Lu beeu marzo de 2020 guníʼ Organización Mundial de la Salud maʼ nuu pandemia stiʼ COVID-19, huaxiéʼ si tu guníʼ ique pa nindaa guendahuará riʼ jma de ti iza. Pur pandemia riʼ, stale binni dede né ca testigu stiʼ Jehová, maʼ bininá ni laacaʼ. ¿Xi maʼ biʼniʼ ca Testigu para gacanecaʼ ca hermanu sticaʼ yaʼ?

 Maʼ biʼniʼ Comité de Coordinadores stiʼ Grupu ni Zániru stiʼ ca Testigu stiʼ Jehová, jma de 950 Comité de Socorro lu guidubi Guidxilayú para gudxiilucaʼ pandemia stiʼ COVID-19. Nuu lugar runi organizar Comité de Socorro dxiiñaʼ para gacané ca hermanu, ne xcaadxi lugar la? rudii ca Testigu lugar gacané gobiernu laacaʼ. Laaca huayuni organizar Comité de Socorro dxiiñaʼ naroʼbaʼ para gacanecaʼ.

 Guidú’yanu ni bizaaca ndaani’ guidxi Paraguay. Ti periódicu bizeete’ cumu bixié’ bueltu pur pandemia, ngue runi stale binni de Paraguay qué ñápaca’ bueltu para sica’ ni goca’. Peru Comité de Socorro de guidxi que, ma’ bizulú gudiizi’ despensa para chupa semana. Cada paquete de despensa risácani bia’ 30 dólar, ne ndaani’ cada paquete zeeda guendaró ne cosa de limpieza para ti familia de tapa binni.

 ¿Xi runi ca voluntariu para gápaca’ laaca’ de COVID-19 ne para gápaca’ xcaadxi yaʼ? Riquiiñecabe cubreboca ne qué ridxíñape’cabe gaxha de binni. Ne laaca rizí’cabe guendaró ca lugar ra nayá, ne ra rinándacabe ca ley sti’ gobiernu. Ruuyacabe chiné guirá’ ca ni ricaa ca paquete ca equipu de protección stica’, gusiaca’ ne guni desinfectarca’ carru’ stica’, ne quíxheca’ ca paquete ca ti lugar ra ma’ guca desinfectar. Ne ca hermanu ni ritiizi’ ca despensa ca, qué ridxíñape’cabe ca hermanu ora risaanacabe ni ra nuuca’.

 Lu enero de 2021, biʼniʼ aprobar Comité de Coordinadores iquiiñeʼ jma de 25 millón de dólar para gacanenu ca hermanu ni gucaná pur COVID-19. Ca Sucursal ne ca Comité de Socorro riquiiñecaʼ ca donación ca jneza ne ruyúbicabe sícabe ca cosa ca cadi tan caru. Guzéʼtenu ni bizaaca ndaaniʼ guidxi Chile. Cuyubi ca hermanu ni nuu lu Comité de Socorro sicaʼ 750 kilu lenteja. Peru lu ti beeu si gudxiʼbaʼ lu lenteja ne bisaca ni doble. Guníʼ ca hermanu que zazíʼcani biaʼ saca ni yanna. Peru chupa hora despué guníʼ vendedor que bidxiguetaʼ ti binni ca lenteja ni guzíʼ. Nga runi lugar de ñuni cobrar vendedor que laacabe doble de saca ni, bitoo ni lúcabe biaʼ saca ni ti beeu ante.

 Ne ora zicaa ca hermanu que ca lenteja que, gucalaʼdxiʼ vendedor que ñuni cancelar acuerdu ni bíʼnicabe. Guniʼbe cadi jneza modo riguiiziʼ ca Testigu despensa, ne rúnicaʼ ni casi runi xcaadxi organización. Biʼniʼ ti hermanu ti oración ndaaniʼ ladxidóʼ, ne despué gúdxibe vendedor que maʼ guca ti encuesta ndaaniʼ ca congregación que para gánnacabe tu peʼ caquiiñeʼ ca despensa que. Ne ora biʼniʼ ca hermanu ca paquete que, guluucabe guendaró ni ró cada familia pur cultura sticaʼ. Ne últimu la? gúdxicabe vendedor que, qué riaxa ca ni rigacané, ne bueltu ni riquiiñeʼ zeeda ni de ni rudii binni de guidubi ladxidóʼ. Guizáʼ bidxagayaa hombre que. Ngue runi bitoobe lenteja que lucaʼ ne bisigáʼdebe 400 kilu laacaʼ lu sti pedidu.

 Lusu nga ti hermana viuda ni maʼ huaniisi, nabeza Liberia né gaayuʼ familia stiʼ. Ti siadóʼ, laga cayéʼcabe ne cayuundacabe textu stiʼ dxi, bidii nietuhuiiniʼ stibe de gadxe iza cuenta maʼ qué gápacabe ni gócabe sti hora. Gunabadiidxabe jñaabiidabe, «¿xi guidoʼno sti ratu yaʼ?». Gudxi jñaabiidabe laabe cadi chuʼbe xizaa purtiʼ laa maʼ biʼniʼ orar Jehová ne maʼ gunábabe laa gudii ni iquiiñecabe, ne nánnabe zacabi Jehová ca oración stibe. Huadxí que ca, guniʼné ca ancianu de congregación Lusu ne gúdxicaʼ laabe tiidibe chicaabe despensa. Sicaríʼ guniʼbe: «Nietu stinneʼ rabi naa yanna maʼ runi cré dxandíʼ rucaadiaga Jehová ca oración, purtiʼ biiyabe bicabi Jehová oración stinneʼ».

 Ti señora de República Democrática del Congo nabeza cueʼ lidxi ti familia de Testigu. Ora bíʼyabe cacaa ca xpecínube despensa ni cudii xcaadxi Testigu laacaʼ, guniʼbe: «Tidiʼ si pandemia riʼ, zácanu testigu stiʼ Jehová, purtiʼ laacaʼ rizaaláʼdxicaʼ ca hermanu sticaʼ ora cadíʼdicaʼ lu guendanagana». Gunnabadiidxaʼ xheelabe laabe: «¿Ñee zácaluʼ testigu stiʼ Jehová pur si ti bolsa arroz la?». Laabe bicábibe: «Coʼ, cadi pur nga diʼ. Peru bolsa arroz ca rusihuínnini dxandíʼ nadxiisaacabe».

 Pur ca donación ni huadiitu huayanda huayacané ca testigu stiʼ Jehová ca hermanu sticaʼ lu pandemia riʼ. Xquixe peʼ laatu pur ca donación ni rúnitu lu donate.jw.org.