Lu beeu Julio 2013, biseendaʼ Grupu ni Zaniruʼ stiʼ ca testigu stiʼ Jiobá ti carta nabé sicarú ra nuu ca misioneru ne ra nuu xcaadxi siervu especial ni nuu de tiempu completu ni cayuni xhiiñaʼ Jiobá ndaaniʼ sti guidxi. Lu carta que zeeda ximodo chigacanécabe laacaʼ para gúnicaʼ viaje sticaʼ ca lugar ra checaʼ asamblea internacional o regional ni chigaca iza 2014 hasta ra ruzulú iza 2015.

Guníʼ Grupu ni Zaniruʼ cheʼ cani nuu lu serviciu de tiempu completu ti asamblea, peru cadi para ngue si, sínuque maca para chiguuyacabe binnilídxicabe ne ca xhamígucabe. Carta que na zaguixe organización stidu pasaje para chécabe ne para guibiguétacabe.

Cadi deruʼ ndiʼ nga primé biaje gaca ti programa sicaríʼ, peru iza riʼ maʼ gadxé modo chigaca ni. Comité de Enseñanza stiʼ grupu ni Zaniruʼ na zaa chuʼ ti departamentu nacubi ni láʼ Sección de Viajes stiʼ central mundial. Departamentu riʼ nga xcuenta guyubi hotel, siʼ boletu de avión ne guni guiráʼ dxiiñaʼ ni caquiiñeʼ gaca.

Cadi xadxí de yendá carta que, bizulú bedandá stale solicitud stiʼ boletu de avión ndaaniʼ ca oficina stidu. Ne para enero 2014 que guizáʼ maʼ nuu stale dxiiñaʼ ndaaniʼ departamentu Sección de Viajes. De raqué maʼ gudixhe ca hermanu runi dxiiñaʼ ndaaniʼ departamentu riʼ ximodo gaca viaje stiʼ ca siervu especial ni nuu de tiempu completu ni nuu lu guidubi Guidxilayú: biyúbicabe hotel, boletu de avión ne bíʼnicabe guiráʼ dxiiñaʼ ni caquiiñeʼ gaca.

Nabé nagana guca para gudixhe chaahuicabe viaje stiʼ ca hermanu riʼ. Nuu tu biʼniʼ viajar dede Reykjavík (Islandia) hasta Cochabamba (Bolivia); xcaadxi biʼniʼ viajarcaʼ dede Nouméa (Nueva Caledonia) hasta Antananarivo (Madagascar). Guyuu tu gucuaa avión dede Port Moresby (Papúa Nueva Guinea) hasta Seattle (Washington, Estados Unidos), ne dede Ouagadougou (Burkina Faso) hasta Winnipeg (Canadá).

Gaayuʼ hermanu ni runi dxiiñaʼ ra Sección de Viajes stiʼ central mundial guziʼcaʼ 19,000 mil boletu para biaʼ 4,300 pasajeru ni zeeda de 176 guidxi roʼ. Gunda guca guiráʼ ndiʼ pur donación bidii ca congregación para programa riʼ.

Nagueendaca bisihuinni ca siervu especial ni nuu de tiempu completu cudiicaʼ xquíxepeʼ. Ti guendaxheelaʼ ni naca misioneru guníʼ: «Yannadxí chiguibiguétadu, sureste asiático, ra cayuni servirdu yanna. Peru cudiʼdu xquíxepeʼ laatu pur gucanetu laadu guyuudu Inglaterra, xquídxidu, para chigánnadu ca binnilídxidu ne ca xhamígudu ni qué huadúʼyadu raca gaayuʼ iza. Qué ñanda diʼ ñuudu pa qué ñacanetu laadu. De guidubi ladxidoʼdo cudiʼdu xquíxepeʼ guiráʼ cani gucané para gunda guyuudu xquídxidu».

Ti misioneru ni nuu Paraguay bicaa: «Naa ne xheelaʼ nuudu gudiʼdu xquíxepeʼ laatu saca gucanetu guyuudu asamblea internacional ni guca Nueva Jersey (Estados Unidos). Ra guyuʼnu iza 2011 que, bizuludu gundisaʼ chaahuidu ti ndaa bueltu para chuudu Estados Unidos ne gunibiaʼdu central mundial. Peru lu beeu junio stiʼ iza que biʼniʼ invitárcabe laadu para chigánnadu ca congregación de seña ni nuu Paraguay. Zúnidu stale viaje lu asignación riʼ. Nabé guníʼ íquedu ni stale biaje, peru últimu la? gudixhe íquedu sidu ti carru ni zacané laadu gúnidu dxiiñaʼ que, lugar de chuudu Estados Unidos. Ca dxi que nga gucuaadu invitación para chuudu asamblea internacional. ¡Guca ni cá íquedu que! Rudiʼdu xquíxepeʼ Jiobá pur guca nachaʼhuiʼ ne pur bisihuinni pabiáʼ nadxii laadu».

Ti guendaxheelaʼ de Malahui bicaa: «Nuudu guséʼndadu correu riʼ para si gábidu laatu: “¡Xquíxepeʼ laatu!”. Qué rugaanda diʼ guiníʼ íquedu pabiáʼ naroʼbaʼ gastu bíʼnitu ne pabiáʼ nadipaʼ dxiiñaʼ bíʼnitu ne pabiáʼ tiempu guleetu para gudíxhetu ximodo gaca ca viaje stidu. Rudiʼdu xquíxepeʼ laatu pur dxiiñaʼ nadipaʼ bíʼnitu ne laaca rudiʼdu xquíxepeʼ organización stiʼ Jiobá saca gucané laadu guyuudu ra lídxidu, guyuudu ti asamblea internacional ne yegánnadu familia stidu ne ca xhamígudu».

Ca hermanu ni runi dxiiñaʼ ra Sección de Viajes stiʼ central mundial laaca nabé guyuuláʼdxicaʼ xhiiñacaʼ. Mileivi guníʼ: «Nabé risaca para laadu gacanedu ca misioneru guibiguétacaʼ ra lídxicaʼ para chigánnacaʼ familia sticaʼ ne ca xhamígucaʼ». Dorise laaca guníʼ: «Naapiaʼ biiyaʼ pabiáʼ nadxii organización riʼ cani rié sti guidxi roʼ para chiguni xhiiñaʼ Jiobá». Ne Rodney, ni naca xaíque stiʼ departamentu que guníʼ: «Guizáʼ nayecheʼ nuaaʼ purtiʼ gunda gucaniáʼ guca dxiiñaʼ riʼ».

Nabé nayecheʼ nuu ca testigu stiʼ Jiobá ni nuu lu guidubi Guidxilayú pur gucanecaʼ guicaa ca hermanu, ni nabé riuulaʼdxiʼ gacané stobi ne ni rucaa ique guni xhiiñaʼ jneza, ti regalu nabé sicarú.