Ñee nannuʼ ni la?

Xiñee gutané ca israelita que stale binni nezalú Baal, dios ni cadi dxandíʼ que, para guni adorarcaʼ laabe

Ca cananeu que biʼniʼ crecaʼ naca Baal ti dios ni racané binni gapa xiiñiʼ, ne laaca laabe ngue racanebe para gudii layú stícabe stale ne guidale guiráʼ ca maniʼ stícabe. Ti libru ni láʼ Manners and Customs in the Bible (Modo bibani binni ne ca costumbre gupa dxiqué), na «ratanécabe binni ndaaniʼ ca yuʼduʼ gúpacabe. Riníʼ íquecabe zaqué nga zanda gucaacabe Baal, dios stiʼ nisaguié, gatané Aserá xheelaʼ, ti ganda gudii layú stícabe jma ne guidale guiráʼ ca maniʼ stícabe».

Ca cananeu que biʼniʼ crecaʼ rié Baal que xagueteʼ yu tiempu gusibá, purtiʼ runi ganar Mot laabe, dios de guendaguti ne tiempu qué rudii gastiʼ. Peru ora guzulú guiaba nisaguié la? rusihuínnini maʼ chiguni mandar Baal sti biaje, purtiʼ maʼ rigaa guixi ne riuu guendanabani. Ca cananeu que rúnicaʼ stale cosa purtiʼ nuucaʼ nayecheʼ, dede riuunecaʼ guiráʼ binni gápacaʼ gana. Nga rusihuinni xiñee guyuuné ca israelita que ca gunaa de Moab que ne biʼniʼ adorarcaʼ Baal de Peor, dxi maʼ bixélecaʼ de Jiobá (Números 25:1-3).

Xii ngue cusiidiʼ Jesús ora guníʼ naca ca escriba ne ca fariseu que «casi baʼ, naquichi bé»

Ti biaje guníʼ Jesús naca ca xaíque yuʼduʼ sti ca judíu que binni rusiguii, de raqué gúdxibe laacaʼ: «Zeda gaca tu casi baʼ, naquichi bé idubi ladi ne sicarú, peru ndaani dxá dxita gueʼtuʼ, ne irá ni nayuudxuʼ» (Mateo 23:27). Diidxaʼ «baʼ, naquichi bé» ca rusietenaláʼdxini laanu ti costumbre yooxhoʼ gupa ca judíu ora riguucaʼ guiuu baʼ. Costumbre riʼ bíʼnicabe ni 15 stiʼ adar, ti beeu ante gaca Pascua, purtiʼ riaba guiuu stiʼ ca baʼ que tiempu nisaguié.

Peru, xiñee naquiiñepeʼ cúʼcabe guiuu ca baʼ que yaʼ. Ti enciclopedia cusiene rúnicabe ni purtiʼ «stale binni ridiʼdiʼ neza ra nuu ca baʼ que ora maʼ zecaʼ ra chigaca Pascua». Ora maʼ dieʼ cani la? jma nagueenda zuuyaʼ binni paraa nuucani, zaqué maʼ qué zagáʼnacabe cani sin gudiicabe cuenta ti cadi gucheenécabe ley (The Jewish Encyclopedia). Números 19:16 na raca binni nabiidiʼ nezalú Dios gadxe gubidxa ora canaʼ ti gueʼtuʼ, dxita ladi ti gueʼtuʼ o ti baʼ. Ne pa gueeda chuu ca israelita que zacá la? qué zanda diʼ gúnicabe guiráʼ ni naquiiñeʼ guni ti binni para guni adorar Jiobá, purtiʼ ley que na záticabe pa gúnicabe ni (Levítico 15:31). Dxi guníʼ Jesús zeeda gaca ca xhenemígube casi «baʼ, naquichi bé» la? maʼ xhupa xhonna gubidxa si ngue cayaadxaʼ para gaca Pascua que, ngue runi nagueendaca bietenalaʼdxiʼ ca binni que costumbre raca guiráʼ iza ora riguucaʼ guiuu ca baʼ que. Ne ca diidxaʼ ca bisihuinni Jesús cadi dxandíʼ diʼ nga nachaʼhuiʼ ca fariseu ne ca escriba que casi modo riniʼcaʼ, ne qué zanda diʼ guni adorar binni Dios jneza pa chuʼ gaxha de laacabe.

[Dibuju/foto ni zeeda lu yaza 13]

MONUMENTU DE GUIÉ RA CÁ BAAL DIOS STIʼ RAYU (SIGLU XIV-XIII ANTE GUEEDA JESÚS)

[Ra gucuaacabe dibuju o foto]

Musée du Louvre (París)