AYudo anaamanga Pumbo Susiri rogo agarã dunduko ti gu rame diwi nga 14 nga ga Nisana. Si adu tipa ka tingidayo na pa wai Yekova akusiyo kusayo ti du ni akanga Ezipeta yo na ki ye nayo ku Ringara Mokido yo. Rogo gu garã nangia 33 Fuo Batikayo Kristo, Yesu na gako amokedi amangi Pumbo Susiri rogo gu vurubambu naadu kuari Yerusarema yo. Fuo i nyasi ri riahe, Yesu aya: ‘Boro sa dagbaroni nika fu re ku be avurare.’ Kina iriworago nazi amokedi, i ki sana Yesu ki ya: ‘Da du?’ Yesu ki ya: ‘Gu kumba mi afu gi kpakuto re fuko, ko du.’ Fuani, ko ki fu kpakuto fu Yuda Keriota. Nibasa, Yuda aguari kuari ki kuru.

Yesu amangi kparakpee fuani, ko ki kuadi kpakuto rukutu, ki fuhe fu yangara gako amokedi. Ko ki ya: ‘Oni ri gi kpakuto re. Si naru kuba kpotore, nga gu mi nika fuhe tipa roni.’ Fuani, ko akpari kurii bete imekakue ki fuhe fu gako amokedi. Ko ki ya: ‘Oni mbiri gi ime kakue re. Si narukuba kurere, nga gu mi nika fuhe tipa mbupai ti aingapai. Mi kido roni nga oni adu ni abakindo na mi ngbangbaturũ yo. Oni mangi gere na agarã dũ kaa tingidapa re.’ Apefuo Yesu naadunguratiyo na agarã dũ ku rogo ba sa rogo gu nyemu re. I nayamba gu dunguratise re areme nga Tingida Pakpio Yesu.

 Tingbafuo riahe, amokedi atona kati kango dagbatiyo tipa da du kiipa ni kisusi. Ono Yesu aya fuyo wẽ: ‘Gu ni kiipa ni gbe dagbaroni kisusi nga gu ni nabi tini nga ni nga gu tooni ni du na umbapa ni.

‘Abakureami nga oni. Mi nagumba agu apai furoni dunduko Buba aida mi gumbaha furoni. Barambeda, mi nika ndu ku ngbangbaturũ yo koyo du Buba ni. Oni nika nye kina ane tigaoni, aboro nika inoho nga gimi abawiriki nga oni mbiko gu nyemuse du oni na ni tipa akuaroni. Oni kpinyemu akuaroni kina wai mi nakpinyemu roni.’

Niyangaraha, Yesu akparikpee, ki sana Yekova ko banda gako abawiriki dunduko. Ko asana Yekova ko undoyo i nimangisunge kina sa rogo zereda yo. Yesu akpari tipa rimo Yekova du ni taasitaasi he. Sidu, Yesu na gako amokedi ki bibia taarimo fu Yekova na ki kuru ku zegiyo. Regbo aima mbeda tipa i zi Yesu.