Ho gu mokedi nangia Yoane adu ni ni ziziboro rogo gu kisanga nga Patemo, Yesu ayugu yuguyuguapai fuko ti genehe 16, watadu asura agu apai nika manga kumbatayo. Gu yuguyuguapai re aayugo wai rimo Yekova nika du ni taasitaasi, wai gako Kindo nika ye, na wai gupai ko akpinyemuhe nika manga auru kpotosende wa du he ngbangbaturũ yo.

Rogo gu kura yuguyugupai sa, Yoane abi Yekova rii gako mbatabakindo ngbangbaturũ yo, na abaakumba 24 rogo pusi roko i nake ko ake kirikiri na akpakpari dahabu nga ga mbatabakindo riyo yo. Aikpira gumba gbiati aworo gumba kini ye yo du mbatabakindo ni. Agu abaakumba naadu 24 re akuku barangba Yekova kini irisiko. Rogo gu kura yuguyugupai yo, Yoane abi bakere rimbasa aboro, dagba rika aboro dunduko, na afugoyo nga aguyo nairiso Yekova. Gu wiri kandoro nga Yesu kini ngerefuoyo, na ki ndu na yo sa gu ime nga ga unga. Kusa, rogo gu kura yuguyugupai yo, Yesu atona ka zogarago ni Bakindo ngbangbaturũ yo na abaakumba 24 fuoko. Rogo gu yuguyugupai nangbefuo ho, Yoane abi Yesu ko ni sovura na Daragona, nga Satana, na gako adaimona. Yesu abayo ngbangbaturũ yo ku auru kpotosende no.

 Fuoho, Yoane abi wene sura wiri kandoro na aguyo du namba yo nga 144,000 i naru rii Bagangara Sinai yo. Ko abi maraika a ko ni gu ariyo auru kpotosende kirikiri, kini gumba gupai fu aboro nga i gunde ti Mbori kini taasirimoko.

Rogo gu kura yuguyugupai, ko abi gu vura nga Aramegido i niso ho. Ti regbo gu vura re, Yesu na gako riivura adibe gi ga Satana gbegberẽ zegino re. Rogo gu yangara yuguyugupai yo, Yoane abi nyenye kodatise dagba ngbangbaturũ na kpotosende. I agbirisi Satana na agu aboro dunduko napeka ko. Aboro dunduko du ngbangbaturũ yo na auru kpotosende aabi rimo Yekova ni ziaziaha na kini irisi kinako sa.