Biniiseʼ ndaaniʼ guidxi Puerto Limón ne ca guidxihuiiniʼ nuu gaxha de laani, ladu este stiʼ Costa Rica. Gupa bixhozeʼ ne jñaaʼ xhono xiiñicaʼ, ne naa beeda galeʼ de lu gadxe. Peru guti bixhozeʼ dxi napaʼ xhono iza, ngue runi maʼ jñaaʼ siaʼ bisiniisi laadu.

Guizáʼ guyuuladxeʼ quiteʼ béisbol purtiʼ dede xcuidi naa nabé guyuuladxeʼ deporte. Dxi maʼ nacaʼ ti adolescente, guyuaaʼ lade ti equipu peru cadi profesional. Dxi nuaa’ lu equipu ca ne maʼ napaʼ biaʼ gande iza, ti hombre ni ruyubi ca jovenhuiiniʼ ni nanna quite biʼniʼ invitar naa chuaaʼ lu ti equipu profesional de Nicaragua. Peru cumu ca dxi que huará jñaa ne naa rapaʼ laabe la? ngue runi qué ninaʼyaʼ nibieeʼ Nicaragua. Ne maʼ qué ñuaaʼ lu equipu profesional que. Gudiʼdiʼ si ti tiempu, biʼniʼ invitar sti hombre naa chuaaʼ lu equipu nacional de béisbol de Costa Rica, raqué riguite caadxi jovenhuiiniʼ ni gulícabe de ca equipu ni cadi naca profesional. Yanna huaxa bineʼ aceptar. Guyuaaʼ lu equipu stiʼ xquidxeʼ dede lu iza 1949 hasta 1952 ne gudxiteʼ stale partidu ndaaniʼ guidxi Cuba, México ne Nicaragua. Guyuaaʼ casi defensor de base, ne guizáʼ galán gudxiteʼ. Gudxiteʼ 17 partidu ne qué lica nucheeʼ nin ti biaje. Guizáʼ riuuladxeʼ ora gunadiagaʼ caníʼ ca binni que laʼyaʼ.

Triste guinieeʼ ni peru maʼ bizuluáʼ yeniáʼ ti vida inmoral. Neca napaʼ novia la? siempre canazayaniá’ xcaadxi gunna. Ne laaca gueeʼ xhaataʼ nisadxuʼniʼ. Ti dxi de tantu guxudxeʼ qué lica ñannaʼ ximodo yendayaʼ ra lidxeʼ, ne ora bibaneʼ sti dxi que maʼ nexheʼ lu cama stinneʼ. Ne runeʼ apostar bueltu ora riguiteʼ dominó ne laaca rizieeʼ billete de lotería.

Ca dxi que nga beeda gaca jñaaʼ testigu stiʼ Jehová. Gucaláʼdxibe laaca niziideʼ ca ni caziidibe, peru qué ñanda ñaca ni zaqué purtiʼ jma gucuá iqueʼ béisbol que. Ne ora maʼ cayuneʼ entrenar lu campu la? dede nin rindaana’. Jma nga ca iqueʼ juegu que. Guizáʼ guyuuladxeʼ quiteʼ béisbol.

Peru dxi maʼ napaʼ 29 iza, yeniáʼ ti golpe guizáʼ naná lu ti partidu ora gucalaʼdxeʼ ñanda ti bola. Ne neca despué biandaʼ la? maʼ qué ñanda niguiteʼ lade equipu profesional que. Neca zaqué qué nusaanaʼ diaʼ béisbol ne bineʼ entrenar caadxi jovenhuiiniʼ gaxha de ra lidxeʼ para ti equipu cadi profesional.

Lu iza 1957, guyaaʼ ti asamblea stiʼ ca testigu stiʼ Jehová ni guca ndaaniʼ tobi de ca estadiu ra gudxiteʼ béisbol. Laga zubaʼ lade ca binni que, guizáʼ bidxagayaaʼ ora biiyaʼ pabiáʼ maʼ gadxe ca Testigu purtiʼ laacaʼ runi respetársaacaʼ, nin gaxha de ora raca ca partidu de béisbol que. Guiráʼ ni biiyaʼ lu asamblea que gucané ni naa chuulaʼdxeʼ guneʼ estudiar Biblia né ca Testigu ne chaaʼ ca reunión stícabe.

Guizáʼ bidxagayaaʼ guiráʼ ca cosa ni ziziideʼ de lu Biblia, casi ni guníʼ Jesús zuni ca discípulo stiʼ lu ca últimu dxi riʼ, zuni predicárcabe ca noticia galán stiʼ Reinu stiʼ Dios lu guidubi naca Guidxilayú (Mateo 24:14). Ne laaca biziideʼ runi predicar ca ni dxandíʼ xpinni Cristu sin guiáxacaʼ. Jesús guníʼ: «Gucuaatu gratis lagudii gratis» (Mateo 10:8).

Biaʼ ziyuundaʼ de lu Biblia, ruchaagaʼ ni cusiidiʼ ni né ni ruuyaʼ runi ca testigu stiʼ Jehová. Guizáʼ bidxagayaaʼ ora biiyaʼ stipa ni rúnicabe para chinécabe ca noticia galán stiʼ Reinu lu guidubi naca Guidxilayú. Bidieeʼ cuenta guizáʼ riuuláʼdxicabe gudiicabe de ni nápacabe casi modo bisiidiʼ Jesús ca xpinni. Ngue runi ora biindaʼ ca diidxaʼ ni zeeda lu Marcos 10:21 ra zeeda invitación ni bi’ni’ Jesús: «Gudáʼ ne dananda naa», oraqueca gudixheʼ iqueʼ gacaʼ testigu stiʼ Jehová.

Peru guca nagana para naa guicaaʼ caadxi decisión. Tobi de laani nga gusaanaʼ de guneʼ apostar pur «númeru de suerte» stinneʼ guiráʼ semana lu lotería nacional ne bineʼ ni pur stale iza. Peru lu Biblia biziideʼ qué riuula’dxi’ Dios ca binni ni runi adorar «dios ni rudii suerte» ninca ca binni ni rachelú gapa jma (Isaías 65:11; Colosenses 3:5). Nga runi bisaana de quiteʼ. Primeca domingu ni qué nizieeʼ billete de lotería, ¡biʼniʼ ganar «númeru de suerte» stinneʼ! Biʼniʼ burla binni naa purtiʼ qué niguiteʼ semana que ne bicaacaʼ naa quiteʼ sti biaje, peru maʼ qué ñuneʼ ni. Ma’ qué ñuuruʼ dxi ñuneʼ apostar.

Dxi peʼ guyuaanisaʼ lu ti asamblea stiʼ ca testigu stiʼ Jehová bihuinni pa dxandíʼ nabaneʼ casi riuula’dxi’ Dios (Efesios 4:24). Huaxhinni que ora biguetaʼ ndaaniʼ hotel ra cayaanaʼ, biiyaʼ ti baʼdudxaapaʼ ni guca xnoviaʼ cabeza naa ra puertaʼ stiʼ habitación que. Óraque gúdxibe naa: «Gudáʼ Sammy, gaca divertirnu ti ratu». Nagueendaca gudxe laabe: «¡Coʼ!». Ne gudxe laabe maʼ nabaneʼ modo ná ca regla moral ni maʼ gudixhe Dios (1 Corintios 6:18). Para bicábibe: «¡Ximodo nouʼ ni!». Para laabe qué risaca diʼ ni rusiidiʼ Biblia de pecadu sexual ne gucuaabe luaʼ guibiguétadu sti biaje. Ma’ qué ñaberuáʼ laabe gastiʼ, guyuaaʼ ndaaniʼ habitación stinneʼ ne guluaaʼ llave. Ca dxi riʼ, guizáʼ nayecheʼ nabaneʼ ne zanda guinieeʼ dede dxi gucaʼ Testigu lu iza 1958, huayaca fiel ne qué huayuu dxi guibiguetaʼ modo bibaneʼ dxiqué.

Pa ñacalaʼdxeʼ ninieeʼ guiráʼ ni maʼ huabeenduáʼ ra zinandaʼ ni rusiidiʼ Biblia naa la? dede nucaaʼ ti libru. Yanna maʼ napaʼ xhamiguaʼ ni dxandíʼ nadxii naa, maʼ napa xquendanabaneʼ sentidu ne maʼ nabaneʼ nayecheʼ.

Riuuladxeruáʼ quiteʼ béisbol, peru maʼ cadi ladi ni nga ni jma risaca para naa. Pur béisbol que nabé binibiáʼ binni naa ne gupa bueltu, peru qué rindaa diʼ ca cosa ca. Ni dxandíʼ rindaa para siempre nga amistad ni napaniaʼ Dios ne ca hermanu stinneʼ. Biblia ná: «Zidiʼdiʼ guidxilayú ne ca deseu stiʼ, peru ni runi ni ná Dios la? qué ziuu dxi gatiʼ» (1 Juan 2:17). Yanna riʼ nuu sti cosa ni jma riuuladxeʼ guneʼ: guneʼ servir Jehová ne chuaaʼ ndaaniʼ xquidxi, nga nga ni jma risaca para naa.