1, 2. Ximodo maʼ bisiidiʼ Jiobá laanu gannaxhiinu.

TI HOMBRE ni nadxii ca xiiñiʼ rusiidiʼ laacabe né ejemplu stiʼ. Ora rusihuínnibe nadxiibe laacaʼ, cusiidibe laacaʼ gannaxhiicaʼ. Ngapeʼ nga ni runi Jiobá né laanu. Guirútiruʼ nadxii laanu jma que biaʼ nadxiibe laanu. Biblia na «nirudóʼ laabe gunaxhii be laanu» (1 Juan 4:19). Ora rusihuinni Jiobá nadxii laanu, cusiidibe laanu gannaxhiinu.

² Xiñee na Biblia gunnaxhii Jiobá laanu primé yaʼ. Purtiʼ biseendabe Xiiñibe beeda gati pur laanu «neca cuchéʼ né nu laa» (Romanos 5:8). Bidii Jiobá lugar gati Xiiñiʼ para gulá laanu de lu náʼ guendaruchee ne guendaguti. Zacá bisaanabe ti ejemplu galán para laanu ne bisiidibe laanu gannaxhiinu ne gudiʼnu ni caquiiñeʼ sti binni (1 Juan 4:10). Ne pur guendaguti stiʼ Jesús zanda gaca xhamígunu Jiobá ne gusihuínninu nadxiinu laa.

3, 4. Ximodo rusihuínninu nadxiinu Jiobá.

³ Guendarannaxhii ca nga guenda ni jma risaca napa Jiobá. Nga runi, Jesús na mandamientu ni jma risaca nga: «Gunaxhii Dios stiuʼ de idubi ladxidóʼ loʼ ne de idubi xhialma luʼ ne de idubi xquenda biaani luʼ ne de irá stipa stiuʼ» (Marcos 12:30). Racalaʼdxiʼ Jiobá gannaxhiinu laa de guidubi ladxidoʼno. Zacanabe pa gannaxhiinu tuuxa o xiixa jma que laabe. Peru  cadi naquiiñeʼ si guininu nadxiinu Jiobá. Laaca racaláʼdxibe gannaxhiinu laabe de guidubi xquendabiaaninu ne guiráʼ stipa stinu, o ca cosa ni guiníʼ íquenu ne cani gúninu. Biblia na: «Laabe maʼ gúdxibe lii, hombre de lu guidxilayú, xii nga galán. Ne xii ndiʼ ni canabaʼ Jiobá de lii yaʼ. Guʼnuʼ ni jneza ne ganaxhiiluʼ guendanachaʼhuiʼ ne gacuʼ biaritiʼ ora sáneluʼ Dios stiluʼ» (Miqueas 6:8).

⁴ Nga runi naquiiñeʼ gannaxhiinu Jiobá de guidubi ladxidoʼno ne guiráʼ ni nápanu. Pa dxandíʼ nadxiinu laabe, zusisácanu laabe jma lu xquendanabáninu. Lu tema gudíʼdinu ca bidúʼyanu tapa modo rusihuinni Jiobá nadxii laanu. Lu tema riʼ zadúʼyanu ximodo zanda gannaxhiinu Jiobá jma ne gusihuínninu ni.

5. Xi racaláʼdxinu gúninu ora riníʼ íquenu guiráʼ ni rudii Jiobá laanu.

⁵ Ora gusigáʼdecabe laanu xiixa, rudiʼnu xquíxepeʼ binni ca. Ti modo gusihuínninu cudiʼnu xquíxepeʼ laabe nga iquiiñenu ni bisigáʼdebe laanu. Apóstol Santiago guníʼ rudii Jiobá laanu stale cosa galán (Santiago 1:17). Jiobá rudii laanu guiráʼ ni caquiiñenu para guibáninu ne chuʼnu nayecheʼ. Ne pur nga rudiʼnu xquíxepeʼ laabe. Rudiʼnu cuenta pabiáʼ nadxii Dios laanu ne racaláʼdxinu gusihuínninu laaca nadxiinu laabe. Ñee zacá runi sentirluʼ la?

6. Xi naquiiñeʼ ñuni ca israelita para nudiiruʼ Jiobá laacabe cosa galán.

⁶ Stale cosa galán bidii Jiobá ca israelita. Bidiibe laacaʼ guiráʼ ni caquiiñecaʼ para guibánicaʼ pur stale iza. Laaca bidiibe laacaʼ Ley para gánnacaʼ xi naquiiñeʼ gúnicaʼ (Deuteronomio 4:7, 8). Guzéʼtenu ti ejemplu, Ley que na naquiiñeʼ gudiicabe Dios ni jmaʼ galán de ca primé cuananaxhi nagüí ni gudii lu layú stícabe (Éxodo 23:19). Pa racaláʼdxicabe gudiiruʼ Jiobá laacabe cosa galán, naquiiñeʼ nuzuubacabe diidxaʼ ne nudiicabe laabe ni jma galán nápacabe. Zacá zusihuínnicabe cudiicabe xquíxepeʼ Jiobá. Biblia na: «Ne ora maʼ gudoloʼ ne maʼ dxaʼ ndaaniluʼ óraque nápaluʼ xidé gusisácaluʼ Jiobá, Dios stiluʼ, pur bidii lii layú sicarú riʼ» (Deuteronomio 8:10).

7. Ximodo zanda iquiiñenu «ca cosa risaca» nápanu para gusihuínninu nadxiinu Jiobá.

⁷ Zanda gusihuínninu nadxiinu Jiobá ora gudiʼnu laa «ca cosa risaca» nápanu (Proverbios 3:9). Ximodo zanda gúninu ni yaʼ. Ti modo nga gudiʼnu bueltu biaʼ náʼ ladxidoʼno para gacanenu ca hermanu stinu ni nuu ra ridagulisaanu ne cani nuu lu guidubi Guidxilayú. Neca nuu de laanu qué gápanu stale cosa, guiranu zanda iquiiñenu ni nápanu para gusihuínninu nadxiinu Jiobá (2 Corintios 8:12). Peru nuuruʼ xcaadxi modo zanda gusihuínninu ni. Guidúʼyanu cani.

8, 9. 1) Gunáʼ nga sti modo zanda gusihuínninu nadxiinu Jiobá. 2) Xi biʼniʼ Mike ne binnilidxi.

⁸ Sti modo zanda gusihuínninu nadxiinu Jiobá nga gápanu confianza laa. Xiñee rininu zacá yaʼ. Guietenaláʼdxinu bisiidiʼ Jesús laanu cadi chúʼpenu xizaa de ca cosa ni jma caquiiñenu. Jiobá maʼ gudxi laanu zudii laanu ca cosa ca pa gudiʼnu xquendanabáninu laabe ne gúninu ni nabe (Mateo 6:31-33). Runi crenu zúnibe ni maʼ bidii stiidxabe. Ne nánnanu zacá ni, purtiʼ ora nadxiinu ti binni, nápanu confianza laa. Ora gápanu jma confianza Jiobá, jma zusihuínninu nadxiinu laabe (Salmo 143:8). Nga runi naquiiñeʼ guinabadiidxanu laca laanu: «Ñee rusihuinneʼ  nadxieeʼ Jiobá pur modo riquiiñeʼ tiempu ne stipa stinneʼ la? Ñee runeʼ cré zudiibe naa ni caquiiñeʼ para guibaneniáʼ guiráʼ dxi la?».

⁹ Guidúʼyanu ni bizaaca ti hermanu ni láʼ Mike ne binnilidxi. Dede dxi nahuiiniʼ Mike, nabé guyuulaʼdxiʼ cheʼ sti guidxi para chigacané ca hermanu guireeche diidxaʼ. Despué de bichaganabe ne gúpabe chupa xiiñibe, guyuuláʼdxirube chebe sti guidxi chigucheechebe diidxaʼ. Mike ne binnilidxi biindacaʼ stale tema ra cayeeteʼ de ca hermanu ni guyé sti guidxi para chigacané guireeche diidxaʼ. Nga runi gudixhe íquecabe guibáninécabe né ni caquiisícabe. Bitoocabe lídxicabe ne yendézacabe ndaaiʼ sti yoo jma nahuiiniʼ. Bisihuiiniʼ Mike negocio ni napa ra rutoocabe cosa para gusiané binni ra lidxi ne biziidibe ximodo gúnibe negocio ca pur Internet. Yanna laabe ne binnilídxibe nuucabe nayecheʼ ra cayúnicabe xhiiñaʼ Jiobá ndaaniʼ sti guidxi. Mike na maʼ biiyacaʼ ximodo cayaca ni guníʼ Jesús lu Mateo 6:33.

10. Xiñee naquiiñeʼ chinándanu ejemplu stiʼ David ne guiníʼ íquenu ni rusiidiʼ Jiobá laanu.

¹⁰ Gulee rey David tiempu para guiníʼ ique lu ca ley stiʼ Jiobá ne lu guiráʼ ni bizáʼ. Nga runi nabe: «Guibáʼ caníʼ pabiáʼ nandxóʼ Dios». Ne laaca guniʼbe «qué ruchee diʼ ley stiʼ Jiobá» ne nápanu confianza ni, rudii ni stipa laanu ne racané ni laanu gácanu binni nuu xpiaaniʼ. Ora guníʼ ique David lu ca cosa riʼ, bicaani laabe gusihuínnibe nadxiibe Dios. Ngue runi guniʼbe racaláʼdxibe chuuladxiʼ Dios modo riníʼ íquebe ne cani rúnibe (Salmo 19:1, 7, 14). Cásica David, laanu laaca naquiiñeʼ guiníʼ íquenu lu guiráʼ ni bizáʼ Jiobá ne xi rusiidibe laanu lu Biblia. Zacá jma zaca xhamígunu Dios ne zusihuínninu nadxiinu laabe.

11. Ximodo zanda iquiiñenu ni rusiidiʼ Jiobá laanu para gusihuínninu nadxiinu laabe. (Biiyaʼ foto ni zeeda ra ruzulú tema riʼ.)

¹¹ Ca dxi stinu riʼ, stale cosa rusiidiʼ Jiobá laanu de laa, de cani bizáʼ, cani maʼ bizabiruaa guni ne de Biblia. Guidxilayú stiʼ Binidxabaʼ rucaa ni binni guiziidiʼ stale cosa ndaaniʼ ca scuela roʼ ca, peru cani riziidicabe ca rucaani laacabe cadi ganna xhiicabe Dios. Peru Jiobá qué racalaʼdxiʼ si guizíʼdinu stale cosa. Laaca racaláʼdxibe guizíʼdinu quixhe íquenu gúninu ni jneza. Laabe racaláʼdxibe iquiiñenu ni rusiidibe laanu para guibáninu galán ne para gacanenu binni (Proverbios 4:5-7). Ximodo zanda gúninu ni yaʼ. Ti modo nga gacanenu binni «ganna ca ni dxandíʼ» ti ganda guilacaʼ (1 Timoteo 2:4). Pa gusíʼdinu guiráʼ binni xi chiguni gobiernu stiʼ Dios pur laanu, zusihuínninu nadxiinu Jiobá ne nadxiinu binni. Biblia na: «Guiráʼ tu ridxibi Dios gueeda ne gucaadiaga, ne naa dxandipeʼ zabeʼ laatu ni maʼ bíʼnibe pur naa. Né ruaaʼ bicaaʼ ridxi laabe, né ludxeʼ bisisacaʼ laabe» (Salmo 66:16, 17).

12. Xi guníʼ ti hermana nahuiiniʼ de ti cosa ni bisigaʼdeʼ Jiobá laa.

¹² Cani nahuiiniʼ laaca zanda guiníʼ íquecaʼ guiráʼ ni rudii Jiobá laacaʼ ne guiráʼ ni rusiidibe laacaʼ. Guzéʼtenu ni bizaaca ti hermana láʼ Shannon. Laa rietenalaʼdxiʼ ximodo biʼniʼ sentir lu guendaridagulisaa roʼ de chonna gubidxa ni biree lá «Devoción piadosa». Dxiqué nápabe 11 iza ne béndabe 10. Lu tobi de ca libana stiʼ guendaridagulisaa roʼ que gunábacabe guiráʼ hombrehuiiniʼ  ne dxaapahuiiniʼ cuicaʼ delante. Shannon gurí raqué. Primé que la? cadxíbibe, peru despué nabé biéchebe ora bisigáʼdecabe guiráʼ hombrehuiiniʼ ne dxaapahuiiniʼ libru Los jóvenes preguntan. Laabe nabe gucané libru que laabe gudiibe cuenta dxandíʼ nuu Jiobá ne guizáʼ nadxii laabe. Ne rudiibe xquíxepeʼ Dios pur rudii laanu regalu nabé galán.

13, 14. Ximodo naquiiñeʼ guni sentirnu ora gulidxe Jiobá laanu.

¹³ Biblia na riguu jneza Jiobá ca binni ni nadxii, «cásica runi bixhoze binni né ti xiiñiʼ» (Proverbios 3:12). Ximodo naquiiñeʼ guni sentirnu ora gulidxe Jiobá laanu yaʼ. Zándaca chuʼnu triste o cadi guni sentirnu galán. Peru naquiiñeʼ gudiʼnu lugar gulidxe Jiobá laanu. Zacá zazíʼdinu gúninu ni jneza ne zatadxí ladxidoʼno (Hebreos 12:11). Qué chuʼ dxi gucáʼnanu guendarulidxe stiʼ Jiobá ne cadi guidxiichinu pa qué chuuláʼdxinu ni gábicabe laanu. Pa gucaadiáganu Jiobá ne gúninu ni jneza, zusihuínninu nadxiinu laabe.

¹⁴ Ca dxi bibani profeta Malaquías, ca judíu que rudiicaʼ sacrificiu ni cadi galán Jiobá. Ngue runi nadipaʼ modo bilídxebe laacaʼ. Biblia na: «Peru laatu runinatu naa ora guinitu: “Nabiidiʼ mexaʼ stiʼ Jiobá, ne rúnitu menu ca cuananaxhi o guendaró nuu luni”. Ne nácabe: “¡Biiyaʼ! ¡Maʼ bireʼdu gana!”, maʼ bibixhiláʼdxitu —na Jiobá, xaíque stiʼ guiráʼ ángel—. Ne maʼ beedanetu ni gúxhatu binni, ne ni nachiitaʼ ñee ne ni huará; ya, maʼ beedanetu para gusigáʼdetu naa. Ñee ziuuladxeʼ ni cudiitu naa la? maʼ guníʼ Jiobá» (Malaquías 1:12, 13). Bilídxebe laacaʼ stale biaje, peru qué nulábicaʼ laabe. Ngue runi gupa xidé biʼniʼ castigar Jiobá laacabe (Malaquías 2:1, 2). Xi rusiidiʼ ndiʼ laanu yaʼ. Pa qué gulábinu ora gulidxe Jiobá laanu o guiníʼ íquenu qué risaca ni la? zusaanabe de gaca xhamígube laanu.

15. Xii nga cadi naquiiñeʼ gúninu.

¹⁵ Stale binni nabé rudxiibaʼ laca laa ne  ruyubi puru si para laa lu guidxilayú riʼ. Stale binni qué riuulaʼdxiʼ gulídxecabe laa o qué riuulaʼdxiʼ gábicabe laa xi naquiiñeʼ guni. Ne ora tuuxa ricaa xiixa conseju, qué runi ni de guidubi ladxidóʼ. Peru Biblia cayabi laanu cadi naquiiñeʼ diʼ gúninu zacá. Naquiiñeʼ guizíʼdinu xi racalaʼdxiʼ Jiobá gúninu ne guzúʼbanu stiidxaʼ (Romanos 12:2). Laabe riquiiñebe xquídxibe para gudiibe conseju laanu ora caquiiñenu ni. Rábibe ca hombre ximodo naquiiñeʼ guni tratar ti gunaa ne ximodo guni tratar ti gunaa ti hombre, ximodo cuinu tu gaca xhamígunu ne gánnanu cuinu xi deporte quítenu, xi guidúʼyanu ne xi gucaadiáganu. Ora rudiʼnu lugar gulidxe Jiobá laanu ne guchaʼnu modo laanu para gusiéchenu laabe, rusihuínninu cudiʼnu xquíxepeʼ laabe pur ca conseju rudiibe laanu ne nadxiinu laabe (Juan 14:31; Romanos 6:17).

16, 17. 1) Ante quixhe íquenu xi gúninu, xiñee naquiiñeʼ gúninu stipa pur gánnanu xi riníʼ ique Jiobá. 2) Lugar de ñapa ca israelita que confianza Jiobá, xi bíʼnicaʼ.

¹⁶ Ca xcuidihuiiniʼ nabé ruyúbicaʼ bixhózecaʼ para gacané laacaʼ ne gapa laacaʼ. Dede binni huaniisi riuu biaje rinábacaʼ gacané bixhózecaʼ laacaʼ. Xiñee yaʼ. Purtiʼ neca zanda quixhe íquecabe gúnicabe xiixa, nánnacabe zanda gudii bixhózecabe laacabe conseju galán. Zacaca nga rizaaca né Jiobá. Rudiibe lugar laanu quixhe íquenu xi gúninu. Peru cumu nápanu confianza laabe ne nadxiinu laabe la? qué rusaana de guinábanu laabe gacanebe laanu. Ne ante quixhe íquenu gúninu xiixa, rúninu stipa pur gánnanu xi riníʼ íquebe. Ora rinábanu Jiobá gacané laanu, rudiibe espíritu stibe laanu para gacané laanu gúninu ni jneza (Filipenses 2:13).

¹⁷ Ca dxi bibani Samuel, gudinde ca israelita né ca filisteu ne lu guendaridinde que ziyuni ganar ca filisteu. Peru lugar de ñápacaʼ confianza Jiobá ne ninabadiidxacaʼ laabe xi naquiiñeʼ ñúnicaʼ, gudixhe íquecaʼ chinecaʼ guiña stiʼ pactu lu guendaridinde que. Guníʼ íquecabe zaqué zacané Jiobá laacabe guni ganárcabe. Peru qué nuyúbicabe ñánnacabe xi riníʼ íquebe. Bíʼnicabe ni rábicabe jneza. Xi bizaaca pur ni bíʼnicabe que yaʼ. Guti 30,000 soldadu israelita. Ne ni jma feu nga biaanané ca filisteu guiñaʼ stiʼ pactu que (1 Samuel 4:2-4, 10, 11). Biblia na: «Nuu ti neza ruluíʼ galán para binni, peru guendaguti nga ridxela binni luni» (Proverbios 14:12).

18. Xi naquiiñeʼ gúninu casi rieeteʼ lu Salmo 42:5, 6 ne Proverbios 3:5, 6.

¹⁸ Ti hombre ni nabé gunnaxhii Jiobá bicaa xi gucané laa ora gupa guendanagana. Laa na gupa confianza zacané Dios laa ne zulabe laa (Salmo 42:5, 6). Ñee zacaca runi sentirluʼ la? Zándaca maʼ nápaluʼ confianza Jiobá. Neca zacá guiranu zanda guizíʼdinu gápanu jma confianza laabe. Biblia na: «Gupa confianza Jiobá de guidubi ladxidoʼloʼ, ne cadi chinándaluʼ ni na xpiaaniluʼ. Lu guiráʼ ni gúniluʼ biiyaʼ xi nabe, ne laabe zúnibe ca neza stiluʼ derechu» (Proverbios 3:5, 6).

19. Ximodo zusihuínniluʼ nadxiiluʼ Jiobá.

¹⁹ Casi maʼ bidúʼyanu ca, gunnaxhii Jiobá laanu primé. Zacá bisiidibe laanu gannaxhiinu laabe. Cadi naquiiñeʼ gusaana de guiníʼ íquenu xi guiráʼ maʼ bíʼnibe pur laanu ne pabiáʼ nadxiibe laanu. Gusihuínninu nadxiinu laabe de guidubi ladxidoʼno, xhiálmanu, xquendabiaaninu ne stipa stinu (Marcos 12:30).