Rietenalaʼdxuʼ la?

Ñee maʼ biindaluʼ ca últimu tema ni bedané revista Torre stiʼ ni rapa la? Yanna biiyaʼ pa zanda guicábiluʼ ca guendarinabadiidxaʼ riʼ:

Ñee guicha ique Sansón nga bidii stipa laa la?

Sansón gupa stale stipa peru cadi pur guicha ique, sínuque purtiʼ guyuu gaxha de Jiobá casi ti nazareu. Peru bixélebe de Dios ora bigá Dalila guicha íquebe (15/4, yaza 9).

Gunáʼ nga chonna cosa ni zanda gacané laanu para chuʼ ladxidoʼno nazaaca.

1) Ni ridoʼno. Cásica naquiiñeʼ guidoʼno guendaró ni zacané laanu para chuʼnu nazaaca, zacaca naquiiñeʼ guizíʼdinu de Dios. 2) Ejerciciu. Ti xpinni Cristu naquiiñeʼ cuee tiempu para chigucheeche diidxaʼ, purtiʼ zacaneni laa chuʼ galán nezalú Dios. 3) Ca binni ridxaaganu. Pa guidxaaganu ca xpinni Cristu ni runi adorar Jiobá de guidubi ladxidóʼ la? zanda gacaneni laanu para cadi chúʼpenu xizaa (15/4, yaza 16).

Padxí gudxi Dios Noé guni ti arca.

Biblia na maʼ huaniisi ca xiiñiʼ Noé ne maʼ bichaganacaʼ ora gudxi Dios laabe gucuibe ti arca. Sicaríʼ gudxi Jiobá laabe: «Ne cayuneniáʼ lii ti pactu, ne napa xidé chuʼluʼ ndaaniʼ arca ca, lii ne ca xiiñiluʼ ne xheelaluʼ ne xheelaʼ ca xiiñiluʼ» (Gén. 6:9-18). Ngue runi, zándaca cayaadxaʼ biaʼ cuarenta o cincuenta si iza ante guiaba Nisaguié naroʼbaʼ que ora gudxi Dios Noé guni ti arca (15/4, yaza 23).

Xiñee qué richaganáʼ caadxi xpinni Cristu.

Stale binni ridxiña dxi guiníʼ ique guichaganáʼ, peru nuu caadxi xpinni Jiobá riaanacaʼ sin guichaganacaʼ, purtiʼ qué ganda guidxélacaʼ ti binni ni riuuláʼdxicaʼ ne ni riuulaʼdxiʼ Dios guichaganacaʼ. Xcaadxi na zanda guiaana sin guichaganáʼ, zacá randa rúnicaʼ jma lu xhiiñaʼ Jiobá purtiʼ qué gápacaʼ ca dxiiñaʼ ni napa cani maʼ bichaganáʼ (15/5, yaza 7).

Xiñee cadi jneza guiníʼ tuuxa ni cudii ti libana ra guti ti binni cayaca ni na Salmo 116:15 luguiáʼ gueʼtuʼ ca.

Textu ca na sicaríʼ: «Nabé risaca para Jiobá guendaguti stiʼ cani qué rusaana laa». Textu riʼ cusiene qué zudii Jiobá lugar gati guiráʼ ca xpinni ni qué rusaana laa tobi si tiru, purtiʼ para laa nabé risaca xquendanabánicaʼ. Qué zudiibe lugar gunduuxecabe guiráʼ xixé ca xpínnibe ni qué rucheené laabe (15/5, yaza 22).

Tuu nga guca ca colportor.

Gudiʼdiʼ si iza 1931, bizulú biquiiñecabe diidxaʼ «colportor» para guiníʼcabe de ca binni ni guca precursor (15/5, yaza 31).

Tuu nga «guiráʼ reinu» ruzeeteʼ Daniel 2:44.

Laani nga ca reinu, o ca gobiernu ni zeeda lu estatua naroʼbaʼ ni bisiene Daniel (15/6, yaza 17).

Padxí beeda gaca potencia mundial angloamericana ra bizaa gadxe guidxi ni jma nadipaʼ ruzeeteʼ Biblia.

Dxi guca Gran Bretaña ne Estados Unidos tobi si lu primé guendaridinde ni guca lu Guidxilayú para gúnicaʼ ti dxiiñaʼ nabé risaca (15/6, yaza 19).

Xi guiráʼ zazaaca ante gueeda Armagedón.

Ca xaíque guidxi roʼ zaniʼcaʼ: «Gasti chi gaca, nuu dxí guidxi» (1 Tes. 5:3). Zucaalú gobiernu ca religión ni cadi dxandíʼ (Apoc. 17:15-18). Ziuu tu zucaalú ca xpinni Jiobá. Gaca si nga maʼ zanitilú guiráʼ cosa malu (1/7, yaza 9).

Tu guiráʼ riníʼ diidxaʼ náhuatl, ne xi cayaca pur laacabe.

Laani nga diidxaʼ guníʼ ca azteca bibani dxiqué, ne riníʼ ti millón arondaʼ binni diidxaʼ riʼ guidubi Méjicu. Ca Testigu rusiidicaʼ binni de Dios lu diidxaʼ náhuatl ne rúnicaʼ stale guiʼchiʼ lu diidxaʼ ca (1/7, yaza 13 ne 14).