Gu bariwara ngbii nga ga aAsuro aima diabe gu kindo nangia ga aYisaraere naadu na angbatunga bawe. Awere, Saneriba bakindo aAsuro aaida ka diabe gu kindo nga ga aYudo naadu na angbatunga rogoho ue. Ko atona ka diabe agu agbata nga ga Yuda ni basasa. Ono gu gbata ko aaidaha gbe nangia Yerusarema. Ono gupai Saneriba aainongo ho ya nga Yekova naabanda Yerusarema.

Izikiya bakindo Yuda afu bakere marã fu Saneriba tipa ka ko zingo Yerusarema ya. Wa si avura du nga Saneriba aima dia gu marã re, ko akedi gako kere asekere i ndu ka sovura kuti Yerusarema. Agu aboro naadu Yerusarema yo aima du na bakere gunde mbiko aAsuro aambeda ni kerehe. Sidu, Izikiya ape gupai fuyo nga: ‘Ka oni gundenga ya. AAsuro ima du na ome tiyo, ono Yekova nika sarani ani du na ome kisusi yo.’

Saneriba akedi gako boro nga Rabasake ku Yerusarema yo tipa ko ndu ka sawia agu aboro du yo. Rabasake aru zegiyo ti gbata ki ta ngbako nga: ‘Ka Yekova undongo roni te. Ka oni mbunga Izikiya ko nangi roni ya. Mbori ho rengbe ka batasa roni berani te.’

Izikiya asana Yekova tipa gupai si aida ko mangihe. Yekova akaragapai fuko nga: ‘Ka mo gundenga be agu apai Rabasake napehe ya. Saneriba adianga Yerusarema te.’ Fuoho, Saneriba akedi waraga fu Izikiya. Gu waraga re aya: ‘Mo mbu gupai re. Ka Yekova batasinga roni te.’ Izikiya akpari ki ya: ‘Ako, Yekova, mo batasi rani, tipa aboro dunduko inihe nga kina ro sa nga ndikidi Mbori.’ Yekova aya fuko: ‘Bakindo aAsuro ayengo ku Yerusarema yo te. Mi nika banda gimi gbata.’

Saneriba aima du na gu kido nga Yerusarema nika du ni gako barambeda. Ono rogo kura yuru sa, Yekova akedi maraika ku rogo gu ba agu asekere re aara rogoho mbembedi na gbata. Gu maraika re aimi  asekere nga 185,000! Ga bakindo Saneriba nyanyaki asekere akpiki naabayo. Kurapai ho ka ko amangihe te, ti gu nga ka ga ku kporo yo fuo i dibe ko. Yekova abanda Izikiya gbiati Yerusarema kina wai ko akidohe. Ka si adu nga mo adu Yerusarema yo, ya mo ka mo akido kuti Yekova?