1, 2. Ora guiníʼ íquenu modo cayuni xquidxi Jiobá dxiiñaʼ, xi rucaani laanu gúninu.

 NABÉ ridxagayaanu ora guidúʼyanu né laanu nuunu ndaaniʼ xquidxi Jiobá, lugar ra nuu ca espíritu ni nuu guibáʼ ne ra nuunu. Lu ca visión ni zeeda lu capítulo 1 stiʼ Ezequiel ne capítulo 7 stiʼ Daniel, ridúʼyanu ximodo cayuni Jiobá dxiiñaʼ para gaca guiráʼ ni maʼ gudixhe ique guni. Jesús nga zaniruʼ ndaaniʼ xquidxi Jiobá ni nuu lu Guidxilayú. Laabe cayacanebe ca xpínnibe ni nuu ndaaniʼ ni gucaa íquecaʼ gucheechecaʼ diidxaʼ, cusiidibe laacaʼ de Dios ne caguube gana laacaʼ ne laaca cayacanebe para guidale ca binni ni runi adorar Jiobá. Guiráʼ ni maʼ bizéʼtenu riʼ, racanécani laanu guni crenu zudii xquidxi Jiobá laanu guiráʼ ni iquiiñenu (Mat. 24:45).

² Yanna, ñee zinanduʼ guiráʼ modo caguixhe xquidxi Jiobá gaca dxiiñaʼ la? Ñee jma riuulaʼdxuʼ gucheechuʼ diidxaʼ yanna la? o maʼ careeluʼ gana. Ora guiníʼ íqueluʼ cani gunabadiidxanu riʼ, zándaca gudiiluʼ cuenta maʼ cadxágaluʼ o maʼ huaxiéʼ rucaa íqueluʼ gúniluʼ ni na Dios cásica bíʼniluʼ dxiqué. Guiranu zanda guizaacanu zacá. Lu primé siglu que, guluu apóstol Pablu gana ca xpinni Cristu para chinándacaʼ ejemplu gudixhe Jesús. Xiñee yaʼ. Laabe bicaabe: «Ora guietenalaʼdxi tu modo udiʼdi be que la? qué zadxaga tu, ne qué zabí sa tu atrá» (Heb. 12:3). Lu tema ni gudídinu ca bidúʼyanu guiráʼ dxiiñaʼ ni cayuni xquidxi Jiobá yanna, ne cásica guluu ejemplu stiʼ Cristu gana ca xpinni ni bibani lu primé siglu, modo cayuni xquidxi Jiobá dxiiñaʼ laaca riguuni gana laanu para gúninu xhiiñaʼ Dios né stale gana ne cadi gusaana de guni huantarnu.

3. Xi caquiiñeʼ gúninu para cadi guidxáganu, ne xi zazíʼdinu lu tema riʼ.

³ Peru Pablu guníʼ nuu sti cosa ni zacané laanu para cadi guidxáganu: naquiiñeʼ gúninu biaʼ gándatiʼ pur «guni nu jneza» (Gál. 6:9). Nga runi, guiranu nga naquiiñeʼ gúninu dxiiñaʼ. Yanna guidúʼyanu gaayuʼ cosa ni zanda gacané laanu guzuhuaʼnu dxiichiʼ ne chuunu biaʼ zeʼ xquidxi Dios. Cani bizéʼtenu riʼ zacanécani laanu guidúʼyanu pa laanu nga caquiiñeʼ guyúbinu xcaadxi modo para gúninu jma lu xhiiñaʼ Dios o pa laaca caquiiñeʼ guni binnilídxinu zacá.

4. Xiñee zanda guininu nabé risaca ca guendaridagulisaa para guni adorarnu Dios modo riuulaʼdxiʼ.

⁴ Nabé risaca para ca xpinni Jiobá guidagulisaacaʼ. Nuu biaje raca invitar ca ángel ni nuu guibáʼ checaʼ nezalú Dios (1 Rey. 22:19; Job 1:6; 2:1; Dan. 7:10). Guidxi Israel ni guyuu dxiqué, bidagulisaacaʼ para gucaadiágacaʼ ne guiziidicaʼ de Dios (Deut. 31:10-12). Ca judíu ni bibani lu primé siglu nabé guyecaʼ ndaaniʼ ca sinagoga para gúʼndacaʼ Stiidxaʼ Dios (Luc. 4:16; Hech. 15:21). Ne dxi maʼ guyáʼ primé grupu de xpinni Cristu, laaca bihuinni pabiáʼ risaca guidagulisaacaʼ. Yanna laaca nabé risaca para laanu guidagulisaanu para guni adorarnu Jiobá. Laanu, cani dxandíʼ xpinni Cristu, ridagulisaanu «para ganaxhii nu jma, ne guni nu ni nachaʼhuiʼ». «Cada tobi [de laanu naquiiñeʼ] acané stobi para indisa ique, ne jma rusi yanna purti caduʼya nu ma zeda dxiña dxi» stiʼ Jiobá (Heb. 10:24, 25).

5. Ximodo zanda ugúʼsaanu gana laanu ora guidagulisaanu.

⁵ Ti modo jma galán ugúʼsaanu gana laanu nga guicábinu ra ridagulisaanu. Zanda gusihuínninu xi runi crenu ora guicábinu ti guendarinabadiidxaʼ, ora gusiénenu ximodo zanda gúninu ni na ti textu zeeda lu Biblia ne ora güinu ni bizaaca tuuxa xpinni Cristu ni gusihuinni ribeendú binni ni galán ora chinanda ca principiu zeeda lu Biblia (Sal. 22:22; 40:9). Neca maʼ napa stale iza de riuunu ca guendaridagulisaa stinu, ora runadiáganu xi guicabi tuuxa ni nahuiiniʼ o xi guicabi ti binni huaniisi nabé riguucani gana laanu.

6. Ximodo racané ca guendaridagulisaa ca laanu.

⁶ Xi xcaadxi razón napa Jiobá para guinabaʼ laanu cadi guiáʼdxanu ca guendaridagulisaa yaʼ. Rinábabe ni laanu, purtiʼ ora chuunu ca guendaridagulisaa ni raca guiráʼ semana ne ca guendaridagulisaa roʼ, racanécani laanu gácanu nadxibalú ora gucheechenu diidxaʼ ne gánnanu xi gúninu ora chuʼ tu gucaalú laanu ne ora qué riná binni gucaadiaga laanu neza ra rucheechenu diidxaʼ (Hech. 4:23, 31). Ne ora guiuundaʼ xiixa tema ni cusiene de Biblia racaneni iguidxi fe stinu (Hech. 15:32; Rom. 1:11, 12). Cásica ni rizíʼdinu lu ca guendaridagulisaa stinu ne ora ridxaaganu ca bíʼchinu ne ca bizáʼnanu racá, racanécani laanu para chuʼnu nayecheʼ ne gatadxí ladxidoʼno ora maʼ cadídinu lu guendanagana (Sal. 94:12, 13). Comité ni Ruuyaʼ xi Guizíʼdinu stiʼ Grupu ni Zaniruʼ nga riguixhe xi guiráʼ naquiiñeʼ guiziidiʼ xquidxi Jiobá lu guidubi Guidxilayú. ¡Nabé rudiʼnu xquíxepeʼ pur guiráʼ ni rizíʼdinu lu ca guendaridagulisaa ni raca guiráʼ semana lu ti iza!

7, 8. 1) Xi razón jma risaca nápanu para chuunu ca guendaridagulisaa stinu. 2) Ximodo racané ca guendaridagulisaa lii.

⁷ Dxandíʼ ribeendunu stale cosa galán ora ridagulisaanu, peru cadi pur nga si nga raca cani, sínuque nuu sti razón jma risaca: raca cani para guni adorarnu Jiobá. Biblia na: «Laguiuu, guni adorarnu ne guindeteʼ íquenu; guzuxíbinu xañee Jiobá, Dios ni bizáʼ laanu» (Salmo 95:6). ¡Ti ndaayaʼ naroʼbaʼ nga gusisácanu Dios stinu! (Col. 3:16.) Naquiiñeʼ gusisácanu laabe gatigá, ne rúninu ni ora riuunu ca guendaridagulisaa ne ora ricábinu lúcani (Apoc. 4:11). Nga runi, qué ridxagayaadinu guinabaʼ Jiobá laanu «cadi guni nu casi cani rusaana de [guidagulisaa]» (Heb. 10:25).

⁸ Ñee ridúʼyanu ca guendaridagulisaa stinu casi xiixa ni racané laanu guni huantarnu ti ganda cuézanu dede ora maʼ gunitilú Jiobá guidxilayú malu riʼ la? Pa zacá ni la? zadúʼyanu cani casi xiixa «ni dxandí risaca» ne zuyúbinu modo chuunu cani neca nabé nuu xhiiñanu (Filip. 1:10). Pa málasi ñeeda guizaaca xiixa nabé naxoo la? óraca si nga ñándaca qué nidagulisaanenu ca bíʼchinu ne ca bizáʼnanu para guni adorarnu Jiobá.

9. Xiñee zanda guininu nabé risaca gucheechenu diidxaʼ.

⁹ Ora rucheechenu diidxaʼ né guiráʼ stipa stinu,  racaneni laanu para chuunu biaʼ zeʼ xquidxi Jiobá. Jesús nga bizulú bisiidiʼ binni dxi guyuu lu Guidxilayú (Mat. 28:19, 20). Dede dxi que, dxiiñaʼ ni jma risaca runi ca binni ni nuu ndaaniʼ xquidxi Jiobá nga gucheechecaʼ stiidxaʼ Reinu ne gacanecaʼ binni gaca discípulo. Stale de cani rizaaca ca xpinni Cristu yanna riʼ, rusihuínnicani racané ca ángel stiʼ Dios laanu ne racanécabe laanu chindanu ra nuu ca binni ni «ma [nuu listu para] icaa enda nabani ni qué zaluxe» (Hech. 13:48; Apoc. 14:6, 7). Dxandíʼ nuu xquidxi Jiobá ndaaniʼ Guidxilayú ne cayacaneni para gaca dxiiñaʼ nabé risaca ni bizéʼtenu ca. Ñee laaca risaca para lii gucheecheluʼ diidxaʼ la?

10. 1) Bizeeteʼ ti ejemplu ni gusihuinni ximodo zanda gúninu ni na Jiobá né stale gana. 2) Ora rucheecheluʼ diidxaʼ né stale gana, ximodo huayacaneni lii para cadi guidxágaluʼ.

¹⁰ Ora rucheechenu diidxaʼ né stale gana racaneni laanu para gannaxhiinu guiráʼ ni maʼ bizíʼdinu lu Biblia. Guidúʼyanu xi guníʼ Mitchel, laa maʼ napa stale iza de naca binnigola ne precursor regular: «Nabé riuuladxeʼ güeniáʼ binni de stiidxaʼ Dios. Ora guiníʼ iqueʼ de xiixa tema nacubi zeeda lu revista Torre stiʼ ni Rapa o ¡Despertad!, nabé riuuladxeʼ ni rusiidicani, purtiʼ casi ñaca nucaadiagaʼ ti binni ni nuu xpiaaniʼ, ti binni ni riene ne nanna xii nga ni jma galán para naa. Riuuladxeʼ chiniáʼ cani ora chigucheecheʼ diidxaʼ para guuyaʼ pa ziuulaʼdxiʼ binni cani ne ruyubeʼ modo chuuláʼdxicabe gánnacabe xi rusiidiʼ cani. Ne racané dxiiñaʼ riʼ naa para guneʼ ca cosa ni jma risaca lu xquendanabaneʼ. Pa caquiiñeʼ guneʼ xiixa órapeʼ naguixheʼ gucheecheʼ diidxaʼ la? runeʼ stipa pur guneʼ ni ante o despué». Casi maʼ bidúʼyanu, pa qué gusaana de gúninu xhiiñaʼ Jiobá la? zacaneni laanu para cadi guchéʼnenu laabe lu ca últimu dxi riʼ (biindaʼ 1 Corintios 15:58).

11. Xiñee naquiiñeʼ guidúʼndanu ca libru ne ca revista ni ricaanu ne guníʼ íquenu lu ni cadúʼndanu.

¹¹ Para ganda guzuhuaʼnu dxiichiʼ la? rudii Jiobá laanu stale libru ne revista ni rusiidiʼ laanu de laa. Zándaca guiranu rietenaláʼdxinu huayuu biaje huaninu ca diidxaʼ riʼ despué de bidúʼndanu ti libru o ti revista: «¡Ndipeʼ nga ni caquiiñeʼ! ¡Casi ñaca Jiobá peʼ biʼniʼ mandar guicá tema riʼ para naa!». Ne zacá nga laani, purtiʼ riquiiñeʼ Jiobá ca libru ne ca revista ca para gusiidiʼ laanu ne gusiene laanu xi gúninu. Laabe maca guniʼbe: «Zudieeʼ lii guendariene, ne zusiideʼ lii saluʼ lu neza ni naquiiñeʼ cheluʼ» (Sal. 32:8). Ñee rúninu stipa pur guidúʼndanu guiráʼ ca libru ne revista ni ricaanu la? Ñee riníʼ íquenu lu ni ridúʼndanu la? Pa gúninu zacá, zanda guni huantarnu intiica guendanagana ne zúninu xhiiñaʼ Jiobá lu ca últimu dxi riʼ né stale gana. Biblia na: «Nayecheʼ nga riuu hombre ni qué huayuu dxi chinanda conseju stiʼ binni malu, ne qué ruzuhuaa lu neza stiʼ ca binni ruchee, ne qué ribí lu banguʼ stiʼ cani runi burla. Riuulaʼdxiʼ guʼndaʼ ley stiʼ Jiobá, ne dxi ne gueelaʼ ruundaʼ ni chaahuidugá» (Salmo 1:1, 2; Sal. 35:28 ne 119:97).

12. Xi zacané laanu gusisácanu guiráʼ libru ne revista ni rudii xquidxi Jiobá laanu.

¹² Laaca galán guiníʼ íquenu xi guiráʼ dxiiñaʼ nadipaʼ raca para guicaa ca xpinni Cristu guiráʼ ni caquiiñecaʼ ti ganda guiziidicaʼ de Dios. Para ganda gaca ti libru, ti revista o intiica si sti guiʼchiʼ ni raca imprimir ne cani riuu lu sitiu ni nápanu lu Internet la? Comité ni Ruuyaʼ xi Guicá lu ca Guiʼchiʼ Ricaanu stiʼ Grupu ni Zaniruʼ ruuyacabe guiuundaʼ chaahuiʼ de xiixa tema, ruuyacabe ximodo guicá ni jma jneza, gaca chaahuiʼ ni pa caquiiñeʼ, ruuyacabe xi foto o dibuju guiree lúcani ne guibiʼxhiʼ ni lu sti diidxaʼ. Ca yoo Betel ni runi imprimir ca guiʼchiʼ ca ruseendacaʼ ni ra nuu ca neza binni ridagulisaa ni nuu gaxha ne ni nuu zitu. Xi para raca dxiiñaʼ nadipaʼ riʼ yaʼ. Para gapa xquidxi Jiobá guiráʼ ni iquiiñeʼ para guiziidiʼ de laabe (Is. 65:13). Nga runi, galán guidúʼndanu guiráʼ guiʼchiʼ ni rudii xquidxi Jiobá laanu (Sal. 119:27).

13, 14. Tuu nga ca binni nuu guibáʼ ni zinanda modo naguixhe Jiobá gaca dxiiñaʼ, ne ximodo zanda chinándanu ejemplu stícabe.

¹³ Lu ti visión ni biʼyaʼ apóstol Juan bihuinni dxiʼbaʼ Jesús ti caballu quichiʼ ne zebe para gunduuxebe ca binni malu ni qué naʼ guni ni na Jiobá (Apoc. 19:11-15). Laaca biiyabe ca xpinni Cristu ni bibí pur espíritu santu, cani maʼ biasa de lade gueʼtuʼ, ne biiyabe ca ángel ni dxiʼbaʼ maniʼ ni nanda Jesús. Cadi dxandíʼ riguidxi fe stinu ora gánnanu nga la? (Apoc. 2:26, 27.) ¡Ejemplu stícabe rusiidini laanu naquiiñeʼ gacanenu ca binni ni zaniruʼ ndaaniʼ xquidxi Dios!

¹⁴ Zacaca nga cayacané ca binni ni chiguibani lu Guidxilayú riʼ gaca dxiiñaʼ ni cayuni ca xpinni Cristu ni bibí pur espíritu santu, cani nabániruʼ lu Guidxilayú riʼ ne caguíxhecaʼ ximodo gaca dxiiñaʼ ndaaniʼ xquidxi Jiobá. Biblia na: «Ndiʼ nga ni maʼ guníʼ Jiobá [Dios] stiʼ stálepeʼ binni nanda guiibaʼ: “Ca dxi que la? chii hombre de guiráʼ diidxaʼ stiʼ ca guidxi ca zagápicaʼ, ya, dxandipeʼ zagápicaʼ bizuudiʼ stiʼ ti hombre ni naca judíu, ne zaniʼcaʼ: «Dxandipeʼ zinedu laatu, purtiʼ huayunadiágadu nuuné Dios laatu»”» (Zacarías 8:23). Ximodo zanda gusihuinni cada tobi de laanu zinanda modo naguixhe Jiobá gaca dxiiñaʼ ndaaniʼ xquidxi yaʼ. Ti modo zanda gúninu ni nga guzúʼbanu stiidxaʼ cani zaniruʼ ndaaniʼ xquidxi Dios (Heb. 13:7, 17). Primeca ra naquiiñeʼ gúninu zacá nga lade ca binni ridagulisaa ra nuunu. Ora rininu de ca binnigola, ñee rucaʼnu xcaadxi guni respetar laacabe ne gusisaca dxiiñaʼ rúnicabe la? Ñee rusíʼdinu ca xiiñinu guni respetar ca xpinni Cristu ni ruzuubaʼ diidxaʼ riʼ ne gucaadiágacaʼ ca conseju ni rudiicabe la? Ñee ruzéʼtenu lu ca binnilídxinu ximodo zanda gudiʼnu bueltu para  gacanenu guireeche diidxaʼ lu guidubi Guidxilayú la? (Prov. 3:9; 1 Cor. 16:2; 2 Cor. 8:12.) Ñee risaca para laanu gacanenu ti guihuinni Yoo stiʼ Reinu galán la? Ora ruuyaʼ Jiobá runi respetarnu stobi ne rúninu dxiiñaʼ tobi si la? rudiibe espíritu santu stibe laanu. Ne racané espíritu riʼ laanu para cadi guidxáganu lu ca últimu dxi riʼ (Is. 40:29-31).

15. Xiñee naquiiñeʼ gúninu stipa para ganda gúninu ni jneza.

¹⁵ Para cadi guireʼnu gana ne para chuunu biaʼ zeʼ xquidxi Jiobá, naquiiñeʼ guibáninu modo riuuláʼdxibe (Efes. 5:10, 11). Peru raca nagana para laanu gúninu ni jneza, purtiʼ binni ruchee laanu, cucaalú Binidxabaʼ laanu ne nabézanu lade binni malu. Nuu de laatu, bíʼchidu ne bizáʼnadu, nánnadu cayúnitu stipa guiráʼ dxi para cadi guixéletu de Jiobá, nga runi guizáʼ nadxiibe laatu. ¡Cadi guiabayutu! Pa nabáninu modo riuulaʼdxiʼ Jiobá la? zadxélanu ximodo iquiiñenu xquendanabáninu, ziuʼnu nayecheʼ ne ziuulaʼdxiʼ Jiobá modo runi adorarnu laa (1 Cor. 9:24-27).

16, 17. 1) Xi naquiiñeʼ gúninu pa bíninu ti pecadu nabé naroʼbaʼ. 2) Xi rusiidiʼ ejemplu stiʼ Anne laanu.

¹⁶ Peru xi naquiiñeʼ guʼnuʼ pa gucheeluʼ ne nabé naroʼbaʼ pecadu biʼnuʼ yaʼ. Gunabaʼ gacanécabe lii nagueendaca. Pa gucaachiluʼ ni la? jmaruʼ si zacaxiroo ni. Guidúʼyanu xi guníʼ David dxi bicaachiʼ donda stiʼ: «Birá stipa stinneʼ dxi qué nibeeruaaʼ diidxaʼ, purtiʼ guidubi dxi maʼ cayuunaʼ» (Sal. 32:3). Pa gacaláʼdxinu gucáʼchinu ca pecadu stinu la? qué ziuʼnu nayecheʼ ne zándaca dede zaxélenu de Jiobá. Peru «zalaseláʼdxicabe» laanu pa cueeruaanu diidxaʼ (Prov. 28:13).

¹⁷ Guníʼ ique ni bizaaca ti dxaapahuiiniʼ láʼ Anne, a laa bizulú biʼniʼ cosa malu neca naca precursora regular ne pur ngue bichiiñaʼ xquendabiaaniʼ laa. Laabe guniʼbe: «Maʼ qué ñuaaʼ nayecheʼ ne nabé gucaʼ deprimir». Xi gucané laabe para bireebe de ndaaniʼ guiruyú ra biábabe que yaʼ. Lu tobi de ca guendaridagulisaa guyebe biuundaʼ Santiago 5:14, 15, raqué biénebe naquiiñeʼ chebe ra nuu ca binnigola ne guinábabe laacaʼ gacanecaʼ laabe. Laabe guniʼbe: «Zeeda gaca ca versículo riʼ casi ti medicina ni rudii Jiobá para gusianda laanu. Nagana para gueʼ binni ni, peru rusianda ni. Yenandaʼ conseju ni cá lu textu riʼ, ne bisiándani naa». Maʼ gudiʼdiʼ chupa chonna iza de ni guca Anne riʼ, peru yanna maʼ cayúnibe xhiiñaʼ Jiobá né stale gana sti biaje ne maʼ qué ruchiiñaʼ xquendabiaanibe laabe.

18. Xi naquiiñeʼ quixhe íquenu gúninu.

¹⁸ Cadi guiaandaʼ ndiʼ laanu: ti ndaayaʼ naroʼbaʼ nga nabáninu lu ca últimu dxi riʼ ne laaca ti ndaayaʼ nga chuʼnu ndaaniʼ xquidxi Jiobá. Naquiiñeʼ chúʼnenu binnilídxinu tobi si para cadi guiáʼdxanu ca guendaridagulisaa stinu, guyúbinu binni ni nayá ladxidóʼ ne guidúʼndanu ca libru ne revista ni rudii xquidxi Dios laanu. Laaca naquiiñeʼ gacanenu cani zaniruʼ ndaaniʼ xquidxi Dios ne guibáninu modo riuulaʼdxiʼ Jiobá. Pa gúninu cani bizéʼtenu riʼ la? ziuunu biaʼ zeʼ xquidxi Jiobá ne qué zadxáganu de gúninu ni jneza.