Jiobá, Dios ni rudii ni caquiiñenu ne ni rapa laanu
«Purtiʼ gunnaxhiibe naa, naa laaca zulaʼyaʼ laabe. Zapaʼ laabe purtiʼ maʼ nánnabe tu laʼyaʼ.» (SAL. 91:14)
1, 2. Xiñee maʼ gadxé modo nabani binni neca ti familia si laa, ne xiñee gadxé gadxé modo binibiáʼ binni Dios.
JIOBÁ nga bizáʼ ca familia ca (Efes. 3:14, 15). Neca nuunu ndaaniʼ ti familia si, peru gadxé gadxé nga modo laanu ne gadxé modo nabáninu. Nuu tu gulezané jñaa ne bixhoze ne biniisi ra nuucabe. Nuu xcaadxi maʼ guti bixhoze ne jñaa pur xiixa guendahuará o pur xiixa desgracia. Ne nuu xcaadxi qué lica ganna tuu nga jñaa o bixhoze.
2 Zacaca nga rizaaca né ca xpinni Jiobá. Neca nácanu de familia stibe, peru gadxé gadxé modo binibiaʼnu laabe. Zándaca xpinni Cristu jñaaluʼ ne bixhózeluʼ ne dede nahuiiniluʼ bisiidicabe lii de Jiobá (Deut. 6:6, 7). O zándaca binibiaʼluʼ Jiobá purtiʼ guyuu tu guniʼné lii de Dios (Rom. 10:13-15; 1 Tim. 2:3, 4).
3. Xii nga ni runiná guiráʼ xixenu.
3 Neca gadxé gadxé modo laanu, modo nabáninu ne modo binibiaʼnu Dios, peru nuu ti cosa ni runiná guiráʼ xixenu. Xi laani yaʼ. Cumu qué nuzuubaʼ Adán stiidxaʼ Dios la? gulenenu donda, rucheʼnu ne rátinu (Rom. 5:12). Neca zacá, cumu rúninu ni na Jiobá la? zanda guinínenu laabe cásica riniʼné binni bixhoze. Dxiqué, ca israelita gunda gúdxicaʼ laabe ca diidxaʼ ni zeeda lu Isaías 64:8, ra na: «Jiobá, lii nga Bixhózedu». Ne Jesús bizulú oración stiʼ né ca diidxaʼ riʼ: «Bixhózedu ni nuu guibáʼ guisácapeʼ laluʼ» (Mat. 6:9, TNM).
4, 5. Xi zanda gacané laanu para jma gannaxhiinu Jiobá.
4 Jiobá, Bixhózenu ni nuu guibáʼ rapa laanu ora rinábanu laa gacané laanu. Laabe cayábibe laanu ca diidxaʼ riʼ: «Purtiʼ gunnaxhiibe naa [ti xpínnibe ni ruzuubaʼ stiidxabe], naa laaca zulaʼyaʼ laabe. Zapaʼ laabe purtiʼ maʼ nánnabe tu laʼyaʼ» (Sal. 91:14). Nadxii Jiobá ca xpinni ne rulá laacabe de lu náʼ ca xhenemígucabe ne rapa laacabe ti cadi chuʼ tu gunitilú laacabe.
5 Para jma gannaxhiinu Jiobá, guidúʼndanu chonna cosa ni zacané laanu: 1) rudiibe ni caquiiñenu, 2) rápabe laanu ne 3) laabe nga ni jma Xhamígunu. Ora guidúʼndanu cada tobi de laacani, galán guiníʼ íquenu pabiáʼ xhamígunu Jiobá, Bixhózenu ni nuu guibáʼ ne xi zanda gúninu para gusisácanu laabe. Ne laaca galán guiníʼ íquenu xi guiráʼ ndaayaʼ rudiibe cani ridxiña laabe (Sant. 4:8).
JIOBÁ, DIOS NI RUDII NI CAQUIIÑENU
6. Ximodo rusihuinni Jiobá «irá ni nachaʼhui» zeeda de laa.
6 Discípulo Santiago bicaa: «Irá ni nachaʼhui ne irá ni dxandí sicarú reeda de ibáʼ. Zeeda ni de Dios ni bizáʼ ca biaani sti ibáʼ» (Sant. 1:17). Ti cosa ni jma sicarú ni bisigaʼdeʼ Jiobá laanu nga guendanabani (Sal. 36:9). Stale ndaayaʼ nga ricaanu tiempu riʼ ora riquiiñenu xquendanabáninu para gúninu ni na Dios, ne despué zanda guibáninu sin qué chuʼ dxi gátinu lu guidxilayú cubi stiʼ Dios (Prov. 10:22; 2 Ped. 3:13). Peru, ximodo zanda guibáninu nayecheʼ pa gulenenu donda, rucheʼnu ne rátinu yaʼ.
7. Xi biʼniʼ Jiobá para ganda guca xhamígunu laa.
7 Jiobá nga rudii laanu guiráʼ ni riquiiñenu ne gadxé gadxé modo rúnibe ni. Rusihuínnibe nacháʼhuibe ora rulabe laanu. Guiranu nga nácanu binni ruchee purtiʼ gulenenu donda stiʼ Adán (Rom. 3:23). Neca zacá, biyubi Dios ximodo zanda gaca xhamígunu laa purtiʼ nadxii laanu. Apóstol Juan bicaa xi biʼniʼ Dios: «Biluíʼ laanu pabiáʼ nadxii laanu ra biseenda tobi lucha Xiiñi ndaani guidxilayú, beda udii laanu enda nabani ni qué zaluxe. Ne sicarí rihuinni xi pe nga enda ranaxhii: cadi laanu gunaxhii nu laabe, sínuque laabe gunaxhii be laanu ne biseenda be Xiiñi be beda tixe irá ni huachéʼ né nu laabe» (1 Juan 4:9, 10).
8, 9. Ximodo bisihuinni Jiobá laa nga rudii ni caquiiñeʼ binni ca dxi bibani Abrahán ne Isaac. (Biiyaʼ dibuju ni zeeda ra ruzulú tema riʼ.)
8 Lu siglu XIX ante de ca dxi stiʼ Jesús, bizaaca xiixa lu xquendanabani Abrahán ni bisihuinni xi chiguni Jiobá pur binni ti ganda guibánicaʼ sin gáticaʼ. Hebreos 11:17-19 na: «Chiqué bitiidi Dios Abraham ti prueba para guʼya pa dxandí runi cre be laa, ne bihuinni dxandí runi cre be. Purti uná be udixhe be tobi lucha xiiñi be para nusigaʼde be laa Dios, neca ma gudxi Dios laabe, na rabi laabe: “De Isaac nga uzulú idale xiiñi luʼ.” Biʼni be zaqué purti ma runibiáʼ be Dios ne ma nanna be dede gueʼtu zanda usibani. Zacá zanda gabi nu casi ñaca guti Isaac ne bigueta bibani para ucuaa bixhoze laa sti tiru». Cásica biʼniʼ Abrahán, zacaca nga biʼniʼ Jiobá. Laa bidii Jesucristu, Xiiñiʼ, beeda gati para ganda guilá guiráʼ xixé binni (biindaʼ Juan 3:16, 36).
9 ¡Guizáʼ nayecheʼ guyuu Isaac ora biʼyaʼ maʼ cadi naquiiñeʼ gatiʼ! Nanna dxíchinu bidiibe xquíxepeʼ Dios purtiʼ bidii ti dendxuʼ barracu ni renda xcachu lade ca guiʼxhiʼ que para gatiʼ lugar de ñátibe (Gén. 22:10-13). Ngue runi, biree lá lugar que «Jiobá-yiré», ca diidxaʼ ca riniʼni «Jiobá rudii ni caquiiñeʼ binni» (Gén. 22:14, nota).
NI BIʼNIʼ DIOS PARA CHÚʼNENU LAA TOBI SI
10, 11. Tuu nga cani zaniruʼ lu xhiiñaʼ Jiobá, ne ximodo huayúnicabe ni.
10 Ora riníʼ íquenu guiráʼ ni maʼ bidii Jiobá laanu, nánnanu pa ñaca qué nudii Jesús xquendanabani pur laanu qué ñanda ñuʼnu tobi si né Dios. Laaca bisihuinni apóstol Pablu zacá ni ora bicaa: «Intiica guni du, runi du ni purti nadxii du Cristu. Cristu guti pur irá nu ti biaʼ dxi ibani nu ma cadi ibani nu para laanu sínuque para laabe. Laabe nga guti be ne bibani be para laanu» (2 Cor. 5:14, 15).
11 Ca xpinni Cristu ni bibani lu primé siglu gunnaxhiicaʼ Dios ne guyuucaʼ nayecheʼ purtiʼ gunda bíʼnicaʼ ni nabe. Ngue runi guyuuláʼdxicabe güínécabe binni stiidxaʼ Dios «para ganda chuʼ né ca laabe tobi si». Cumu bicheechecabe diidxaʼ ne gucanécabe binni gaca discípulo stiʼ Cristu la? stale binni ni nayá ladxidóʼ gunda guyuunecaʼ Dios tobi si, guca xhamígucaʼ laabe ne beeda gácacaʼ xiiñibe guibáʼ. Ca dxi stinu riʼ, ngaca nga dxiiñaʼ ni cayuni ca xpinni Cristu ni bibí né espíritu. Cuseendaʼ Jiobá laacabe para guiníʼcabe pur laa ne pur Cristu ne cayacanecaʼ binni chuʼ gaxha de Jiobá ne gácacaʼ xpínnibe (biindaʼ 2 Corintios 5:18-20; Juan 6:44; Hech. 13:48).
12, 13. Ximodo zanda gusihuínninu rudiʼnu xquíxepeʼ Jiobá pur guiráʼ ni rudii laanu.
12 Guiráʼ ca xpinni Cristu ni chiguibani lu Guidxilayú riʼ rusihuínnicaʼ rudiicaʼ xquíxepeʼ Dios ora racanecaʼ ca xpinni Cristu ni bibí né espíritu santu para guireeche stiidxaʼ Reinu. Ora maʼ cucheechenu diidxaʼ riquiiñenu Biblia, ne laani nga sti cosa ni bisigaʼdeʼ Dios laanu (2 Tim. 3:16, 17). Ora riquiiñenu Stiidxaʼ Dios jneza, racanenu binni guiziidiʼ ni na Dios ti guibánicaʼ sin qué chuʼ dxi gáticaʼ. Peru nuuruʼ ni zanda gacané laanu. Jiobá laaca rudii laanu espíritu santu stiʼ ti ganda gúninu xhiiñaʼ (Zac. 4:6; Luc. 11:13). Ne ora ridúʼndanu Anuario de los testigos de Jehová ridúʼyanu xi guiráʼ maʼ huabeendú ca xpinni Dios lu dxiiñaʼ riʼ. ¡Ti ndaayaʼ nga gúninu dxiiñaʼ ni rusisaca Bixhózenu ni rudii cani riquiiñenu!
13 Cumu stale nga ni maʼ bidii Jiobá laanu la? ngue runi galán guiníʼ íquenu: «Ñee cayuneʼ stipa biaʼ gándatiʼ para gucheecheʼ diidxaʼ ne zacá gusihuinneʼ rudieeʼ xquíxepeʼ Jiobá pur guiráʼ ni rudii naa la? Xi naquiiñeʼ guneʼ ti ganda gucheecheʼ stiidxaʼ Reinu jma jneza». Zusihuínninu rudiʼnu xquíxepeʼ Dios pa gúninu xhiiñaʼ Reinu primé lu xquendanabáninu. Ne Jiobá zudii guiráʼ ni caquiiñenu (Mat. 6:25-33). Cumu nadxiibe laanu la? rápabe laanu ne nga rucaa laanu gúninu biaʼ gándatiʼ para gusiéchenu ladxidoʼbe (Prov. 27:11).
14. Pora nga racané Jiobá xquidxi.
14 Sicaríʼ biindaʼ David: «Nuaaʼ triste ne pobre naa. Qué zusiaandaʼ Jiobá naa. Lii racaneluʼ naa ne rulaluʼ naa» (Sal. 40:17). Stale biaje maʼ bilá Jiobá xquidxi, jmaruʼ si ora runiná o rizananda ca xhenemígucaʼ laacaʼ. Ora ridxaagalunu guendanagana racanebe laanu, ne qué rusaana de gudiibe ni caquiiñenu ti cadi guchéʼnenu laabe. ¡Nabé rudiʼnu xquíxepeʼ laabe pur ni rúnibe ca!
RAPA JIOBÁ LAANU
15. Bizeeteʼ ti ejemplu ra rihuinni ximodo rulá binni xiiñiʼ.
15 Ti binni ni nadxii ca xiiñiʼ rudii ni caquiiñecabe, peru laaca rapa laacabe. Ora guʼyaʼ binni nuu xiiñiʼ ra naxoo la? nagueendaca racané laabe. Guzéʼtenu xi bizaaca ti xpinni Cristu dxi nahuiiniʼ. Ti dxi laabe ne bixhózebe bibiguétacabe de yegucheechecabe diidxaʼ. Para chindácabe ra lídxicabe naquiiñeʼ tiidicabe ti guiiguhuiiniʼ. Peru qué ñanda nidíʼdicabe guiiguʼ que purtiʼ nabé biaba nisaguié siadóʼ que ne bidxá ni. Napa xidé tídicabe lu caadxi guié naroʼbaʼ ni nexheʼ ndaaniʼ guiiguʼ que. Laabe zanírube lu bixhózebe, peru bixooñeʼ ñeebe lu tobi de ca guié que ne biábabe ndaaniʼ nisa que ne chupa biaje biaazibe ndaaniʼ ni. Nagueendaca gudapi bixhózebe xíʼquebe para cadi ñátibe guiiguʼ. ¡Nabé bidiibe xquíxepeʼ bixhózebe pur bilá laabe! Zacaca nga rulá Bixhózenu ni nuu guibáʼ laanu de ca cosa dxabaʼ ni nuu lu Guidxilayú ne rulá laanu de lu náʼ Binidxabaʼ. Jiobá si nga zanda gulá laanu (Mat. 6:13; 1 Juan 5:19).
16, 17. Ximodo bilá Jiobá ca israelita dxi gudindenecaʼ ca amalequita.
16 Bisihuinni Jiobá pabiáʼ nadxii ca xpinni ne rápabe laacaʼ pur ni bizaaca ca israelita ora bireecaʼ de esclavu Egipto. Biʼniʼ Jiobá ti milagru para gudíʼdicabe ndaaniʼ nisadóʼ Xiñáʼ lu iza 1513 ante de ca dxi stiʼ Jesús, ante chindácabe ñee dani Sinaí gudíʼdicabe ti lugar láʼ Refidim.
17 Binidxabaʼ nanna zaca ni na ca diidxaʼ riguixhená guníʼ Dios lu Génesis 3:15, nga runi zanda guxuíʼlunu pabiáʼ gucaláʼdxibe nunitilube ca israelita que, purtiʼ biiyabe casi ora guirutiʼ tu zacané laacaʼ. Ne ora bíʼyabe maʼ zanda gucaalube ca israelita, biquiiñebe ca amalequita ni naca xhenemigu xquidxi Dios (Núm. 24:20). Guidúʼyanu ximodo biquiiñeʼ Jiobá tapa hombre para bilá xquidxi: Josué, Moisés, Aarón ne Hur. Gudindené Josué ca amalequita lu ti guerra, laga Moisés, Aarón ne Hur gudxíʼbacaʼ lu ti danihuiiniʼ ni nuu gaxha de raqué. Ora rindisanáʼ Moisés, runi ganar ca israelita que ca xhenemigu. Ngue runi, ora maʼ cadxaga nabe, Aarón ne Hur rindísacaʼ nabe. Cumu gucané Jiobá laacabe la? gunda «biʼniʼ ganar [Josué] Amaleq ne xquidxi» (Éx. 17:8-13). Moisés biʼniʼ ti altar raqué ne gulee labe ni «Jiobá-nisí», lu diidxaʼ hebreu riníʼ ni «Jiobá nga ni rulá naa». Biblia na: «Yanna, Jiobá gudxi Moisés: “Bicaa ndiʼ ndaaniʼ libru para guietenaláʼdxicabe ne gudxi Josué: Ne maʼ guirutiʼ zietenalaʼdxiʼ Amaleq lu guidxilayú”. Ne bizulú Moisés biʼniʼ ti altar ne gulee labe ni Jiobá-nisí» (Éxodo 17:14, 15, nota).
RULÁ JIOBÁ LAANU DE LU NÁʼ BINIDXABAʼ
18, 19. Ximodo huayapa Jiobá laanu ca dxi riʼ.
18 Rulá Jiobá cani nadxii laa ne cani ruzuubaʼ stiidxabe. Casi modo biʼniʼ ca israelita que Refidim, laanu laaca ruyúbinu gacanebe laanu ora rucaalú ca xhenemígunu laanu. Ne zacá huayúnibe ni, stale biaje maʼ bilá Jiobá xquidxi ne hualabe laanu de lu náʼ Binidxabaʼ. Guníʼ ique panda biaje maʼ hualá Jiobá ca xpinni ni qué huacheené laa. Zacá nga bizaaca stale de ca xpinni Cristu ni bibani Alemania ne xcaadxi guidxi tiempu biʼniʼ mandar ca nazi. Ora ridúʼndanu ni bizaaca ca xpinni Jiobá ni rieeteʼ lu Anuario ridúʼyanu ximodo bilabe laacaʼ dxi guyuu tu guzananda laacaʼ, ne ora riníʼ íquenu de laacabe la? jma riguidxi confianza stinu purtiʼ nánnanu zulabe laanu (Sal. 91:2).
Zanda iquiiñeʼ Jiobá ca xpinni Cristu para gacané laanu cadi guchéʼnenu laa ora guidxaagalunu guendanagana (Biiyaʼ párrafo 18 dede 20)
19 Ximodo rapa Jiobá laanu. Riquiiñebe xquídxibe ne ca libru ne revista ni nápanu para gánnanu xi gúninu. Guiráʼ ni rusiidibe riʼ nabé racanécani laanu. Ca dxi riʼ, nabé riuulaʼdxiʼ binni xhudxi, chuʼné tutiica binni ne guʼyaʼ pornografía, peru Jiobá rudii laanu stale conseju para cadi guiábanu lu ca trampa ca. Cásica runi bixhoze binni, rábibe laanu xi gúninu para cadi guidxaaganu binni ni guxheleʼ laanu de laabe lu ca red social ca (1 Cor. 15:33). *
20. Ximodo rapa Jiobá laanu ra ridagulisaanu.
20 Ximodo zanda gusihuínninu cusiidiʼ Jiobá laanu yaʼ. Ra chinándanu ca mandamientu stibe (Is. 54:13). Ra ridagulisaanu nga rizíʼdinu xi gúninu para gapa Jiobá laanu, purtiʼ racá nga racané ca binnigola ca laanu ne rudiicaʼ conseju ni zeeda ndaaniʼ Biblia laanu (Gál. 6:1). Rusihuinni Jiobá nadxii laanu ora «bidii be gracia binni para guni xhiiña be» (Efes. 4:7, 8). Xi naquiiñeʼ gúninu ora gudii ca binnigola ca laanu ti conseju yaʼ. Guzúʼbanu diidxaʼ de guidubi ladxidoʼno, pa gúninu zacá la? zaguu ndaayaʼ Jiobá laanu (Heb. 13:17).
21. 1) Xi maʼ gudixhe íquenu gúninu. 2) Xi zazíʼdinu lu sti tema ca.
21 Gudiʼnu lugar gacané espíritu santu laanu ne ca conseju ni rudii Bixhózenu ni nuu guibáʼ laanu. Guiníʼ íquenu ejemplu stiʼ Jesucristu, Xiiñibe, ne gúninu stipa pur chinándanu ejemplu stibe. Bizuubabe diidxaʼ dede dxi gútibe ne guluu ndaayaʼ Jiobá laabe (Filip. 2:5-11). Laaca zaguu ndaayaʼ Jiobá laanu pa gápanu confianza laa de guidubi ladxidoʼno (Prov. 3:5, 6). Nga runi, qué chuʼ dxi guiaandaʼ laanu naca Jiobá, ti Dios ni rudii ni iquiiñenu ne rapa laanu, ne qué zadxélanu sti binni casi laabe. ¡Nabé nayecheʼ riuʼnu ora gúninu ni nabe ne ti ndaayaʼ ni para laanu! Yanna, xiñee zanda guininu laabe nga ni nabé Xhamígunu yaʼ. Sti tema ca zacabi ni gunabadiidxanu ca ne nga zacané laanu gannaxhiinu laabe jma.
^ párrafo 19 Zadxélaluʼ xcaadxi conseju ni zacané lii lu tema «Ximodo iquiiñenu Internet sin guiábanu lu trampa stini» ni zeeda lu Torre stiʼ ni rapa 15 stiʼ agosto 2011, yaza 3 dede 5, ne zaqueca lu ca tema «¡Lagataná ti cadi guiábatu lu ca trampa stiʼ Binidxabaʼ!» ne «Guzuhuaʼnu dxiichiʼ ti cadi guiábanu lu ca trampa stiʼ Binidxabaʼ», ni zeeda lu Torre stiʼ ni rapa 15 stiʼ agosto 2012, yaza 20 dede 29, Artículo 1.
