LECCIÓN 7
Bí naka Yelarnebé ki Dios
1. Bí naka Yelarnebé ki Dios
Bixhkié Jesús naake bene rnebé chhiaʼterhe (MARCOS 1:40-42)
Naka to yelarnebé rhee yibá. Yéstikaga «gxhoxhaj ukinaj na yosniti yogoté yelarnebé» ki bene, na gon ka rheyolachhi Dios lo Lichhileyó ka chi rhaka yibá (Daniel 2:44). Yelarnebé ki Dios naka ta nakinhe bene le wegón na bene Lichhileyó yikuake toze. A bi rhékelo le naka rson chhiágazi. Blaba Mateo 6:9, 10 len 24:14.
Kateka naka ki to yelarnebé rhee Lichhileyó nakin to bene snebé, lhézekan Jeobá Dios chi gleaje Xhiʼinhe, Jesucristo, na snebé lo Yelarnebé kíe. Lo Biblia rne: «Yelarnebé ki lichhileyó chi bchhin naka Yelarnebé ki Xhanrha len ki Cristo kíe, na leʼ zeajlí snebé» (Revelación [Apocalipsis] 11:15).
Byo video Nobí Yelarnhebeʼ ki Dios
2. Bixhkié Jesús naake bene rnebé chhiaʼterhe
Chhiaʼterhe naka snebé Xhiʼin Dios tan naake bene wen len yogoniate rhonhe ta naka chhiatzawe (Mateo 11:28-30). Len napeʼ yelarzeke na gákalenhe bene, na ugónhene chhin katí snebé yibate lo Lichhileyoni. Len katí beyasa bebanhe, Jesús beyiaje yibá gaʼ gleze kuita Xhoze na sieʼ yelarzeke na snebé (Hebreos 10:12, 13). Nan bchhin, Dios bdeʼ kíe yelarnebé. Blaba Daniel 7:13, 14.
3. A dzákarhe bene snébeke len Jesús
Lo Biblia rne dzaka yetó kue bene snébeke len Jesús. Daniel 7:27 rhue loke santos. Dios gleaje primero apóstoles ki Jesús na gákake bene santos. Lo dzanandza Jeobá nizeaj rbéaje bene len nigolha lilachhi na xhchhin gákake santos. Ka goka ki Jesús, ka bene ní nan chi gótike dzajzuake yibá ka to beʼ. Lo Biblia rne: «Na kan naka katí yiyasa yebán ka bene goti. [...] Rhati bene naka bélha, rheyasa bene ka to beʼ» (1 Corintios 15:42, 44). Blaba Juan 14:1-3.
Bálake yeyiajke yibá. Lo Biblia rne létikaze, Jesús gné kieke to kue zingo bekóxhilha (Lucas 12:32). Lo Biblia rguixhajeʼ bálake snébeke len Jesús lo Lichhileyó, nákake «144,000 bene zua rhuaxhgake lawe len ló Xhoze» (Revelación 14:1).
4. Bí goka katí Jesús gxhie yelarnebé
Jesús gzolawe rnebé yíza 1914, ta primero ta bhene goka bebeaje Taxhiwe len ka demonios kietaʼ yibá na bozáleta Lichhileyó. * Tandozi rdzataʼ gzólhota nabékita ta zedi doxhén Lichhileyó (Revelación 12:7-10, 12). Tanka zeajtezi rbeʼ ta malha, dila, bedoxhó, yelaweʼ len gbin, rlué chi rhaka ka zua lo Biblia na yéstikaga Yelarnebé ki Dios gaka loneʼ Lichhileyoni. Blaba Lucas 21:7, 10, 11, 31.
5. Bí rhoon Yelarnebé ki Dios lo dza naʼn len bí gon ta zi zaalha
Yelarnebé ki Dios rhotobi bene ziangolha ki yogoté naciones, nia ki tan rtzálajke rson chhiágazi ta zaa lo Biblia. Millónkane bene golalachhi rheyónbeʼke yelarnebé ki Jesús len rzenágake kíe. Yelarnebé ki Dios gonchiʼ leke katí yosnitie diarha ta malha rhee Lichhileyó. Tanka chen rheʼnerha sirha banheza ka gon Yelarnebé ní, rhon bayochhi gzénagarha ki Jesús. Blaba Revelación 7:9, 14, 16, 17.
Non 1,000 yíza, Yelarnebé ní yiyon kanha gonhe Dios ki ka bene na yiyaka Lichhileyó to Paraíso. Nan yiyochhi 1,000 yíza, Jesús yodee yelarnebé ní ki Xhoze (1 Corintios 15:24-26). A kebi rdanlo ktzalajlenlo bene yobla ki yelarnebé ní. Blaba Salmo 37:10, 11, 29.
^ párr. 6 Na snísielho masrhe tan rne Biblia ki yíza 1914, byo nota 22 lo página 217 a 220 ki libro ¿Qué nos enseña la Biblia?
