1. Xii nga ca razón nápanu para gudiʼnu xquíxepeʼ Jiobá.

STALE cosa galán rusigaʼdeʼ Jiobá laanu (Santiago 1:17). Ne rusihuínnibe nadxiibe laanu ora rudiibe guiráʼ ni caquiiñenu para guibáninu cásica runi ti pastor chaʼhuiʼ né ca dendxuʼ stiʼ (Salmo 23:1-3). Ne pa nápanu guendanagana la? rápabe laanu ne rudiibe stipa laanu (Salmo 46:1). Ora riníʼ íquenu guiráʼ ni rúnibe pur laanu, runi sentirnu casi biʼniʼ sentir salmista que ora guníʼ: «Lagudii xquíxepeʼ Jiobá, purtiʼ nacháʼhuibe». Salmista riʼ laaca guníʼ qué zusaana Dios de gaca nachaʼhuiʼ (Salmo 106:1). Rihuinni dxíchica naquiiñeʼ gudiʼnu xquíxepeʼ Dios.

2, 3. 1) Xi zazaaca pa gusaana de gudiʼnu xquíxepeʼ. 2) Xi guendarinabadiidxaʼ zacábinu lu tema riʼ.

² Xiñee naquiiñeʼ guiníʼ íquenu gudiʼnu xquíxepeʼ Jiobá yaʼ. Maʼ xadxí rieeteʼ lu Biblia ziuu binni ni qué zudii xquíxepeʼ ca dxi stinu riʼ, ne zacá cadúʼyanu ni yanna (2 Timoteo 3:2). Stale binni qué rudii xquíxepeʼ Jiobá pur guiráʼ ni bíʼnibe pur laacaʼ. Millón de binni jma ricá ique siʼ cosa ni cadi caquiiñeʼ. Neca zacá, cadi nayecheʼ nuucaʼ né ni maʼ nápacaʼ. Pa laaca gusaana de gudiʼnu xquíxepeʼ, zazaacanu ni bizaaca ca israelita. Zándaca maʼ qué zusisácanu cani maʼ biʼniʼ  Jiobá pur laanu ne maʼ qué zaca xhamígunu laabe (Salmo 106:7, 11-13).

³ Pa gusaana de gudiʼnu xquíxepeʼ la? laaca zaca nagana para laanu gudxiilunu ca guendanagana stinu. Xiñee yaʼ. Purtiʼ jma zaníʼ íquenu de ca guendanagana ni nápanu que ca cosa galán ni maʼ nápanu (Salmo 116:3). Lu tema riʼ zacábinu chupa guendarinabadiidxaʼ: Xi zanda gúninu para cadi gusaana de gudiʼnu xquíxepeʼ. Ne ximodo zanda chuʼnu nayecheʼ neca guidxaagalunu guendanagana.

4. Xi naquiiñeʼ gúninu para gusihuínninu nácanu ti binni ni rudii xquíxepeʼ Jiobá.

⁴ Naquiiñeʼ gúninu stipa pur gudiʼnu xquíxepeʼ Jiobá. Para nga naquiiñeʼ guiníʼ íquenu xi guiráʼ cosa maʼ bíʼnibe pur cada tobi de laanu. Ne despué guiníʼ íquenu ximodo rusihuínnibe nadxiibe laanu pur ca cosa ni maʼ bidiibe laanu. Ngapeʼ nga biʼniʼ ti hombre ni bicaa Biblia. Ne guizáʼ bidxagayaabe pur ni biʼniʼ Jiobá pur laabe. Biblia na: «Stale cosa sicarú nga ni maʼ bíʼniluʼ para laadu, Jiobá, Dios stinneʼ, nabé nga riníʼ íqueluʼ laadu; guirutiʼ zanda guchaagadu lii. Pa ñacalaʼdxeʼ nusieneʼ ne niniéʼ de laacani, qué ñanda ñuneʼ ni, purtiʼ nabé stale cani para guzeeteʼ de laacani. Tuu nga nuu xpiaaniʼ. Cásica zuuyabe ca cosa ca, zaqueca ziene chaahuibe pabiáʼ nachaʼhuiʼ Jiobá ne nadxii binni» (Salmo 40:5 ne 107:43).

5. Pa racaláʼdxinu gudiʼnu xquíxepeʼ casi Pablu, xi naquiiñeʼ gúninu.

⁵ Zanda gusihuínninu nácanu ti binni ni rudii xquíxepeʼ ra guizíʼdinu de ejemplu stiʼ apóstol Pablu. Stale biaje guníʼ íquebe guiráʼ ni maʼ bidii Jiobá laabe. Ximodo nánnanu ni yaʼ. Purtiʼ gatigá bidiibe xquíxepeʼ Jiobá lu ca oración stibe. Laaca laabe guniʼbe gúcabe ti hombre ni nabé bichá bi yanni ne bininá binni, guzanándabe ca xpinni Cristu ne guniʼbe ni cadi dxandíʼ de laacaʼ. Ngue runi bidiibe xquíxepeʼ Dios pur bitiidilaʼdxiʼ stóndabe ne bidii lugar gucheechebe diidxaʼ (biindaʼ 1 Timoteo 1:12-14). Laaca bidiibe xquíxepeʼ Dios pur ca xpinni Cristu, purtiʼ gúcacaʼ binni nachaʼhuiʼ ne qué nusaanacaʼ Dios (Filipenses 1:3-5, 7; 1 Tesalonicenses 1:2, 3). Laaca bidiibe xquíxepeʼ Dios cada biaje gacané ca xpinni Cristu laabe gudxiilube xiixa guendanagana (Hechos 28:15; 2 Corintios 7:5-7). Ngue runi gudxi Pablu ca xpinni Cristu gudiicaʼ xquíxepeʼ Dios, gúʼndacaʼ ne gusisácacaʼ Dios ti zacá cúʼsaacaʼ gana laacaʼ (Colosenses 3:15-17).

6. Xi razón nápaluʼ para gudiiluʼ xquíxepeʼ Dios.

⁶ Cásica Pablu, laanu laaca zanda guiníʼ íquenu xi guiráʼ maʼ biʼniʼ Jiobá pur laanu (Salmo 116:12). Guiníʼ íquenu: «Xi razón napaʼ para gudieeʼ xquíxepeʼ Dios yaʼ». Zanda guiníʼ íquenu xhamígunu laabe o bidiibe Xiiñibe para guixá stóndanu. Ne laaca zanda guiníʼ íquenu ximodo huayacané ca xpínnibe laanu ora gúpanu xiixa guendanagana. Ne pa maʼ bichagananu o nápanu xiiñinu gudiʼnu xquíxepeʼ laabe pur familia stinu. Guiranu nápanu stale razón para gudiʼnu xquíxepeʼ Dios. Nga runi, guiníʼ íquenu ximodo huayacanebe laanu. Zacá zápanu razón para gudiʼnu xquíxepeʼ laabe guiráʼ dxi. Biblia na: «Nabé galán nga gudii binni xquíxepeʼ Jiobá, ne gúʼndacaʼ para laluʼ, Dios  ni jma Nandxóʼ; siadoʼroʼ riniʼcaʼ pabiáʼ nacháʼhuiluʼ ne nadxiiluʼ binni ne huaxhinni riniʼcaʼ qué rusaanaluʼ laacaʼ» (Salmo 92:1, 2).

7. 1) Xiñee naquiiñeʼ guni orarnu Dios para gudiʼnu xquíxepeʼ laa. 2) Xi zabeendunu pa gudiʼnu xquíxepeʼ Jiobá lu ca oración stinu.

⁷ Ora guiníʼ íquenu guiráʼ cosa galán ni nápanu, zucaani laanu guni orarnu Dios para gudiʼnu xquíxepeʼ laa (Salmo 95:2; 100:4, 5). Nuu binni runi orar Dios para si guinábacaʼ laabe xiixa cosa. Peru laaca riuuláʼdxibe guni orarnu laabe para gudiʼnu xquíxepeʼ laabe pur cani maʼ nápanu. Zacá biʼniʼ stale binni ni rieeteʼ lu Biblia, casi Ana ne Ezequías (1 Samuel 2:1-10; Isaías 38:9-20). Laanu laaca zanda chinándanu ejemplu stícabe ne gudiʼnu xquíxepeʼ Dios pur guiráʼ ni maʼ biʼniʼ pur laanu (1 Tesalonicenses 5:17, 18). Zacá zuguusaanu gana laanu, jma zannaxhiinu Dios ne jma zaca xhamígunu laabe (Santiago 4:8).

8. Xii nga cani zanda gucaa laanu gusaana de gácanu binni ni rudii xquíxepeʼ.

⁸ Pa qué gápanu cuidadu, zanda gusaana de gusisácanu ca cosa ni rusigaʼdeʼ Jiobá laanu. Nuu chupa cosa ni zanda gucaa laanu gusaana de gácanu binni rudii xquíxepeʼ. Primé la? nácanu binni ruchee ne nga nga ni bisaanané Adán ne Eva laanu. Dxi bizáʼ Dios Adán ne Eva bidiibe laacaʼ guiráʼ ni caquiiñecaʼ. Ñanda nibánicabe sin qué ñuu dxi ñáticabe ndaaniʼ ti lugar sicarú ne guirutiʼ ñuniná laacabe (Génesis 1:28). Peru qué nusisácacabe ni biʼniʼ Dios pur laacabe. Gucaláʼdxicabe ñápacabe jma de ni caquiiñecabe, peru biníticabe guirani (Génesis 3:6, 7, 17-19). Guiropa, nabáninu lade binni ni qué rudii xquíxepeʼ. Guidxilayú riʼ zanda gucaa laanu gúninu cosa ni cadi jneza ne gusaana de gusisácanu guiráʼ ni maʼ bisigaʼdeʼ Jiobá laanu, casi gácanu xhamígube ne chuʼnu ndaaniʼ xquídxibe ni nuu lu guidubi Guidxilayú (1 Juan 2:15-17). Xi zanda gúninu para cadi guniná ca cosa ca laanu yaʼ. Guiníʼ íquenu gatigá lu guiráʼ ni maʼ biʼniʼ Jiobá pur laanu ne guni orarnu para gudiʼnu xquíxepeʼ. Biblia na: «Ti cosa maʼ gunabaʼ Jiobá... ne laani nga chiyubeʼ, cuezaʼ ndaaniʼ lidxi Jiobá biaʼ dxi guibaneʼ, ti guuyaʼ pabiáʼ nacháʼhuibe ne chuaaʼ nayecheʼ guuyaʼ yuʼduʼ stibe» (Salmo 27:4).

9. Ora nápanu guendanagana, xiñee naquiiñeʼ guiníʼ íquenu ca cosa galán ni rudii Jiobá laanu.

⁹ Ora rudiʼnu xquíxepeʼ Dios, nabé racané ni laanu ora nápanu xiixa guendanagana naroʼbaʼ. Nuu biaje qué ridxélanu xi gúninu ora málasi guizaaca xiixa ni guchaa xquendanabáninu. Zándaca gusaana xheelanu laanu, gaca huaranu, gatiʼ tuuxa ni nabé nadxiinu o guizaaca xiixa desgracia casi ti xu roʼ. Pa guiníʼ íquenu ca cosa galán ni rudii Jiobá laanu, zatadxí ladxidoʼno ne zápanu stipa para guni huantarnu ca guendanagana gápanu. Guidúʼyanu ximodo huayacané ndiʼ chupa chonna xpinni Cristu.

10. Ora riníʼ ique Irina modo racané Jiobá laa, ximodo racané nga laabe.

¹⁰ Irina * nga ti precursora regular ni nabeza Norteamérica. Guca xheelabe binnigola lade ca binni ridagulisaa, peru bicheené laabe ne bisaana laabe ne ca xiiñibe. Xi racané laabe para cadi gusaanabe de gúnibe xhiiñaʼ Jiobá yaʼ. Laabe guniʼbe: «Rudieeʼ xquíxepeʼ Jiobá purtiʼ rapa naa ne rizaalaʼdxiʼ naa. Ora riníʼ iqueʼ guiráʼ dxi modo riguu ndaayabe naa, rudieeʼ cuenta pabiáʼ galán nabaneʼ pur napaʼ ti Bixhozeʼ ni runibiáʼ naa ne rapa naa. Nannaʼ qué ziuu dxi gusaanabe naa». Huayapa Irina stale guendanagana lu xquendanabani. Peru qué rusaana de chuʼ nayecheʼ ne nga racané laa guni huantar ne cuʼ gana xcaadxi.

11. Xi huayacané ti gunaa xpinni Cristu de Asia para guni huantar guendahuará ni napa.

¹¹ Kyung-sook, ti gunaa ni nabeza Asia. Maʼ ziné jma de 20 iza de naca precursora laa ne xheelaʼ. Ti dxi gudxi doctor laabe nápabe cáncer lu pulmón stibe ne zabánibe chonna o xhoopaʼ beeu si. Neca laabe ne xheelabe huayápacabe xcaadxi guendanagana, peru nin tobi de laacabe qué huayaca huará. Laabe guniʼbe: «Guizáʼ triste guyuaaʼ ora gunnaʼ ni. Bineʼ sentir biniteʼ guiráʼ ni napaʼ ne guizáʼ bidxibeʼ». Xi huayacané laabe para guni huantarbe yaʼ. Guiráʼ gueelaʼ ante gátabe riguíbabe ique lídxibe para guni orarbe Jiobá. Óraque rudiibe xquíxepeʼ Dios pur gaayuʼ cosa galán ni bizaacabe dxi que. Ni rúnibe riʼ riguixhedxí ni ladxidoʼbe ne rucaani laabe gusihuínnibe nadxiibe Jiobá. Pur ca oración riʼ bidiibe cuenta racané Jiobá laanu órapeʼ jma cadídinu ra nagana ne laaca bidiibe cuenta nápanu jma cosa galán que cosa feu lu xquendanabáninu.

12. Xi gucané Jason despué de guti xheelaʼ.

¹² Jason runi dxiiñaʼ ndaaniʼ Betel stiʼ ca testigu stiʼ Jiobá ni nuu África. Maʼ zinebe jma de 30 iza de cayúnibe jma lu xhiiñaʼ Dios. Peru raca gadxe iza guti xheelabe de cáncer. Nabé triste riuube ora guiníʼ íquebe pabiáʼ bininá guendahuará que xheelabe. Xi gucané laabe ca dxi nagana que yaʼ. Ti dxi bietenaláʼdxibe ti cosa galán ni bizaacanebe xheelabe ne bidiibe xquíxepeʼ Jiobá pur laani. Gutadxí ladxidoʼbe ne dede dxi que bizulú bidiibe xquíxepeʼ Jiobá pur ca dxi nayecheʼ bibaninebe xheelabe. Bidiibe cuenta ora rudiibe xquíxepeʼ Jiobá jma nayecheʼ riuube. Nanaruʼ riuube purtiʼ guti xheelabe, peru maʼ nexhedxí ladxidoʼbe. Xi gucané laabe yaʼ. Ni gucané laabe nga gudiibe xquíxepeʼ Jiobá purtiʼ bibaninebe xheelabe nayecheʼ, nabé gunnaxhii xheelabe Jiobá ne bíʼnicabe xhiiñabe.

13. Xi racané Sheryl para cadi chuʼ triste.

¹³ Sheryl napa 13 iza dxi bininá supertifón Haiyan ca isla ni nuu Filipinas  ra ziluxe iza 2013. Binítibe lídxibe lu tormenta que. Ne laaca guti bixhózebe, jñaabe ne chonna de ca bizáʼnabe. Xi racané Sheryl para cadi chuʼ triste yaʼ. Laabe riníʼ íquebe guiráʼ cosa galán ni nápabe ne nga racané laabe gudiibe xquíxepeʼ Dios. Laabe biiyabe modo gucané ca xpinni Cristu laabe ne guluucaʼ gana guiráʼ tu caquiiñeʼ ni. Ne laaca nánnabe cayuni orar ca xpinni Cristu ni nuu lu guidubi Guidxilayú pur laabe. Sheryl guníʼ: «Rudieeʼ xquíxepeʼ Jiobá purtiʼ racané naa. Laabe qué rusaana de gudiibe guiráʼ ni caquiiñenu». Zacá ni, ora rudiʼnu xquíxepeʼ pur ca cosa galán ni nápanu qué riuʼnu triste. Ne laaca racané ni laanu guni huantarnu intiica guendanagana ni gápanu (Efesios 5:20; biindaʼ Filipenses 4:6, 7).

14. Xi cosa sicarú maʼ guníʼ Dios chigudii laanu. (Biiyaʼ dibuju ni zeeda ra ruzulú tema riʼ.)

¹⁴ Dede dxiqué hasta yanna, ca xpinni Jiobá qué rusaana de gudiicaʼ xquíxepeʼ Dios pur racanebe laacaʼ. Casi dxi bilabe ca israelita de lu naʼ rey stiʼ Egipto lu nisadóʼ Xiñáʼ que, bidiicaʼ xquíxepeʼ Dios ra biindacaʼ para laabe (Éxodo 15:1-21). Ca dxi stinu riʼ, nuu ti cosa sicarú ni cabeza laanu. Dios cayabi laanu maʼ cadi candaa zaree guiráʼ cosa ni cayuniná laanu (Salmo 37:9-11; Isaías 25:8; 33:24). Guiníʼ íquenu ximodo zuni sentirnu ora gunitilú Dios guiráʼ ca xhenemigu ne guibáninu ndaaniʼ ti guidxilayú ra gaca ni jneza ne chuʼdxí binni. Cadi dxandíʼ racaláʼdxinu gudiʼnu xquíxepeʼ Jiobá la? (Apocalipsis 20:1-3; 21:3, 4.)

15. Xi racaláʼdxinu gúninu lu iza 2015.

¹⁵ Nanna dxíchinu zuni Jiobá stale cosa galán pur laanu lu iza 2015. Zándaca laaca zápanu guendanagana. Peru nánnanu qué ziuu dxi gusaana Jiobá laanu (Deuteronomio 31:8; Salmo 9:9, 10). Zudiirube ni zanda gacané laanu para cadi gusaana de guzúʼbanu stiidxabe. Nga runi, gúninu cásica biʼniʼ profeta Habacuc. Laa guníʼ neca qué ñapa ni ñó ne ñapa stale guendanagana la? ziuu nayecheʼ purtiʼ nanna zacané Jiobá laa (Habacuc 3:17, 18). Lu iza 2015 guiníʼ íquenu ca cosa galán ni rudii Dios laanu ne chinándanu conseju ni zeeda lu textu stiʼ iza riʼ. Textu riʼ na: «Lagudii xquíxepeʼ Jiobá, purtiʼ nacháʼhuibe» (Salmo 106:1).