Erizabeta adu na paranga gumeri ti ni rimori angia Maria, ri aaraka rogo gu gbata nga Nazareta Gariraya yo. Gu bakpengua nangia Yosefa apazua Maria. Ho Erizabeta adu ni na mobara tipa adiwi sita, gu maraika nga Gaburere re andu fuo Maria. Ko aya: ‘Wene uru Maria. Yekova ima ngba namo ni bakerehe.’ Ri aruganga tiri na gupai Gaburere agumbaha te. Ko ki ya furi: ‘Mo nika du na vuse na ki batika kumbagude, na mo du wa ka mo yambu rimoko nga Yesu. Ko nika zogarago ni Bakindo. Na gako Kindo nika raka nyeanye kindi.’

Maria ki ya: ‘Ono ngasudee nga mi. Mi nika batika wai?’ Gaburere ki ya: ‘Pai ho rengbe ka gasa Yekova te. Ziazia toro nika ye kuriro na mo ki batika kumbagude. Gumero nga Erizabeta ima du na vuse awere.’ Fuani, Maria aya: ‘Ga Yekova kanga nga mi. Si mangi fere a wa gumba mo ho.’

 Maria andu ku rogo gu gbata naadu na abaagangara ka bi Erizabeta. Ho Maria afu sene ni fu Erizabeta, gude awo ku vuru Erizabeta yo. Erizabeta ki hi be ziazia toro na ki ya: ‘Maria Yekova ima fu maku foro. Pa ngbarago du fere nga na gi Gbia ye kono du mi ni.’ Maria ki ya: ‘Mi natambua Yekova na kpotoreyo dunduko.’ Maria araki na Erizabeta tipa adiwi biata, ri ki karaga tiri ku Nazereta yo.

Ho Yosefa aini gupai ni nga Maria na vuse, ko aaida ka mbu ri. Ono maraika ki ye fuoko rogo musumo yo ki ya: ‘Ka mo gunde nga ti dia diaro ya. Gbegberẽpai ho ri namangihe te.’ Sidu, Yosefa adi Maria ni diako na ki ye na ri ku kporo.