Bete aregbo kusa fuo Bakindo Nebukadenesara rari musumo tipa kpiahe, ko ambakadi bakere kpiahe nga ga dahabu. Ko amoihe rogo gu kpasakpasa rago nangia Dura na ki yambu gu nyanyakipa aboro dũ naadu rogo ringara kodihe na aSadaraka, Mesaka, na Abedenego i dunguratiyo ku barabangiri gu kpiahe re. Bakindo azinahe nga: ‘Bara sa kindi oni nagi woro ambanya, nambongo na nzenze i navudihe oni ki kuku sande fu gu kpiahe re! Gu boro nika kukonga sande ya i nika ba ni ku rogo gbigiwi we yo.’ Ya mo gu paranga aEbere biata re akuku fu gu kpiahe, watadu i airisi kina Yekova sa?

Fuani, bakindo azinahe nga i wo ti woro manzigo. Aboro dunduko ki tiwi ku sande ka irisa gu kpiahe re kpara kusayo sa ti kina Sadaraka, Mesaka, na Abedenego. Bete kura aboro abi gipai re na ki pehe fu bakindo nga: ‘Gu paranga aEbere biata re ima ká ka iriso gu kpiahe re.’ Nebukadenesara ki kedi sunge fuoyo na ki ya: ‘Mi nafu momu berewe furoni tipa oni irisi gu kpiahe re. Ka oni airisongo ho ya, mi nika ba roni ku we yo. Mbori ho rengbe ka batasa roni bere te.’ I ki karagapai nga: ‘Ndupai ho mo fu kura momu berewe furani te. Gaani Mbori rengbe arengba ka batasa rani. Ono ka ko avuranga batasa rani ya, Ako bakindo, ani airisongo gu kpiahe re te.’

Nebukadenesara azingi ni kerehe. Ko aya fu gako aboro wẽ: ‘I gindo we si foi berewe susi gu nidu mbata wa bara saba!’ Fuani, ko ki ya fu gako asekere: ‘Oni vodi  agi akumba re, ki ba yo koyo!’ Gu we re aima faa ni kerehe si ki da nga ho asekere ambedi ni na ni i ki kpiki nibasa. Agu aEbere biata re aima tiwa ku we yo. Ono ho Nebukadenesara angere ni ku we yo, ko abi gupai nga aboro biama nata rogo gu we re angianga biata ya. Gunde ki ziko ni kerehe ko ki sana gako abanyaki nga: ‘Anga aboro biata ani ba yo ku rogo we te? Mi nabi aboro biama na gu kurani sa nangera wa maraika!’

Nebukadenesara ki mbedi koyo du we ni ki yambuhe nga: ‘Oni kuru yo, oni nga agu amoyambu nga ga gu Mbori Du na Tanduapai Dũ!’ Aboro dunduko ngbayo azere ka bi aSadaraka, Mesaka, na Abedenego i nikuru we yo zanga gbi. Kpotoyo, mangeriyo, na gayo aroko aagbingo te, kandara fũo we aadunga ti yo te.

Nebukadenesara ki ya: ‘Gu Mbori nga ga Sadaraka, Mesaka, na Abedenego nga bakerepa Mbori. Ko nikedi gako maraika ko ye ka banda yo. Mbori ho du wa ko te.’

Ya mo mo diberã ka nye niruru ro fu Yekova apai ki vura du wai vurũ wa gu paranga aEbere naadu biata re?