TEMA STIʼ PORTADA
Tuu nga ca testigu stiʼ Jiobá
«Maʼ napa iza de runebiaʼyaʼ Mike. Testigu stiʼ Jiobá laabe, peru nabé riníʼ iqueʼ de religión stibe ca. Tuu nga Jiobá. Xiñee qué runi ca Testigu guiráʼ saa runi binni. Nabé riuaaʼ xizaa gannaʼ nuu Mike ndaaniʼ ti secta.» (Becky, de California, Estados Unidos)
«Dxi bizulú cayuundaʼ ca vecinu stinneʼ Biblia né ca testigu stiʼ Jiobá, guníʼ iqueʼ: “¡Xiñee zacá láʼ religión ca pue! Xi ndaʼ riníʼ ni yaʼ”.» (Zenon, de Ontario, Canadá)
«Naa ne xheelaʼ guníʼ íquedu reeda ca Testigu ra nuudu para si gábicaʼ laadu cadi jneza ni cayúnidu, purtiʼ maʼ qué riuudu yuʼduʼ. Rábidu pa nin ndaaniʼ ca religión ni jma runibiáʼ binni qué nidxéladu ni cuyúbidu la? jmaruʼ si qué zanda guidxéladu ni lade secta stiʼ ca testigu stiʼ Jiobá.» (Kent, de Washington, Estados Unidos)
«Dxandipeʼ, qué lica gannaʼ tu laacabe o xi runi crécabe.» (Cecilie, de Esbjerg, Dinamarca)
Zándaca huayuuyaluʼ laacabe ora maʼ canagucheechecabe diidxaʼ de yoo pur yoo, ndaaniʼ calle, cudiicabe binni publicación ni cusiidiʼ de Biblia ne cayábicabe laacaʼ pa zaziidicaʼ de Biblia sin quíxecaʼ. Zándaca tobi de laacabe nga bidii lii revista ni naazuʼ riʼ. Peru zándaca laaca riníʼ íqueluʼ casi riníʼ ique ca binni ni bizéʼtenu ca ne rinabadiidxaluʼ tupeʼ nga ca testigu stiʼ Jiobá.
Pa racaláʼdxiluʼ gánnaluʼ xiixa de ca testigu stiʼ Jiobá, xi zanda gúniluʼ yaʼ. Ximodo zanda gánnaluʼ xi runi crécabe, paraa ribeecabe bueltu para gúnicabe xhiiñacabe, gucuícabe ca yoo ra ridagulisaacabe, ne xiñee ridxíñacabe lii lu calle o riécabe de ra lídxiluʼ para güinécabe lii diidxaʼ yaʼ.
Cecilie, gunaa ni maca bizéʼtenu que guníʼ: «Biindaʼ stale de ca testigu stiʼ Jiobá lu Internet. Binadiaʼgaʼ riníʼ binni rúnicabe caadxi cosa ni cadi jneza, ngue bicaa naa guiníʼ iqueʼ mal de laacabe». Peru dxi laapebe guníʼnebe ca Testigu, bisiénecabe laabe guiráʼ cani racaláʼdxibe gánnabe.
Pa racaláʼdxiluʼ gánnaluʼ jma de ca testigu stiʼ Jiobá, xiñee qué guinabadiidxaluʼ ni laacabe. Laacabe nga cani rucaa revista riʼ ne laacabe nga cani jma jneza guicabi lii cani racaláʼdxiluʼ gánnaluʼ (Proverbios 14:15). Ribézadu gacané ca tema ni zeeda lu revista riʼ lii gánnaluʼ tu laacabe, xi runi crécabe ne xi rúnicabe.
