1-3. Xi guendanagana ridxaagalú ca guendaxheelaʼ. (Biiyaʼ dibuju ni zeeda ra ruzulú tema riʼ.)

TI XPINNI Cristu ni maʼ ziné 38 iza de bichaganáʼ guníʼ: «Pa tuuxa guni stipa ne gusihuinni racalaʼdxi guibaniné xheelaʼ galán, zaguu ndaayaʼ Jiobá laa». Rihuinni dxichi zanda guibani ti guendaxheelaʼ nayecheʼ neca guidxaagalú guendanagana (Proverbios 18:22).

² Guiráʼ guendaxheelaʼ nga rapa guendanagana. Biblia na: «Zaca ni nagana para cani ichaganáʼ» (1 Corintios 7:28). Dxandíʼ, nabé ridxágacabe pur ni rúnicabe guiráʼ dxi. Nuu guendaxheelaʼ nabé rúnicaʼ dxiiñaʼ ne nápacaʼ xidé gusiniisicaʼ ca xiiñicaʼ. Cumu binni ruchee hombre ca ne gunaa ca la? nuu biaje zándaca guiniʼcaʼ xiixa ni guniná laacaʼ. Ne nuu biaje qué rienesaacaʼ laacaʼ ne rápacaʼ guendanagana (Santiago 3:2, 5, 8). Cumu nuu stale cosa ni gúnicabe ne nabé maʼ bidxágacabe la? ngue runi qué gápacabe tiempu para laacabe. Ne cumu nuu biaje qué gápacabe bueltu, gaca huará tobi de laacabe o gápacabe sti guendanagana la? zándaca chaahuiʼ chaahuiʼ maʼ qué gannaxhiisaacabe ne maʼ cadi guni respetarsaacabe. Lu Biblia laaca rieeteʼ de binni ni zuni ni na beela ladi. Casi chuʼné ni cadi xheelaʼ, muxeʼ o gunaa nguiuʼ, cani maʼ qué zuni respetar ca  ley stiʼ Jiobá, binni ni quiñe xheelaʼ o gabi laabe diidxaʼ naná, guendaridinde, gaca tuuxa celoso o naguíʼ, guidxiichi o tinde xheelacaʼ (Gálatas 5:19-21). Ca cosa riʼ zanda guniná ni ti guendaxheelaʼ ni ruluíʼ nuu naguidxi.

³ Peru cadi ngasi nga laani. Ca binni ni nabani lu ca últimu dxi riʼ, ruyúbicaʼ puru si para laacaʼ ne qué runi respetarcaʼ Dios (2 Timoteo 3:1-4). Ca ndiʼ zanda guninácani ti guendaxheelaʼ. Ne Binidxabaʼ racalaʼdxiʼ guchiá ca guendaxheelaʼ ca. Apóstol Pedru na canazá Binidxabaʼ «casi ti lion ni canaguu beedxeʼ, canayubi tu uxuuxe» (1 Pedro 5:8; Apocalipsis 12:12).

4. Ximodo zanda gudxiilú ca guendaxheelaʼ ca guendanagana gápacaʼ ne guibánicaʼ nayecheʼ.

⁴ Ti xpinni Cristu de Japón nanna riuu biaje ridindené xheelaʼ purtiʼ nuu stale cosa ni naguu xizaa laacaʼ. Guyuube xizaa purtiʼ qué gápabe bueltu, peru que nabe gábibe ni xheelabe. Peru xheelabe bidii cuenta ne laaca guyuu xizaa. Ne cadi xadxí guca huará gunaa que. Racá ridúʼyanu, rapa ca guendaxheelaʼ ca guendanagana. Neca zacá, zanda gudxiilúcabe cani ne chúʼcabe nayecheʼ. Ximodo zanda gúnicabe ni yaʼ. Naquiiñeʼ gacané Jiobá laacabe. Biblia na: «Pa Jiobá qué ñacané nibí yoo ca la? pur gana si bíʼnicabe dxiiñaʼ nadipaʼ para gurí ni. Pa Jiobá qué ñapa guidxi ca, pur gana si ñataná ni cayapa ni» (Salmo 127:1). Lu tema riʼ zadúʼyanu gaayuʼ cosa ni zanda gacané ca guendaxheelaʼ riʼ chuʼcaʼ naguidxi ne guibánicaʼ nayecheʼ. Laaca zadúʼyanu zanda gudxiilúcabe ca guendanagana stícabe pa nadxiisaacabe.

5, 6. Xi naquiiñeʼ guni cani maʼ bichaganáʼ pa racaláʼdxicaʼ gabi Jiobá laacaʼ xi naquiiñeʼ gúnicaʼ.

⁵ Pa ti hombre ne ti gunaa ni maʼ bichaganáʼ racaláʼdxicaʼ gápacaʼ ti guendaxheelaʼ naguidxi ne guibánicaʼ nayecheʼ la? naquiiñeʼ gannaxhiicaʼ Jiobá ne guzuubacaʼ stiidxabe. Lu Biblia rieeteʼ naquiiñeʼ chuʼ Jiobá lu xquendaxheelacabe. Biblia na: «Ora stubi binni zanda gucaalú tuuxa laa, peru ora chúpacabe zanda gudxiilúcabe. Ne ti doo de chonna xcuaa qué zaruuguʼ diʼ nagueenda» (Eclesiastés 4:12). Para nga naquiiñeʼ gúnicabe ni na Jiobá. Isaías 30:20, 21 na rabi Dios laanu xi naquiiñeʼ gúninu ne xi neza chuunu. Para ganda gabi Jiobá ca guendaxheelaʼ ca xi naquiiñeʼ gúnicaʼ la? naquiiñeʼ gúʼndacaʼ Biblia juntu (Salmo 1:1-3). Laaca naquiiñeʼ cueecabe ti dxi ndaaniʼ semana para guʼndanécabe binnilídxicabe, ne guni orárcabe juntu guiráʼ dxi. Zacá ziuu xquendaxheelacabe naguidxi ne zaziidicabe gudxiilúcabe ca cosa malu nuu lu guidxilayú stiʼ Binidxabaʼ.

⁶ Guidúʼyanu ni bizaaca ti xpinni Cristu de Alemania. Laa guníʼ cada biaje gapané xheelaʼ xiixa guendanagana la? rinándacabe ca conseju ni zeeda lu Biblia. Zacá maʼ biziidicabe gápacabe paciencia ne gutiidiláʼdxicabe stóndacabe. Riníʼcabe nabé risaca guiropaʼ cosa riʼ para chuʼ ti guendaxheelaʼ galán. Ora runi ti hombre ne ti gunaa ni maʼ bichaganáʼ stipa pur chuʼ Dios lu xquendaxheelacaʼ la? jma naguidxi riuu xquendaxheelacabe.

7. Ximodo naquiiñeʼ guni tratar ti hombre xheelaʼ.

⁷ Sti cosa ni racané para chuʼ ti guendaxheelaʼ jma naguidxi ne nayecheʼ nga modo guni tratar hombre xheelaʼ. Biblia na: «Cristu nga xaíque sti irá hombre, ne hombre nga xaíque sti gunaa» (1 Corintios 11:3). Ndiʼ riníʼ naquiiñeʼ guni tratar hombre xheelaʼ cásica biʼniʼ Cristu né ca discípulo stiʼ. Laabe qué ñácabe naduxhuʼ ne qué ñuninabe laacaʼ. Qué nusaana de ñánnaxhiibe laacaʼ, gúcabe nachaʼhuiʼ, biénebe laacaʼ ne qué nudxiibabe laca laabe (Mateo 11:28-30).

8. Xi naquiiñeʼ guni ti hombre para gannaxhii xheelaʼ laa ne guni respetar laa.

 ⁸ Ti hombre ni naca xpinni Cristu qué rinabaʼ xheelaʼ guni respetar laa. Biblia cayabi ca hombre sicaríʼ: «Lagaca nachaʼhui ne laacabe, cadi purti si jma nadá cabe que laatu» (1 Pedro 3:7). Xi riníʼ ca diidxaʼ riʼ yaʼ. Riníʼcani naquiiñeʼ guni tratar hombre xheelaʼ galán. Laaca naquiiñeʼ guiniʼbe né respetu ne gácabe nachaʼhuiʼ né laa cásica ora nuucabe stúbicabe zaqueca ora nuucabe nezalú binni. Zacá zusihuínnibe risaca xheelabe para laabe (Proverbios 31:28). Ora rusihuinni hombre riʼ nadxii xheelaʼ, xheelabe laaca rannaxhii laabe ne runi respetar laabe ne Jiobá riguu ndaayaʼ xquendaxheelacabe.

9. Ximodo rusihuinni ti gunaa runi respetar Jiobá casi xaíque stiʼ.

⁹ Pa dxandíʼ nadxiinu Jiobá la? qué zudxíʼbanu laca laanu, zadúʼyanu laabe casi xaíque stinu ne zuzúʼbanu stiidxabe (1 Pedro 5:6). Dios na: «Hermana caʼ, lauzuuba stiidxa xheela tu» (Colosenses 3:18). Pa ti gunaa ni maʼ bichaganáʼ racalaʼdxiʼ gusihuinni runi respetar Jiobá casi xaíque stiʼ la? naquiiñeʼ gacané xheelaʼ. Zándaca cadi guiráʼ ora chuuláʼdxibe ni quixhe ique xheelabe guni. Neca zacá, pa cadi cucheené xheelabe xiixa ley stiʼ Dios la? naquiiñeʼ gacanebe laa (1 Pedro 3:1).

10. Xiñee naquiiñeʼ guni respetar ti gunaa ni quixhe ique xheelaʼ guni.

¹⁰ Maʼ bisaana Jiobá ti dxiiñaʼ risaca ne galán para gunaa ndaaniʼ ti familia. Gácabe xcompañeru xheelabe (Malaquías 2:14). Nga runi, ora quixhe íquecabe gúnicabe xiixa ndaaniʼ familia stícabe, gunaa ca zanda guiníʼ né respetu ni riníʼ ique ne ni runi sentir. Peru zuni respetarbe ni quixhe ique xheelabe guni. Dxandíʼ, ti hombre ni nadxii xheelaʼ zucaadiaga laabe (Proverbios 31:10-31). Pa gunaa ca nadxii xheelaʼ ne racané laabe, guirácabe zabánicabe galán. Guirácabe zabánicabe nayecheʼ ne qué zadindesaacabe. Hombre ne gunaa ni maʼ bichaganáʼ zabánicaʼ nayecheʼ purtiʼ nánnacaʼ riuulaʼdxiʼ Dios modo nabánicaʼ (Efesios 5:22).

11. Xiñee naquiiñeʼ guiziidiʼ cani maʼ bichaganáʼ gutiidiláʼdxicaʼ donda sticaʼ.

¹¹ Ti guendaxheelaʼ laaca riuu naguidxi ora hombre ca ne gunaa ca riziidicaʼ gutiidiláʼdxicaʼ donda sticaʼ. Lu Biblia ridxélanu conseju ra na gutiidilaʼdxiʼ binni donda stiʼ xcaadxi (Colosenses 3:13). Pa qué gusiaandaʼ hombre o gunaa ni maʼ bichaganáʼ ra bicheené xheelaʼ laa ne iquiiñeni para gucaalú laabe la? qué ziuu diʼ guendaxheelaʼ riʼ naguidxi. Ora runinácabe ladxidóʼ tuuxa ne ora ridaacabe xiana zeeda gácani casi ora nicá bi ti yoo. Jma nagana raca ni para hombre ca ne gunaa ca gutiidiláʼdxicaʼ donda sticaʼ ne gúnicaʼ dxiiñaʼ juntu. Jma jneza nga guiziidicabe gutiidiláʼdxicabe donda stícabe cásica rutiidilaʼdxiʼ Jiobá stóndacabe. Zacá jma naguidxi ziuu xquendaxheelacabe (Miqueas 7:18, 19).

12. Xi riníʼ ca diidxaʼ «pa nadxii tu stobi la? neca uchee né laatu qué zuquixe tu ni laa».

¹² Pa dxandíʼ nadxiinu tuuxa, qué zugábanu panda biaje gucheené laanu. Biblia na: «Pa nadxii tu stobi la? neca uchee né laatu qué zuquixe tu ni laa» (1 Corintios 13:4, 5; biindaʼ 1 Pedro 4:8). Nga riníʼ cadi naquiiñeʼ gusaana de gutiidiláʼdxinu stonda binni. Ti biaje gunabadiidxaʼ apóstol Pedru panda biaje naquiiñeʼ gutiidiláʼdxinu donda stiʼ xcaadxi binni. Jesús guníʼ: «Setenta de gadxe» (Mateo 18:21, 22). Ni guníʼ Jesús raríʼ nga cadi naquiiñeʼ ugábanu panda biaje gutiidiláʼdxinu donda stiʼ sti binni (Proverbios 10:12). *

13. Ximodo riziidiʼ binni gutiidilaʼdxiʼ donda.

¹³ Ti hermana de Alemania láʼ Annette bisiene xiñee risaca gutiidilaʼdxiʼ binni donda stiʼ stobi. Laabe guniʼbe, pa ti hombre ne ti gunaa maʼ bichaganáʼ qué gutiidiláʼdxicaʼ donda sticaʼ la? ridaacaʼ xiana ne maʼ qué runi confiarcaʼ laacaʼ. Ne ndiʼ nabé runiná ni xquendaxheelacabe. Peru pa gutiidiláʼdxicabe donda stícabe riuucabe tobi si ne riuu xquendaxheelacabe naguidxi. Yanna, ximodo riziidicabe gutiidiláʼdxicabe stóndacabe yaʼ. Guirópacabe naquiiñeʼ gudiicabe xquíxepeʼ. Cada tobi naquiiñeʼ guni stipa pur guʼyaʼ ca guenda sicarú napa xheelaʼ ne gábibe laa galán cani runi (Colosenses 3:15). Pa guiziidicabe gutiidiláʼdxicabe donda la? hombre ca ne gunaa ca zatadxí xquendabiaanicaʼ, ziuucaʼ tobi si ne zánnacaʼ nayecheʼ nuu Jiobá né laacaʼ (Romanos 14:19).

14, 15. 1) Xii nga Regla de Oro. 2) Ximodo racané Regla de Oro ti guendaxheelaʼ.

¹⁴ Guiranu racaláʼdxinu guni respetárcabe laanu ne guni tratárcabe laanu galán. Riuuláʼdxinu gucaadiágacabe laanu ne guizaaláʼdxicabe modo nuunu. Neca zacá, guiranu huayunadiáganu tuuxa guiníʼ: «Zuquixeʼ laabe ni bíʼnibe naa». Ne nuu biaje riénenu xiñee nuu tu riníʼ zacá. Peru Biblia na: «Cadi guiniʼluʼ: “Cásica bíʼnibe naa zaqueca zuneʼ laabe”» (Proverbios 24:29). Yanna, ximodo nga jma jneza gudxiilunu ti guendanagana gápanu yaʼ. Jesús guníʼ: «Laguni laacabe ni racalaʼdxi tu guni cabe laatu» (Lucas 6:31). Ni cusiidiʼ Jesús raríʼ nga naquiiñeʼ guni tratarnu binni casi modo riuuláʼdxinu gúnicabe laanu. Stale tu ribee lá conseju riʼ Regla de Oro. Ximodo zanda guni binni ni na regla riʼ lu xquendaxheelaʼ yaʼ. Cada tobi naquiiñeʼ guni tratar xheelaʼ modo riuulaʼdxiʼ guni tratárcabe laa.

¹⁵ Pa cada tobi de laacabe guni stipa pur cadi guniná ladxidóʼ xheelaʼ la? jma naguidxi ziuu xquendaxheelacabe. Ti hermanu de Sudáfrica guníʼ laa ne xheelaʼ ruyúbicaʼ modo chinándacaʼ ni na Regla de Oro. Laa guníʼ: «Riuu biaje ridxiichidu, peru nabé rúnidu stipa pur guni tratar cada tobi de laadu  modo riuulaʼdxiʼ guni tratárcabe laa: né respetu ne gusisácadu cada tobi de laadu».

16. Xi ca cosa ndiʼ cadi jneza guni ti hombre o ti gunaa ni maʼ bichaganáʼ.

¹⁶ Lu ti guendaxheelaʼ cadi galán diʼ guiníʼ tuuxa mal de xheelaʼ nezalú sti binni. Ne laaca cadi galán diʼ guiníʼcabe cadi jneza runi xheelacabe xiixa cosa nezalú binni, neca gúnicabe ni casi guendariguite. Ti guendaxheelaʼ laaca qué zuuyaʼ tupeʼ nga jma nadipaʼ ládecaʼ, tu runi ridxi jma o tu jma runiná xheelaʼ. Dxandíʼ, guiranu gulenenu donda ne nuu biaje rininu o rúninu xiixa cosa ni ruchiichi stobi. Peru cadi pur nga hombre ca o gunaa ca guni xiixa ni gusituí lucaʼ o guiníʼcabe xiixa ni guniná laacabe. Ne jma feu nga gulaa násaacabe o cápacabe laacabe. Biblia na: «Ni nanna gucueeza ruaa la? nuu xpiaaniʼ, ne ti hombre ni riene la? qué ridxiichi nagueenda ne cadi casi zeʼ rundaa ruaa xiixa. Maʼ guniʼbe né guendabiaaniʼ, ne ley stiʼ guendanachaʼhuiʼ nuu lu lúdxibe» (Proverbios 17:27 ne 31:26).

17. Xi qué ziuu dxi guni ti hombre ni runi ni na Regla de Oro.

¹⁷ Ndaaniʼ caadxi guidxi riníʼcabe dxandíʼ hombre tuuxa ora rucaa ridxi xheelaʼ ne ora riguiñe laabe. Peru cadi nga diʼ nga ni rusiidiʼ Biblia. Nani jma galán nga ti hombre ni qué ridxiichi nagueenda que ti hombre nadipaʼ ne jma galán nga ti hombre ni rucueeza laca laa que ti hombre ni runi ganar ti guidxi (Proverbios 16:32). Naquiiñeʼ gaca tuuxa nadipaʼ para ganda gucueeza laca laa ne cadi quiñe stobi. Jesucristu nga hombre ni jma risaca bibani lu Guidxilayú, ne qué ñuu dxi nidxiichi. Rey David laaca guca ti hombre nadipaʼ ne nadxibalú. Laa guníʼ: «Lagaca diti, peru cadi gucheetu. Laguiníʼ guiráʼ ni gápatu gana ndaaniʼ ladxidoʼto lu cama stitu, ne cadi gábitu ni sti binni» (Salmo 4:4). Nga runi ti hombre ni riguiñe xheelaʼ ne qué randa rucueeza laaca laa cadi dxandíʼ naca ti hombre nadipaʼ. Ne qué raca xhamigu Jiobá clase hombre ca.

18. Xiñee risaca nga gannaxhii ca guendaxheelaʼ.

¹⁸ (Biindaʼ 1 Corintios 13:4-7.) Ndaaniʼ ti guendaxheelaʼ guizáʼ risaca nga guiá tuuxa xheelaʼ, gaca nachaʼhuiʼ, cadi gudxiibaʼ laca laa ne cadi guidxiichi nagueenda. Biblia na: «Jma naquiiñe ganaxhii saa tu, purti zacá zaca pe tu tobi si» (Colosenses 3:12, 14). Guendarannaxhii ca nga ti guenda ni jma risaca lu ti guendaxheelaʼ. Jesús nabé gunnaxhii binni, nga runi gunabe gútibe pur laacaʼ. Ne cásica gunnaxhii Cristu binni zacaca nga naquiiñeʼ gannaxhii ti guendaxheelaʼ. Zacá zanda gápacabe ti guendaxheelaʼ naguidxi neca guidxaagalúcabe guendanagana casi xiixa ni runi tobi de laacabe ne qué riuulaʼdxiʼ xheelaʼ, guendahuará malu, ora qué gápacabe bueltu o guendanagana gápacabe né familia stiʼ xheelacabe.

19, 20. 1) Xi naquiiñeʼ guni binni para gapa ti guendaxheelaʼ naguidxi ne nayecheʼ. 2) Xi zadúʼyanu lu sti tema ca.

¹⁹ Para chuʼ ti guendaxheelaʼ naguidxi ne nayecheʼ, naquiiñeʼ gannaxhiisaacaʼ, cadi gucheenecaʼ xheelacaʼ ne caquiiñeʼ stale stipa. Pa gápacabe guendanagana cadi naquiiñeʼ gusaabi xheelacabe, sínuque jma naquiiñeʼ chúʼcabe tobi si. Ora guirópacabe nadxiicabe Jiobá ne nadxiisaacabe, rúnicabe stipa pur guni chaahuicabe guendanagana stícabe. Xiñee yaʼ. Purtiʼ Stiidxaʼ Dios na «qué ziuu dxi initilú enda ranaxhii» (1 Corintios 13:8; Mateo 19:5, 6; Hebreos 13:4).

²⁰ Ca dxi nagana nabáninu riʼ nagana nga gaca xquendaxheelaʼ binni naguidxi ne guibánicaʼ nayecheʼ (2 Timoteo 3:1). Peru maʼ bidúʼyanu zanda chuʼ ti guendaxheelaʼ naguidxi ne nayecheʼ ora racané Jiobá laa. Neca zacá, naquiiñeʼ gapa ca guendaxheelaʼ ca laacaʼ. Ndaaniʼ guidxilayú riʼ nabé nga ricá ique binni chuʼné ni cadi xheelaʼ. Lu sti tema ca zadúʼyanu xi zanda guni ti hombre ne ti gunaa ni maʼ bichaganáʼ para gaca xquendaxheelacaʼ naguidxi.