Bidxiña Dios

Xi canabaʼ Jiobá gúninu

Deuteronomio 10:12, 13

NAGANA nga raca para binni guzuubaʼ diidxaʼ. Stale binni nisi maʼ caguicheruaa para guzuubaʼ stiidxaʼ tuuxa patrón ni naduxhuʼ o ni nabé rucaa ridxi purtiʼ si laa runi mandar. ¡Peru ca xpinni Dios gadxepeʼ nga ni rúnicaʼ! Laacabe ruzuubacabe diidxaʼ purtiʼ riuuláʼdxicabe gúnicabe ni. Ca diidxaʼ guníʼ Moisés lu Deuteronomio 10:12, 13 zacanécani laanu gánnanu xiñee. a

Ora caníʼ Moisés xi canabaʼ Dios guni ca xpinni la? gunabadiidxabe ndiʼ: «Xi canabaʼ Jiobá Dios stiluʼ lii» yaʼ (versículo 12). Laabe nga Dios ni jma nandxóʼ lu guidubi naca guibáʼ ne Guidxilayú, ne laabe nga rudiibe laanu guendanabani (Salmo 36:9; Isaías 33:22). Nga runi, laabe nga nápabe derechu guiniʼbe xi racaláʼdxibe gúninu, ne laasibe nga zanda guinábabe laanu guzúʼbanu stiidxabe. Peru Jiobá qué racalaʼdxiʼ guzúʼbanu stiidxaʼ purtiʼ siʼ canábabe ni laanu, sínuque rábibe laanu gúninu ni de «idubi ladxidóʼ [no]» (Romanos 6:17).

Peru, xi zucaa laanu guzúʼbanu stiidxabe de guidubi ladxidoʼno yaʼ. Versículo 12 cuzeeteʼ ti cosa ni zacané laanu para gúninu ni: guidxíbinu Jiobá, Dios stinu. b Raríʼ cadi caníʼ diʼ Moisés guidxíbinu Dios purtiʼ zusabanáʼ laanu pur ca cosa malu ni gúninu. Racá caniʼbe naquiiñeʼ guni respetarnu Dios ne gúninu ni cayábibe laanu lu ca ley stibe, nga zacané laanu para cadi gúninu xiixa ni guchiichi laabe.

Peru gadxé cosa nga ni naquiiñeʼ gucaa laanu guzúʼbanu stiidxaʼ Dios. Moisés guníʼ: racalaʼdxiʼ Jiobá gannaxhiinu laa, gúninu ni na de guidubi ladxidóʼ ne de guidubi xhiálmanu (versículo 12). Ndiʼ nga ni cusiidiʼ textu ca: naquiiñeʼ guzúʼbanu stiidxabe purtiʼ nadxiinu laabe. Peru, para gusihuinni tuuxa nadxii Dios la? cadi naquiiñeʼ si guiníʼ runi sentir xiixa pur laabe. Sicaríʼ cusiene ti libru de ni caninu ca: «Ca diidxaʼ ni riquiiñeʼ binni lu diidxaʼ hebreu ora maʼ caníʼ xi runi sentir la? laaca ruzeetecani xi nga cani runi binni pur ni runi sentir». Nga runi, pa dxandíʼ nadxiinu Dios la? zúninu stipa pur gúninu ni riuuláʼdxibe (Proverbios 27:11).

Yanna, ñee nuu ra cadi naquiiñeʼ guzúʼbanu stiidxaʼ Dios la? Moisés guníʼ naquiiñeʼ sanu lu guiráʼ ca neza stiʼ Dios (versículo 12). Jiobá canabaʼ laanu guzúʼbanu stiidxaʼ lu guiráʼ ni gúninu. Zándaca ziuu tu zaníʼ cadi galán diʼ nga gúninu guiráʼ ni gábicabe laanu. Peru, pa Dios nga canabaʼ ni laanu la? naquiiñeʼ gúninu ni.

Puru si ni galán nga ribeendunu ora ruzúʼbanu stiidxaʼ Dios de guidubi ladxidoʼno. Zacá bisihuinni Moisés ni lu versículo 13 ora guníʼ: «Gápaluʼ ca xmandamientu Jiobá ne ca ley [stiʼ], para cheʼ ni lii jneza». Intiica guinábabe laanu, riquiiñeʼ gánnanu nga nga ni jma galán para laanu. Cadi guiaandaʼ laanu «de Dios nga reeda enda rannaxhii» (1 Juan 4:8). Nga runi, pa gúninu ni na ca mandamientu stibe la? zabeendunu stale ni galán, cásica yanna ne despué (Isaías 48:17). Pa gúninu guiráʼ ni canábabe laanu la? qué zápapenu guendanagana, ne despué zacaanu stale ndaayaʼ ni qué zará ora maʼ gueeda Reinu stiʼ Dios. c

Nga runi, ora guinabaʼ Jiobá laanu gúninu xiixa la? ni jma galán nga guzúʼbanu stiidxabe ne gúninu ni de guidubi ladxidoʼno. Ora gúninu zacá la? ziuʼnu jma gaxha de Jiobá, Dios ni nadxii laanu ne ni nanna xii nga ni jma galán para laanu.

[Cani cá ñee yaza]