LECCIÓN 2
Nonho Dios
1. Bixhkié rheyala tzeajneláchhirha Dios
Dios benhe yogoté tan dia. Tolizi zué len bibata gatie (Salmo 90:2). Kíe zaa rson chhiágazi tan rheyalirha lo Biblia (1 Timoteo 1:11). Lo Biblia rne: «Jeobá, Dios kiendo, bene wezékie gon yogoté, rhedólalo gákalo xhen len silho balaʼan [...], tan lí bhenlo yogoté tan dia». Tanka rheyala gzénagarha len tzeajneláchhirha toze Leʼ (Revelación [Apocalipsis] 4:11).
2. Nonaka naka Dios
Nitó bene kane rlene Dios, tan naake espíritu ka to beʼ, Leʼ nayepiterhe ka rhoʼ (Juan 1:18; 4:24). Pero waka gonbérhane katí ryorha yogoté tan noonhe. Kanho, nayán kue frutas len yiaj ta nagoe, rguixhajeʼ naake bene rheajníe len rlué gákati rhékene rhoʼ. Len ka banachhi noonhe yibá len Lichhileyó rlué gákati yelarzeke napeʼ. Tanka lo Biblia rne kíe: «Bi gaka slerha Dios pero wezékie gonbeʼrha ka naake katí ryorha tan rhonhe len ta chi benhe» (Romanos 1:20).
Tan glábarha Xhtidza Dios naka yetó kaʼ gonbérhane. Naʼ rtzalaj naʼka rhonhe len ka bene, bí ta rheyolachhe len bí ta bi rhájxhenenhe len naʼka rhonhe katí bí rhaka. Kanho lo Biblia rne Dios naake «bene rzixhen len rheyechilachhi, bene bi rchixhe stikado len nákagaze lilachhi len bene rhékene» (Salmo 103:8).
3. Bí ló Dios
Jesús gné: «Xhózito sualho yibá, gaka chhiatzawe lolho» (Mateo 6:9). Zákala napeʼ nayán títulos, pero dia to lawe. Totó didza natzá ka rneke ló Dios. Didza xhidza rnerha Jeobá, lhézekan rgónkene chhin Yavé. Lo Biblia rne: «Zéloze lí nayepilolho doxhente Lichhileyó, na lolho naka Jeobá» (Salmo 83:18 [82:19 bala versiones]).
Nayán Biblia chi beguiélake lawe na bozuake Dios o Señor len nan bchhiakate Biblia gloʼke kado 7,000 nia. Jesús bgónhene chhin ló Dios katí bsédiene ka bene. Lo Biblia rguixhajeʼ didza gné Jesús: «Nedi chi bzluékedane lolho, len weksluérheda» (Juan 17:26).
Byo video ¿Tiene Dios un nombre?
4. A rzue guiʼa Dios rhoʼ
Kateka rhon xhozi bido ní, Xhosrha Dios rheʼenene suarha chhiatzawe
Chen tabálaksi rheeke Jeobá rhoʼ, bixhkié nodegue látaj rhee yelarheguirlá. Bálake rhékiekene Dios rsakayé rhoʼ na irhoajbé nobí gonrha. Pero ten bi naka li. Lo Biblia rne: «Binho sekie sinaʼ Dios na gonhe ta malha ni ka rzue prueba nitó bene» (Santiago 1:13).
Jeobá noone látaj guiorha bilha neza kielarha lo yelanabán kierha. Na chhiaʼterhe naka chen kueajrha ta tzeajneláchhierhane (Josué 24:15). Pero bene zian rgónkene chhin na gonke ta malha, xhtole le naʼn rhee zítelha yelarheguirlá. Jeobá rzuayéchigaze katí rlene rzakayarha. Lo Biblia rne katí «Jeobá blene ta malha ki bene bedzá lo Lichhileyó [...] na gzuá yéchigaze» (Génesis 6:5, 6).
Jeobá rhékene rhoʼ len rzelachhe suarha yatzajyolaj. Tanka yéstikaga na yosnitie yelarheguirlá len ka bene malha nabékike le. Tzalaka zi gonhe kan, Leʼ nézene bixhkié ni nodegue látaj rhee yelarheguirlá. Lo lección 8, weyédierha bixhkié nodegue látaj. Blaba 2 Pedro 2:9 len 3:7, 13.
5. Naʼka wezékie suarha gago len Dios
Jeobá rledze rhoʼ gonrha oración na suarha gago len Leʼ. Rzuene guiʼa totorha (Salmo 65:2; 145:18). Leʼ rheʼenene sixhene kierha len rheyonbée gákati rhoeláchhirha rhonrha chhin kíe, zákala bi rzékierha gonrha kateka rheʼenene. Tanka zákala nákarha bene dolaxhkiá waka suarha gago len Leʼ. Blaba Salmo 103:12-14 len Santiago 4:8.
Tan chi bhene yelanabán kierha, rheyala yékierhane masrhe kalha bene yobla (Marcos 12:30). Lí wezékie ksluelho gákati rhekelho Dios chen ryédielo masrhe len rzenágalo kíe. Lo Biblia rne: «Ten rhene iné yelarheke kierha len Dios: tan gzénagarha mandado kíe; len mandado kíe bi naka zedi» (1 Juan 5:3). Chen kan gonlo, wezuáteslo masrhe gago len Leʼ. Blaba 1 Timoteo 2:4.
