mbusa [gbarasahe]” napido yo.—Mt. 24:30; Yugo. 1:7.

11. Ginipai si aida ani moihe ku berãrani yo wa ani apido agu apai du kumbatayo?

¹¹ Fuo Yesu takipande pa gako sapangbanga kurii ‘arikaaboro dunduko,’ kura dungu nyanyakipa apai kinaho nika manga mbata fu gu vura nga Aramegido. (Mt. 25:32) Ani nika wisigo apai ue dagba agu apai re: gu zubohe nga ga Gogo gbiati  dungura mbedimbedi aKristano. Wa ani kaa sakapai tipa agi apai du ue re, si naida ani moi gupai ku berãrani yo nga Fugo Mbori ayugongo boro gu regbo nzunzu agi apai re nika manga ti ni te. Nirengo, si nawira wa regbo kinaho agi apai re nika manga ti bangisa regbo sa.

12. Wai du Satana nika sovura ni yangaraha kuti Kindo?

¹² Sovura kuti ga Mbori aboro. Gogo boro Magogo nika zubo yangara mbedimbedi aKristano na abakureayo nga kura akandoro. (Oni gedi Yezekere 38:2, 11.) Gi vura Satana asoho kuti ga Mbori Kindo re nika ngia gu gako yangara vura ko adigi ni soho kuti mbedimbedi aKristano tona ho i ado ko ni kusayo ngbangbaturũ yo. (Yugo. 12:7-9, 17) Gbe, fuo i tona ka dungura mbedimbedi aKristano ku rogo dungurati, Satana aima manga ome tipa ka gbarasa gu wene asino nga ga toro du tiyo, ono zanga du na diabese. (Mt. 13:30) Ono tie, ti gu regbo i nika gbarasa ziree apambori dunduko, ga Mbori aboro nika du tigayo wa gu ‘bakporo adu nga na ngbongbo watadu akpuguru bakporo ti ni’ ya, sidu, Satana nika bihe nga momu du re. Ko nika zingisa kpoto gako gbegberẽ aboro yo i ye navura sa agu aboro nasongoda ga Mbori Kindo.

13. Wai du Yekova nika sovura tipa gako aboro?

¹³ Yezekere asakipai tipa gupai nika manga. Nibipa Gogo, gu sangbanebi re naya: “[Mo] ki kuru rogo ga ba ti mburu apapara rago nodiyo, mo na dungu aboro na mo, i dunduko nioro ri kina afarasi, nga bakere rimbasa agu aboro, rimbasa vura du na ome; mo akúra kuti gimi aboro aYisaraere, wa dubo na dada ringara.” (Yeze. 38:15, 16) Ginipai Yekova nika mangaha tipa gupai nangera wa boro ho rengbe ka ru genehe re te? Yekova aya: “Gi ngariangaria zinga adu ni zingisizingisi he. Mi ayámba ngbatunga agbudagbuda [abasape] dũ.” (Yeze. 38:18, 21; oni gedihe Zakaraya 2:8.) Yekova nika sovura tipa gako amoyambu auru kpotosende ane. Gu vura re du i ayambaha nga Aramegido.

14, 15. Gini kurapai si awira wa si nika manga tingbafuo tona Satana zubohe kuti ga Mbori aboro?

¹⁴ Mbata fu ani ndu kumbatayo ka bi wai Yekova nika sovura tipa gako aboro ti regbo gu vura nga Aramegido, ani runga tooni ka berãnga kurii gu kura nyanyakipa pai sa. Si nawira wa gipai re nika manga bangbanda gu regbo Satana nika tona sovura na ga Mbori aboro na gu regbo Yekova nika rimiso tiko ku rogo gu vura nga Aramegido. A wa ani abihe rogo genewaraga 11, gi uepai re nga pa dungura yangara mbedimbedi aKristano.

¹⁵ Dungura mbedimbedi aKristano. Matayo gbiati Marako aima ke gu fugo Yesu du tipa “siasia aboro” nga mbedimbedi aKristano ni papara agu pai nika manga ti mburu kuraha mbata fu Aramegido tona. (Oni bi genewaraga 7.) Yesu afura tipa tiko wa Bakindo rogo gu sangbanebi re nga: “Ko  akéda amaraika i dungura gako siasia aboro rogo gi zegino dunduko re, digida sende yo na digida ngbangbaturũ yo.” (Mk. 13:27; Mt. 24:31) Gini ngbatunga dungura he du Yesu aafura tipaha ane? Ko aafuranga ane tipa gu yangara dikohe nika manga ti mbedimbedi aKristano te, nga gu nika manga ngbutuko mbata fu bakere gberãngbi tona te. (Yugo. 7:1-3) Kuba gure, Yesu aafura tipa gupai nika manga ti regbo gu bakere gberãngbi nika ye. Sidu, si nawira wa bara ti tonatona ga Satana vura kuti ga Mbori aboro, gu mbedimbedi aKristano du kindi auru kpotosende ane i nika dungura yo ku ngbangbaturũ yo.

16. Ginipai gu mbedimbedi aKristano i nika zingisa yo be kpio nika mangaha ti regbo gu vura nga Aramegido?

¹⁶ Gini ngbanya du dagba pa dungura mbedimbedi aKristano na gupai nika manga fuo gure nga, Aramegido? Gu regbo re nayugo gupai nga mbedimbedi aKristano dunduko nika du ngbangbaturũ yo mbata fu ga Mbori vura nga Aramegido tona. Yesu na gako abadiazogarago nga 144,000 nika gbia pagbia ngbangbaturũ yo ka mangasunge na “ngbondo marã” ka gbarasa avura ga Mbori Kindo kusayo. (Yugo. 2:26, 27) Fuani, agu amaraika du na tandu, gu mbedimbedi aKristano i nika zingisayo be kpio, wa sa na gu Bakindo Nga Basovura, i nika sovura kuti gu “rimbasa [aboro] vura” nika ye sa ga Mbori aboro. (Yeze. 38:15) Ho gi kerepai re nika manga ni, gure nga gu vura nga Aramegido ima tona!—Yugo. 16:16.

17. Ginipai nika manga tipa “ameme” ti regbo Aramegido?

¹⁷ Sapangbanga. Gu vura nga Aramegido nika ngia yangara papara bakere gberãngbi. Ti gu regbo re, Yesu nika manga gu kurapai berewe. Kupati du ko ni Basapungbanga “arikaaboro” dunduko, ko nika da a ni ba imi gu rikaaboro dunduko ko aima sapangbanga yo mbata ni “ameme.” (Mt. 25:32, 33) Gaani Bakindo nika imo “arikaaboro” na “tĩtĩ [gbanga] basape.” Nirengo, agu aboro dunduko du wa ameme tona ti “abakindo” ki da ti “akanga,” i dunduko nika ndu “ku rogo nyenye mbusa [gbarasahe].”—Yugo. 19:15, 18; Mt. 25:46.

18. (a) Wai du apai nika ariatihe fu “akandoro”? (b) Wai du Yesu nika du na diabese?

¹⁸ Nairiwo wai apai nika ariatihe fu agu aboro Yesu nasapungbanga yo ni “akandoro”! Kuba gupai nga gu rimbasa aboro vura nga ga Satana yo nga “ameme” simbi yo na nduyo, gu “bakere rimbasa aboro” si awira wa babanda yo ti ni te nga “kura akandoro” re, i nika bata be ga avura yo zubohe na ki ‘kuru rogo bakere gberãngbi.’ (Yugo. 7:9, 14) Tingbafuo Yesu du na diabese na ki nyasiriipa avura ga Mbori Kindo dunduko, ko nika ba Satana na gako adaimona ku rogo gu due zanga mburuhe. I nika du yo wa agu aboro niima kpiko tipa  agarã sa kutu, ka sunge adunga tiyo ya.—Oni gedi Yugoti 6:2; 20:1-3.

19, 20. Wai du rengbe ani ka mangapai kuti gu rugute du rogo Yesaya 26:20 na 30:21?

¹⁹ Wai du rengbe ani ka mbakadatirani tipa gu kereapai nika zigizo kpotosende kumbatayo re? Ngbaõbambu Sinziri apepai bete agarã kusayo nga: “Bata nika ru riipa giasangba.” Tipagine duhe ti ni wo? Gu karagapai du tipa gipai re gudu rogo gu zahe yo Yekova afuhe fu agu aYudo naadu ni zizi yo Babera yo. Yekova aima pe gupai fuyo nga i nika zio Babera azio, ono ginipai si aaida ga Mbori aboro mangihe tipa ka mbakadatiyo? Yekova aya: “Oni yé, gimi aboro, oni rími ku rogo gaoni abambu, ki kisi gaoni angbadimo fuo roni, ngbutuko toni daho pa imisiri ngbaduse ka susa ni.” (Yes. 26:20) Oni kparia gu mangimangiapai du rogo gi veresi re: “oni ye,” “oni rimi,” “ki kisi gaoni angbadimo,” “oni óko tironi,” agi azinahe re dũ si aaida i mangihe. Si nawira wa agu aYudo nadegetuyo sa gi zinahe re aima sungo rogo akpuyo, zanga mbeda koyo du agu asekere ni naaye ka ziorago. Sidu, pa gayo bata aaruriipa giasangba ga Yekova arugute. *

²⁰ Ginipai ani awirikaha ti gipai re? A wa si adu tipa gu ga Mbori amoyambu naadu mbata re, pa gaani bata ti regbo agu apai du kumbatayo re naruriipa gia ani sangba ga Yekova arugute. (Yes. 30:21) Ngbatunga agu arugute re naye furani vurube gu mbakadapai nga ga dungurati. Sidu, si naida ani gisangba agu arugute ani agbiaha. (1 Yo. 5:3) Ka ani mangihe wo areme, si nika sarani ani du na nyemu giasangba kumbatayo na ki rengbe ka gbia gu bandahe nga ga Barani nga Yekova, na gaani Bakindo nga Yesu. (Zef. 2:3) Gu bandahe nga ga Mbori re nika sa gupai nga ani bi wai ga Mbori Kindo nika nyasariipa avuraha nyeanye kindi. Nairiwo gupai bangirani nikaa gonga ti ni re ya!