1, 2. Xiñee maʼ gadxé ca cámara ni nuu ndaaniʼ ca tienda ca né guielú Jiobá.

NDAANIʼ stale guidxi nuu cámara ndaaniʼ ca tienda ca, ti gúʼyacabe cadi cuanaʼ ca binni ni cazíʼ. Ora tuuxa binni cuanaʼ xiixa, ruuyacabe laa lu ca cámara riʼ ne rinaazecabe laa. Né ca cámara riʼ nagana de cuanaʼ binni xiixa.

² Yanna, ñee zanda guininu zeeda gaca ca cámara riʼ casi guielú Jiobá, Bixhózenu ni nadxii laanu la? Biblia na guielú Jiobá cayuuyaʼ «guiráʼ ladu» (Prov. 15:3). Ñee riníʼ nga cada ratu cayuuyabe guiráʼ ni rúninu la? Ñee ruuyabe laanu para si gúʼyabe pa cayúninu ni na ca Ley stibe ne guni castigarbe laanu pur ti cosahuiiniʼ ni qué gúninu jneza la? (Jer. 16:17; Heb. 4:13.) ¡Coʼ njaʼ! Ruuyaʼ Jiobá cani rúninu purtiʼ nadxii laanu ne racalaʼdxiʼ guibáninu galán (1 Ped. 3:12).

3. Bizeeteʼ gaayuʼ modo rusihuinni Jiobá nadxii laanu.

³ Ximodo nánnanu ruuyaʼ Jiobá ni rúninu purtiʼ nadxii laanu yaʼ. Guidúʼyanu gaayuʼ modo rúnibe ni: 1) riguixhenabe laanu ante gúninu xiixa cosa malu, 2) riguu jnézabe laanu ora rucheʼnu, 3) rudiibe laanu ca principiu stiʼ Biblia para gacané laanu, 4) racanebe laanu ora ridxaagalunu  guendanagana ne 5) riguube ndaayaʼ laanu ora rúninu ni jneza.

4. Xi para gudixhená Jiobá Caín ante guchee.

⁴ Primé, guidúʼyanu ximodo riguixhená Dios laanu ante gúninu xiixa cosa malu (1 Crón. 28:9). Para ganda guiénenu ximodo nga ruuyaʼ Jiobá cani rúninu la? Guidúʼyanu xi bizaaca Caín. Stiidxaʼ Dios na «guizáʼ bidxiichi[be]» ora bíʼyabe qué ñuulaʼdxiʼ Jiobá xpiaʼbe (biindaʼ Génesis 4:3-7). Xi biʼniʼ Jiobá yaʼ. Gudxi laabe «gúni[be] ni jneza». Ne biindaca lube, zucheebe pa qué gúnibe ni. Casi ñaca nucaachilú guendaruchee que ra puertaʼ, cabeza si guinaazeʼ laabe. Óraque gunabadiidxaʼ Jiobá laabe: «Ñee zanda gucueezaluʼ ni la?». Ni gucalaʼdxiʼ Jiobá nga nucaadiaga Caín ni cayábibe laa ne ñuuláʼdxibe ni cayuni. Ne zacá, qué nusaana de ñuube gaxha de Dios ni bizáʼ laabe.

5. Ximodo riguixhená Jiobá laanu.

⁵ Ca dxi stinu riʼ, guielú Jiobá ruuyaʼ ni nuu ndaaniʼ ladxidoʼno; qué zanda diʼ gucáʼchinu gastiʼ. Nánnabe xi riníʼ íquenu ne xi riuuláʼdxinu. Nadxiibe laanu ne racaláʼdxibe gúninu ni jneza, peru qué rucaabe laanu gúninu ni nabe. Nga runi, pa gúʼyabe maʼ zixélenu de xquídxibe, riquiiñebe Stiidxabe para quixhenabe laanu. Ximodo riguixhenabe laanu yaʼ. Rúnibe ni ora ridúʼndanu Biblia guiráʼ dxi, ca libru ne ca revista ni ribee xquídxibe ne ora riuunu ca guendaridagulisaa. Ñee huayuu ora huayunadiágaluʼ o huayuundaluʼ xiixa órapeʼ caquiiñeluʼ ni la? Ñee gucaneni lii para gunda bidxiiluluʼ xiixa guendanagana ni Jiobá si nanna la?

6, 7. 1) Ximodo nánnanu rapa Jiobá cada tobi de ca xpinni. 2) Xi naquiiñeʼ gúninu para cueendunu ni galán ora riguixhená Jiobá laanu.

⁶ Guiráʼ ni rabi Jiobá laanu para quixhená laanu, rusihuínnicani ruuyabe ni rúninu purtiʼ nadxiibe laanu ne rizaaláʼdxibe cada tobi de ca xpínnibe. Dxandíʼ racané Biblia millón binni, zaqueca ca guendaridagulisaa rápanu ne ca libru ne revista ni rudii xquídxibe, peru cada tobi de laanu nga rinabaʼ Jiobá gucaadiáganu ca conseju ni zeeda lu Stiidxabe para ganda gúninu ni jneza. Nga rusihuinni rizaaláʼdxibe cada tobi de laanu.

⁷ Para ganda cueendunu ni galán ora riguixhená Jiobá laanu, primé naquiiñeʼ gánnanu dxandipeʼ rizaaláʼdxibe laanu. Despué naquiiñeʼ gúninu guiráʼ ni rinábabe laanu lu Stiidxabe ne gúninu stipa para cadi guiníʼ íquenu xiixa ni gucaa laanu guchéʼnenu laabe. Stiidxaʼ Dios na: «Laguyubi Jiobá, laga zándaruʼ guidxélatu laa. Lagucaa ridxi laabe, laga nuurube gaxha de laatu. Gusaana binni malu neza stiʼ, ne gusaana binni qué iquiiñeʼ cani riníʼ ique; ne guibiguetaʼ ra nuu Jiobá, laa zalaselaʼdxiʼ laabe, ne guibiguetaʼ ra nuu Dios stinu, purtiʼ laa zutiidilaʼdxiʼ guiráʼ donda» (Isaías 55:6, 7). Nga runi, pa guzúʼbanu stiidxabe la? qué zápanu stale guendanagana. Peru pa maʼ bicheʼnu yaʼ. Ximodo zanda gacané Jiobá laanu.

8, 9. Ximodo rusihuinni Jiobá rizaalaʼdxiʼ laanu ora rudii ti xpinni Cristu conseju laanu. Bizeeteʼ ti ejemplu.

⁸ Rudiʼnu cuenta pabiáʼ rizaalaʼdxiʼ Jiobá laanu ora riguu jneza laanu (biindaʼ Hebreos 12:5, 6). Nanna dxíchinu guirutiʼ riuulaʼdxiʼ uguu jnézacabe laa (Heb. 12:11). Peru ora uguu jneza tuuxa laanu o gudii laanu ti conseju ni zeeda lu Biblia la? naquiiñeʼ gánnanu xiñee cayúnibe ni. Cadi cayúnibe ni para guninabe laanu, sínuque ribeebe  tiempu para guluiʼbe laanu ca conseju stiʼ Biblia ni zacané laanu cadi guixélenu de Jiobá. Cumu de Jiobá nga zeeda guiráʼ conseju riʼ la? rusihuínnicani nadxiibe laanu.

⁹ Guzéʼtenu ti ejemplu ra rihuinni rizaalaʼdxiʼ Jiobá laanu ora rudii sti binni conseju laanu. Ti xpinni Cristu nabé biiyaʼ pornografía ante guiziidiʼ de Dios. Neca bisaana de ñuuyabe ni la? riuu biaje ruquiinderuʼ laabe gúʼyabe ni, ne biaanaruʼ ni ndaaniʼ ladxidoʼbe casi riaana guí despué de guicaguí xiixa. Peru ti dxi guziʼbe ti celular cubi ne casi ñaca bibani lu guí que sti biaje (Sant. 1:14, 15). Né teléfono que randa riuube página de Internet ra ruuyacabe pornografía. Ti dxi laga cucheechecabe diidxaʼ pur teléfono, bitiiñebe celular riʼ ti binnigola ni ridagulisaanebe para guyubi caadxi dirección. Málasi bihuinni caadxi página de pornografía. Galán bizaaca ngue, purtiʼ oraqueca guluu jneza binnigola que laabe ne zacá bisaanabe de gúʼyabe pornografía. ¡Guizáʼ rudiʼnu xquíxepeʼ Jiobá purtiʼ rizaalaʼdxiʼ laanu, ruuyaʼ cani rúninu nagaʼchiʼ ne riguu jneza laanu ante guchéʼnenu laa!

10, 11. 1) Ximodo rusihuínninu zinándanu ni gabi Jiobá laanu. 2) Ximodo biiyaʼ ti familia galán nga chinanda binni ca principiu zeeda lu Biblia.

¹⁰ Sicaríʼ biʼndaʼ ti salmista para Jiobá: «Né conseju stiluʼ zuluiʼluʼ naa xi guneʼ» (Sal. 73:24). Ora caquiiñenu tuuxa gabi laanu xi gúninu, zanda gánnanu xi riníʼ ique Jiobá ora guidúʼndanu Stiidxabe. Ora rúninu ni na ca principiu stiʼ Biblia, riuʼnu jma gaxha de Dios ne laaca racaneni laanu gudiʼnu ni caquiiñeʼ binnilídxinu (Prov. 3:6).

¹¹ Guzéʼtenu ti ejemplu. Ti xpinni Cristu ni runi dxiiñaʼ layú, nabezané binnilidxi ndaaniʼ ti guidxihuiiniʼ stiʼ Masbate (Filipinas) ni riaana lade dani. Laabe ne xheelabe nácacabe precursor regular. Málasi gudxi hombre ni ruquixe laacabe layú stiʼ maʼ cadi gúnicabe dxiiñaʼ lu ca layú que. Xiñee yaʼ. Purtiʼ guyuu tu guníʼ ribáʼnacabe stiʼ dueñu que. Neca qué ganna xpinni Cristu riʼ paraa chindezané binnilidxi la? guníʼ: «Jiobá zudii ni caquiiñedu. Intiica guizaacadu laabe rápabe laadu». Ne zacá gúcani. Chupa chonna  gubidxa despué, gudxi dueñu stiʼ ca layú que laacabe zanda guiaanacabe. Xi bicaa dueñu que guchaa modo riníʼ ique yaʼ. Biiyaʼ qué nucaalúcabe ora guyuu tu guníʼ mal de laacabe. Nabé bidxagayaabe pur ni guca que dede bidiibe laacaʼ xcaadxi layú para gúnicaʼ dxiiñaʼ (biindaʼ 1 Pedro 2:12). Racá ridúʼyanu, racané ca principiu stiʼ Biblia laanu para gudxiilunu guendanagana.

12, 13. Pora nga zándaca guiníʼ íquenu pa cayuuyaʼ Jiobá ni cazaacanu.

¹² Nuu biaje xadxí rapa binni xiixa guendanagana. Zándaca maʼ xadxí huaranu, rucaalú binnilídxinu laanu o dede rizanándacabe laanu. Ne zándaca nuu tuuxa ra ridagulisaanu ni qué riaba laanu.

¹³ Bixuiʼlú ñabi ti xpinni Cristu lii xiixa ni ñuniná lii. Zándaca guiníʼ íqueluʼ: «Xiñee raca ndiʼ ndaaniʼ xquidxi Dios pue». Ne ni jma ruchiichi nga cacaa xpinni Cristu riʼ jma dxiiñaʼ lade ca binni ridagulisaa, ne ruuyaluʼ nabé riníʼcabe galán de laabe. Ne zándaca riníʼ íqueluʼ: «Ximodo pue, ñee qué ruuyaʼ Jiobá ni cayaca riʼ la? Ñee qué zúnibe xiixa la?» (Sal. 13:1, 2; Hab. 1:2, 3).

14. Xi razón napa Jiobá para gudii lugar guizaaca xiixa.

¹⁴ Cadi modo ridúʼyanu ca cosa ca nga ruuyaʼ Jiobá cani. Laabe nápabe razón para gudiibe lugar guizaaca cani. Guzéʼtenu ti ejemplu, ora gudii tuuxa laanu ti conseju la? zándaca guidxiichinu ne guininu cadi para laanu conseju ca. Peru Jiobá rulidxi laanu purtiʼ nanna xipeʼ nga caquiiñenu. Karl Klein, ti xpinni Cristu ni guyuu lade Grupu ni Zaniruʼ guníʼ xi bizaaca. Ti biaje nabé naduxhuʼ guniʼné Rutherford laabe ora guluu jneza laabe. Despué, né diidxaʼ nadóʼ gudxi Rutherford laabe: «¡Xi tal xa, Karl!», qué ninágabe nicábibe laa. Ora biʼyaʼ Rutherford cadxiichi Karl la? gúdxibe laa chuʼ cuidadu laa pacaa zusaba Binidxabaʼ laa lu trampa stiʼ. Despué guníʼ Karl Klein: «Ora daʼnu xiana purtiʼ guluu jneza ti xpinni Cristu laanu la? zándaca guiábanu lu ca trampa stiʼ Binidxabaʼ». *

15. Xiñee naquiiñeʼ gápanu paciencia ora guidxaagalunu guendanagana.

¹⁵ Zándaca guireʼnu gana ora cadi cayaca chaahuiʼ xiixa guendanagana. Xi zanda gacané laanu guni huantarnu yaʼ. Bixuiʼlú zigusaluʼ xcárruluʼ lu ti autopista ne qué ganda tiidiluʼ purtiʼ yendaluʼ ti lugar ra zuhuaadxí stale carru. Qué gánnaluʼ pora maʼ zanda tiidiluʼ. Pa guireeluʼ gana ne guyúbiluʼ sti neza la? zándaca guinítiluʼ ne zándaca jma zandaaluʼ para chindaluʼ ra zeluʼ. Nga runi, jma galán gápaluʼ paciencia ne cadi guyúbiluʼ sti neza cheluʼ. Zacaca nga rizaacanu ora ridxaagalunu xiixa guendanagana, pa qué guireʼnu gana ne chinándanu ca principiu stiʼ Biblia la? zacané Jiobá laanu guni huantarnu guendanagana ca.

16. Xi sti razón zándaca napa Jiobá pur rudii lugar guidxaagalunu guendanagana.

¹⁶ Zándaca gudii Jiobá lugar gápanu xiixa guendanagana para gusiidibe laanu (biindaʼ 1 Pedro 5:6-10). Peru naquiiñeʼ gánnanu cadi laadibe nga nápabe donda pur guiráʼ ca guendanagana ni nápanu (Sant. 1:13). «Binidxabaʼ, enemigu» stinu nga napa donda pur cazaaca stale de ca guendanagana ni nápanu yanna. Peru zanda iquiiñeʼ  Dios cani para gacané laanu iguidxi fe stinu. Ne cumu nadxiibe laanu la? ti tiempu si zudiibe lugar gacananu. Ñee rudiiluʼ xquíxepeʼ Jiobá pur rapa lii ora cadíʼdiluʼ lu guendanagana la? Ñee runi creluʼ zudiibe lii stipa para guni huantarluʼ la? (2 Cor. 4:7-9.)

17. Xi para ruuyaʼ Jiobá ni nuu ndaaniʼ ladxidóʼ binni.

¹⁷ Ne últimu, ruuyaʼ Jiobá ni runi binni pur sti razón jma risaca: racaláʼdxibe cuʼbe ndaayaʼ cani nadxii laabe de guidubi ladxidóʼ. Profeta Hananí gudxi rey Asá: «[Guielú Jiobá] cayuuyaʼ guiráʼ ni cayaca lu guidxilayú para guluiʼbe stipa stibe luguiáʼ cani runi cré laabe de guidubi ladxidóʼ» (2 Crón. 16:9). Peru Asá qué ñannaxhii Jiobá de guidubi ladxidóʼ. Yanna laanu pa gúninu stipa pur gúninu ni jneza la? zuluíʼ Jiobá laanu «stipa» stiʼ, o zápabe laanu ne zaguube ndaayaʼ laanu.

18. Xi cadi naquiiñeʼ guiaandaʼ laanu neca ruluíʼ guirutiʼ ruuyaʼ ca cosa galán ni rúninu. (Biiyaʼ dibuju ni zeeda ra ruzulú tema riʼ.)

¹⁸ Para ganda cuʼ Jiobá ndaayaʼ laanu la? cayábibe laanu: «Laguyubi ni nachaʼhuiʼ, [...] lagannaxhii ni nachaʼhuiʼ» ne laaca cayábibe laanu: «[Laguni] ni jneza» (Amós 5:14, 15; 1 Ped. 3:11, 12). Ruuyaʼ Jiobá ni runi ca binni nachaʼhuiʼ ne riguube ndaayaʼ laacaʼ (Sal. 34:15). Guzéʼtenu ni biʼniʼ Jiobá pur Sifrá ne Puá, chupa partera, dxi nuu ca israelita de esclavu Egipto. Faraón de guidxi que biʼniʼ mandar gatiʼ guiráʼ hombrehuiiniʼ xiiñiʼ ca israelita ora gálecaʼ, peru ca gunaa riʼ jma bidxíbicaʼ Jiobá que faraón, bizuubacaʼ stiidxaʼ Dios ne qué ñuuticaʼ ca baʼduhuiiniʼ que. Ngue runi guluu Jiobá ndaayaʼ laacabe ne despué gúpacabe xiiñicabe (Éx. 1:15-17, 20, 21). Neca riuu biaje riníʼ íquenu guirutiʼ ruuyaʼ ca cosa galán ni rúninu la? cadi guiaandaʼ laanu ruuyaʼ Jiobá cani ne zaguu ndaayaʼ laanu (Mat. 6:4, 6; 1 Tim. 5:25; Heb. 6:10).

19. Ximodo bidii ti xpinni Cristu de Hungría cuenta ruuyaʼ Jiobá ca cosa galán ni rúninu.

¹⁹ Ti gunaa xpinni Cristu ni nabeza Austria bidii cuenta ruuyaʼ Jiobá guiráʼ cosa galán ni rúninu. Cumu de Hungría laabe la? bidiicabe laabe dirección stiʼ ti binni ni riníʼ stiidxabe para chebe ra nuu ne guiníʼnebe laa de Dios. Nagueendaca yeyúbibe laa, peru qué nidxélabe guirutiʼ. Bibiguétabe sti biaje ne bisaanabe chupa chonna revista ra yoo que, carta, ne númeru de teléfono stibe... Nuu tiru runi sentirbe nuu tuuxa ndaaniʼ yoo que, peru guirutiʼ ricabi laabe. Ti iza arondaʼ despué, málasi bixeleʼ puertaʼ que. Guizáʼ nachaʼhuiʼ ti gunaa biree ndaaniʼ yoo que ne gudxi laabe chuʼbe ne rabi laabe: «Maʼ biindaʼ guiráʼ guiʼchiʼ ni bisaananeluʼ naa, ne cabeza lii». Cumu cacaa gunaa que quimioterapia la? qué gápabe stipa para guidxagalube binni. Peru dxi que gunábabe guʼndanécabe laabe Biblia. Racá ridúʼyanu, biiyaʼ Jiobá ca cosa galán biʼniʼ xpinni Cristu riʼ ne guluu ndaayaʼ laabe.

20. Ximodo runi sentirnu ora gánnanu ruuyaʼ Jiobá cani rúninu.

²⁰ Ruuyaʼ Jiobá guiráʼ ni rúninu. Peru qué chuʼ dxi guiníʼ íquenu rúnibe ni para si gúʼyabe paraa cucheʼnu ne gápabe ni ndaaniʼ íquebe, casi runi grabar ca cámara ni nuu ndaaniʼ ca tienda ca, sínuque rúnibe ni purtiʼ rizaaláʼdxibe cada tobi de laanu ne racaláʼdxibe cuʼbe ndaayaʼ laanu pur ca cosa galán ni rúninu. Cadi dxandíʼ riuʼnu jma gaxha de Dios, Bixhózenu ni nadxii laanu, ora gánnanu cani rúnibe la?