SITA SANAHE
Wai Rengbe Mi ka Sovura Kuti gu Soapai Nga ga Akurase?
GINIPAI KA MO MANGIHE?
Mo berẽnga kurii gi kpiapai re: Ngbadu Benty tona kuo nibasa fuo biko akumbagude ue du ko na yo sukuru yo i niye fuoko. Agu akurako re ima asada bara ue ni gi poso re ka sako ko vu gundö. Gere nga biataha.
Bambata kumbagude ya:
“Mo kina nisaro berewe?”
Ko ta beko ku mangu yo ki kusi he yo kini yaha fu Benty.
Benty bi gupai nga gundö du. Ngbadu Benty tona ka kuo berewe gbe.
Benty ya fuko: “Ako. Mi aima pe gupai foro nga mi naavungo . . . ”
Ue kumbagude defugo ngbako ki ya: “Ka mo dunga ni iragunde wa gure ya!”
Benty fura ni ngarã ki ya: “Iragunde nga mi te!”
Ue kumbagude ba beko pagoro Benty kini zungodi ko niya: “Mo di ru adia. Kungbo wiripai du gbua.”
Bambata kumbagude gbisi gu gundö re kuti kpakpu Benty ki fura ni patapata fuko niya: “Ani apenga ha fu boro te. Boro ho nika ino nga mo avugundö te.”
Ka mo ngia Benty, ginipai ka mo mangihe?
MO RUNGA KA BERÃ!
Ya mo agu akumbagude nasosoda Benty re berẽ nzunzu kurii gupai i amangaha re? Ya mo i du nitiyo naidi ka tona vugundö watadu kura aboro du nasosodi yo i tonaha? I aidi akurayo idi na yo, sidu, i kini mbuyo i moipai kuriyo.
Ka mo du rogo pai wa gure, wai rengbe mo ka sia gu gene du kia na ki dibe gu soapai nga ga akurase?
-
MO BERẼ KUMBATAYO
Baibiri naya: “Ngangarã boro nabi kere pai, ki gbu; ono zangainahe nandu andu kindi, ki bi mbusa tipa ha.”—Asanza 22:3.
Dedede, mo rengbe arengba ka bi kerepai kumbatayo. Ni kpiapai, ka mo bi gamo agude sukuru i nasungu kini fura tipa adee watadu tipa akumba, ginipai ka mo mangihe? Ka mo berẽpa gupai rengbe ka manga, mo rengbe arengba ka mbakadatiro ka mangapai ka i idi ka rimiso ro ku rogo gayo bibiriko afugo.
-
MO BERẼNGA
Baibiri naya: “Oni . . . du na wene sangba kpoto yo.”—1 Petero 3:16.
Mo sananga tiro nga, ‘Sangbakpotoreyo nika du wai kumbatayo ka mi idi ka ndu na rimbasa aboro?’ Mo rengbe arengba ka ida akuaro idi na mo tipa bete regbo gbua. Ono mo nika bi gupai re kumbatayo wai? Ya mo mo naida ka gberesapa gu ngbatunga boro nga mo mbiko gupai gbua nga akuaro idi na mo sukuru yo?—Gate 23:2.
-
MO DIBERÃ
Baibiri naya: “Iratatamana namakia pa apai.”—Asanza 14:16.
Boro na boro duwa ka ní mangi siapai na ki raki na sangbanaha. Baibiri napepa akumba wa Yosefa, Eyobo, na Yesu, nga aguyo namangi ruru siapai. Si napepa aguyo a namangi gbegberẽ siapai, wa Kaina, Esau, na Yuda. Mo nika manga wai tigamo?
Baibiri naya: “Kina agu aboro namanga pai na rengo ngba ti [Yekova].” (Asanza 12:22) Ka si du nga mo ima berãkurii asangbana mangapai na ki ima dakuti pai, si rengbe kadu foro taata mo gumbaha ziazia fu akuaro.
Ka mo bakingo bangiro ya, anga si naida mo fura fu akuaro ni kina bagbangaha te. Kura aregbo kinaho rengbe mo ka ya gbua OÓ ono si kidu na ome rogoho. Kurapai rengbe mo ka pehe nga:
-
“Oni kusi re rogo gure!”
-
“Mi naamanganga ngbatunga gupai re te!”
-
“Oni ima ino re wenengai nga mi naamanganga gure te!”
Gupai si aidaha nga ka karagapai ni ipo na si kidu na ome rogoho. Ka mo mangihe wo, akuaro rengbe arengba ka mbu fuda ro ni kina ipo!
SOVURA KUTI SAWIAHE
Ka mo mbu tiro fu gu soapai nga ga akurase, mo nada wakina gu masini kina boro arugaha si nimangipai
Na ka akuaro asawia ro? Na ka i ya foro, “Gini namanga ro, iragunde nga mo?” Mo ini gupai nga gure nga tonatona soapai nga ga akurase. Wai rengbe mo ka karagapai? Apai ue rengbe mo ka mangaha.
-
Mo rengbe arengba ka ida gu soapai re. (“Rengo du, mi nagunde agunde!” Fuoho, mo ki pe gupai mo agunde ti ni.)
-
Mo rengbe ka karaga soapai kutiyo. Mo gumba ndu gupai mo aidanga na gupai re ti ni ya, na ki ariapai kuriyo. (“Mi aberẽhe tigimi nga aboro wa oni were arengbanga ka vugundö te!”)
Ka akuaro ake na mo kindi, mo guari ho gamo! Mo ini gupai nga, ka mo nye kinaho kindi, gayo soapai nika kio kina kumbatayo. Ka mo guari ho, si nika yugo gupai nga mo ambunga aboro i gberesi sinoro te.
Gu rengo du nga, ka mo gbunga be gu soapai nga ga akurase te. Ono mo rengbe arengba ka diaberã tipa kadu ni gu ngbatunga boro mo aida kadu nga ní, kini rugu pa ga raka. Mo na siapai bero ka mangaha!—Yosua 24:15.
