BIDXIÑA DIOS
«Lainaba lu Dios, zudii laatu»
Ti dxi, tobi de ca discípulo stiʼ Jesús gudxi laabe: «Señor, bisiidi laadu iní né du Dios» (Lucas 11:1). Ra bicabi Jesús hombre riʼ biquiiñebe chupa ejemplu para gusiidibe ximodo naquiiñeʼ guni orarnu ti gucaadiaga Dios laanu. Ñee huayuu dxi guinabadiidxaluʼ pa rucaadiaga Dios ca oración stiluʼ la? Pa zacá ni, ziuuláʼdxiluʼ gánnaluʼ xi bicabi Jesús hombre que. (Biindaʼ Lucas 11:5-13.)
Primé ejemplu biquiiñebe que guniʼbe xi runi ti binni ni runi orar (Lucas 11:5-8). Jesús guníʼ ejemplu stiʼ tobi hombre ni gupa biuuzaʼ galaa gueelaʼ ne qué gápabe guendaró quíxhebe lucaʼ. Cumu caquiiñebe ni óraque la? neca maʼ huaxhinni, guyebe ra nuu ti xhamígube ne gunábabe laa chonna pan. Qué náʼ ga xhamígube que guiasa para cadi gucuaaniʼ binnilidxi. Peru hombre que qué ñaanadxí de ninabaʼ ni laabe, dede ra gundísabe xhamígube que ne bidii laabe ni caquiiñebe. *
Xi rizíʼdinu de oración lu ejemplu riʼ. Rizíʼdinu cadi naquiiñeʼ guiaanadxinu de guinábanu, guyúbinu ne guxhidxinanu (Lucas 11:9, 10). Ximodo zanda guiénenu ca diidxaʼ ca yaʼ. Ñee guníʼ Jesús ora guni orarnu casi ñaca cuxhidxinanu ra puertaʼ lidxi ti Dios ni qué riná gucaadiaga laanu la? Coʼ, cadi zacá diʼ ni. Gadxepeʼ laabe de xhamigu hombre ni rieeteʼ lu ejemplu ni guníʼ Jesús que, Dios racalaʼdxiʼ gudii guiráʼ ni guinabaʼ ca binni ni runi cré dxandíʼ zacanebe laacaʼ, pa riuuláʼdxibe ni guinábacaʼ laabe. Zusihuínninu runi crenu dxandíʼ zacanebe laanu pa qué gusaananu de guinábanu laabe ni caquiiñenu. Ora rinábanu Dios xiixa chupa chonna biaje la? rusihuínninu dxandíʼ caquiiñenu ni canábanu ne runi crenu zanda gudiibe ni laanu (Marcos 11:24; 1 Juan 5:14).
Lu guiropa ejemplu ni guníʼ Jesús bisiene xi runi Jiobá, Dios «ni rucaadiaga oración» (Salmo 65:2). Jesús gunabadiidxaʼ: «Tu tobi de laatu ninaba xiiñi laa ti gueta, nudii ti guie, o ninaba laa ti benda, nudii ti beendaʼ, o ninaba laa ti dxita, nudii ti meuxubi». Cadi liica nagana para guicábinu nga: nin ti binni ni nadxii xiiñiʼ zudii laabe xiixa ni nanna zuniná laabe. De racá gudxi Jesús ca binni ni cucaadiaga laa ca diidxaʼ riʼ: «Pa laatu cadi nachaʼhui tu ne nanna tu gudii tu ni galán xiiñi tu la? lágaxa Bixhoze tu ni nuu ibáʼ qué udii Espíritu Santu [ni jma risaca zanda gusigaʼdeʼ Dios laanu] ni inaba laa» (Lucas 11:11-13; Mateo 7:11). *
Né ejemplu riʼ, bisiidiʼ Jesús laanu guidúʼyanu Jiobá, Dios «ni rucaadiaga oración», casi ti binni ni nadxii xiiñiʼ ne dxandipeʼ racalaʼdxiʼ gudii ni caquiiñebe. Nga runi, cani runi adorar Jiobá ora tiica si zanda gábicaʼ laabe ni nuu ndaaniʼ ladxidoʼcaʼ. Ne cumu nánnacabe racalaʼdxiʼ Dios guibánicabe galán la? ngue runi, riuucabe nayecheʼ pur modo ricabi Dios ca oración stícabe, neca qué ricábibe cani módopeʼ racaláʼdxicabe. *
Biaʼ nexheʼ guiuundaʼ biblia beeu riʼ:
^ párrafo 2 Lu ejemplu ni guníʼ Jesús ca rihuinni costumbre stiʼ ca binni ni bibani tiempu stibe. Nabé risaca para ca judíu que gápacaʼ biuuzaʼ. Cumu ca binni que rúnicaʼ pan para ti dxi si la? pa iquiiñerúcabe, rinábacabe tuuxa xpecínucabe. Ne ca binni pobre que rásicaʼ ndaaniʼ ti cuartu si, ne jma nga rásicabe layú, nga runi, pa guiasa tuuxa la? zucuaani xcaadxi.
^ párrafo 4 Lu ca ejemplu biquiiñeʼ Jesús nabé bizeetebe diidxaʼ «lágaxa» para gusíenebe pa randa raca xiixa ni nahuiiniʼ la? jmaruʼ si zanda gaca xiixa naroʼbaʼ.
^ párrafo 5 Pa racaláʼdxiluʼ gánnaluʼ xiruʼ zanda gúniluʼ para gucaadiaga Dios ca oración stiluʼ la? biiyaʼ capítulo 17 stiʼ libru Xipeʼ ndiʼ cusiidiʼ Biblia, ni biʼniʼ ca testigu stiʼ Jiobá.
Dios racalaʼdxiʼ gudii guiráʼ ni guinabaʼ ca binni ni runi cré dxandíʼ zacanebe laacaʼ
