Virginia nga ti gunaa testigu stiʼ Jehová, nápabe ti guendahuará ni láʼ síndrome del enclaustramiento. Ndiʼ riníʼ qué randa runiibibe cuerpu stibe, qué randa riniʼbe ne qué randa robe. Ni randa si rúnibe nga gúʼyabe, gunadiágabe, guxhélebe ne guseeguʼ lube ne guniibi íquebe caadxi. Peru cadi zacá diʼ guca Virginia dxiqué. Gúcabe ti gunaa nazaaca ne ni daʼ gana. Peru lu iza 1997, ti siadóʼ, guizáʼ biuubaʼ íquebe ne qué nidiʼdiʼ ni. Ngue runi yené xheelabe laabe ra hospital ne gueelaʼ que ca guyuube en coma. Bibánibe chupa semana despué, guluucabe laabe ra riaapaʼ ca binni ni nuu grave, qué ganda guniibibe cuerpu stibe ne cabe oxígeno. Gastiʼ qué ñanda ñeetenaláʼdxibe chupa chonna gubidxa, dede qué ñánnabe tu labe.

 Sicaríʼ guníʼ Virginia: «Chaahuiʼ chaahuiʼ bietenaladxeʼ caadxi cosa. Guizáʼ bineʼ orar Jehová purtiʼ qué racalaʼdxeʼ gateʼ ne gusaanaʼ xiiñeʼ, ti hombrehuiiniʼ de gaʼ iza. Bineʼ stipa guietenalaʼdxeʼ textu de lu Biblia, para gapaʼ stipa ne cadi chuaaʼ triste.

 »Gudiʼdiʼ si tiempu, bireeʼ de ra riaapaʼ binni ni nuu grave. Despué de xhoopaʼ beeu de guyuaaʼ ndaaniʼ gadxé gadxé hospital ne gucuaaʼ terapia, biseendacabe naa ra lidxeʼ. Qué ganda guniibeʼ cuerpu stinneʼ, caquiiñeʼ tu gacané naa. Guizáʼ guyuaaʼ triste. Ne bineʼ sentir maʼ qué zanda guneʼ ni ná Jehová ne gacaniáʼ binni. Laaca guizáʼ guyuaaʼ xizaa purtiʼ maʼ qué zanda gapaʼ xiiñeʼ.

 »Bizuluáʼ biindaʼ experiencia stiʼ xcaadxi Testigu ni napa guendahuará cásica napaʼ ne guizáʼ bidxagayaaʼ ora biiyaʼ guiráʼ ni randa rúnicabe para Jehová. Nga runi lugar de chuaaʼ triste, jma gucuá iqueʼ ca cosa ni zanda guneʼ. Dxiqué qué gapaʼ tiempu para guundaʼ Biblia, guneʼ predicar ne guneʼ orar. Peru yanna maʼ runeʼ ni guiráʼ dxi. Nga runi, lugar de chuaaʼ triste, gudixheʼ iqueʼ iquiiñeʼ tiempu stinneʼ para guneʼ ni ná Jehová.

 »Biziideʼ iquiiñeʼ ti computadora. Riquiiñeʼ ti programa ni runi detectar ora guniibeʼ iqueʼ para ganda gucaaʼ. Neca ridxagaʼ, peru pur programa riʼ randa runeʼ estudiar Biblia ne rinieniáʼ binni de esperanza ni napaʼ pur carta o pur correu electrónicu. Para ganda guinieniáʼ binni, riquiiñeʼ ti tabla ra cá abecedariu. Ruluíʼ náʼ binni ca ti letra tobi pur tobi. Ora gucheebe la? ruxheleʼ luaʼ ne ora guluíʼ nabe letra ni biaʼsi la? ruseeguaʼ luaʼ. Ne zacá rúnidu dede ra gánnacabe xii nga nuaaʼ gabeʼ laacabe. Caadxi de ca hermana ni maʼ xadxí de racané naa dede maʼ nánnacaʼ xi nuaaʼ gabeʼ laacaʼ ne ruxídxidu ora rucheecaʼ.

 »Riuuladxeʼ gacaniaʼ congregación stinneʼ. Racaʼ conectar para reunión, purtiʼ yanna maʼ rácacani pur videollamada. Ora racalaʼdxeʼ guneʼ comentar, rucaani ne maʼ sti hermanu ruundaʼ ni ora rinabadiidxacabe. Ne guiráʼ beeu raca conectar né ti grupuhuiiniʼ de hermanu para guidúʼyadu programa JW Broadcasting. *

 »Maʼ ziniaʼ 23 iza de napaʼ guendahuará riʼ. Nuu biaje riuaaʼ triste, peru ni racané naa nga guneʼ orar, chuaaʼ gaxha de ca hermanu, ne guneʼ cosa para Jehová. Cumu racané ca hermanu de congregación naa la? maʼ ziniaʼ jma de xhoopaʼ iza de nacaʼ precursora auxiliar. Huayuneʼ stipa gudieeʼ ti ejemplu galán xiiñeʼ ni láʼ Alessandro. Yanna maʼ bichaganabe ne nácabe ancianu de congregación. Laabe ne xheelabe nácacabe precursor regular.

 »Stale biaje riníʼ iqueʼ xi guiráʼ zuneʼ ora chuaaʼ ndaaniʼ Paraísu. Primé ca ni guneʼ nga guinieniaʼ binni de Jehová. Ñuuladxeʼ ñaaʼ lu ti layú ni nuu gaxha de ra cuxooñeʼ nisa para guuyaʼ guiráʼ ca cosa sicarú ni maʼ bizáʼ Dios. Maʼ raca gande iza de riquiiñecabe ti tubu para gudiicabe ni gahuaʼ, nga runi guizáʼ maʼ racalaʼdxeʼ guedandá dxi guchuuguaʼ ti manzana de lu yaga ne gahuaʼ ni. Ne cumu de Italia naa la? ruxuiʼluaʼ cayuneʼ ti guendaró ni nabé raca raríʼ..., ¡ti pizza ni guizáʼ nanixe!

 »Racané “esperanza ni zulá laanu” naa (1 Tesalonicenses 5:8). Dxandíʼ nga stale cosa qué randa runeʼ purtiʼ huaraʼyaʼ. Peru nannaʼ dxiicheʼ, huidxe si maʼ cadi zacá diʼ ziuaaʼ. Nga runi guizáʼ riecheʼ ora guiníʼ iqueʼ maʼ nuaaʼ ndaaniʼ guidxilayú cubi ca. Guizáʼ maʼ racalaʼdxeʼ gapaʼ “guendanabani, ni dxandíʼ guendanabani”, ni maʼ guníʼ Jehová gudii laanu pur Reinu stiʼ» (1 Timoteo 6:19; Mateo 6:9, 10).