Ñee nannuʼ ni la?

Aparte de Biblia, ñee nuuruʼ tu riníʼ dxandíʼ bibani Jesús la?

▪ Caadxi historiador ni bibani despué de Jesús ruzeetecaʼ de laabe. Tobi de laacabe nga Corneliu Tácito ni bicaa historia stiʼ Roma dxi biʼniʼ mandar ca emperador, ne riniʼbe de Cristu lu cani. Ora ruzeeteʼ Tácito dxi gucuá guí Roma lu iza 64 despué de Jesús, guniʼbe bigaaniʼ Nerón donda ique ca binni ni runibiáʼ guidxi que casi «xpinni Cristu», purtiʼ maʼ qué racaláʼdxibe guiníʼ guidxi que laabe bíʼnibe ni. De raqué guniʼbe de ca xpinni Cristu sicaríʼ: «Bíʼnicabe ni na Cristu, hombre biiti Poncio Pilatu dxi naca Tiberio rey» (Anales, XV, 44).

Historiador judíu Flavio Josefo laaca ruzeeteʼ dxandíʼ bibani Jesús. Ora bicaa Josefo xi bizaaca dxi guti Festo, gobernador stiʼ Judea lu iza 62 ne dxi gurí Albino, ni biaana lugar stiʼ Festo que, guniʼbe «bidagulisaané [Anán, xaíque stiʼ ca sacerdote] que Sanedrín. Biseendacaabe Jacobo [o Santiagu] para gaca juzgar, hombre riʼ nga biʼchiʼ Jesús ni biree lá Cristu» (Antigüedades Judías, libro XX, cap. IX, sec. 1, [200]).

Xiñee gúdxicabe Jesús «Cristu»

▪ Ca Evangeliu ca ruzeetecaʼ beeda ti ángel láʼ Gabriel ra nuu María para gabi laabe zaca xiiñibe, ne laaca gudxi laabe naquiiñeʼ cuee labe baʼduhuiiniʼ que Jesús (Lucas 1:31). Ca judíu ni ruzeeteʼ Biblia nabé gulee lacaʼ xiiñicaʼ zacá. Historiador judíu Josefo ruzeeteʼ biaʼ doce binni biree lá Jesús, sin cuʼnu cuenta cani ruzeeteʼ Biblia. Xiiñiʼ María que gúdxicabe laa «Jesús de Nazaret» para gunibiáʼcabe laabe lade xcaadxi láʼ zaqué, purtiʼ biniisibe Nazaret (Marcos 10:47). Peru laaca binibiáʼcabe laabe casi «Cristu», o Jesucristu (Mateo 16:16). Xi riníʼ diidxaʼ ca yaʼ.

Diidxaʼ cristu ca zeedani de griegu kjristós, ne lu hebreu riníʼcabe ni maschíaj (mesías). Lu guiropa diidxaʼ ca riniʼni «ni bibí», ne ante gueeda Jesús laaca biquiiñecabe ni para guzeetecabe de xcaadxi binni. Casi Moisés, Aarón ne rey David rieeteʼ gúcacabe ni bibí, ndiʼ rusihuinni bidii Dios laacabe ti dxiiñaʼ risaca ne laaca biquiiñeʼ laacabe para guiníʼcabe pur laa (Levítico 4:3; 8:12; 2 Samuel 22:51; Hebreos 11:24-26). Yanna, cumu Jesús nga Mesías ni maca nexheʼ gueeda que la? biáʼsipeʼ laabe nga ni riníʼ pur Jiobá, ne jneza nga labe: «Cristu, Xiiñi Dios ni nabani» (Mateo 16:16; Daniel 9:25).

[Dibuju/foto ni zeeda lu yaza 15]

RETRATU STIʼ FLAVIO JOSEFO