«¡QUÉ ziuu dxi guiaandaʼ ni laadu!», zacá guníʼ stale binni ni biʼyaʼ «Drama de la Creación». Bedandá drama riʼ biáʼsipeʼ tiempu caquiiñeʼ guʼyaʼ binni ni ne qué ñuu dxi ñaandaʼ ni laacabe. Ne biquiiñeʼ ni para gunibiáʼ stale binni Jiobá ante sananda Hitler ca xpinni Dios ni nabeza Europa. Peru xii nga «Drama de la Creación» yaʼ.

Guidúʼyanu xi guca lu iza 1914, dxi nuu ca oficina stiʼ xquidxi Jiobá ndaaniʼ guidxi Brooklyn (Nueva York). Iza que bíʼnicabe ti «Foto-Drama de la Creación». Zeeda gaca ni casi ti película ra ridiʼdiʼ caadxi diapositiva de color ne laaca nápani ridxi, rindaani xhono hora. Millón de binni biiyaʼ ni lu guidubi Guidxilayú. Laaca iza queca biree stobi de laani peru jma nachucu ni biree lá «Drama Eureka». Peru lu ca iza ni gudiʼdiʼ despué de 1920, ca película ne ca aparatu ni canazanécabe que maʼ cadi galán diʼ cani. Peru nuuruʼ stale binni ni racalaʼdxiʼ guʼyaʼ «Foto-Drama» que. Sicaríʼ gunabadiidxaʼ stale binni de Ludwigsburg, ti guidxi stiʼ Alemania: «Padxí gutiidicabe “Foto-Drama” que sti biaje pue». Raqué bidiʼdu cuenta caquiiñeʼ gúnidu xiixa.

Para ganda gudiicabe ni caquiiñeʼ ca binni que, biseendaʼ Betel ni nuu Magdeburgo, Alemania, caadxi binni para siʼ rollo de foto ra nuu ti empresa ni rutiidiʼ noticia guidxi París ne laaca guzíʼ ca binni que diapositiva ra nuu sti empresa ni nuu guidxi Leipzing ne Dresde. Lu cani guzíʼcabe riʼ guluucabe caadxi de ca diapositiva ni maca nápacabe stiʼ «Foto-Drama» ni zándaruʼ iquiiñeʼ.

Tiempu que guyuu ti xpinni Cristu ni láʼ Erich Frost, laa nabé nanna guxhidxi saa, ne laa nga gudixhe chaahuiʼ saa ni rixidxi ora maʼ cadiʼdiʼ ca película ne ca diapositiva que. «Foto-Drama» cubi ni guca riʼ biree lani «Drama de la Creación» purtiʼ gucuaacabe caadxi diidxaʼ ni zeeda lu libru La Creación para bíʼnicabe ni.

Laaca rindaa drama cubi riʼ xhono hora cásica primé que, ne rutiidicabe ni ti ndaa ga chupa chonna gueelaʼ. Lu drama que ridiʼdiʼ stale cosa sicarú ni guca cada dxi biquiiñeʼ Dios para bizáʼ guiráʼ ni nuu, laaca rusiéneni historia stiʼ Biblia ne xi riníʼ binni de Biblia ne rusihuínnini ximodo maʼ gudxite ca religión ni qué rusiidiʼ ni dxandíʼ binni. Biiyaʼ binni ni ndaaniʼ guidxi Alemania, Austria, Luxemburgo ne Suiza, ne xcaadxi lugar ra riníʼcabe alemán.

Guidúʼyanu xi guníʼ Erich Frost: «Ante gutíʼdidu drama que, rabeʼ ca binni runeniáʼ dxiiñaʼ —cani ruxhidxi lu orquesta que— chuudu ra zuba ca binni que para gusaananedu laacaʼ ca libru ne  ca folletu sicarú stidu ora guiluxe cada ndaa stiʼ drama que. Cumu riuudu cada fila ra zubaʼ binni la? jma stale libru ne folletu rusaanadu que ora chuudu de yoo pur yoo». Johannes Rauthe nga ti xpinni Cristu ni gudixhe ximodo tiidiʼ drama que ndaaniʼ guidxi Polonia ne guidxi ni runibiáʼcabe yanna casi República Checa. Laabe guniʼbe nabé bidii stale de ca binni ni yeguuya drama que dirección sticaʼ para chigánnacabe laacaʼ sti biaje. Zaqué bidxélacabe jma binni ni zanda chigánnacabe.

Lu ca iza ni gudiʼdiʼ despué de 1930, nabé bidxá binni cada lugar chitiidiʼ «Drama de la Creación», ne guiráʼ binni riníʼ de ca testigu stiʼ Jiobá. Para lu iza 1933, maʼ biaʼ ti millón binni maʼ gunda biiyaʼ drama que ca lugar ra gudixhe Betel ni nuu Alemania tiidiʼ ni. Guidúʼyanu xi cusiene ti gunaa láʼ Käthe Krauss: «Para ganda gúʼyadu drama que gaayuʼ gubidxa la? rizadu 10 kilómetru para chuudu ra chitiidiʼ ni ne biáʼqueca rizadu para guibiguétadu. Ridídidu guiʼxhiʼ, riguíbadu dani ne ridídidu ndaaniʼ caadxi valle». Sti gunaa ni láʼ Else Billharz guníʼ: «“Drama de la Creación” que nga gucané naa para gannaxhieeʼ ni rusiidiʼ Biblia».

Alfred Almendinger guníʼ xi biʼniʼ jñaa biiyaʼ si drama que: «Nabé cayéchebe dede guziʼbe ti Biblia ne biyúbibe diidxaʼ purgatorio» lu ni, cumu qué nidxélabe diidxaʼ que la? bisaanabe yuʼduʼ stibe ne guyuunísabe. Erich Frost guníʼ nabé «stale binni gunna xi rusiidiʼ Biblia purtiʼ biiyacaʼ “Drama de la Creación”» (3 Juan 1-3).

Peru ca dxipeʼ jma cadale binni ni cayuuyaʼ drama que, dxi queca ziyuni ganar ca nazi stale guidxi nuu Europa. Ra bizulú iza 1933, bicueezacabe dxiiñaʼ cayuni ca Testigu de Alemania. Dede iza que hasta dxi biluxe guiropa guendaridinde ni guca guidubi Guidxilayú lu iza 1945, nabé naná modo guzanándacabe ca Testigu ni nuu Europa. Biseguyoocabe Erich Frost xhono iza, peru bilabe ne despué bíʼnibe dxiiñaʼ Betel ni guyuu Wiesbaden, Alemania. Qué nusiaandacabe «Drama de la Creación» que purtiʼ bedandá ni órapeʼ jma caquiiñeʼ ni. Dxandipeʼ bidiini stipa guiráʼ ca xpinni Cristu que para gúcacaʼ nadxibalú, purtiʼ lu guiropa guendaridinde que bihuinni pa dxandíʼ naguidxi fe ni nápacabe. (Cani naguu chaahuiʼ xquidxi Dios ni nuu Alemania.)