TI PEREGRINU (superintendente de circuito) de Japón ni nabeza Estados Unidos bibiguetaʼ xquidxi casi misioneru 6 stiʼ septiembre iza 1926. Raqué cabeza tobi lucha hombre ni napa ti suscripción de revista La Torre del Vigía, ne hombre riʼ bitagulisaa ti grupu de binni para gúʼndacaʼ Biblia ndaaniʼ guidxi Kobe. Ca Binni Ruundaʼ Biblia gúpacaʼ primé guendaridagulisaa roʼ sticaʼ 2 stiʼ enero iza 1927 ndaaniʼ guidxi que. Guyé 36 binni guendaridagulisaa riʼ ne guyuunisa 8 de laacaʼ. Galán modo bizulú grupuhuiiniʼ riʼ, peru ndaaniʼ guidxi que nuu 60 millón de binni. Yanna, ximodo zanda gusiidicabe guiráʼ binni riʼ cani dxandíʼ zeeda lu Biblia yaʼ.

Lu beeu mayo iza 1927, ca Binni Ruundaʼ Biblia gudixhe chaahuicaʼ modo gaca ti campaña para guni invitarcaʼ binni chigucaadiaga caadxi libana ni zeeda lu Biblia. Primé libana que zadiʼdiʼ ni ndaaniʼ guidxi Osaka, ne ca xpinni Cristu guniʼcaʼ de laani ndaaniʼ guidubi guidxi que ne biquiiñecaʼ letreru ne pancarta. Laaca biseendacabe 3,000 invitación ra nuu ca binni risaca de guidxi que ne gudiizicabe 150,000 invitación. Peru laaca guníʼcabe de ca libana riʼ lu ca periódicu ni jma ruundaʼ binni, ¡ne dede lu 400,000 boletu stiʼ tren! Ne dxi chitiidiʼ libana que bisaba chupa avioneta 100,000 invitación ndaaniʼ guidxi que. Xi guleendúcabe yaʼ. Bidxá tipa Sala Asahi. Biaʼ 2,300 binni yegucaadiaga libana ni láʼ «El Reino de Dios se ha acercado». Ne sti 1,000 binni biaana fuera... purtiʼ nahuiiniʼ lugar que para guirácabe. Ora biluxe libana que, biaana 600 de cani yegucaadiaga que para guicábicabe ni guinabadiidxacaʼ. Lu xhupa xhonna beeu que, guyuu xcaadxi libana ndaaniʼ guidxi Kioto ne ndaaniʼ xcaadxi guidxi ni nuu neza riaaziʼ Gubidxa stiʼ Japón.

Lu beeu octubre iza 1927, ca xpinni Cristu gudíxhecaʼ chuʼ chonna libana ndaaniʼ guidxi Tokio. Biseendacabe invitación ra nuu ca binni risaca de raqué sti biaje, casi primé ministru, cani nuu lu Parlamentu, ne ca xaíque yuʼduʼ ne ca soldadu. Laaca bicaacabe cartel, anunciu lu periódicu ne gudiizicabe 710,000 invitación. Biaʼsi guyé 4,800 binni.

Nabé risaca dxiiñaʼ biʼniʼ ca colportor (precursor) ora bicheechecaʼ diidxaʼ de yoo pur yoo. Matsue Ishii, tobi de ca primé colportora de Japón ne xheelaʼ, Jizo, bicheechecaʼ stiidxaʼ Reinu casi guidubi guidxi que: dede Sapporo, neza guiaʼ, hasta Sendai, Tokio, Yokohama, Nagoya, Osaka, Kioto, Okayama ne Tokushima. Matsue ne sti hermana ni jma huaniisi, Sakiko Tanaka, nabé yegánnacaʼ ca xaíque guidxi, ne para chécabe ra nuucaʼ rácucabe kimono stícabe. Ti biaje, ti xaíque guidxi gunabaʼ 300 libru ni láʼ El Arpa de Dios  ne Liberación para cuʼbe cani ndaaniʼ ca biblioteca ni nuu ndaaniʼ ca lidxi guiibaʼ que.

Despué de biindabe ca libru ni bidii hermana Matsue laabe, Katsuo ne Hagino Miura bidiicaʼ cuenta maʼ bidxélacaʼ ni dxandíʼ. Guyuunísacaʼ lu iza 1931 ne gúcacabe colportor. Haruichi ne Tane Yamada, ne xcaadxi de ca binnilidxi, laaca gúcacaʼ xpinni Cristu ante de iza 1930. Laaca gúcacaʼ colportor, ne xiiñidxaapacabe, Yukiko, yeguni dxiiñaʼ Betel ni nuu Tokio.

Cumu nabé caru ca carru que ne nabé feu ca carretera que la? ngue runi, Kazumi Minoura ne xcaadxi colportor nahuiiniʼ biquiiñecaʼ caadxi yoohuiiniʼ ni napa llanta peru qué gapa motor. Gulee lácabe cani Jehú, pur Jehú ni rieeteʼ lu Biblia ne pur modo bisá carru stiʼ (2 Rey. 10:15, 16). Ndaaniʼ Betel stiʼ Japón bizácabe chonna Jehú naroʼbaʼ, ziuulaʼ cani 2,2 metru, ne nalaga ni 1,9 metru ne nasoo ni 1,9 metru, ne zanda chineni xhoopaʼ colportor. Ne laaca bizáʼcabe 11 Jehú nahuiiniʼ, ne bicicleta rixubiyú laacaʼ, ne randa riné ni chupa binni. Kiichi Iwasaki, ni bizáʼ cani guníʼ: «Cada Jehú napa ti carpa ique ne napa ti bateriá stiʼ carru para ganda gápani biaaniʼ». Ca colportor que yenecaʼ stiidxaʼ Dios ndaaniʼ guidubi guidxi Japón, yenécabe ca Jehú que lade ca dani ne ca valle que, rireecabe Hokkaido, ni riaana neza guiá, hasta chindácabe Kyushu, ni riaana ladu gueteʼ.

Ikumatsu Ota guníʼ: «Ora rindadu ndaaniʼ ti guidxi rusaanadu Jehú que ruaa xiixa guiiguʼ o ti lugar ra napampa. Primé, rigánnadu ca binni risaca de guidxi que, casi alcalde, ne de raqué rusaanadu ca libru ne revista zinedu que de yoo pur yoo. Ora maʼ biluxe gunínedu guiráʼ binni de guidxi que, riuudu sti guidxi».

Dxi gupa 36 Binni Ruundaʼ Biblia de Kobe primé guendaridagulisaa roʼ sticaʼ, dxi que nga deruʼ cuzulú grupuhuiiniʼ riʼ (Zac. 4:10). Peru gaayuʼ iza despué, lu iza 1932, bihuinni maʼ nuu 103 colportor ne ni rucheeche diidxaʼ Japón. ¡Bisaananécabe binni jma de 14,000 libru! Yanna maʼ nuu biaʼ 220,000 ni rucheeche diidxaʼ cuzaaniʼ biaaniʼ sticaʼ ndaaniʼ Guidxi ra Rindani Gubidxa. (Cani naguu chaahuiʼ xquidxi Dios Japón.)