¡DXANDÍʼ ni na ca diidxaʼ ca! Purtiʼ binni guidxilayú nabaniné «puru si guendanagana ne yuubaʼ». Nga runi, nuu tu rinabadiidxaʼ pa zanda guibani binni nayecheʼ.

Guidúʼyanu ni bizaaca Maria. Laabe gúcabe ti gunaa ni nabé biʼniʼ dxiiñaʼ; peru yanna, maʼ nápabe 84 iza, ne maʼ qué rándapeʼ rireebe. Neca guizaʼruʼ xquendabiaanibe, peru maʼ qué randa rúnibe cani ñuuláʼdxibe ñúnibe. Pa zacá nabánibe, ximodo zanda chuʼbe nayecheʼ yaʼ.

Ñee zacaca nuuluʼ la? Zándaca huayuu ora guinabadiidxaluʼ pa zanda guibániluʼ nayecheʼ. Zándaca ngueca ca ngueca dxiiñaʼ rúniluʼ guiráʼ dxi ne rusidxaga ni lii, ne guirutiʼ rudii cuenta pabiáʼ nadipaʼ dxiiñaʼ rúniluʼ. Ne neca nabániluʼ galán yanna, peru zándaca riuuluʼ xizaa pa zabániluʼ galán despué; o riuu biaje runi sentirluʼ nuuluʼ stúbiluʼ o riuuluʼ triste, o riuuluʼ xizaa purtiʼ nabé ridinde binnilídxiluʼ. Zándaca maʼ guti tuuxa binni ni nadxiiluʼ. Ngapeʼ nga ni bizaaca ti hombre láʼ André. Nabé gucuánube bixhózebe, málasi ti dxi guca huará bixhózebe ne guti. Ni bizaacabe ca nabé bininá ni laabe ne guniʼbe maʼ qué ziuuruʼ dxi guibánibe nayecheʼ.

Intiica si guendanagana ne yuubaʼ cadxaagalunu yanna, guiranu racaláʼdxinu gánnanu pa zanda guibáninu nayecheʼ. Para gánnanu ni la? guidúʼyanu modo bibani ti hombre ni guyuu lu Guidxilayú riʼ raca biaʼ chupa mil iza, ne laabe nga Jesucristu. Neca gúpabe stale guendanagana, bibánibe galán ne guyuube nayecheʼ. Ne laanu laaca zanda guibáninu zacá pa chinándanu ejemplu stibe.