Arame bawe tingbafuo Yesu karaga tiko ku ngbangbaturũ yo, gako abawiriki agbia ziazia toro. Rago Pendekote du naadu rogo gu garã nangia 33 Fuo Batikayo Kristo, aboro aye ku Yerusarema yo rogo dungu arago tipa ka manga pumbo. Ga Yesu abawiriki adu yo wa 120 naadungura tiyo ku rogo gu bambu naadu kuari. Wakina ikpirogumba, iˈiriwopai amangi. Kpiahe wakina mirãwe asusungu rii agu abawiriki re yo ni basasa, na i ki tona ka fura rogo angbatunga afugo yo ni basasa. Bakere woro he wakina ba wege kini poi vuru bambu yo dunduko.

Agu ageno naaye rogo gu kura arago ku Yerusarema yo agi gu woro he re na i ki oro koyo tipa ka bi gupai naamanga yo. Rago aima iriwo tiyo ho i agi abawiriki ni i nifura rogo agu afugo re. I ki ya: ‘Ono aboro Gariraya nga agi aboro re. Mangihe wai tie i afura ti ni rogo parani yo?’

Fuoho, Petero na gu kura amokedi aru barangba rimbasa aboro. Petero agumbapa wai i aimi Yesu fu aboro, na pa wai Yekova  azingisi ko be kpio. Petero aya: ‘Awere, Yesu kumbabe Mbori ngbangbaturũ yo, na ko ima uka gu ziazia toro nga gu ko akido paha. Si du oni nagi gi iˈiriwo apai re ti ni na ki bi he.’

Ga Petero afugo aima fõngbadu aboro yo gbe na i ki sanahe nga: ‘Ani mángi wãi?’ Ko aya fuyo: ‘Oni saberã ti gaoni aingapai i ki bapatizi roni ti rimo Yesu. Oni ki gbia gu gamahe a nga ziazia toro.’ Rogo gu uru re, bange aboro wa 3,000 naazi bapatiza. Naatona ti gu regbo re kaa ndu ku mbatayo, abawiriki atona kaa nge Yerusarema yo ni kina boro ipo. Mbiko gu undohe nga ga ziazia toro, amokedi asigira dungu adungurati tipa wa ka i rengbe ka yugo agu apai dunduko fu abawiriki Yesu azinahe tipaha fuyo.