Ni riníʼ binni: Qué runi ca testigu stiʼ Jehová Navidad purtiʼ qué runi crecaʼ Jesús.

 Ni dxandíʼ: Xpinni Cristu laadu ne nánnadu pur laasibe zanda guiladu (Hechos 4:12).

 Ni riníʼ binni: Ruxhélecabe ca xpínnicabe de familia sticaʼ purtiʼ rusiidicabe laacaʼ cadi gúnicaʼ Navidad.

 Ni dxandíʼ: Nabé risaca familia para laadu; dede rusíʼdidu binni ca conseju zeeda lu Biblia ni racané para chuʼni naguidxi.

 Ni riníʼ binni: Qué riuucabe nayecheʼ ca dxi raca Navidad; qué rudiisaacabe regalu laacabe ne qué rihuinni pa riuucabe tobi si dxi ca.

 Ni dxandíʼ: Rúnidu stipa pur cadi chuʼdindenedu binni ne gácadu nachaʼhuiʼ guiráʼ dxi ne cadi ti dxi si (Proverbios 11:25; Romanos 12:18). Tobi de ca cosa rúnidu nga qué rinábadu bueltu binni ora cheʼ ca guendaridagulisaa stidu ne qué ruquíxedu laacaʼ saca rucheechedu diidxaʼ, rácani zacá purtiʼ zinándadu mandatu bidii Jesús riʼ: «Qué niguixe tu saca gudixhe irá ndi lu ná tu guni tu. Yanna laguni cani sin guiaxa tu» (Mateo 10:8). Laaca rábidu binni Reinu stiʼ Dios si nga zaguu guendariuudxi lu Guidxilayú (Mateo 10:7).

•   Biʼniʼ mandar Jesús guietenaláʼdxicabe dxi gutiʼ ne cadi dxi gule (Lucas 22:19, 20).

•   Nin ca apóstol stiʼ Jesús, nin ca primé xpinni Cristu qué ñúnicaʼ Navidad. Casi na Diccionario del cristianismo, saa riʼ «biasastí ni ndaaniʼ guidxi Roma lu iza 330» despué de ca dxi stiʼ Jesús, jma de chupa gayuaa iza despué de guti últimu de ca apóstol que.

•   Gastiʼ nin ti prueba ni cusihuinni gule Jesús 25 stiʼ diciembre ne qué riníʼ diʼ Biblia padxipeʼ gúlebe.

•   Nánnadu qué riuulaʼdxiʼ Dios guni binni Navidad, purtiʼ zeeda ni de ca costumbre ne de guiráʼ cosa biʼniʼ ca binni ni qué runi adorar Dios (2 Corintios 6:17).

 Neca nanna binni cadi cá lu Biblia gaca Navidad ne nánnacaʼ zeeda ni de guiráʼ costumbre stiʼ ca binni ni qué ñuni adorar Dios, riníʼ íquecaʼ cadi málupeʼ gúnicaʼ ni ne qué nacaʼ gusaanacaʼ ni purtiʼ runi guiráʼ binni ni.

 Biblia cayabi laanu guiníʼ ique chaahuinu ora quixhe íquenu gúninu xiixa (Romanos 12:1, 2). Laaca cusiidiʼ ni laanu risaca nga gúninu ni jneza (Juan 4:23, 24). Cadi qué rizaaláʼdxidu ni guiníʼcabe de laadu, peru laaca qué zusaana de chinándadu ca principiu zeeda lu Biblia pur gúnidu ni runi binni.

 Neca qué rúnidu Navidad, peru runi respetardu binni pa gúnini o pa qué gúnini. Nga runi, qué rucueezadu guirutiʼ de gúnini.